Batumelebi

ბათუმის შოთა რუსთაველის უნივერსიტეტის ყოფილი ლექტორი და ბათუმის საკრებულოს წევრი, ომარ მახარაძე ბათუმში, პოლიციის მეექვსე განყოფილებაში, გამოკითხვაზე მივიდა. პოლიცია ომარ მახარაძეს გამოკითხავს მისი მხრიდან სტუდენტის სექსუალური შევიწროების საქმეზე. ინფორმაცია გამოკითხვის დროისა და ადგილის შესახებ შს სამინისტრომ მიაწოდა ჟურნალისტებს.

ომარ მახარაძე პოლიციას გუშინ, 29 მაისს, უნდა დაეკითხა, თუმცა მახარაძე პოლიციაში არ მისულა.

ბათუმის სახელმწიფო უნივერსიტეტის ლექტორის, ომარ მახარაძის მხრიდან სექსუალურ შევიწროებაზე მისი სტუდენტი „ბათუმელებს“ 21 მაისს მოუყვა. გამოძიება თავდაპირველად იძულების მუხლით დაიწყო, თუმცა შემდეგ პროკურატურამ მუხლი დაამძიმა და ამჯერად ლექტორს სისხლის სამართლის კოდექსის 139-ე მუხლის მეორე ნაწილით ედავებიან, რაც გულისხმობს „სექსუალური ხასიათის სხვაგვარი ქმედების იძულებას“, რასაც მძიმე შედეგი მოჰყვა. ეს მუხლი 3-დან 5 წლამდე თავისუფლების აღკვეთას ითვალისწინებს.

ომარ მახარაძეს 28 მაისს ბათუმის სახელმწიფო უნივერსიტეტმა შრომითი კონტრაქტი შეუწყვიტა. ომარ მახარაძე ასევე აღარ არის ბათუმის საკრებულოს იურიდიული კომისიის თავმჯდომარე და ფრაქცია „ქართული ოცნების“ წევრი.

ბათუმში ხშირია შემთხვევა, როცა კერძო სექტორის წარმომადგენლები რუს ტურისტებს რუსულ ენაზე მიმართავენ და ეპატიჟებიან რუსულ ენაზე. ასევე კაფე-ბარებსა და რესტორნებში ხშირად მენიუ წარმოდგენილია მხოლოდ რუსულ ენაზე. ამ საკითხზე „ბათუმელები“ აჭარის ტურიზმის დეპარტამენტის ხელმძღვანელს, სულხან ღლონტს ესაუბრა და ჰკითხა, ხედავს თუ არა ამაში პრობლემას და რა როლი უნდა შეასრულოს დეპარტამენტმა იმისთვის, რომ კერძო სექტორმა ქართული ენის, კულტურის პოპულარიზაცია მშობლიურ ენაზე აწარმოოს და არა რუსულ ენაზე.

სულხან ღლონტი აღიარებს, რომ რუსულ ენაზე რუს ტურისტებთან კომუნიკაცია არის პრობლემა, რადგან მისი აზრით, ტურიზმიც ეროვნული ინტერესებიდან უნდა ამოდიოდეს.

„ჩვენ გავაკეთეთ ლევან მიქელაძის საგანმანათლებლო სკოლასთან შეთანხმება, რომელიც საგარეო საქმეთა სამინისტროს დაქვემდებარებაშია და ტურიზმის სფეროს წარმომადგენლებთან გავიარეთ სასემინარო კურსი მსგავს თემებზეც.

სატრენინგო კურსის დროს სრული ინფორმაცია მივაწოდეთ მათ ქვეყნის ოკუპაციასთან დაკავშირებით ყველა იმ კითხვაზე, რასაც სვამენ როგორც რუსი ტურისტები, ასევე ტურისტები ევროკავშირის ქვეყნებიდან. მაქსიმალურად ვცდილობთ, ყველა ნაბიჯი გადავდგათ იმისთვის, რომ რაც შეიძლება ეროვნული ინტერესებიდან ამოვიდეს ყველა ნაბიჯი,“ – ამბობს სულხან ღლონტი.

მისი თქმით, ტურიზმის სფეროს წარმომადგენლებს ესაუბრნენ ელჩები, დესპანები, კონსულები და მსგავსი შინაარსის ტრენინგები სამომავლოდაც გაგრძელდება.

სულხან ღლონტის თქმით, მიუხედავად იმისა, რომ რუსეთი არ არის სამიზნე ქვეყანა და ფული არ იხარჯება ჩვენი ქვეყნის რეკლამირებაზე, ამ ქვეყნიდან შემომსვლელი ტურისტების მაჩვენებელი მაინც მაღალია. „ეს აიხსნება საქართველოს მიმართ ცნობადობით, ასევე ინტერესით. რუსეთის სარეკლამო ბაზარზე ჩვენ ფინანსებს არ ვხარჯავთ 2017 წლის შემდეგ“.

სულხან ღლონტის თქმით, წელს სამიზნე ქვეყნებს წარმოადგენს გერმანია და დიდი ბრიტანეთი, ასევე ბალტიისპირეთის ქვეყნები. მისი თქმით, 15 ივნისს, ტურისტული სეზონის გახსნის დღეს, ევროკავშირის სამი ქვეყნიდან – პოლონეთი, ლიეტუა, ესტონეთი, ჩარტერული რეისები შესრულდება. „ასევე მეზობელი ქვეყნებიდან ველოდებით ბევრ ტურისტს,“ – ამბობს სულხან ღლონტი.

ამავე თემაზე: ბათუმის იახტკლუბში ტურისტებს რუსულ ენაზე ეპატიჟებიან

დღეს, 29 მაისს, სსიპ “აჭარის მუზეუმის” დირექტორი თამარ ორაგველიძე თანამდებობიდან გაათავისუფლეს. მან გათავისუფლების შესახებ მთავრობის თავმჯდომარის, თორნიკე რიჟვაძის მიერ ხელმოწერილი ბრძანება დილით მიიღო.

“ბათუმელების” კითხვებს გათავისუფლების სავარაუდო მიზეზებსა და სსიპ-ის მენეჯმენტის მუშაობასთან დაკავშირებით თამარ ორაგველიძე პასუხობს.

