ბათუმში, ბონი-გოროდოკის დასახლებაში, რამდენიმე ქუჩის რეაბილიტაციისთვის ქალაქის ბიუჯეტიდან 1,7 მილიონ ლარზე მეტია გამოყოფილი. საქალაქო ინფრასტრუქტურისა და კეთილმოწყობის სამმართველომ სამუშაოების შესყიდვაზე ტენდერი უკვე გამოაცხადა, შესყიდვის სავარაუდო ღირებულება 1 768 746 ლარია.
ამ ტენდერის ფარგლებში რეაბილიტაცია ჩაუტარდება:
ალ. ჩხაიძის ქუჩის (ფეხით სავალი ნაწილი ერთ მხარეს, ჯიბეები) და ქუჩის გაგრძელებას იაშვილის ქუჩიდან ერისთავის ქუჩამდე, იოსელიანის, ერისთვის შესახვევისა და II ჩიხის, ა. ნოღაიდელის, იაშვილის, კაიკაციშვილის, იუნკერების, დადიანის და ს. თაყაიშვილის ქუჩებს.
ტენდერში წინადადებების მიღება 2019 წლის 21 თებერვალს დაიწყება და 26 თებერვალს შეწყდება. სამუშაოები სრულად უნდა განხორციელდეს 450 დღის განმავლობაში ტენდერში გამარჯვებულთან ხელშეკრულების გაფორმებიდან.
ტენდერის პირობების მიხედვით თითოეულ ქუჩაზე სამუშაოები უნდა განხორციელდეს მას შემდეგ, რაც ტენდერში გამარჯვებული პრეტენდენტი შემსყიდველის მხრიდან მიიღებს წერილობით შეტყობინებას სამუშაოების დაწყების თაობაზე, რომელშიც განსაზღვრული იქნება სამუშაოების დაწყების კონკრეტული თარიღი და ვადა კონკრეტულ ქუჩაზე ან მონაკვეთზე; შემსრულებელს უნდა შეეძლოს ერთდროულად ორ, საკუთარი სურვილის შემთხვევაში კი მეტ ქუჩაზეც სამუშაოების ჩატარება.
