სულხან ღლონტი: რუსულ ენაზე ტურისტებთან კომუნიკაცია არის პრობლემა

ბათუმში ხშირია შემთხვევა, როცა კერძო სექტორის წარმომადგენლები რუს ტურისტებს რუსულ ენაზე მიმართავენ და ეპატიჟებიან რუსულ ენაზე. ასევე კაფე-ბარებსა და რესტორნებში ხშირად მენიუ წარმოდგენილია მხოლოდ რუსულ ენაზე. ამ საკითხზე „ბათუმელები“ აჭარის ტურიზმის დეპარტამენტის ხელმძღვანელს, სულხან ღლონტს ესაუბრა და ჰკითხა, ხედავს თუ არა ამაში პრობლემას და რა როლი უნდა შეასრულოს დეპარტამენტმა იმისთვის, რომ კერძო სექტორმა ქართული ენის, კულტურის პოპულარიზაცია მშობლიურ ენაზე აწარმოოს და არა რუსულ ენაზე.

ქალაქში ხშირად შეგხვდებათ სარეკლამო ბანერები, რომლებზეც ინფორმაცია მხოლოდ რუსულ ენაზეა განთავსებული
ფოტო: მანანა ქველიაშვილი

სულხან ღლონტი აღიარებს, რომ რუსულ ენაზე რუს ტურისტებთან კომუნიკაცია არის პრობლემა, რადგან მისი აზრით, ტურიზმიც ეროვნული ინტერესებიდან უნდა ამოდიოდეს.

„ჩვენ გავაკეთეთ ლევან მიქელაძის საგანმანათლებლო სკოლასთან შეთანხმება, რომელიც საგარეო საქმეთა სამინისტროს დაქვემდებარებაშია და ტურიზმის სფეროს წარმომადგენლებთან გავიარეთ სასემინარო კურსი მსგავს თემებზეც.

სატრენინგო კურსის დროს სრული ინფორმაცია მივაწოდეთ მათ ქვეყნის ოკუპაციასთან დაკავშირებით ყველა იმ კითხვაზე, რასაც სვამენ როგორც რუსი ტურისტები, ასევე ტურისტები ევროკავშირის ქვეყნებიდან. მაქსიმალურად ვცდილობთ, ყველა ნაბიჯი გადავდგათ იმისთვის, რომ რაც შეიძლება ეროვნული ინტერესებიდან ამოვიდეს ყველა ნაბიჯი,“ – ამბობს სულხან ღლონტი.

მისი თქმით, ტურიზმის სფეროს წარმომადგენლებს ესაუბრნენ ელჩები, დესპანები, კონსულები და მსგავსი შინაარსის ტრენინგები სამომავლოდაც გაგრძელდება.

კაფეებსა და რესტორნებში ასევე ნახავთ მენიუს მხოლოდ რუსულ ენაზე

სულხან ღლონტის თქმით, მიუხედავად იმისა, რომ რუსეთი არ არის სამიზნე ქვეყანა და ფული არ იხარჯება ჩვენი ქვეყნის რეკლამირებაზე, ამ ქვეყნიდან შემომსვლელი ტურისტების მაჩვენებელი მაინც მაღალია. „ეს აიხსნება საქართველოს მიმართ ცნობადობით, ასევე ინტერესით. რუსეთის სარეკლამო ბაზარზე ჩვენ ფინანსებს არ ვხარჯავთ 2017 წლის შემდეგ“.

სულხან ღლონტის თქმით, წელს სამიზნე ქვეყნებს წარმოადგენს გერმანია და დიდი ბრიტანეთი, ასევე ბალტიისპირეთის ქვეყნები. მისი თქმით, 15 ივნისს, ტურისტული სეზონის გახსნის დღეს, ევროკავშირის სამი ქვეყნიდან – პოლონეთი, ლიეტუა, ესტონეთი, ჩარტერული რეისები შესრულდება. „ასევე მეზობელი ქვეყნებიდან ველოდებით ბევრ ტურისტს,“ – ამბობს სულხან ღლონტი.

ამავე თემაზე: ბათუმის იახტკლუბში ტურისტებს რუსულ ენაზე ეპატიჟებიან

ტურიზმი რუსულ ენაზე

„რატომ აცხადებთ მომსახურების შესახებ ინფორმაციას მხოლოდ რუსულ ენაზე?რა ვქნათ, რუსები არიან მარტო, ქართველი ტურისტი არაა. როცა ქართველები შემოვლენ, მერე ქართულსაც დავამატებთ“. ასეთია სტანდარტული პასუხი ბათუმის იახტკლუბში დასაქმებულთაგან, როცა ეკითხები, თუ რატომ არ აკეთებენ საქართველოს სახელმწიფო ენაზე რეკლამას.

Posted by ბათუმელები • Batumelebi.ge on ორშაბათი, 27 მაისი, 2019

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com