• ქალბატონო თამარ, აჭარის განათლების მინისტრის მოვალეობის შემსრულებელმა თქვა, რომ მენეჯმენტის გაუმჯობესება იყო თქვენი გათავისუფლების მიზეზი. მიგიღიათ შენიშვნები მენეჯმენტზე?

არც შენიშვნა და არც გაუთვალისწინებელი მითითება, ამ ერთი წლის განმავლობაში არ მიმიღია. შემიძლია ვთქვა, რომ რაკი დადგა აუცილებლობა პირველ ივნისს სსიპ-ი შექმნილიყო და მე შემომთავაზეს მისი ხელმძღვანელობა, მიუხედავად ჩემი ხედვებისა და კითხვის ნიშნებისა აღნიშნული სსიპ-ის შესახებ, ეს იყო შესაძლებლობა შემეცვალა რეალობა და მემსახურა იმ საქმის უფრო კარგად წარმართვისთვის, რაც მიყვარდა და რასაც წლები შევალიე. 12 წელია მუზეუმში ვმუშაობ, ჩემი კანდიდატურა შეირჩა სწორედ ნობელის მუზეუმში წარმატებით განხორციელებული პროექტებიდან გამომდინარე. ამიტომ შევხედე ამას, როგორც შესაძლებლობას, რომ პირადად გამეკეთებინა ეს ჩემი ხელით, ჩემი გონებით.

რა თქმა უნდა, დამრჩა ბევრი განუხორციელებელი პროექტი და იდეა, რადგან ეს იყო რეაქციის პროცესი – მოგეხსენებათ 4 მუზეუმი თავისი ფილიალებით შეერთდა; რა თქმა უნდა, ამას ყველა ბედნიერად არ შეხვედრია. მე ამის მოლოდინი არც მქონდა, მაგრამ მთავარია, რომ ჩვენ დავდეთ კარგი შედეგი. მაგალითად: თუ საგანმანათლებლო პროგრამების მაჩვენებელს გადავხედავთ, 2019 წელს მხოლოდ მაისის თვემ ორჯერ აჯობა 2017 და 2018 წლების მაჩვენებლებს.

რაც შეეხება საერთაშორისო პროექტებს, მე ვიმყოფებოდი ინგლისში „კრეატიული საქართველოსა“ და ბრიტანეთის საელჩოს ერთობლივი პროექტით, სადაც წარვადგინეთ რელიგიისა და ნობელის მუზეუმები. რელიგიის მუზეუმს ანალოგი მსოფლიოში არ მოეძებნება და ჩვენი ქალაქის რელიგიური ტოლერანტობის, მისი გამორჩეულობის შესახებ ყვება, რითაც ძალიან დაინტერესდნენ. ასევე სსიპ-მა შექმნა ელექტრონული ბილეთები, ფასდაკლების ბილეთები, რიგ მუზეუმებში ინგლისურენოვანი გიდები, სერვისის გაუმჯობესების კუთხით ბევრი სამუშაო ჩატარდა, მათ შორის საერთაშორისო გამოფენები და გვქონდა ბევრი სიახლე პროექტების კუთხით, რაც გამჭვირვალეა.

ჩვენ დავიწყეთ მომავალი თაობიდან, სწორედ საგანმანათლებლო პროგრამებით… გარდა ამისა, ქალაქში გაჩნდა ბანერები, გამზადებულია 111 წლის კატალოგი, რომელიც ხარიტონ ახვლედიანის მუზეუმს არ ჰქონია, თუმცა სსიპი როცა შეიქმნა, კატალოგის რაღაც ნაწილი დამხვდა და მადლობა მინდა ვუთხრა იმ გუნდს, რომელიც ღირსეულად ემსახურება სამუზეუმო საქმეს. ეს არ არის ოფიციალური განცხადების ნაწილი, რეალურად ეს ადამიანები არიან ცოცხალი მემატიანეები, რომლებიც უვლიან, პატრონობენ, იცავენ და დახმარება სჭირდებოდათ პოპულარიზაციის ნაწილში და მე სწორედ ამას ვცდილობდი.

დაგეგმილი პროექტები ალბათ განხორციელდება იმიტომ, რომ ეს ყველაფერი გეგმაში შეტანილია და ჩვენ ველოდებით ძალიან მნიშვნელოვან გამოფენას ზაფხულში. ეს არის ქართველი და იაპონელი მხატვრის, სამურაის უკანასკნელი ხმლის მფლობელის ერთობლივი გამოფენა.

• თქვენ ახსენეთ, რომ თავიდანვე ოთხი მუზეუმის გაერთიანებას ყველა დადებითად არ შეხვედრია. შესაბამისად სსიპ-ის თანამშრომლების ნაწილი თქვენს წინააღმდეგ იყო განწყობილი, ამ დაპირისპირებას თუ ხედავთ გათავისუფლების მიზეზად?

არამგონია შიდა უსაფუძვლო დაპირისპირება გამხდარიყო საბაბი, რადგან ყველა საჩივარზე, რომლებიც ამ თანამშრომლებს ჰქონდათ, მე მაქვს გაცემული არგუმენტირებული პასუხები, მაგალითად, ინსპექტირების სამსახურში და ეს ყველაფერი ძალიან გამჭვირვალეა.

• წინასწარ იყო თუ არა თქვენთვის ცნობილი, რომ თქვენს გათავისუფლებას აპირებდნენ, ბოლო პერიოდში იყო გაფრთხილება ამის თაობაზე ან შეთავაზება, თავად წასულიყავით. ან ხომ არ შემოუთავაზებიათ სხვა ადგილი დირექტორის პოსტიდან წასვლის საკომპენსაციოდ?

აქამდე კონკრეტული შემოთავაზება არ მქონია, გათავისუფლების შესახებ განკარგულებაც ჩემთვის საქმისწარმოების ელექტრონული სისტემა eFlow-დან გახდა ცნობილი. ასევე, სსიპ “აჭარის მუზეუმის” დირექტორის მოადგილის, ქალბატონ ნინო შაინიძის მოვალეობის შემსრულებლად დანიშვნის თაობაზე.

