Batumelebi

შემოსავლების სამსახური საბაჟო გამშვები პუნქტი „სარფის“ შენობის ფასადის ღებვის სამუშაოებს ელექტრონული ტენდერით შეისყიდის. შესყიდვის სავარაუდო ღირებულება 230 ათას 310 ლარია. შენობის ფასადი კვლავ თეთრად შეიღებება.

გამშვები პუნქტის შენობა მიეკუთვნება კოროზიული ზემოქმედების მეექვსე – ძალიან მაღალ (ზღვის) კატეგორიას, ასევე, გამოირჩევა მაღალტენიანობით და ულტრაიისფერი გამოსხივების მაღალი დონით, რისთვისაც, როგორც ტენდერის განაცხადშია აღნიშნული, ფასადის სამღებრო სამუშაოებისთვის შერჩეული იქნა „აკრილის ბაზაზე დამზადებული საღებავი, რომელსაც პოლიმერული თვისებებიდან გამომდინარე გააჩნია ელასტიურობა [მაღლივი კოშკის დინამიური დატვირთვების გათვალისწინებით საჭიროა საღებავი, რომელიც ამ პირობებში არ გაიჩენს ბზარებს] და არის მოცემულ კლიმატურ პირობებთან შესაბამისი“.

ბოლო, დამცავი ფენა [ზედაპირი] უნდა შეესაბამებოდეს შენობის ფასადის არსებულ ფერს, ანუ უნდა იყოს თეთრი ფერის; სამღებრო სამუშაოები ტენდერში გამარჯვებულთან ხელშეკრულების გაფორმებიდან 90 კალენდარულ დღეში უნდა დასრულდეს. ტენდერში წინადადებების მიღება კი 2019 წლის 20 თებერვალს დაიწყება და 25 თებერვალს შეწყდება.

შენობა 2011 წელსაა აგებული და რთული კონფიგურაციისაა. სადამკვირვებლო კოშკი თერთმეტსართულიანია, დაახლოებით 40 მეტრი სიმაღლის. შენობის ზედაპირი, შემოსავლების სამსახურის ინფორმაციით, დალაქავებული და დაზიანებულია გარემო პირობების ზემოქმედების შედეგად – საღებავი ზოგან მოცილებულია, შეიმჩნევა გამოტუტვა და ჟანგის ზედაპირზე გამოსვლა.

ტენდერის პირობით, შესრულებული სამუშაოს საგარანტიო ვადა ბოლოო მიღება-ჩაბარების აქტის გაფორმებიდან არანაკლებ 5 წელი უნდა იყოს.

ფინეთის დედაქალაქი, ჰელსინკი ის იშვიათი ქალაქია, სადაც ვერ შეხვდებით მოწყალების მთხოვნელებსა და უსახლკაროებს. თუ, მაგალითად, ბრიტანეთში 2010 წლის შემდეგ იმატა უსახლკაროთა რიცხვმა, ჰელსინკში 2007 წლის შემდეგ უსახლკაროთა რაოდენობა მინიმუმამდე შემცირდა.

ბოლო 30 წლის განმავლობაში ფინეთში არაერთხელ შეიცვალა მთავრობა, თუმცა უცვლელი დარჩა ერთ-ერთ მთავარი გამოწვევა – უსახლკარობის დაძლევა, რაც სოციალური პროგრამის საშუალებით – „ყველაზე მთავარი სახლია“, შესაძლებელი გახდა.

1987 წელს ფინეთში 18 000-ზე მეტი უსახლკარო იყო, ეს რიცხვი 2017 წელს 6 600-მდე შემცირდა და მათგან ძალიან მცირეა რაოდენობა, ვისაც გასათევი არსად აქვს.

უსახლკაროთა უმრავლესობა მეგობრებთან, ნათესავებთან ან დროებით საცხოვრებელში ათევს. ღამით ქუჩაში ერთეულები რჩებიან.

ფინეთის ხელისუფლება ცდილობს უსახლკაროებს უმოკლეს ვადაში გადასცეს საცხოვრებელი პირად საკუთრებაში, რის სანაცვლოდაც სახელმწიფო სარგებელს არ იღებს და უსახლკაროებს საცხოვრებლის გადაცემის შემდეგაც არანაირ პირობებს არ უწესებს. მათ ამ სახლებში ცხოვრების ბოლომდე შეუძლიათ დარჩენა.

„არ უნდა არსებობდნენ უსახლკაროები, რომლებიც იძულებით ათევენ ქუჩაში ღამეს, არავინ უნდა კვდებოდეს ქუჩაში. ეს არ იქნებოდა საზოგადოება და ქალაქი, სადაც ვისურვებდით ცხოვრებას“, – აცხადებს BBC-სთან ჰელსინკის ვიცე-მერი, სანა ვესიკანსა.

საცხოვრებლით უზრუნველყოფის შემდეგ ბენეფიციართა განათლებასა და დასაქმებაზე ზრუნავენ ინდივიდუალური უნარების გათვალისწინებით. ეს დიდი მხარდაჭერაა მათთვის, ვინც ცდილობს დაძლიოს ძლიერი დამოკიდებულება ალკოჰოლსა და ნარკოტიკზე.

უსახლკაროთა საცხოვრებლებს საერთო სამზარეულო და ჰოლი აქვს, სადაც მათ ერთად შეკრება და სოციალურ აგენტებთან საუბარი შეუძლიათ.

