Batumelebi | “შენ გეუბნები, ქურდები ვართ” – ლავასოღლის ფარული ჩანაწერები სასამართლოში “შენ გეუბნები, ქურდები ვართ” – ლავასოღლის ფარული ჩანაწერები სასამართლოში – Batumelebi
RU | GE  

“შენ გეუბნები, ქურდები ვართ” – ლავასოღლის ფარული ჩანაწერები სასამართლოში

“შენ გეუბნები, ქურდები ვართ, ძმა…” “ლავასოღლი ვარ, ჩამოეთრიე აქ, ამოგთხრი მიწიდან”, – ეს ფრაზები მინდია ლავასოღლის ერთ-ერთ ფარულ ჩანაწერში ისმის. “ქურდული სამყაროს წევრობის საქმეზე” მოსამართლე ლევან გელოვანმა აუდიოჩანაწერებს დღეს, 5 ნოემბერს, მოუსმინა.

დღეს სასამართლომ ბრალდებულების: მინდია ლავასოღლის, ივანე გიგიაძის, შოთა კეკელიძის და ზაალ ახვლედიანის ჩანაწერები მოისმინა. პროცესს სამი მათგანი ესწრებოდა, თუმცა მოსმენის პროცესში ივანე გიგიაძემ და ზაალ ახვლედიანმა სხდომათა დარბაზი დატოვეს.

რაც შეეხება მინდია ლავასოღლს, იგი ტრაპიზონში 25 ოქტომბერს დააკავეს. ამ დრომდე ლავასოღლი საქართველოში ექსტრადირებული არ არის.

ქურდული სამყაროს წევრობისა და ქუჩურ გარჩევებში მონაწილეობის ბრალდებით სამართალდამცველებმა 10 პირი 17 ივლისს ბათუმში დააკავეს. საქმის მასალების მიხედვით, ბრალდებულები ემუქრებოდნენ დაზარალებულებს, სცემდნენ და დიდი ოდენობით თანხას სძალავდნენ ქურდული „ობშიაკის“ შესავსებად. საქმის მასალებში არის კიდევ ერთი საინტერესო დეტალიც – კანონიერ ქურდობაში ბრალდებულები „დაზარალებულებს  ემუქრებოდნენ სახელის გამტეხი ცნობების გავრცელებით“.

პროკურატურის თქმით, ბრალდებულები ბათუმში, გონიოსა და ახალშენში იბარებდნენ დაზარალებულებს და აიძულებდნენ ქურდული „ობშიაკისთვის“ თანხის შეწირვას.

სატელეფონო საუბრების ჩანაწერები პროკურატურამ სასამართლოს შესაბამისი ნებართვის საფუძველზე მოიპოვა. ფარული სატელეფონო ჩანაწერების გარდა, საქმეშია ასევე ლავასოღლის მიერ თურქეთიდან ბადრი ქობულაძის მიმართ გამოგზავნილი აუდიოფაილიც. ბადრი ქობულაძეც ამავე საქმეზე ბრალდებულია და ჩანაწერები მის ტელეფონში გამოძიებამ ქობულაძის დაკავებამდე, სპეციალური კომპიუტერული პროგრამის გამოყენებით შეძლო.

ათობით ჩანაწერში ბრალდებულები სხვადასხვა ფორმით ახსენებენ “ქურდობას”. ზოგიერთ ჩანაწერში საუბარია გავლენების გადანაწილებაზე და იმაზე, თუ ვის უფრო დიდი ავტორიტეტი აქვს.

“ამ ჩანაწერებით არ დგინდება არაფერი კონკრეტული, რომ ბრალდებული ვინმეს სთხოვს ფულს და ასე შემდეგ… ცალკეული ფრაზები ისმის, მაგრამ დანაშაული არ მტკიცდება. ჩანაწერებიდან რთულია გაარკვიო, რეალურად რაზეა საუბარი,” – გვითხრა შესვენების დროს ადვოკატმა მზია დიასამიძემ.

აუდიოჩანაწერების მოსმენა სასამართლოში დღის 3 საათზე დაიწყო და ამ დრომდე გრძელდება.

ნეტგაზეთის მასალების სხვა გამოცემებში გადაბეჭდვის წესი
ავტორი