• თქვენ დაინიშნეთ ზურაბ პატარაძის მთავრობის თავმჯდომარეობის დროს. როგორ ფიქრობთ, ის ხომ არ გახდა გათავისუფლების მიზეზი, რომ თქვენ პატარაძის კადრი იყავით და არა რიჟვაძის?

კონკრეტიკას პოლიტიკის კუთხით ავცდებოდი. ვფიქრობ, მუზეუმი ის სფეროა, სადაც კადრების ასეთ მფარველობაზე არ უნდა ვისაუბროთ. მე მოვედი ნობელის მუზეუმის წარმატებით განხორციელებული პროექტებით და ეს დაინახეს ადამიანებმა. მადლობელი ვარ იმ ადამიანების, ვინც დაინახა და დღესაც ხედავს რაც გავაკეთე დ გავაკეთებ მომავალში.

• რამდენიმე დღის წინ გაათავისუფლეს აჭარის განათლების მინისტრი ინგა შამილიშვილი, რუსეთის ფედერაციის დროშასთან დაკავშირებული სკანდალის გამო. ითქვა, რომ თქვენი გათავისუფლება უკავშირდება მის წასვლას თანამდებობიდან. თქვენ ხედავთ ამ კავშირს?

ეს ხმები იმის შესახებ, რომ საერთოდ ამასთან რაიმე კავშირი მქონდა, ზედმეტად მიმაჩნია.

აუცილებლად უნდა ვთქვა და ეს ჩემთვის ძალიან მნიშვნელოვანია, რომ ჩემი მეუღლე და მისი ძმა ორივე სამხედრო პირია. მე ვარ ოჯახიდან, სადაც აგვისტოს ომის ორი მონაწილე მყავს, ვიცე-პოლკოვნიკი და საქართველოს გმირი. მე, ისევე როგორც საქართველოს ყველა პატრიოტსა და ჯანსაღად მოაზროვნე ადამიანს, რუსეთთან მაქვს ისეთივე დამოკიდებულება, მე ვიცავ ჩემი ქვეყნის მთლიანობას და ჩემი ოჯახის ორი წევრი დღემდე პირნათლად ასრულებს ამ მისიას.

• აპირებთ თუ არა გადაწყვეტილების გასაჩივრებას?

ეს ფაქტი ჩემთვის იმდენად მოულოდნელი იყო, რომ ვიტოვებ ფიქრის უფლებას.

• არის თუ არა თქვენთვის ცნობილი, ვის დანიშვნას აპირებენ ამ პოსტზე?

არა.  ჩემი გათავისუფლების შესახებ განკარგულება სრულიად მოულოდნელი იყო.

______________________

ფოტოზე: თამარ ორაგველიძე და აჭარის მთავრობის თავმჯდომარე თორნიკე რიჟვაძე. ფოტო: აჭარის მუზეუმი

„ბათუმის წყალი“ ჩაქვში წყალმომარაგების ე.წ. ძველი ქსელის გაუქმებას იწყებს. ძველი ქსელის დემონტაჟი მოხდება ეტაპობრივად, 2019 წლის პირველი ივნისიდან 30 ივნისამდე პერიოდში. კომპანიის განცხადებით, წყალმომარაგების ახალ ქსელზე დაერთებულ აბონენტებს, რომლებსაც არ ექნებათ მრიცხველი, წყლის მიწოდება ავტომატურად შეუწყდებათ.

„ბათუმის წყალში“ ასევე აცხადებენ, რომ ის აბონენტები, რომელთა მისამართზე წყალმომარაგების ქსელი რეაბილიტირებულია, თუმცა არ დამონტაჟებულა მრიცხველი, კომპანიას უნდა დაუკავშირდნენ [ქოლცენტრის ნომერზე: (0422) 24 22 22]. მრიცხველის დამონტაჟება აბონენტებისთვის უფასოა.

როგორც ბათუმელებმა გაარკვია, დღეს ჩაქვში ძველი ქსელის აბონენტები წყალმომარაგებასა და წყალარინებაში გადასახადს თვეში სულადობით იხდიან – 1,85 ლარი თვეში. ის აბონენტებიც ვერ სარგებლობენ წყალარინების [კანალიზაციის] სისტემით, იხდიან მხოლოდ წყალმომარაგების გადასახადს – სულზე 1,20 ლარს თვეში. ახალი ქსელის შემთხვევაში კი მოხმარებულ 1 ტონა წყალზე გადასახადი იქნება შესაბამისად, 51 თეთრი [წყალმომარაგება და წყალარინება ერთად] და 33 თეთრი [მხოლოდ წყალმომარაგება].

ჩაქვის ტერიტორიაზე წყლის ახალი მაგისტრალური და გამანაწილებელი ქსელი მუნიციპალური ინფრასტრუქტურის რეაბილიტაციის პროექტის ფარგლებში მოეწყო. ამავე პროექტის ფარგლებში, ჩაქვის ტერიტორიაზე მიმდინარეობს წყლის ინდივიდუალური მრიცხველების მოწყობა და „ბათუმის წყლის“ ინფორმაციით, უკვე მოწყობილია 2000 მრიცხველი.

სწორედ მრიცხველების დამონტაჟების პროცესის დასრულების შემდეგ მოხდება ძველი სისტემის სრულად გაუქმება და მოსახლეობას სასმელი წყალი ახალი წყალმომარაგების სისტემით მიეწოდება.

მუნიციპალური ინფრასტრუქტურის რეაბილიტაციის პროექტის ფარგლებში, ჩაქვში  წყალარინების ახალი სისტემა და გამწმენდი ნაგებობაც უნდა მოეწყოს, თუმცა ვადები, როგორც „ბათუმის წყალში“ გვითხრეს, მათთვის უცნობია.

ბათუმის მერიის ინფორმაციით, ჩაქვში წყალარინების ცალკე სისტემაა მოსაწყობი ცალკე გამწმენდი ნაგებობით, რომელიც ბათუმის ცენტრალურ სისტემაზე ვერ დაერთდება. თუმცა ამ ეტაპზე არც შესაბამისი პროექტია მზად და შესაბამისად არც ფინანსები. „ამ კუთხით მიმდინარეობს მუშაობა, ასევე მოლაპარაკებები დონორებთან. თუმცა ჩაქვში მობილური [მცირე] წყალარინების გამწმენდი ნაგებობა და სისტემა მოწყობილია და მუშაობს მდინარე ჩაქვისწყლის მარჯვენა მხარეს. იქ, სადაც მჭიდრო დასახლება და მრავალბინიანი სახლებია,“ – აცხადებენ ბათუმის მერიაში.