BBC- ს ინფორმაციით, ფინეთმა დაახლოებით 300 მილიონი ევრო დახარჯა ბოლო ათი წლის განმავლობაში, რომ 3 500 ადამიანი უზრუნველეყო საცხოვრებლით და ხელფასი გადაეხადა 300 სოციალური მუშაკისთვის.

დიდი  ბრიტანეთის ხელისუფლება 32 მილიონ ევროს ხარჯავს საპილოტე პროგრამისთვის, რომლის საშუალებითაც უსახლკაროთათვის 1000 ბინა უნდა შეიძინონ.

მსოფლიოს სხვადასხვა ქალაქში უსახლკაროთა პრობლემის გადაჭრის გზებს ეძებენ.

ჩეხეთში 5 წელია მოქმედებს სოციალური პროექტი „Pragulic“-ი, რომელსაც ალტრუისტული მიზანი აქვს და სამყაროს უკეთესობისკენ შეცვლას ცდილობს. პროექტის იდეის ავტორები თავდაპირველად ჩეხი სტუდენტები იყვნენ და მათ სურდათ უსახლკაროთათვის მოქმედების არეალი, საარსებო სახსრების გამომუშავების საშუალება მიეცათ.

მაგალითად, თუ პრაღაში მოგზაურობას გადაწყვეტთ, შეგიძლიათ ქალაქის გაცნობის ალტერნატიულ ფორმას მიმართოთ და დაიხმაროთ არა ჩვეულებრივი გიდი ჩვეულებრივი ტურისტული სააგენტოდან, არამედ პრაღელი უასხლკაროები. ქალაქის ღირსშესანიშნაობებისა და ისტორიის შესახებ მათგან ვერაფერს მოისმენთ, მაგრამ ნახავთ, სად ათევენ უსახლკაროები, რა ადგილები არსებობს ქალაქში მიუსაფართათვის ზამთრის გადასატანად, ქალაქის რომელი შადრევნების საშუალებით იცავენ პირად ჰიგიენას და  როგორ ცხოვრობენ უჩინარი ადამიანები.

პროექტ Pragulic-ში ჩართულ გიდებს, გარდა იმისა, რომ უხდიან ხელფასს, ფინანსურ დახმარებასაც უწევენ საცხოვრებლის, სამოსის, ტრანსპორტისა და წამლების ხარჯის დასაფარად.

უსახლკაროთა აღრიცხვა და მონაცემთა ბაზის შექმნა საქართველოში 2014-2020 წლების ადამიანის უფლებათა დაცვის ეროვნულ სტრატეგიის მთავარ ამოცანადაა მიჩნეული. თუმცა დღემდე არ არსებობს უსახლკაროთა სტატისტიკა და, შესაბამისად, არც სისტემური პოლიტიკა რეალობის შესაცვლელად. კანონმდებლობის მიხედვით, უსახლკარობის დაძლევად საქართველოს სახელმწიფო საცხოვრებლის გადაცემას მიიჩნევს, ეს მიდგომა კი ხარვეზებითა და არაეფექტურობით გამოირჩევა.

2015-2017 წლებში, მაგალითად, EMC-ს მონაცემებით, უსახლკაროდ დარეგისტრირებისა და თავშესაფრის მთხოვნელი 7000 ადამიანი იყო. 15 თვის განმავლობაში კომისიამ მხოლოდ 732 განაცხადი განიხილა, უსახლკაროს სტატუსი მიანიჭა მხოლოდ 335 პირს და თავშესაფრით მხოლოდ 47 განაცხადი დააკმაყოფილა.

______________

მთავარ ფოტოზე: ყოფილ უსახლკაროთა საცხოვრებელი სახლები ჰელსინკში. ფოტო: BBC

კურორტ გოდერძიზე ხელოვნური ტბა უნდა მოეწყოს. ტბის ფართობი დაახლოებით 3 ათასი კვ/მ იქნება, რომელიც ზამთარში შესაძლოა გაიყინოს და მასზე ციგურებით ისრიალონ, ხოლო ზაფხულში – წყლის ველოსიპედით ისეირნონ. ტბის ირგვლივ 13 კოტეჯი აშენდება. ეს იმ კომპანიის ვალდებულებაა, რომელსაც კურორტზე 5000 კვ/მ-ზე მეტი მიწის ნაკვეთი აჭარის მთავრობამ 85 250 ლარად აუქციონის გარეშე მიჰყიდა.

„ზუსტად რამდენ კვადრატულ მეტრს შევარჩევთ ხელოვნური ტბისთვის, ჯერ მონახაზი არ გვაქვს გაკეთებული. ამ საკითხებზე მუშაობას დავიწყებთ, როცა თოვლი გადნება. 3-4 წელი დრო კიდევ გვაქვს და არ ვჩქარობთ. გრძელვადიანი პროექტები გვაქვს აქ. თუმცა, 5000 კვ/მ-ია კოტეჯების მოშენების და 3500-მდე  ტბისთვის იქნება. სპეციალისტები გადაწყვეტენ, რამდენი იქნება ხელოვნური ტბის სიღრმე – 2, შეიძლება 2,5 მეტრი იყოს. ვიზუალის დანიშნულება ექნება, სილამაზისთვის კეთდება. ზამთრის ყინვის დროს შეიძლება გაიყინოს და სასრიალო გავაკეთოთ ზედ, შეიძლება თევზიც ჩავყაროთ და ვინმემ ითევზაოს, ანუ ნაწილი ჩაიგუბოს და ა.შ. ჩანაფიქრი დიდი გვაქვს, თუმცა, დეტალებში ჯერ ვერ შევალთ. ზაფხულში, ტბასთან და ვილებთან მოეწყობა ინფრასტრუქტურა. იქნება დასაჯდომები, შესაძლებელია პატარა ზღვის ველოსიპედებით გასეირნებაც დაგეგმო, ახლა იმ მოცულობის არ იქნება, რომ ვთქვათ, ბევრი ისეირნო,“ – გვითხრეს კომპანია „გთემ გროუპში“.

