Batumelebi

აჭარაში კორონავირუსის 79 ახალი შემთხვევა დადასტურდა. ამავე პერიოდში გამოჯანმრთელდა 92 პაციენტი.

დღეის მონაცემებით, აჭარის კოვიდკლინიკებში მკურნალობს 353 პაციენტი, მათგან მართვით სუნთქვაზე იმყოფება 8 ადამიანი.

ბოლო 24 საათში აჭარაში კოვიდით პაციენტის გარდაცვალება არ დაფიქსირებულა.

ამავე თემაზე: 

3 ოქტომბრის მონაცემებით, ბოლო 24 საათში საქართველოში კოვიდით 33 ადამიანი გარდაიცვალა. ამავე პერიოდში დადასტურდა კორონავირუსის 1 164 ახალი შემთხვევა.

ბოლო 24 საათში გამოჯანმრთელებულად მიიჩნევა 2 292  ადამიანი.

2 ოქტომბრის მონაცემებით, საქართველოში დადებითობის დღიური მაჩვენებელი 5,27%-ია.

დღეის მონაცემებით სტაციონარში მეთვალყურეობის ქვეშაა 4 102 ინფიცირებული, კლინიკურ სასტუმროში იმყოფება 675 ადამიანი.

3 ოქტომბრის მონაცემებით, საქართველოში სულ ჩატარდა 1 813 679 აცრა კორონავირუსზე, დღიურად აცრილთა რაოდენობაა 5 159.

2021 წლის არჩევნების შედეგების წინასწარი მონაცემები გვაჩვენებს, რომ ამომრჩევლის განწყობა „მმართველი პარტიის“ მიმართ მკვეთრად შეიცვალა და გვაჩვენებს იმასაც, რომ საკრებულოებში პოლიტიკური გადანაწილების ახალი მოცემულობის გათვალისწინებით პროცესი ბევრი კონტექსტით იქნება საინტერესო.

მონაცემები საბოლოო არ არის, თუმცა დიდი ალბათობით ციფრები მკვეთრად აღარ შეიცვლება. ამიტომაც განსაკუთრებით საინტერესოა როგორ იმუშავებს ბათუმის 35-წევრიანი საკრებულო, სადაც ოპოზიციას 19 წევრი ეყოლება. ამ მონაცემებში გიორგი გახარიას გუნდის სამი წევრიც შედის. შესაბამისად, დიდი მნიშვნელობა ექნება ამ პარტიის წევრების პოზიციებს იმის გასარკვევად, თუ ვინ მიიღებს გადაწყვეტილებებს ბათუმის შემდეგი მოწვევის საკრებულოში – ისევ „ოცნება“ თუ ოპოზიცია.

საკრებულოების შეკრებამდე წინ ჯერ არჩევნების საბოლოო შედეგების გამოქვეყნება და მეორე ტურია. ამ დროისთვის უკვე დაზუსტებით ვიცით, რომ ბათუმში მეორე ტურში მონაწილეობას მიიღებენ მერობის კანდიდატი „ოცნებიდან“ არჩილ ჩიქოვანი და „გაერთიანებული ოპოზიციის“ კანდიდატი გიორგი კირთაძე.

3 ოქტომბრის 7:20 საათის, მონაცემებით გიორგი კირთაძემ ამომრჩეველთა ხმების – 41,97%  ,არჩილ ჩიქოვანმა კი  -41,8% მიიღო.

გიორგი გახარიას ფაქტორი ამ ბრძოლაშიც  მნიშვნელოვანია. ვის დაუჭერენ მხარს გახარიას პარტიის ამომრჩევლები მეორე ტურში, რა მესიჯებს გააჟღერებს პარტია საკუთარი ამომრჩევლისთვის? – ამ კითხვაზე მკაფიო პასუხი დღეს არ გვაქვს.

ახალი პოლიტიკური კონფიგურაცია ბათუმის საკრებულოში

ამ დროისთვის, 2021 წლის 2 ოქტომბრის არჩევნების შედეგების თანახმად, პროპორციული წესით ბათუმის საკრებულოში ოთხი პარტიის წარმომადგენლები შევლენ: „ქართული ოცნება“, ნაციონალური მოძრაობა“, „გახარია – საქართველოსთვის“ და „ლელო“.