აჭარის განათლების მინისტრის მოვალეობის შემსრულებელი, ბაგრატ მანველიძე „ბათუმელებთან“ ამბობს, რომ აჭარის მუზეუმის დირექტორი თამარ ორაგველიძე თანამდებობიდან მისი გადაწყვეტილებით გათავისუფლდა. თამარ ორაგველიძის თქმით, ბრძანებაში არ წერია მოტივი, თუ რის საფუძველზე გაათავისუფლეს თანამდებობიდან.

„მიზეზი არის მხოლოდ და მხოლოდ ის, რომ სამუზეუმო სფერო ითხოვს ყოველდღიურ გაუმჯობესებას, საქმიანობა ჩვენთვის მთავარი პრიორიტეტი და მიმართულებაა. აქედან გამომდინარე, ჩვენ გვინდა, რომ შეიცვალოს მენეჯმენტი,“ – ამბობს ბაგრატ მანველიძე.

კითხვაზე – კონკრეტულად რაში გამოიხატა, რომ თამარ ორაგველიძე სუსტი მენეჯერი იყო? მანველიძე ამბობს: „არა, ასე ნუ დავსვამთ საკითხს, რომ არ გვაკმაყოფილებდა. მოწონება არმოწონებაზე არ არის აქ საუბარი, ჩვენ გვინდა უფრო მეტი გავაკეთოთ და უფრო ეფექტური გახდეს მენეჯმენტი და გაუმჯობესდეს საქმიანობა“.

კითხვაზე – ჰქონდათ თუ არა საუბარი ყოფილ დირექტორთან მენეჯმენტის გაუმჯობესების თაობაზე, ბაგრატ მანველიძე ამბობს, „არ არის აქ პრეტენზიებზე საუბარი, არ არის აქ საუბარი რაღაც თემებზე…“

კითხვაზე, ხომ არ აქვს ორაგველიძის გათავისუფლებას პოლიტიკური საფუძველი და ხომ არ უკავშირდება ის ინგა შამილიშვილის მინისტრობიდან გადაყენებას? ბაგრატ მანველიძე პასუხობს, რომ  – არა. „გამორიცხულია. ეს გადაწვეტილება მივიღე მე, სამინისტრომ მიიღო, რასაც დაეთანხმა მთავრობის თავმჯდომარე. გარკვეული რეორგანიზაციები მიმდინარეობს, შიდა რეორგანიზაციებია განსაზღვრული და მთლიანად მუზეუმის რეორგანიზაცია ხდება“.

ბაგრატ მანველიძემ ასევე თქვა, რომ ახალ კანდიდატს კონსულტაციების შემდეგ წარადგენენ.

აჭარის მუზეუმის დირექტორი, თამარ ორაგველიძე თანამდებობიდან დღეს, 29 მაისს, გაათავისუფლეს.

აჭარის მთავრობის პრესსამსახურში გვითხრეს, რომ აჭარის მუზეუმის ხელმძღვანელის გათავისუფლება განათლების მინისტრის წარდგინების საფუძველზე ხდება.

ამავე თემაზე:

თამარ ორაგველიძე, აჭარის მუზეუმის დირექტორი თანამდებობიდან გაათავისუფლეს. მან გათავისუფლების შესახებ მთავრობის თავმჯდომარის, თორნიკე რიჟვაძის მიერ ხელმოწერილი ბრძანება დღეს დილით მიიღო. თამარ ორაგველიძე ამბობს, რომ მისთვის ეს მოულოდნელი იყო:

„ერთწლიანი მუშაობის განმავლობაში არ მიმიღია არავითარი შენიშვნა. სამუზეუმო საქმეში აჭარის მუზეუმების გაერთიანებამ, მე ვფიქრობ, რომ ბევრი კარგი საქმე გააკეთა და ბევრ კარგ საქმეს უკვე საფუძველი აქვს ჩაყრილი. ჩემთვის ეს განკარგულება მოულოდნელი იყო“.

თამარ ორაგველიძე აქამდე ძმები ნობელების ტექნოლოგიური მუზეუმის დირექტორი იყო. იგი ამ პოზიციაზე მუზეუმის დაარსების დღიდან, 2007 წლიდან მუშაობდა.

აჭარის მუზეუმი ბათუმში მდებარე ოთხ მუზეუმს აერთიანებს: ბათუმის არქეოლოგიურ მუზეუმს, აჭარის ხელოვნების მუზეუმს, აჭარის ხარიტონ ახვლედიანის სახელობის მუზეუმსა და ძმები ნობელების სახელობის ტექნოლოგიურ მუზეუმს.

მუზეუმის დირექტორს აჭარის განათლების სამინისტროს წარდგინებით, თანამდებობაზე ნიშნავს აჭარის მთავრობა, ხოლო თანამდებობიდან ათავისუფლებს ასევე მთავრობა – მინისტრის წარდგინებით ან საკუთარი ინიციატივით.

„აჭარის მუზეუმი“ 2018 წელს შეიქმნა.

„ბათუმის ბულვარი“ სანაპირო ზოლზე ხუთ საზღვაო-სამაშველო სამეთვალყურეო შენობას [კოშკურას] ააშენებს. კოშკურები ძირითადად ლითონის კონსტრუქციის იქნება. მშენებლობისთვის ბულვარის ადმინისტრაციას 150 ათასი ლარი აქვს გათვალისწინებული და შესაბამის მომსახურებას ელექტრონული ტენდერით შეისყიდის.

ტენდერის პირობების მიხედვით, სამუშაოები უნდა განხორციელდეს შესაბამისი ხელშეკრულების გაფორმებიდან ორმოცი დღის ვადაში. კოშკურების განთავსების ადგილებს ბათუმის ბულვარის სანაპირო ზოლზე ბულვარის ადმინისტრაცია განსაზღვრავს.

წინადადებების მიღება 2019 წლის 26 ივნისს დაიწყება და პირველ ივლისს დასრულდება.