კომპანიაში აცხადებენ, რომ ტერიტორია, სადაც ხელოვნური ტბა უნდა გაკეთდეს, ძირითადად ჭაობიანი ადგილია, გამდინარე წყლები გამოდის და წყლის დაგროვება ადვილადაა შესაძლებელი. ტექნოლოგიურად ტბის მოწყობას ამარტივებს ის, რომ პატარა არხიც ჩამოდის იქვე და იქედან შეიძლება წყლის აღება.

როგორ აისახება გარემოზე ხელოვნური ტბა და ხომ არ იქნება საჭირო გარემოზე ზემოქმედების შეფასების [გზშ] ანგარიშის მომზადება? – ამ კითხვაზე პასუხად კომპანიაში გვითხრეს, რომ იქ ისეთს არაფერს ეხებიან, რომ გზშ დასჭირდეს.

აჭარის ფინანსთა და ეკონომიკის სამინისტროს მიერ მოწოდებული ინფორმაციით, ხელოვნური ტბა კურორტ გოდერძიზე არსებული განაშენიანების რეგულირების გეგმით განსაზღვრული პარამეტრების შესაბამისად, 2021 წლის 14 ოქტომბრამდე უნდა მოეწყოს. ამასთან „გთემ გროუპი“ ვალდებული იყო, 2018 წლის პირველ ნოემბრამდე დაესრულებინა ხელოვნური ტბის მოწყობის მიზნით საპროექტო/სამშენებლო დოკუმენტაციის მომზადება და შესათანხმებლად წარედგინა სამინისტროში.

სამინისტროში გვითხრეს, რომ კომპანიას ტბის მოსაწყობად საპროექტო/სამშენებლო დოკუმენტაცია ჯერ არ წარუდგენია და ის ვადების შეცვლას ითხოვს.

„კომპანიას წარმოდგენილი აქვს საბანკო გარანტიაც და მასთან დადებულ ხელშეკრულებაში ვადების შეცვლის საკითხზე აჭარის ეკონომიკური საბჭო უახლოეს სხდომაზე იმსჯელებს,“ – გვითხრეს სამინისტროში.

სამინისტროდან წერილობით მიღებულ დოკუმენტში კი აღნიშნულია, რომ 2018 წელს ამ კომპანიას „მიეცა დამატებითი ვადა და გათავისუფლდა ვალდებულების შესრულების პირობით 2685,06 ლარის ჯარიმისგან“ [მარტო 2017-18 წლებში აჭარაში 30-ზე მეტ ინვესტორს, ვალდებულების შესრულების პირობით, ჯამში 20 მილიონი ლარის და 2 მილიონი დოლარის ჯარიმა აპატიეს].

ტერიტორია, სადაც კოტეჯები უნდა აშენდეს და ხელოვნური ტბა  მოეწყოს, „გთემ გროუპმა“ 2017 წლის დეკემბერში პირდაპირი წესით და 36 თვის ვადაში, არანაკლებ 4,5 მილიონი ლარის ინვესტიციის განხორციელების პირობით შეისყიდა. გადაწყვეტილება მიწის ნაკვეთის პირდაპირი წესით გადაცემაზე აჭარის მთავრობის მაშინდელმა თავმჯდომარემ, ზურაბ პატარაძემ მიიღო. კომპანიის მესაკუთრე ედნარ პაპუნაიშვილი კი ზურაბ პატარაძის მეგობარია.

პაპუნაიშვილის სხვა კომპანიამ, „ხიდი 2006“-მა, კურორტ გოდერძიზე მოქმედი სასტუმრო „მეტეოც“ შეისყიდა, თუმცა პირობიანი აუქციონით.

„ხიდი 2006“-ის 100% წილი ბიზნესმენმა ედნარ პაპუნაიშვილმა 2017 წელს შეისყიდა. ის ბათუმში რესტორან „სან რემოს“ რეკონსტრუქციასაც გეგმავს. რესტორნის ტერიტორია ბათუმის მერიისგან კომპანიას 2067 წლამდე იჯარით აქვს აღებული.

ამ თემაზე:

რესტორანი „სან-რემო“ გაიყიდა

See more

 

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო დევნილ ოჯახებს ბათუმში, ტაბიძის ქუჩაზე, ახალაშენებულ კორპუსებში საცხოვრებელ ფართობებს გადასცემს.

დევნილთა საკითხების შემსწავლელი კომისიის გადაწყვეტილებით ამ ეტაპზე ბინა 139 დევნილ ოჯახს გადაეცემა.

ერთოთახიან ბინას მიიღებს 39 ოჯახი. 

ოროთახიან ბინას – 84 ოჯახი. 

სამოთახიან ბინას მიიღებს 13 ოჯახი. 

ხოლო ოთხოთახიან ბინას მიიღებს სამი ოჯახი. 

სამინისტროს ცნობით, კომისია დამატებით, კრიტერიუმების მიხედვით,  განიხილავს დარჩენილი 25 ბინის განაწილების საკითხსაც.

ბინებს ოჯახები ბათუმში, ტაბიძის ქუჩაზე, ორ 16-სართულიან ახალაშენებულ კორპუსში მიიღებენ.