ბათუმის 79-ე საოლქო კომისიის ინფორმაციით, ამ დროის მონაცემებით, „ქართულმა ოცნებამ“ 39.42 პროცენტი მიიღო [29 789 ხმა], „ნაციონალურმა მოძრაობამ“ 38.34 პროცენტი [28 970 ხმა], შემდეგ მოდის „გახარია საქართველოსთვის“ – 10.4 პროცენტით [7 587 ხმა], 3.2 მიიღო „ლელომ“ [2447 ხმა].

შესაბამისად, „ქართული ოცნება“ 35-წევრიან ბათუმის საკრებულოში 12 წევრის შეყვანას შეძლებს პროპორციული სიით, ამას დაემატება მაჟორიტარები. ამ დროს მონაცემებით, „ქართული ოცნება“ ბათუმის საკრებულოში 4 მაჟორიტარის შეყვანას შეძლებს. გაერთიანებულ ოპოზიციას პროპორციული სიით 12 წევრი შეჰყავს საკრებულოში. იგივე მონაცემების თანახმად,  ოპოზიციას  3 მაჟორიტარი ეყოლება. შესაბამისად, ოპოზიურ პარტიებს ბათუმის საკრებულოში 19 წევრი ეყოლებათ და 16 წევრი კი „ქართულ ოცნებას“.

მუნიციპალიტეტები

წინასწარი მონაცემებით, 2 ოქტომბრის ადგილობრივი თვითმმართველობის არჩევნებზე „ქართული ოცნების“ მერობის კანდიდატმა ხელვაჩაურში, ზაზა დიასამიძემ, ამომრჩეველთა ხმების 42.9% მიიღო, ხოლო „გაერთიანებული ოპოზიციის“ მერობის კანდიდატმა მიშა ბოლქვაძემ – 41.18 %.  შესაბამისად, საბოლოო შედეგი აქაც მეორე ტურმა უნდა გამოავლინოს.

ქობულეთის მერის არჩევნებში „ქართული ოცნების“ კანდიდატი – ლევან ზოიძე ლიდერობს. ცესკოს წინასწარი მონაცემებით, ლევან ზოიძემ ხმების 52.5 პროცენტი მიიღო.

აჭარის სხვა მუნიციპალიტეტებში – ქედაში, შუახევსა და ხულოში „ოცნების“ მერობის კანდიდატები ლიდერობენ. ამავე ოლქებში პროპორციული სიის მიხედვით „ოცნება“ იგებს, თუმცა პროცენტული მაჩვენებლების მიხედვით ოპოზიცია საკრებულოებში ფრაქციების შექმნას შეძლებს.

ამ დრომდე აჭარაში ისევე, როგორც მთელს ქვეყანაში, მაჟორიტარულ ოლქებს უმეტესწილად „ოცნება“ იგებდა, ეს არჩევნები კი განსხვავებული შედეგით დასრულდა.

ქობულეთში 13 მაჟორიტარული ოლქია, აქედან წინასწარი მონაცემებით, ორ ოლქში ოპოზიცია ლიდერობს. ხელვაჩაურის რვა ოლქიდან სამს იგებს ასევე ოპოზიციის კანდიდატი. ქედაში შვიდი მაჟორიტარული ოლქიდან ოპოზიცია მხოლოდ ერთ ოლქში ლიდერობს. ამდენივე ოლქია შუახევში, აქ შვიდივეში „ოცნება“ იგებს, ხულოში კი ოპოზიცია მხოლოდ ერთ უბანზე ლიდერობს.

არჩევნების დღე, დარღვევები, ზეწოლა და მუქარა

კოორდინატორების მობილიზება საარჩევნო უბნებთან 2 ოქტომბრის თვითმმართველობის არჩევნებზეც ერთ-ერთი მთავარი პრობლემა იყო. ამას დაემატა ისიც, რომ წელს ისინი განსაკუთრებით აგრესიულები იყვნენ ჟურნალისტებისა და არასამთავრობო ორგანიზაციების დამკვირვებლების მიმართ.

          „მოგხედავთ“, „ვიმახსოვრებთ სახელებს“ – ბათუმის საარჩევნო უბანზე ჟურნალისტს დაემუქრნენ. 