ბათუმის სახელმწიფო უნივერსიტეტის ლექტორს, ომარ მახარაძეს ეთიკური სტანდარტის დარღვევა დაუდგინეს. გადაწყვეტილება უნივერსიტეტის დისციპლინარულმა საბჭომ მიიღო.

საუბარია 21 მაისს გავრცელებულ ინფორმაციაზე – სტუდენტი გოგო „ბათუმელებს“ მოუყვა, რომ მას ლექტორი სექსუალურად ავიწროებდა. გამოძიება თავდაპირველად იძულების მუხლით დაიწყო, შემდეგ კი, პროკურატურამ მუხლი დაამძიმა და ამჟამად ძიება „სექსუალური ხასიათის სხვაგვარი ქმედების იძულების“ მიმართულებით გრძელდება.

„დღეს, 6 საათზე, შევიკრიბეთ და ორი საათი განვიხილავდით ამ საკითხს… ჩვენი გადაწყვეტილება ეყრდნობა სხვადასხვა ფაქტს, რომელიც სტუდენტებმა მოგვაწოდეს. დასაბუთებას გადაწყვეტილებაში დავწერთ. ჩვენ დავდეთ დასკვნა, ლექტორთან შრომითი ხელშეკრულების შეწყვეტაზე საბოლოო სამართლებრივი აქტი რექტორმა უნდა მიიღოს. ჩვენ მივიღეთ გადაწყვეტილება, რომ დისციპლინური სახდელის ეს ფორმა გამოგვეყენებინა – სამსახურებრივი ხელშეკრულების შეწყვეტა“, – გვითხრა ანზორ ბერიძემ, ბსუ-ს დისციპლინარული საბჭოს ხელმძღვანელმა.

საბჭოს სხდომას მხოლოდ ერთი წევრი – ლევან ჯაყელი არ ესწრებოდა. ომარ მახარაძისთვის შრომითი კონტრაქტის შეწყვეტას საბჭოს ექვსმა წევრმა დაუჭირა მხარი. ამ გადაწყვეტილების გასაჩივრება ლექტორს სასამართლოში შეუძლია.

ბათუმში, ხახულის ქუჩაზე, დღეს, 28 მაისს, ხანძარი გაჩნდა.

ბათუმის სახანძრო სამსახურის ინფორმაციით, ცეცხლი საცხოვრებელ ფიცრულ სახლს გაუჩნდა, რომელიც მთლიანად დაიწვა.

ხანძრის შედეგად არავინ დაშავებულა.

ბათუმის შოთა რუსთაველის სახელმწიფო უნივერსიტეტის აკადემიურმა საბჭომ უნივერსიტეტის ადმინისტრაციის ხელმძღვანელის -კანცლერის არჩევნები გამოაცხადა.

ადმინისტრაციის ხელმძღვანელის თანამდებობის დასაკავებლად კანდიდატს უნდა ჰქონდეს უმაღლესი განათლება და არანაკლებ 5 წლის სამუშაო გამოცდილება. კანდიდატმა ბსუ-ს საარჩევნო კომისიას უნდა წარუდგინოს სამოქმედო გეგმა.

ამ დრომდე უნივერსიტეტის კანცლერის პოსტი ჯემალ ანანიძეს ეკავა. იგი კანცლერის თანამდებობაზე 2015 წლიდან მუშაობს და 23 ივნისს ეწურება ამ პოსტზე მუშაობის ოთხწლიანი ვადა. ჯემალ ანანიძე ამბობს, რომ ჯერ არ აქვს გადაწყვეტილი, მიიღებს თუ არა არჩევნებში მონაწილეობას.

„უნივერსიტეტი ახლა დიდი გამოწვევების წინაშეა, დიდი კონკურენციაა, ახალი მიმართულებებია… არ გამოვრიცხავ, შეიძლება მივიღო მონაწილეობა კონკურსში, თუმცა ერთსა და იმავე თანამდებობაზე ოთხ წელზე მეტხანს მუშაობა თავისებური გამოწვევა და რისკიცაა“, – აღნიშნა ჯემალ ანანიძემ „ბათუმელებთან“.

უნივერსიტეტის კანცლერს აკადემიური საბჭოს წევრები ირჩევენ, ხოლო წარმომადგენლობითი საბჭო მას ფარული კენჭისყრით ამტკიცებს.

მახვილაურში, ნიკო მუსხელიშვილის ქუჩაზე მცხოვრები მოსახლეობა მეფრინველეობის ფაბრიკის მეპატრონის მისამართით უკმაყოფილებას გამოთქვამს. აქ მცხოვრები ადამიანები ამბობენ, რომ ქათმების ფერმის მეპატრონე არ იცავს სტანდარტებს, რის  გამოც წყლის არხები დაბინძურებულია და მძაფრი სუნი დგას.

მოსახლეობამ დღეს, 28 მაისს, გამაფრთხილებელი აქცია გამართა. აღნიშნული ტერიტორია ბათუმის საზღვრებშია.

„ქათმების ფერმა დასახლებულ პუნქტშია, საწარმო არ იცავს გარემოს დაცვის სტანდარტებს, ფეკალური მასები პირდაპირ ჩაედინება არხებში, წყალი დაბინძურებულია და საშინელი სუნი დგას,“ –  გვეუბნება ერთ-ერთი მცხოვრები ზაურ შაინიძე.

მისი თქმით, ფერმის მეპატრონეს რამდენჯერმე მიმართეს, თუმცა ვითარება არ შეცვლილა. „მხოლოდ გარედან შეცვალა ბანერები, სანიტარული მდგომარეობა კი არ შეცვლილა. სახლებში შემოდის სუნი,  ბევრი მწერია. ტექნიკა, რომელიც მოძრაობს ფერმიდან, დაბინძურებულია, არ რეცხავენ, სავინტილაციო სისტემები მოსაწესრიგებელი აქვთ,“ – გვითხრა აქ მცხოვრებმა ზაურ შაინიძემ.

გარემოს ზედამხედველობის დეპარტამენტში „ბათუმელებს“ უთხრეს, რომ ზედამხედველობის სამსახურმა ჩაატარა ინსპექსტირება და რამდენიმე სახის სერიოზული დარღვევა გამოავლინა.