ამავე თემაზე: 164 დევნილი ოჯახი ბათუმში ბინას მიიღებს – სამინისტროში შესულია 468 განაცხადი

სამინისტროს ცნობით, დევნილთა საკითხების შემსწავლელი კომისიის წევრები ინდივიდუალურად შეხვდებიან იმ იძულებით გადაადგილებულ პირებს, რომლებსაც ბინების განაწილების პროცესთან დაკავშირებით შეკითხვები აქვთ.

დევნილების მიღება  თბილისში 6 თებერვალს, 10:00 საათიდან დაიწყება (მისამართი: თბილისი, თამარაშვილის ქ.N15ა). ბათუმში, იძულებით გადაადგილებულ პირებს 7 და 8 თებერვალს 11:00 საათიდან შეხვდებიან (მისამართი: ბათუმი, მ.კობახიძის ქ.N119- აჭარის ჯანმრთელობისა და სოციალური დაცვის სამინისტრო).

_____________

 

წლების განმავლობაში რუსულ ოკუპაციას საქართველოში სხვადასხვა ფორმით აპროტესტებენ –  მასიური გამოსვლები, ცოცხალი ჯაჭვი, შეკრებები საოკუპაციო ხაზთან… ასევე, არიან ადამიანები, რომლებმაც ეს პროტესტი ყოველდღიურ ცხოვრებაში გადმოიტანეს – რატომ და რა ფორმით, ამის შესახებ თავად გვიამბობენ.

26 წლის თამარ მჟავანაძე ბათუმში ცხოვრობს, მამა ქართველი ჰყავს, დედა – უკრაინელი.  თამუნა ამბობს, რომ რუსეთის აგრესია მისი მშობლების ორივე ქვეყანას მწვავედ შეეხო. ის თავიდანვე ამ განცდით გაიზარდა, ამიტომაც რუსეთის პოლიტიკის მიმართ პროტესტს ყოველდღიურ ცხოვრებაში, თავისებურად გამოხატავს.

“არასოდეს ვყიდულობ რუსულ პროდუქციას, იქნება ეს საკვები, ტანსაცმელი თუ სხვა ნივთი. მე ვთვლი, რომ ჩემ მიერ მათი ნაწარმოები პროდუქტების შეძენა, არის ერთგვარად მათი დაფინანსება, მათი გაძლიერება… მათი ძალა კი არაერთხელ ძალიან ცუდად აისახა ჩვენი ქვეყნის ისტორიაზე… სწორედ ამიტომ არის ეს ჩემი მათდამი პროტესტის ერთ-ერთი ფორმა”, – ამბობს ის.

თამარი რუსულ პროდუქციას შტრიხკოდის პირველი სამი ციფრით: 460-ით ცნობს. „ვიცი, რომ ჩემ მიერ ნაყიდი ერთი თუ ორლარიანი რუსული ორცხობილას ყიდვა მათ ქვეყანას არ ააშენებს, მაგრამ ეს არის ჩემი პატარა წვლილი მთლიან საქმეში. პროტესტი არ ნიშნავს, რომ აუცილებლად ქუჩაში და აუცილებლად ბევრი ხალხი გამოვიდეს, ვიყვიროთ და ასე შემდეგ. ვსაუბრობ სამოქალაქო პასუხისმგებლობაზე, როცა თითოეულმა ჩვენგანმა საკუთარ თავთანაც რომ გამოხატოს, თუნდაც მცირედი საპროტესტო ქმედება, რაღაც ძალიან ცუდის და მასშტაბურის წინააღმდეგ“, – ამბობს თამარ მჟავანაძე.

პაატა ძიძიგური კაფე “ვინილის” ერთ-ერთი მეპატრონეა. იგი მუსიკისა და მედიის დარგშიც საქმიანობს. თუმცა, პირველ რიგში, როგორც მოქალაქე, თავის წილ პროტესტს რუსეთის აგრესიის წინააღმდეგ იმით გამოხატავს, რომ რუსულ ტელეარხებს არ უყურებს. “რუსულ არხებს ძალიან დიდი ხანია არ ვუყურებ, უბრალოდ იმიტომ, რომ ტყუილის ტირაჟირებაში არ მინდა თუნდაც პასიური მონაწილე ვიყო. ნებისმიერი სათავგადასავლო, დოკუმენტური მონათხრობი წამყვანისა, რატომღაც მთავრდება იმით, თუ როგორი ცუდები არიან მათთვის (რუსეთისთვის) უცხოელები”, – ამბობს პაატა.

რუსეთი ანტიდასავლურ პროპაგანდაზე მართლაც აქტიურად მუშაობს. სამოგზაურო, კულინარიული, გასართობი გადაცემები თუ საბავშვო ანიმაციური ფილმები, ირიბად თუ პირდაპირი გზით, ევროპისა და ამერიკის დემონიზაციისა და რუსეთის დადებითი სახით წარმოჩენისკენაა მიმართული.

 

დღეს, 5 თებერვალს, ბათუმის მერიაში მოქალაქეთა ჯგუფმა განცხადება შეიტანა. ისინი ბათუმის მერს, ლაშა კომახიძეს, სთხოვენ, თავი შეიკავოს ბათუმის ნავსადგურში კარბამიდის ტერმინალის მშენებლობის ნებართვის გაცემისგან, ვიდრე მოქალაქეებს არ ექნებათ უსაფრთხოების სრული გარანტია.