თვითმმართველობის არჩევნებზე ბათუმის არაერთ საარჩევნო უბანთან დააფიქსირეს მოქალაქეები, რომლებიც დიდხანს იდგნენ საარჩევნო უბნებთან და თან ჰქონდათ სიები.

„დაგიმტვრევ თავ-ყბას თუ უფლება არ გაქვს და ისე იღებ” – ამ სიტყვებით ბათუმის N44 უბანზე საიას დამკვირვებელს მიმართავს უბნის მიმდებარე ტერიტორიაზე მყოფი უცნობი პირი.

„დაგიმტვრევ თავ-ყბას“ – საიას დამკვირვებლისთვის ბათუმში ტელეფონის წართმევა სცადეს

2 ოქტომბერს, ადგილობრივი თვითმმართველობის არჩევნების გაშუქებისას „ბათუმელებმა“ ორჯერ მიმართა პოლიციას ჟურნალისტზე მუქარის და საარჩევნო კოდექსის შესაძლო დარღვევის გამო.

„ბათუმელებმა“ დღეს ორჯერ მიმართა პოლიციას – მუქარის და ხელისშეშლის ფაქტები

შს სამინისტროს ინფორმაციით, 2 ოქტომბერს, თვითმმართველობის არჩევნებზე საქართველოს მთელ ტერიტორიაზე, სხვადასხვა საარჩევნო უბანთან, დაფიქსირებული ძალადობის შემთხვევებზე სისხლის სამართლის მუხლით 16 შემთხვევაში დაიწყო გამოძიება. დაკავებულია 7 ადამიანი.

ჩვენ დავინტერესდით, რამდენი პირი დაჯარიმდა საარჩევნო უბანთან 100  მეტრის რადიუსში თავშეყრის აკრძალვის წესის დარღვევის გამო. პასუხი ჯერჯერობით არ მიგვიღია.

საჩივრები

ბათუმის საოლქო-საარჩევნო კომისიის თავმჯდომარის, ციალა შავაძის  ინფორმაციით, კომისიაში 41 საჩივარი შევიდა, მათგან უმეტესობა პროცედურულ დარღვევებს უკავშირდება. მისივე განმარტებით, „ამ დარღვევებიდან უმეტესობა ადგილზევე აღმოფხვრეს კომისიის წევრებმა, ხოლო რაზეც რეაგირება არ მოახდინეს, ამ საჩივრებს კომისია კანონის შესაბამისად განიხილავს.“

ამას ემატება ის საჩივრებიც, რომლებიც ბათუმის საუბნო კომისიებში დაწერეს დამკვირვებლებმა. ციალა შავაძის ინფორმაციით, საოლქო კომისიაში და უბნებზე შესული საჩივრები ძირითადად იდენტური შინაარსისაა.

დღეს, 3 ოქტომბერს, „ლელომ“ საგანგებო ბრიფინგი გამართა, სადაც განაცხადა, რომ ოპოზიცია ბათუმის მე-7 ოლქში, ცამეტივე საარჩევნო უბანზე ხმების ხელმეორედ გადათვლას მოითხოვს.„ლელოს“ განცხადებით, 13-ივე საარჩევნო უბანზე ბათილად არის ცნობილი 925 ბიულეტენი და ხელოვნურად არის შექმნილი დისბალანსი.

გააბათილეს 925 ბიულეტენი, „ოცნების“ კანდიდატს 5 ხმით გაამარჯვებინეს – ოპოზიცია

არასამთავრობო ორგანიზაცია „სამართლიანი არჩევნების“ შეფასებით 2021 წლის 2 ოქტომბრის არჩევნებზე საარჩევნო უბნების უმრავლესობაზე კენჭისყრის პროცესი, ძირითადად, მშვიდ გარემოში, კანონის მოთხოვნების დაცვით მიმდინარეობდა. თუმცა, გამოიკვეთა ცალკეული ტენდენციები, რომლებმაც არჩევნების დღის გარემოზე უარყოფითად იმოქმედეს.

„დაფიქსირდა ხმის მიცემის ფარულობის დარღვევის არაერთი ფაქტი, უბანზე ყოფნის უფლების მქონე პირთა მიერ ამომრჩეველთა აღრიცხვა, არასათანადო დოკუმენტაციის საფუძველზე ხმის მიცემის რამდენიმე შემთხვევა და მარკირების გავლისა და შემოწმების პროცედურის დაუცველად ხმის მიცემა. ზოგიერთ შემთხვევაში, რეგისტრატორებს გამორჩათ ამომრჩეველთა ხელმოწერები. დაფიქსირდა ბიულეტენის გაცემის წესის დარღვევა. ხშირი იყო „სამართლიანი არჩევნების“ დამკვირვებლებისთვის დაკვირვების უფლების შეზღუდვა, რაც, ძირითადად, გამოიხატებოდა მათთვის მტრული გარემოს შექმნაში. აღნიშნული ფიქსირდებოდა საარჩევნო უბნების გახსნის მომენტიდან და ჰქონდა განგრძობადი ხასიათი.“

_____

ცესკოს წინასწარი მონაცემებით, 2 ოქტომბრის ადგილობრივი თვითმმართველობის არჩევნებზე „ქართული ოცნების“ ქედის მერობის კანდიდატი, როლანდ ბერიძე ლიდერობს.

მან ქედაში ამომრჩეველთა ხმების 56.66 პროცენტი მიიღო, ხოლო მისმა მთავარმა კონკურენტმა, გაერთიანებული ოპოზიციის კანდიდატმა, რამინ ბერიძემ 35.1 % მიიღო.

7.83% მიიღო ელგუჯა ნაკაშიძემ, პარტია „გახარია – საქართველოსთვის“ კანდიდატმა.

ქედაში 32 საარჩევნო უბნიდან 30 უბანი დათვლილია.

როლანდ ბერიძე ამ დრომდე ქედის მერის მოადგილეა. მანამდე ბერიძე აჭარის საავტომობილო გზების მართვის დეპარტამენტში, სახელმწიფო შესყიდვების განყოფილებაში მუშაობდა.

ცესკოს წინასწარი მონაცემებით, 2 ოქტომბრის ადგილობრივი თვითმმართველობის არჩევნებზე „ქართული ოცნების“მერობის კანდიდატმა ხულოში, ვახტანგ ბერიძემ ამომრჩეველთა ხმების 54.3% მიიღო, ხოლო ოპოზიციური ერთობის კანდიდატმა, გოგიტა სოლომონიძემ – 36.47 %.

ამ დროისთვის ხულოში 55 უბნიდან დათვლილია 54 უბანი.

ამ შედეგებით, წინასწარი მონაცემების თანახმად, არჩევნები ხულოში ვახტანგ ბერიძემ მოიგო.

ვახტანგ ბერიძე 2019 წლის 10 ივნისიდან უკვე არის ხულოს მუნიციპალიტეტის მერი, მანამდე ხულოს მერის მოადგილე იყო, უფრო ადრე კი – აჭარის პოლიციის დეპარტამენტის ხულოს რაიონული სამმართველოს უფროსი.

ხულოს მერის არჩევნებში სამი კანდიდატი მონაწილეობდა: ერთიანი ოპოზიციის, „გახარია – საქართველოსთვის“ და „ქართული ოცნების“ კანდიდატები.

ხმები ასე გადანაწილდა:

• ვახტანგ ბერიძე, „ქართული ოცნება“ – 54.3%
• გოგიტა სოლომონიძე, ერთიანი ოპოზიცია – 36,47 %
• გია აბულაძე, „გახარია საქართველოსთვის“ – 9,22%

ცესკოს მონაცემებით, ხულოში ხმა მისცა 14 879-მა მოქალაქემ – რეგისტრირებულ ამომრჩეველთა 61.61%-მა.

ცენტრალური საარჩევნო კომისიის წინასწარი მონაცემებით, ბათუმის მერის არჩევნებში ოპოზიციის კანდიდატი გიორგი კირთაძე და „ოცნების“ კანდიდატი, არჩილ ჩიქოვანი ლიდერობენ, თუმცა, ამ დროისთვის არსებული ინფორმაციით, მათ მიერ მიღებულ ხმებს შორის სხვაობა მცირეა და ვერც ერთ ვერ უახლოვდება 50-პროცენტიან ბარიერს, რაც საჭიროა არჩევნების პირველ ტურში გასამარჯვებლად.

ამ დროსთვის [07:30] არჩილ ჩიქოვანს აქვს ამომრჩეველთა ხმების 41.49%, ხოლო გიორგი კირთაძეს – 42.34%. 