გარემოსდაცვითი ზედამხედველობის დეპარტამენტის აჭარისა და გურიის რეგიონული სამმართველოს განყოფილების უფროსის, ნატო დავითაძის თქმით, მოსახლეობის მიმართვის საფუძველზე 22 მაისს ჩატარდა ინსპექტირება, რომელმაც სერიოზული კანონდარღვევები რამდენიმე მიმართულებით გამოავლინა.

„გამოვლინდა ბევრი დარღვევა ნარჩენების მართვის კუთხით, ადგილზე დათვალიერებით გამოვლინდა ზედაპირული სანიაღვრე არხების ექსკრემენტებით დაბინძურების ფაქტი, ასევე, კომპანია „ბათუმი 2016“-ს, რომელიც ფერმას ფლობს, არ აქვს შემუშავებული და სამინისტროსთან შეთანხმებული ნარჩენების მართვის გეგმა, არ ჰყავს გარემოს დაცვითი მმართველი, ნარჩენების ტრანსპორტირებას თვითონ ახორციელებს სპეციალური რეგისტრაციის გარეშე. მას ევალებოდა აღრიცხვა-ანგარიშგების წარდგენა პირველ მარტამდე სამინისტროში, რაც არ გააკეთა“.

ნატო დავითაძის თქმით, ეს ვალდებულებები გამომდინარეობს იქედან, რომ ფერმას წლის განმავლობაში წარმოექმნება 200 ტონაზე მეტი არასაყოფაცხოვრებო ნარჩენი. „წარმოექმნება სახიფათო ნარჩენებიც, რომელიც ინფექციის გავრცელების საფრთხეა. დაცემული ქათამი ყოველდღიურად არ გადის ფერმიდან, ჯერ აგროვებს და მერე გააქვს, რაც იწვევს ინფექციის გავრცელების საფრთხეს“.

მისივე თქმით, ფერმერი სახიფათო ნარჩენს არ გადასცემს შესაბამისი ნებართვის მქონე ორგანიზაციას, „გააქვს ნაგავსაყრელზე და ესეც დარღვევაა“.

ზედამხედველობის სამსახური სამართალდარღვევათა ოქმს ხვალ, 29 მაისს შეადგენს. ჯარიმის ოდენობას კი სასამართლო გადაწყვეტს.

თავისუფლების აღკვეთის მთავარი მიზანი კანონთან კონფლიქტში მყოფი პირების რესოციალიზაცია რეაბილიტაციაა. ევროპასთან ასოცირების ხელშეკრულებით საქართველოს აქვს ვალდებულება კანონთან კონფლიქტში მყოფი პირების რესოციალიზაცია-რეაბილიტაციისა და დასაქმების სახელმწიფო პროგრამები დროთა განმავლობაში მიუახლოვოს და დაუქვემდებაროს სტანდარტს.

რამდენად შეესაბამება ყოფილი პატიმრების სარეაბილიტაციო პროგრამები სტანდარტებს საქართველოში, მოცემულია კვლევაში, რომელიც ორგანიზაციამ „ინიციატივა მოწყვლადი ჯგუფების რეაბილიტაციისთვის“ ჩაატარა.

კვლევის დიდი ნაწილი ეთმობა პენიტენციურ სისტემაში და მის გარეთ პატიმრებისა და ყოფილი პატიმრების პროფესიულ განათლებას, რაც გათავისუფლების შემდეგ ამ ჯგუფისთვის დასაქმების საფუძველი უნდა იყოს.

პროფესიული სწავლების პროცესი მიმდინარეობს როგორც პენიტენციურ დაწესებულებებში, ისე საზოგადოებრივ კოლეჯებში. თუმცა პენიტენციურ სისტემაში პროფესიული სწავლება ყველა დაწესებულებაში არ არის თანაბრად ხელმისაწვდომი. ბენეფიციარს აქვს საშუალება მოკლე ვადაში (6 თვეში) ერთ-ერთი მოდულის გავლით მოიპოვოს შესაბამისი კრედიტები. ხშირად განათლებისა და მეცნიერების სამინისტროს მიერ შემოთავაზებული კურსები მხოლოდ თეორიულ სწავლებას ეფუძნება და არ მოიცავს პრაქტიკულ ნაწილს. მაშინ, როცა ბენეფიციართა უმრავლესობისთვის მნიშვნელოვანია პრაქტიკაზე დაფუძნებულ მოკლევადიან პროგრამებში ჩართვა.

კვლევაში მოცემული რეკომენდაციის მიხედვით აუცილებელია, პროფესიული განათლების მიმწოდებლებმა თეორიული სწავლების პარალელურად პრაქტიკული აღჭურვილობის ბაზაც შექმნან.

სერვისების დეფიციტი, ბაზების არარსებობა

კვლევის მიხედვით პენიტენციურ დაწესებულებებში სერვისების დეფიციტია. ძირითადი სარეაბილიტაციო სერვისები ხელმისაწვდომია მხოლოდ სამ: N11, N5 და N16 პენიტენციურ დაწესებულებაში, სადაც განთავსებულია პატიმართა დაახლოებით 5% .

არ არსებობს სხვადასხვა სახის სერვისების ბაზები, რაც ხელმისაწვდომი იქნებოდა სხვადასხვა სახელმწიფო უწყების, მედიისა და არასამთავრობო ორგანიზაციისათვის. ბაზები სასურველია შეიცავდეს უახლეს ინფორმაციას მიმდინარე და დასრულებული პროგრამების შესახებ. ბაზის არარსებობა, ხელს უშლის პროგრამების ეფექტურ დაგეგმვას, ასევე ორგანიზაციიდან ორგანიზაციაში ბენეფიციარების გადამისამართების შესაძლებლობას სასურველი სერვისის მისაღებად.

მიმდინარე პროგრამებთან დაკავშირებით ინფორმაციის არარსებობის გამო, ორგანიზაციები ზოგჯერ ერთსა და იმავე სერვისს სთავაზობენ ბენეფიციარებს, სხვა საჭირო სერვისები კი საერთოდ არ არის მიწოდებული.