წერილს 200-მდე ხელმოწერა აქვს. „ბათუმელები“ უცვლელად გთავაზობთ წერილის ტექსტს:

„ბოლო ორი თვეა, აქტიურად მიმდინარეობს  საუბარი  ბათუმის ნავსადგურში დაგეგმილი მინერალური სასუქების კარბამიდის გადამზიდი ტერმინალის მშენებლობის შესახებ. გვინდა გაცნობოთ, რომ ბათუმის მოქალაქეები ვართ სენსეტიურად განწყობილები ტერმინალის მშენებლობის მიმართ და გვაქვს გარკვეული შიში. ჩვენი შიშის საფუძველი კი ის  არის,  რომ ბოლო წლებია, ჩვენს თვალწინ სახელმწიფოს ხელშეწყობით ან სათანადო რეაგირების უქონლობის გამო ჩვენი საცხოვრებელი გარემო სახიფათო და გაუსაძლისი  ხდება. გარემოს ეროვნული სააგენტოს კვლევებით, გასულ 2018  წელს ატმოსფერული ჰაერის ინდიკატორულ კვლევაში ჰაერის ყველაზე დაბალი ხარისხი რეგიონებიდან სწორად ბათუმშია დაფიქსირებული. ეს მაჩვენებელი ქალაქის არჩეული მერისთვის საგანგაშო უნდა იყოს.

ჩვენთვის ცნობილია, რომ ბათუმის მერიას ტერმინალის აშენების ნებართვის მისაღებად შპს „ბათუმის ნავსადგურმა“ უკვე მოგმართათ.

ჩვენი, ბათუმში მცხოვრები მოქალაქეების აღელვება გამოიწვია იმ ფაქტმა, რომ 2019 წლის 23 იანვარს ცნობილი გახდა, რომ  სკრინინგის პროცედურის შემდეგ გარემოს დაცვის  მინისტრმა ხელი მოაწერა ბრძანებას ტერმინალის გზშ-ს გარეშე აშენების შესახებ. მაშინ, როცა ბათუმის მოსახლეობა აპროტესტებს ტერმინალის მშენებლობას  და ითხოვს სახელმწიფოსგან პროცესის  სრულ მონიტორიგს,  მიგვაჩნია, რომ გარემოს დაცვის სამინისტრო ანგარიშვალდებული  იყო ადრე გაცემულ ნებართვაში კი არ შეეტანა  ცვლილება, არამედ ახალი გზშ-ს ანგარიშის გაკეთება  მოეთხოვა, მითუმეტეს, როდესაც ტერმინალის მშნებლობა იგეგმება  დასახლებული ადგილიდან რამდენიმე მეტრის დაშორებით. ჩვენც და თქვენც კარგად უნდა ვხედავდეთ და აღვიქვამდეთ ჩვენს რეალობას: უსაფრთხოების ნორმების უგულებელყოფისა და  მონიტორიგის არქონა ყოველდღიურად ჩვენი მოქალაქეების სიცოცხლის ფასად გვიჯდება.

ამავე თემაზე: ბათუმის პორტში კარბამიდის ტერმინალი გარემოზე ზემოქმედების შეფასების გარეშე აშენდება

მართალია, სკრინინგის გადაწყვეტილების საფუძველზე,  კომპანიას კარბამიდის გარდა სხვა ნივთიერებების გადაზიდვის უფლება არ აქვს, მაგრამ ჩვენ გვაქვს უნდობლობა პროცესის მიმართ ანულირებული  კონტროლის მექანიზმების გამო. ვინაიდან ეს კერძო  კომპანიის ტერმინალია… ამიტომაც მიგვაჩნია,  რომ  სრული გზშ-ს დოკუმენტის მომზადება  და მონიტორინგის პროცედურების გაწერა საჭიროა.

ბატონო ლაშა! მოგიწოდებთ, იმოქმედოთ მოსახლეობის ინტერესების შესაბამისად, თავი შეიკავოთ ტერმინალის მშენებლობის ნებართვის გაცემისგან, ვიდრე მოქალაქეებს არ გვექნება უსაფრთხოების სრული გარანტია და ყველა კითხვაზე პასუხი.

მართალია, ერთი შეხვედრა უკვე შედგა ბათუმის მერიაში  და კომპანიამ ტერმინალის მშენებლობის  პრეზენტაცია წარმოადგინა, თუმცა ყველა დაინტერესებული მხარე შეხვედრაში არ მონაწილეობდა.  გთხოვთ,  კიდევ ერთხელ უზრუნველყოთ უფრო ფართო სპექტრით შეხვედრის ორგანიზება, დაინტერესებული მოქალაქეების გარდა მოიწვიოთ გარემოს დაცვის სამინისტროს, ტერმინალის მშენებელი კომპანიის, ბათუმის ნავსადგურის“ ორგანიზაცია „მწვანე ალტერნატივის“ და სხვა გარემოსდაცვითი საერთაშორისო ორგანიზაციის  წარმომადგენლები, რათა დისკუსია უფრო ინფორმაციული და კონკრეტულ შედეგზე ორიენტირებული გახდეს,“ – ვკითხულობთ წერილში.

ამავე თემაზე: რამდენად სახიფათოა ბათუმისთვის კარბამიდის ტერმინალის აშენება გზშ-ს გარეშე 

 

„ხანძარი, ფაქტობრივად, უკვე ლოკალიზებულია. ჩვენ დავაკვირდებით და დავითვლით ზარალს. ადმინისტრაციული ერთეულის თანამშრომლები დაკავებული არიან უკვე ამით,“ – განაცხადა ბათუმის მერმა, ლაშა კომახიძემ ბერიძის ქუჩაზე. ხანძარი ამ ქუჩაზე მდებარე რამდენიმე სახლს გაუჩნდა.

