Batumelebi | პარიზში ხანძრის შედეგად 10 ადამიანი, მათ შორის ბავშვი დაიღუპა პარიზში ხანძრის შედეგად 10 ადამიანი, მათ შორის ბავშვი დაიღუპა – Batumelebi

პარიზში ხანძრის შედეგად 10 ადამიანი, მათ შორის ბავშვი დაიღუპა

BBC-ს ინფორმაციით, დღეს, 5 თებერვალს, პარიზის ცენტრალური უბნის მე-16 რაიონში, საფეხბურთო სტადიონ Parc des Princes – თან, რვასართულიან შენობაში გაჩენილი ხანძრის შედეგად ათი ადამიანი დაიღუპა, მათ შორის ბავშვი.

დაშავდა 30-ზე მეტი ადამიანი, მათ შორის არიან მეხანძრეებიც.

სახანძრო კიბის საშუალებით მეხანძრეებმა 50 მაცხოვრებლის ევაკუირება მოახერხეს.

ხანძარი თავდაპირველად საცხოვრებელი სახლის მეორე სართულზე გაჩნდა და 1970-იანი წლების შენობას მთლიანად მოედო. სახლის მაცხოვრებლთა ნაწილი იძულებული გახდა ახლომდებარე შენობების სახურავებზე გადამძვრალიყო ცეცხლისა და კვამლისგან თავდასაღწევად.

როგორც ფრანგული ტელევიზიები იუწყებიან, სახანძრო სიგნალიზაცია ხანძრის გაჩენიდან არც ისე სწრაფად ამუშავდა, როცა დაკვამლიანება საკმაოდ ძლიერი იყო.

250 მეხანძრე იყო ჩართული სახანძრო-სამაშველო სამუშაოებში, რომლებიც BFM TV-თან ყვებიან, რომ სახურავზე თავშეფარებული ხალხის გადასარჩენად ასულებს აპოკალიფსური სურათი დახვდათ, შველას ითხოვდნენ ღია ფანჯრებიდან ის ადამიანებიც, ვინც ხანძარს ვერ გაასწრო და ბინაში დარჩა.

მეხანძრეებმა ხანძრის ლოკალიზება 5 საათში შეძლეს. დაღუპულთა და დაზარალებულთა რიცხვი, ვარაუდობენ, რომ შესაძლოა გაიზარდოს.

ხანძრის გაჩენაში ეჭვმიტანილმა ქალმა, თვითმხილველთა ინფორმაციით, მეზობელთან ჩხუბის შემდეგ სახლის ეზოში ავტომანქანის დაწვა სცადა. როგორც პარიზის პროკურორი, რემი ეიტსი ამბობს, ხანძრის გაჩენაში ეჭვმიტანილი ქალი სავარაუდოდ ფსიქიკური აშლილობის მქონეა. ეჭვმიტანილი დაკავებულია.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com