Batumelebi | წყალდიდობები, ხანძრები და სიღარიბე – რა მოხდება თუ მსოფლიოში 1.5C-ით დათბება წყალდიდობები, ხანძრები და სიღარიბე – რა მოხდება თუ მსოფლიოში 1.5C-ით დათბება – Batumelebi

წყალდიდობები, ხანძრები და სიღარიბე – რა მოხდება თუ მსოფლიოში 1.5C-ით დათბება

IPCC კლიმატის ცვლილების სამთავრობათშორისო ექსპერტთა ჯგუფის ბოლო ანგარიშში 2040 წლისთვის კრიზისის რისკების განხილვისას აღნიშნულია, რომ ექსტრემალური დათბობის, წყალდიდობებისა და სიღარიბის რისკების შესამცირებლად სწრაფი ცვლილებებია საჭირო.

„მსოფლიოს წამყვანი მეცნიერ-კლიმატოლოგები იუწყებიან, რომ დარჩენილია მხოლოდ ათეული წელი იმისთვის, რომ (გლობალური) დათბობის მაჩვენებელი შენარჩუნებული იყოს 1.5 C-ზე, რადგან ნახევარი გრადუსით მეტი მატებაც კი მნიშვნელოვნად ზრდის ათასობით ადამიანისთვის გვალვების, წყალდიდობების, ექსტრემალური სიცხისა და სიღარიბის რისკებს” – წერს theguardian-ი.

ანგარიშში, რომელიც ახლახან გამოქვეყნდა IPCC-ს მიერ, მეცნიერთა ჯგუფი აღწერს სამყაროს, რომელშიც უკვე 2040 წლისთვის შემცირებულია საკვების მარაგები, გახშირებულია ტყის ხანძრები და ხდება მარჯნების მასიური განადგურება –  წერს The new york times-ი.

ანგარიშში ერთ-ერთი უმთავრესი მესიჯია, რომ ჩვენ უკვე ვხედავთ 1°C-ით დათბობის შედეგებს უფრო ექსტრემალური ამინდის, ზღვის დონეების მატების და არქტიკური ყინულის შემცირების სახით.

კვლევის ავტორებმა დაადგინეს, რომ თუ სათბურის გაზების გაფრქვევა გაგრძელდება მიმდინარე ტემპით, 2040 წლისთვის დათბება 1.5 გრადუსი ცელსიუსით, რაც გამოიწვევს უფრო მეტ წყალდიდობას, გვალვასა და სიღარიბეს.

ანგარიშზე მუშაობდა 91 მეცნიერი 40 ქვეყნიდან, რომლებმაც გაანალიზეს 6000-ზე მეტი სამეცნიერო ნაშრომი. პარიზის შეთანხმება კლიმატის ცვლილების შესახებ ითვალისწინებდა, რომ დათბობის მაჩვენებელი არ გაზრდილიყო 2 გრადუსზე მეტად. დიდი ხნის განმავლობაში მიიჩნეოდა, რომ  ეს იყო კლიმატის ცვლილების მაქსიმალური ზღვარი, რაც გამოიწვევდა ძალიან დიდ სოციალურ და ეკონომიკურ ზარალს, თუმცა ზღვის დონის მატებით შეწუხებულმა მეცნიერებმ გადაწყვიტეს გამოეკვლით კლიმატის 1.5 გრადუსით დათბობის შედეგებიც.

ანგარიშში წერია, რომ აგრესიული ქმედებების გარეშე, ბევრი საგანგაშო შედეგი, რაც მხოლოდ რამდენიმე ათწლეულში იყო მოსალოდნელი, 2040 წლისთვის დადგება. იმისათვის, რომ თავიდან ავიცილოთ 1.5 გრადუსით დათბობა, 2030 წლისთვის სათბურების გაზებით გამოწვეული დაბინძურება 2010 წელთან შედარებით უნდა შემცირდეს 45%-ით, 2050 წლისთვის კი 100%ით. ასევე დაადგინეს, რომ 2050 წლისთვის ქვანახშირის გამოყენება ელექტროენერგიის წყაროსთვის უნდა შემცირდეს 40%-ით. ხოლო განახლებადი ენერგია, როგორიცაა ქარი და მზის ენერგია, რაც დღეისთვის ელექტროენერგიის წყაროს 20%-ს შეადგენს, უნდა გაიზარდოს 67%-მდე.

თუ გაინტერესებთ რამდენად დათბა თქვენს მშობლიურ ქალაქში თქვენი დაბადებიდან დღემდე, გადადით ბმულზე და დაიანგარიშეთ.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან