მერია ბათუმის უბნებში სერვისცენტრების მშენებლობას იწყებს.
როგორც „ბათუმელებს“ მერიაში უთხრეს, სერვისცენტრებში მოქალაქეები სხვადასხვა ტიპის მომსახურებას მიიღებენ და მშენებლობის მიზანი ბიუროკრატიული ბარიერების შემცირებაა.
მაგალითად, მოქალაქეს შეეძლება მერიაში გამოსაგზავნი წერილი ამ სერვისცენტრში ჩააბაროს ან მიმართოს ცენტრს სხვადასხვა საკითხთან დაკავშირებით. ცენტრი „ერთი ფანჯრის“ პრინციპით უმუშავებს.
მშენებლობას მერიის კეთილმოწყობის სამსახური ახორციელებს.
ბათუმის მერიის ინფორმაციით, თითო ცენტრის მშენებლობაზე დაახლოებით ასი ათასი ლარი დაიხარჯება. ამჟამად სერვისცენტრის მშენებლობა ვაჟა-ფშაველასა და ბესიკის ქუჩების კვეთაში მიმდინარეობს.
როგორც მერიაში გვითხრეს, ცენტრში ის ადამიანები იქნებიან დასაქმებული, რომლებიც ამჟამად მერიის ადმინისტრაციულ ერთეულებში მუშაობენ.
მერიის ინფორმაციით, სულ 14 სერვისცენტრის აშენება იგეგმება.