ბათუმის მერის თქმით, ვიზუალური დათვალიერებით, ხანძრის შედეგად დაახლოებით 4-5 სახლი დაზიანდა. ლაშა კომახიძემ ჟურნალისტებთან საუბრის დროს ხაზი გაუსვა იმასაც, რომ რამდენიმე დღის წინ ეს ქუჩა გარემოვაჭრეებისგან გათავისუფლდა.

„რამდენიმე დღის წინ ჩვენ აქ ავალაგეთ გარევაჭრობა, რომელსაც მთლიანად ჰქონდა ქუჩა დაკავებული. ვფიქრობ, გაცილებით დიდი იქნებოდა გავრცელების კერა. შესაბამისად, სახანძრო მანქანასაც არ ჰქონდა არანაირი შეფერხება ამ ქუჩაზე შემოსვლასთან დაკავშირებით,“ – აღნიშნა ლაშა კომახიძემ.

სახანძრო და სამაშველო სამსახური ბერიძის ქუჩაზე ამ დრომდე მუშაობს.

 

ბათუმში, ბერიძის ქუჩაზე ხანძარი ლოკალიზებულია, ამჟამად მეხანძრეები კვამლის რამდენიმე დარჩენილ კერაზე მუშაობენ.

ბოლო ინფორმაციით დაიწვა ერთი ოჯახის საცხოვრებელი სახლი და რამდენიმე სახლის სახურავი. სულ დამწვარია 200 კვ.მ ფართობი.

ხანძრის შედეგად არავინ დაშავებულა.

შემთხვევის ადგილზე იმყოფებოდა ბათუმის მერი, ლაშა კომახიძეც.

 

ბათუმში, ბერიძის (ყოფილი კალიევის) ქუჩაზე, სახლი იწვის. ადგილზე მობილიზებული არიან სახანძრო და სამაშველო ჯგუფები. სამაშველო სამსახურის ინფორმაციით, ხანძარი ორსართულიან სახლში გაჩნდა.

ამ დროისთვის აღნიშნული სამსახური არ ფლობს ინფორმაციას, ევაკუირებულია თუ არა მოსახლეობა. ადგილზე იმყოფება სასწრაფო დახმარების სამსახურიც. მათი ინფორმაციით, ხანძრის შედეგად არავინ დაშავებულა, „მხოლოდ სახლის მეპატრონეა ცუდად,“- ამბობენ სასწრაფოში.

დაავადებათა კონტროლისა და საზოგადოებრივი ჯანმრთელობის ეროვნული ცენტრი წითელას საწინააღმდეგო იმუნიზაციის პროცესთან დაკავშირებით განცხადებას ავრცელებს.

2019 წლის იანვრიდან „პროფილაქტიკური აცრების ეროვნული კალენდარი“ სავალდებულო გახდა. წითელას სავალდებულო აცრის შესახებ მოსახლეობის განსაკუთრებული ინტერესი გამოიწვია საქართველოს მთავრობის განკარგულებამ, სადაც აღნიშნულია, რომ  საგანმანათლებლო დაწესებულებებში უნდა გამოვლინდნენ ის პირები, რომელთაც არიან აუცრელები ან არასრულად აცრილნი და ორი თვის ვადაში ბენეფიციარების მხრიდან აცრის დამადასტურებელი ცნობის წარუდგენლობის შემთხვევაში საგანმანათლებლო დაწესებულებას შეუძლია განიხილოს მათი სტატუსის შეჩერების საკითხი.

„აღნიშნული საკანონმდებლო აქტებით გათვალისწინებული ღონისძიებები მიმართულია მხოლოდ აცრების მოცვის მაჩვენებლის გაზრდისთვის, რადგან დაავადების შეჩერება და ელიმინაცია მოხდება მხოლოდ იმ შემთხვევაში, თუ აცრებით მოცვის მაჩვენებელი იქნება არანაკლებ 95% -სა.

საქართველოს მთავრობის განკარგულების არსი მდგომარეობს იმაში, რომ გაიზარდოს საზოგადოების ცალკეული წევრის როგორც ინდივიდუალური, ასევე კოლექტიური პასუხისმგებლობა და რაც მთავარია, ითვალისწინებს საზოგადოებრივი ჯანმრთელობისთვის უსაფრთხო გარემოს შექმნას საზოგადოებრივი მნიშვნელობის დაწესებულებებში, მათ შორის სამედიცინო დაწესებულებებსა და ზოგად, პროფესიულ და უმაღლეს საგანმანათლებლო დაწესებულებებში მყოფი ნებისმიერი პირისათვის. განკარგულების არც ერთი პუნქტის შინაარსი არ მოიაზრებს რაიმე ტიპის სადამსჯელო ღონისძიების გატარებას და ვინმესთვის სასწავლო პროცესის შეფერხებას ან სამსახურებრივი უფლებამოსილების შეჩერებას.“ – აღნიშნულია დაავადებათა კონტროლისა და საზოგადოებრივი ჯანმრთელობის ეროვნული ცენტრის განცხადებაში.

კითხვაზე, იმ შემთხვევაში, თუ კონკრეტული პირი უარს იტყვის აცრაზე, განიხილება თუ არა მისი სტატუსის შეჩერების საკითხი საგანმანათლებლო დაწესებულებაში, დაავადებათა კონტროლის ეროვნულ ცენტრში ვერ პასუხობენ. აქ გვითხრეს, რომ მთავრობის განკარგულებაზე ახსნა-განმარტებებს ვერ გააკეთებენ.

