დღეს, 1 თებერვალს, საქართველოს განათლების მინისტრმა მიხეილ ბატიაშვილმა უმაღლესი განათლების სისტემის პრეზენტაცია წარადგინა. მან ისაუბრა ორწლიან სამოქმედო გეგმაზე, რომლის მეშვეობით უნდა მოხდეს საქართველოს უმაღლესი განათლების სისტემის ევროპულთან ინტეგრაცია.
მინისტრის თქმით, უკვე გაკეთებულია განაცხადი უმაღლესი განათლების ხარისხის უზრუნველყოფის ევროპულ ქსელში (ENQA) და არსებობს მოლოდინი, რომ მარტში ცენტრი ამ ორგანიზაციის წევრი გახდება.
„ამ ეტაპის წარმატებით გავლის შემდეგ იგეგმება ცენტრის გაწევრიანება „ხარისხის უზრუნველყოფის სააგენტოების ევროპული რეესტრში“ (EQAR) და „უმაღლესი განათლების აკრედიტაციის ევროპული კონსორციუმში“ (ECA), რაც უზრუნველყოფს საქართველოში გაცემული დიპლომების უპირობო აღიარებას ევროპაში და საერთაშორისო კვლევებში ქართული უნივერსიტეტების ჩართულობას წაახალისებს“.
ბატიაშვილის განცხადებით, ამ გეგმების განხორციელება შესაძლებელია ორ წელიწადში.
„ENQA არის ერთგვარი ინსტიტუცია, რომელიც საქართველოში ეფექტურად დანერგავს ხარისხის განვითარების ევროპულ წინაპირობებს. ამიტომ კრიტიკულად მნიშვნელოვანია, რომ ჩვენ ENQA-ს გავწევრიანდეთ. ეს იქნება დასტური იმისა, რომ დავიწყეთ ევროპული სტანდარტების ამოქმედება და მათი ეფექტური დანერგვა.
ამასთანავე, ეს ნიშნავს, რომ მუდმივ კომუნიკაციაში ვიქნებით გავლენიან ევროპულ ინსტიტუციებთან, რომლებიც ხარისხის განვითარების მიმართულებით მუშაობენ. ENQA იქნება გარანტი ქართული ხარისხის განვითარების სისტემის დამოუკიდებლობისა და მუდმივი განვითარებისა“, – განაცხადა განათლების მინისტრმა.