კვლევის შედეგად გამოიკვეთა, რომ არ არის ჩამოყალიბებული მიწოდებული სერვისების ხარისხის უზრუნველყოფის სისტემა და შესაბამისად, ვერც გათავისუფლებისთვის მომზადების ერთიანი პროცესის ანალიზი ხორციელდება.

პენიტენციურ სისტემის ხარისხის კონტროლის მექანიზმები არაერთგვაროვანია და სისტემატიზირებული არ არის. აუცილებელია ჩამოყალიბდეს ხარისხის კონტროლის სისტემა, რაც საკანონმდებლო დონეზე უნდა იყოს რეგულირებული.

ბენეფიციართა დაბალი მოტივაცია

როგორც კვლევებმა აჩვენა, პენიტენციურ სისტემაში, ბენეფიციარებს აქვთ დაბალი მოტივაცია ჩაერთონ პროგრამებში. ხშირ შემთხვევაში, მათ არ აქვთ სრულყოფილი ინფორმაცია სერვისების შესახებ, რომელსაც შესაბამისი უწყებები ახორციელებენ. არ არის ჩამოყალიბებული ბენეფიციართა მოტივირების ეფექტიანი და მტკიცებულებებზე დაფუძნებული სისტემა, რაც სახელმწიფო სერვისებსა და პროგრამებს ბენეფიციარებისთვის მეტად მიმზიდველს გახდიდა.

კრიმინალური სუბკულტურა

ბენეფიციართათავის სერვისების მიწოდების პროცესში ერთ-ერთ ხელისშემშლელ ფაქტორად კვლევაში კრიმინალური სუბკულტურაა დასახელებული. კვლევები აჩვენებს, რომ კრიმინალურ სუბკულტურაში არსებული წესების თანახმად, ბენეფიციართა ჩართვა საგანმანათლებლო-სარეაბილიტაციო პროგრამებში ცუდ ტონად ითვლება პატიმართა გარკვეულ ჯგუფებს შორის, რაც შესაძლოა ახდენდეს გავლენას ბენეფიციართა მოტივაციაზე.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

მთავარ ფოტოზე: ილუსტრაცია „ციხის საერთაშორისო რეფორმის” მხარდაჭერით მომზადებული კვლევიდან – „გაეროს განახლებული მინიმალური სტანდარტული წესები პატიმრებთან მოპყრობის შესახებ (,,ნელსონ მანდელას წესები“)

საქართველოს პარლამენტის გენდერული თანასწორობის საბჭომ ლექტორის მხრიდან სტუდენტის სექსუალური შევიწროების სავარაუდო ფაქტთან დაკავშირებით განცხადება გამოაქვეყნა.

განცხადებას უცვლელად გთავაზობთ:

“საბჭო პირადად დაუკავშირდა სტუდენტს და დამატებით მიიღო ინფორმაცია მომხდარის შესახებ. საბჭო მხარს უჭერს სექსუალური შევიწროების წინააღმდეგ მებრძოლ ყველა სტუდენტს და მადლობას უხდის მათ გამბედაობისთვის.

სექსუალური შევიწროებისგან დაცვის ეფექტიანი საშუალებები სახელმწიფომ უკვე შექმნა – სექსუალური შევიწროება, როგორც დისკრიმინაციის ერთ-ერთი სახე აკრძალულია საქართველოს კანონმდებლობით, ამასთან, სექსუალური მოძალადისთვის განსაზღვრულია სათანადო პასუხისმგებლობა. აღსანიშნავია, რომ სექსუალური შევიწროება საგანმანათლებლო სივრცეში ზიანს აყენებს არა მხოლოდ კონკრეტულ მსხვერპლს, არამედ აზარალებს საგანმანათლებლო პროცესს და მთლიანად საზოგადოებას.

დღეს, როდესაც ქვეყანაში გენდერული თანასწორობის მიღწევისთვის ვიბრძვით, საზოგადოების იმ ნაწილს, რომელიც მზად არის ღიად ისაუბროს სექსუალური შევიწროების ფაქტებზე, დაუცველობის განცდა არ უნდა დარჩეთ.

გენდერული თანასწორობის საბჭო მოუწოდებს ყველა კომპეტენტურ ორგანოს, შემჭიდროებულ ვადაში განიხილონ საქმე და მოახდინონ ადეკვატური რეაგირება.

საბჭო დააკვირდება უფლებამოსილი უწყებების რეაქციებს და განაგრძობს კომუნიკაციას ბსუ-ს სტუდენტ(ებ)თან”.

____

სტატია იმის შესახებ, რომ ბათუმის უნივერსიტეტის მეორე კურსის სტუდენტი ლექტორს სექსუალურ შევიწროებაში ადანაშაულებს, „ბათუმელებმა“ 21 მაისს გამოაქვეყნა. 19 წლის სტუდენტი ამბობს, რომ ლექტორი მას ფეისბუქზე წერდა, სთხოვდა თამამ სელფებს და უკომპლექსოდ მოქცევას. ასევე ჰპირდებოდა, რომ ამის შესახებ ვერავინ გაიგებდა.

სტუდენტისგან სექსუალურ შევიწროებაში დადანაშაულებულმა ლექტორმა ბრალდება „ბათუმელებთან” უარყო. მისი თქმით, ბოლო კვირაა რაც შენიშნა, რომ ფეისბუქი გაუტეხეს, თუმცა IT სპეციალისტთან მისვლა ვერ შეძლო.

სტუდენტმა განცხადებით მიმართა უნივერსიტეტს და შინაგან საქმეთა სამინისტროსაც. შსს-მ გამოძიება თავდაპირველად  საქართველოს სისხლის სამართლის კოდექსის 150-ე მუხლით დაიწყო, რაც იძულებას გულისხმობს და ისჯება ჯარიმით ან გამასწორებელი სამუშაოთი ვადით ერთ წლამდე ან იმავე ვადით თავისუფლების აღკვეთით. მოგვიანებით მუხლი შეიცვალა. გამოძიება ამჯერად სისხლის სამართლის კოდექსის 139-ე მუხლის მეორე ნაწილით მიმდინარეობს, რაც გულისხმობს „სექსუალური ხასიათის სხვაგვარი ქმედების იძულებას“.