ცენტრის ინფორმაციით, ჯანმრთელობის მსოფლიო ორგანიზაციის მონაცემებით, საქართველო ევროპაში წითელას გავრცელების მაჩვენებლით იმ ოთხ ქვეყანას შორისაა, სადაც ინციდენტობის მაჩვენებელმა 2019 წლის იანვრისთვის 400-ს გადააჭარბა. ბოლო 16 წლის განმავლობაში, მსოფლიოში წითელას ვაქცინაციით გადარჩენილია 20 მილიონამდე ადამიანის სიცოცხლე, მნიშვნელოვნად შემცირდა როგორც საერთოდ, ისე წითელათი გამოწვეული ბავშვთა სიკვდილიანობა, რაც კიდევ ერთხელ ამტკიცებს, რომ ვაქცინაცია კაცობრიობის უდიდესი მიღწევაა.

„სამედიცინო დაწესებულებაში მოქალაქის მიმართვისას წითელას შესახებ იმუნურობის დამადასტურებელი დოკუმენტის მიღების მიზნით, სამედიცინო პერსონალმა: თუ არ იძებნება ჩანაწერი აცრის დადასტურების შესახებ ან არ იძებნება ჩანაწერი წითელათი დაავადების შესახებ – დადასტურებული სათანადო ლაბორატორიული კვლევით, უნდა უზრუნველყოს ვაქცინაცია – იმუნურობის (წითელას მიმართ) სტატუსის განსაზღვრის დავალდებულების გარეშე.

მასთან, თითოეული მოქალაქის უფლებაა ჩაიტაროს ამგვარი კვლევა, განისაზღვროს იმუნურობის სტატუსი ან მისაწვდომ დაწესებულებაში (სამედიცინო დაწესებულება, სადაც უტარდებოდა გეგმიური ვაქცინაცია, არქივი და ა.შ.) აღადგინოს ჩანაწერი აცრის ჩატარების შესახებ და იმ შემთხვევაში, თუ იმუნურობის სტატუსი განისაზღვრა როგორც დადებითი (აქვს იმუნიტეტი) – წარადგინოს მოთხოვნის შესაბამისად. იმ შემთხვევაში, თუ აცრის სტატუსის ჩანაწერის აღდგენა არ ხერხდება და/ან სათანადო ლაბორატორიული ტესტირებით იმუნურობის სტატუსი განისაზღვრა როგორც უარყოფითი (არ აქვს იმუნიტეტი) – უფლებამოსილია ჩაიტაროს ვაქცინაცია და ჩატარების დამადასტურებელი დოკუმენტი წარადგინოს მოთხოვნის შესაბამისად.

„პროფილაქტიკური აცრების ეროვნული კალენდრისა და იმუნიზაციის მართვის წესების დამტკიცების შესახებ“ საქართველოს შრომის, ჯანმრთელობისა და სოციალური დაცვის მინისტრის 2015 წლის 19 ნოემბრის ბრძანებით გათვალისწინებული წესით და პირობებით ნებისმიერი მოქალაქე, აცრაზე უარის თქმის შემთხვევაში, შესაბამის დაწესებულებაში წარადგენს „პირის მიერ პროფილაქტიკურ აცრაზე უარის თქმის შევსებულ ფორმას“ – ვკითხულობთ განცხადებაში.

ამავე თემაზე: სად შეგიძლიათ აიცრათ აჭარაში წითელაზე უფასოდ და აიღოთ ცნობა 

ქობულეთში, ლერმონტოვის 13-თან ჟურნალისტის გამოჩენისთანავე თითქმის ყველა ჭიშკარს კეტავს, ადამიანები მზიანი ამინდის მიუხედავად, ხმის ამოუღებლად ტოვებენ ქუჩას, ტროტუარს, ეზოს… მათ კამერის წინ გამოჩენა აღარ სურთ. ამის მიზეზს აქ არავინ განგიმარტავთ. ლერმონტოვის 13-ში მდებარე სამსართულიანი სახლი კი, ისევ ცარიელი და გამოკეტილია. 5 წლის წინ ამ მისამართზე მუსლიმი თემი პანსიონის გახსნას გეგმავდა. ადგილობრივებმა პანსიონის გახსნის საშუალება მუსლიმებს არ მისცეს, სახლს – ღორის თავი მიაჭედეს.

რა ხდება ახლა, სასამართლოს არაერთი გადაწყვეტილების შემდეგ? რამდენად შეიცვალა ადგილობრივების დამოკიდებულება, როცა მათ სასამართლომ უთხრა, რომ ასე მოქმედება კანონსაწინააღმდეგო და დისკრიმინაციულია? რა შეიცვალა მას შემდეგ, რაც სასამართლომ ქობულეთის მერიას პანსიონის შენობის წყლისა და კანალიზაციის სისტემაში ჩართვა დაავალა? – „ბათუმელები“ ქობულეთელებს გაესაუბრა და ჰკითხა: რა რეაქცია ექნებათ ადგილობრივებს ახლა, თუკი პანსიონი ისევ გაიხსნება?

