აჭარის საპატრულო პოლიციას ახალი უფროსი ჰყავს – დავით მიქიაშვილი სამსახურებრივი უფლებამოსილების შესრულებას დღეს, 4 თებერვალს შეუდგა. იგი აქამდე საპატრულო პოლიციის დეპარტამენტის მცხეთა-მთიანეთის მთავარი სამმართველოს უფროსი იყო.
ეს თანამდებობდა ვაკანტურია 31 იანვრიდან, როცა მიხეილ დილიმაშვილმა საქართველოს საპატრულო პოლიციის დეპარტამენტის უფროსის პოსტი დაიკავა. დილიმაშვილი ამ თანამდებობაზე გასული წლის ივნისში დანიშნეს.
შს სამინისტროს ინფორმაციით, დავით მიქიაშვილი 1978 წელსაა დაბადებული, იგი პროფესიით ინჟინერი და სამართალმცოდნეა. მან კარიერა შინაგან საქმეთა სამინისტროში 2005 წელს, პატრულ-ინსპექტორის პოზიციიდან დაიწყო.
2007-2013 წლებში იყო საპატრულო პოლიციის დეპარტამენტის ქალაქ თბილისის და მცხეთა-მთიანეთის მთავარი სამმართველოს ათეულის მეთაური, შემდეგ – ოცეულის მეთაური, ასმეთაური და სამმართველოს უფროსი;
2013 წლიდან საქმიანობა განაგრძო საპატრულო პოლიციის დეპარტამენტის ქალაქ თბილისის მთავარი სამმართველოს სახაზო – საპატრულო სამმართველოს უფროსის პოზიციაზე;
2015 წლიდან დაინიშნა საპატრულო პოლიციის დეპარტამენტის დირექტორის მოადგილის – ქალაქ თბილისის მთავარი სამმართველოს უფროსის პოზიციაზე;
2017-2019 წლებში ეკავა საპატრულო პოლიციის დეპარტამენტის მცხეთა-მთიანეთის მთავარი სამმართველოს უფროსის თანამდებობა.
