აჭარის საზოგადოებრივი ჯანდაცვის ცენტრის ინფორმაციით, ბოლო მონაცემებით ჩანს, რომ აჭარაში H1N1-ის შემთხვევების სტატისტიკამ იკლო.
ცენტრის დირექტორის, რუსუდან შავიშვილის ინფორმაციით, გასული კვირის მონაცემებით შემთხვევთა რაოდენობა 100 ათას მოსახლეზე არის 230, რაც იმას ნიშნავს, რომ გრიპისა და გრიპისმაგვარი დაავადებების შემთხვევთა რაოდენობა მკვეთრადაა შემცირებული წინა კვირებთან შედარებით.
„ასევე, შემცირებულია მძიმედ მიმდინარე გრიპისა და გრიპისმაგვარი დაავადებების შემთხვევაში ჰოსპიტალიზების შემთხვევები და 12,4 პროცენტს შეადგენს. თუ შევადარებთ წინა კვირებს, როცა ეს მონაცემი 30 პროცენტზე მეტი იყო, შეიძლება ითქვას, რომ გვაქვს ძალიან კარგი დინამიკა. საავადმყოფოებში მაინც რჩებიან მკურნალობაზე პაციენტები გრიპის და გრიპისმაგვარი დაავადებით, არის ამბულატორიაში მიმართვიანობაც, მაგრამ ორივე მიმართულებით აღინიშნება მნიშვნელოვანი რაოდენობრივი კლება,“ – განაცხადა რუსუდან შავიშვილმა „ბათუმელებთან“.
კითხვაზე, გადაიარა თუ არა გრიპის სეზონის პიკმა, რუსუდან შავიშვილის თქმით, ამის ზუსტი პროგნოზი შეუძლებელია:
„წინა წლების გამოცდილებასა და გრიპის ვირუსის ხასიათიდან გამომდინარე შეგვიძლია ვთქვათ, რომ გრიპს ახასიათებს ტალღისებული მიმდინარეობა და ამ მიმდინარეობაში ფიქსირდება პირველი და მეორე პიკი. საზოგადოდ, პირველი პიკი არის უფრო ძლიერი. შესაძლოა, საერთოდ არ იყოს მეორე პიკი და კლება გაგრძელდეს სრულ მილევამდე. ამიტომაც ველოდებით მოვლენების განვითარებას და სამედიცინო დაწესებულებები, საავამდყოფოები და ამბულატორია-პოლიკლინიკები სრულ მზადყოფნაში არიან“.
აჭარაში მიმდინარე სეზონზე გრიპის ვირუსით გარდაცვალების შვიდი შემთხვევა დაფიქსირდა.
წაიკითხეთ ამ თემაზე: როგორ დავიცვათ თავი H1N1 ვირუსისგან – პაატა იმნაძის ექვსი რჩევა