„იმავეს ვიზამთ… რაღა ახლა ჩამოვიარე მეც,“ – გვითხრა სესილი ოქროპირიძემ, პანსიონის შენობის წინ სპეციალურად განთავსებულ ჯვართან შეჩერდა და განაგრძო: „აქ ჩვენ ჯვარი გვაქვს გაკეთებული. ამის შემდეგ შეიძლება აქ მუსლიმთა პანსიონი? მე მგონი, არ შეიძლება. კი ბატონო, სასამართლომ დაადგინა დისკრიმინაცია, მაგრამ მე არ ვფიქრობ მასე. ქრისტიანი გამოდის აქ და ეკლესიაში მიდის. არ უნდა გაიხსნეს, რომ ცუდი რაღაცები არ მოხდეს…“

პანსიონის ახლოს მცხოვრები ადამიანები ან არაფერს ამბობენ, ან ამბობენ, რომ იმავეს, ან უარესს გააკეთებენ, თუკი პანსიონი გაიხსნება. მიუხედავად იმისა, რომ სასამართლომ „პანსიონის საქმეზე“ დისკრიმინაცია დააგინა, მოქალაქეები არც ახლა ერიდებიან სიძულვილის ენის გამოყენებას. ოთხივე მოქალაქემ, ვისაც „ბათუმელები“ პანსიონის მიმდებარედ ესაუბრა, იცის, რომ სასამართლო დავა მუსლიმმა თემმა მოიგო, თუმცა ეს მათ არ აღელვებთ. ისინი ახსენებენ მთავრობასაც: „მთავრობას მაინც რაც უნდა, იმას გააკეთებს“.

თემურ ნოღაიდელი: „კატეგორიული წინააღმდეგი წავალთ მე, ჩემი ოჯახი და მეზობლებიც. არავითარ შემთხვევაში არ უნდა გაიხსნას. კონსტიტუციით ყველას აქვს უფლება, მაგრამ აქ არის ყველა ქრისტიანული ოჯახი, პატარა ბავშვები იზრდებიან. მე არ მიმაჩნია მიზანშეწონილად. ბევრი ისეთი ადგილია ქობულეთში, სადაც არაა მჭიდრო დასახლება და იქ გახსნან. იურიდიულად და კანონით აქვთ უფლება, მაგრამ კანონის გვერდზეც ხომ არის რაღაც? ჩვენი სახლები გვერდიგვერდაა, არ შეიძლება ასე ახლოს იყოს პანსიონი, ბავშვები აქ გამოდიან და ბაღში მიდიან… გასაგებია, რომ დადგინდა დისკრიმინაცია, მაგრამ ჩვენ ვართ მესამე საუკუნიდან ქრისტიანული ადგილი, არანაირი საწინააღმდეგო გვაქვს რწმენასთან“.

„მთავრობას რასაც უნდა, იმას გააკეთებს, მაგრამ ჩვენ გავაპროტესტებთ,“ – ამბობს ზიული კოპლატაძე. ისიც ლერმონტოვის ქუჩაზე ცხოვრობს. მას ვუთხარით, იცოდა თუ არა სამართლებრივი პასუხისმგებლობის შესახებ, რაც შეიძლება მოჰყვეს პანსიონის გახსნისთვის ისევ ხელის შეშლას.

„ხელით კი არ ვეტაკები, ადრეც არ დავტაკებივარ, სიტყვიერად ვიტყვი და გამოვალ, ღორის თავის მიჭედვის ამბავს მე ვერ დავადასტურებ, მაშინ ხიდზე ვიდექი აქციაზე. ჩემი პოზიცია არის ის, რომ სკოლა სახლებს შორის ასე გვერდიგვერდ არ უნდა იყოს,“ – აღნიშნავს ზიული კოპლატაძე.

ანალოგიური პოზიცია აქვს გურამ ბასილაძესაც, რომელმაც ჩვენთან საუბრის დროს ხაზი გაუსვა საკუთარ რელიგიურ აღმსარებლობას – ის მუსლიმია.

„არ უნდა გაიხსნას. ვიღაცას ხომ უნდა უხაროდეს შენი დანახვა? მე ვიცი ის, რომ აქ მაგის ადგილი არ არის. ისევ იქნება წინააღმდეგობა, უარესი მოხდება. ახლა, თქვენ მოდით და აქ ხალხი უარესად დაირაზმება… მე თვითონ მუსლიმი კაცი ვარ, მაგრამ უმჯობესია სხვა ადგილი გამონახონ. სადმე ისეთი ადგილი უნდა მოძებნონ, სადაც ხალხი ასე ბევრი არ არის,“ – გვითხრა გურამ ბასილაძემ.

თუკი ლერმონტოვის ქუჩას გაუყვებით ქობულეთის ცენტრისკენ და ადამიანების პოზიციებით დაინტერესდებით, ნახავთ, რომ პანსიონისთვის განკუთვნილი შენობიდან მოშორებით პოზიციები რბილდება. ზოგიერთი ამბობს, რომ პანსიონი არ უნდა გაიხსნას, თუმცა ამას ხელს არ ან ვერ შეუშლის. ზოგიერთი კი მიიჩნევს, რომ პანსიონი არავის და არაფერს უშლის ხელს.

„თუ უნდათ გახსნან, რატომაც არა? აბა, ევროპაში რომ გვინდა შესვლა, როგორ არის? არ ვიცი, საერთოდ წინააღმდეგობა იქნება თუ არა, წესრიგი უნდა იყოს ყველგან,“ – გვითხრა ნანული ანტონოსიანმა.

 

დაახლოებით იმავეს ამბობს იამზე შავაძე: „მე არ ვარ წინააღმდეგი. საერთოდ არ მესმის, რატომ უნდა ვიყო წინააღმდეგი. სხვა როგორ იტყვის, არ ვიცი“.