აჭარის კულტურული მემკვიდრეობის დაცვის სააგენტომ [კმდს] გვარას ციხეზე არქეოლოგიური გათხრების შედეგად ცხრა ქვევრი აღმოაჩინა. ექსპედიციამ ციხის შიდა ტერიტორიაზე სხვადასხვა დანიშნულების ნაგებობებიც შეისწავლა. კონკრეტულად, ციხის სამხრეთ-აღმოსავლეთ გალავანში ჩართული კოშკი.

„როგორც გაირკვა, თავის დროზე ციხეს შესასვლელი სწორედ ამ მხრიდან ჰქონია. კოშკი აკონტროლებდა ციხეში ამომავალ ერთადერთ გზას და მნიშვნელოვანი ადგილი ეკავა ციხის თავდაცვით სისტემაში.

კოშკის შიდა სივრცეში იატაკის დონეზე აღმოჩნდა 9 ქვევრი. არქეოლოგიური გათხრების პარალელურად დანაწევრდა და ციხის გარეთ გაიზიდა გალავნის ჩაქცეული კედლების უმეტესი ნაწილი. გაივლო საკონტროლო თხრილები ციხის გარეთ – დასავლეთ, ჩრდილოეთ და სამხრეთ კედლებთან. გაიწმინდა ციხის მიმდებარე ტერიტორიაც“, – ნათქვამია აჭარის კმდს-ს მიერ გავრცელებულ ინფორმაციაში. 

გვარას ციხე ნიგალისა და მაჭახლის ხეობის გასაღები იყო. ამ ციხესთან გაივლიდა შავშეთისა და კლარჯეთისაკენ მიმავალი გზები. ციხის ძირითადი დანიშნულებაც მდ. ჭოროხისა და მაჭახლის წყლის ხეობაზე გამავალი გზების გაკონტროლება იყო. „იგი ყველა ეპოქაში თავისი ადგილმდებარეობით მიმზიდველი იყო და XI ს-დან XX ს-ის I ნახევრამდე დიდ როლს ასრულებდა მდ. ჭოროხის ხეობის ერთიანი თავდაცვითი სისტემის ჯაჭვში“.

ცხვრის ფარას თუშეთში მწყემსები წელიწადში ორჯერ მიერეკებიან, გაზაფხულსა და შემოდგომაზე: მაისის დასაწყისიდან დასასრულამდე და სექტემბრის ბოლოდან ოქტომბრის შუა რიცხვებამდე.

ეს ფოტოები მწყემსმა არჩილ აქიმიძემ თუშეთში რამდენიმე დღის წინ გადაიღო, როცა სოფელ ფშაველიდან ფარას ომალოსკენ მიერეკებოდა. კადრებზე ცხვრის ფარა გადადის ზღვის დონიდან 2950 მეტრზე მდებარე, თუშეთთან დამაკავშირებელ აბანოს უღელტეხილზე. აქ ამ დროს ჯერ კიდევ დიდია თოვლი და ავტომობილები ვერ მოძრაობს. აბანოს უღელტეხილი ევროპაში ყველაზე მაღალი უღელტეხილია, სადაც საავტომობილო გზა გადის.

კურორტ ბახმაროში 9 მიწის ნაკვეთი და მათზე განლაგებული შენობა-ნაგებობები საქართველოს მთავრობამ „ორბი ჯგუფი ბახმაროს“ 1 ლარად მიჰყიდა. ნაკვეთების საერთო ფართობი 43 269 კვ.მ-ია. კომპანიამ სიმბოლურ ფასად გადაცემულ ქონებაზე 5 წლის ვადაში უნდა აამოქმედოს არანაკლებ 120 ნომრის მქონე სასტუმრო/სასტუმროები, კომერციული ფართობ[ებ]ი, კვების ობიექტ[ებ]ი, სპორტული მოედნები და სხვ.

განკარგულების მიხედვით, რომელსაც პრემიერ-მინისტრმა მამუკა ბახტაძემ  ხელი 2019 წლის 15 მაისს მოაწერა, „ორბი ჯგუფი ბახმაროს“ აღნიშნული ქონების გადაცემიდან [ხელშეკრულების გაფორმებიდან] 10 წლის ვადაში ეკრძალება აქ მრავალბინიანი საცხოვრებელი სახლების მშენებლობა.

მთლიანობაში კი კომპანიამ პირადად, ან მესამე პირის მეშვეობით, ჯამში 50 მილიონი ლარის [დღგ-ს გარეშე] ინვესტიცია უნდა განახორციელოს.

28 მაისის მდგომარეობით, აღნიშნული ნაკვეთები, რომლებიც ბახმაროში, ძირითადად, გურიის ქუჩაზე მდებარეობს, ჯერ ისევ სახელმწიფოს საკუთრებაშია.

„ორბი ჯგუფი ბახმარო“ დაახლოებით ხუთი თვის წინ, 2018 წლის 27 დეკემბერსაა რეგისტრირებული. მისი დირექტორი ირაკლი კვერღელიძეა, ხოლო 100% წილის მფლობელი – ზვიად ზოიძე.

—

„ორბი ჯგუფი“ საქართველოში ერთ-ერთი ყველაზე მაღალბიუჯეტიანია. „ორბი ჯგუფის“ დამფუძნებლებმა და მასთან დაკავშირებულმა პირებმა 2014 წელს სახელისუფლებო პარტიას დიდი თანხა შესწირეს. ზაზა ზოიძემ „ოცნებას“ 40 ათასი ლარი შესწირა. 60 ათასი ლარი შესწირა „ქართულ ოცნებას“ კომპანიის კიდევ ერთმა დამფუძნებელმა ელგუჯა ლომინეიშვილმა. „ორბის“ დირექტორმა ირაკლი კვერღელიძემ კი მმართველ პარტიას 60 ათასი ლარი შესწირა. 40 ათასი ლარი შესწირა „ქართულ ოცნებას“ შპს „ორბი ბეტონის“ დირექტორმა და კომპანიის წილის 50%-ის მფლობელმა მალხაზ ბერიძემ. ამ თემაზე: შეწირე და მიიღე. 

ირაკლი კვერღელიძემ 2018 წლის საპრეზიდენტო არჩევნებში 25 ათასი ლარი შესწირა „ოცნების“ მიერ მხარდაჭერილ კანდიდატს სალომე ზურაბიშვილს.