ბოლო მონაცემებით, ბათუმში 105 უბნიდან 34 უბანია დათვლილი.

საარჩევნო კოდექსის მიხედვით, მერის არჩევნებში არჩეულად ჩაითვლება ის კანდიდატი, რომელმაც არჩევნებში მონაწილე ამომრჩეველთა ხმების 50%-ზე მეტი მიიღო, წინააღმდეგ შემთხვევაში ინიშნება არჩევნების მეორე ტური, სადაც მონაწილეობს 2 კანდიდატი, რომლებმაც პირველ ტურში სხვებზე მეტი ხმა მიიღეს.

მერის არჩევნების მეორე ტური ტარდება მერის არჩევნებიდან მეოთხე შაბათს.

საარჩევნო კოდექსის თანახმად, არჩევნების მეორე ტურში არჩეულად ჩაითვლება ის კანდიდატი, რომელმაც მეტი ხმა მიიღო. თუ კანდიდატებმა თანაბარი რაოდენობის ხმები მიიღეს, არჩეულად ჩაითვლება ის კანდიდატი, რომელმაც პირველ ტურში მეტი ხმა მიიღო და თუ ხმათა ეს რაოდენობებიც ტოლი აღმოჩნდა, გამარჯვებულად ჩაითვლება ის კანდიდატი, რომელმაც უფრო ადრე გაიარა რეგისტრაცია.

ცესკოს წინასწარი მონაცემებით,  ბათუმის მერის არჩევნებში ოპოზიციის კანდიდატი, გიორგი კირთაძე ლიდერობს 42.34% პროცენტით – 8681 ხმა.

„ქართული ოცნების“ კანდიდატს, არჩილ ჩიქოვანს ხმების 41.49% აქვს – 8506 ხმა.

ამ დროისთვის ბათუმში 105 უბნიდან 34 უბანია დათვლილი.

მერის არჩევნებში კანდიდატს გამარჯვებისთვის სჭირდება მიცემულ ხმათა ნახევარზე მეტი – 50 პროცენტს პლუს თუნდაც ერთი ხმა. წინააღმდეგ შემთხვევაში გაიმართება  მეორე ტური, სადაც  არჩევანის გაკეთება შესაძლებელი იქნება იმ ორ კანდიდატს შორის, რომლებიც პირველ ტურში ამომრჩეველთა ყველაზე მეტ ხმას მიიღებენ.

ცესკოს მონაცემებით, ბათუმში ხმა მისცა 77 494-მა მოქალაქემ – რეგისტრირებულ ამომრჩეველთა 52.36%-მა.

ამავე თემაზე: 

ბათუმის #56 საარჩევნო უბანზე ხმების დათვლის დროს აღმოჩნდა, რომ სამი ბიულეტენი კონვერტის გარეშეა. სამივე ბიულეტენზე „ერთიანი ნაციონალური მოძრაობაა“ შემოხაზული.

დამკვირვებელმა ოპოზიციური ერთობიდან ბიულეტენების გადათვლა მოითხოვა, იმის გასარკვევად, ბიულეტენები უკონვერტოდ ჩააგდეს ყუთში თუ ყუთიდან გადმოვარდა.

ამ საკითხის განხილვას უბანზე დაძაბულობა მოჰყვა. საარჩევნო კომისიის თავმჯდომარემ საოლქო კომისიას მიმართა, ადგილზე მოვიდა ასევე ერთიანი ნაციონალური მოძრაობის ერთ-ერთი ლიდერი ბათუმში, მირდატ ქამადაძე.

მსჯელობის შემდეგ გადაწყდა, რომ სამივე ბიულეტენი ჩაითვლება, რადგან ვერავინ გაიხსენა ბიულეტენების უკონვერტოდ ყუთში მოთავსების ფაქტი.  შესაბამისად, კონვერტებს უბანზე აღარ გადათვლიან.

ბათუმის 106 საარჩევნო უბანზე ამომრჩეველთა ხმებს ითვლიან. „ბათუმელების“ კორესპონდენტები ქალაქის სხვადასხვა უბანზე ადევნებენ თვალს არჩევნებს. ბევრ ადგილას ხმის დათვლის პროცედურა ჯერ ისევ მიმდინარეობს, რამდენიმე უბანზე კი უკვე ოქმიც მზად აქვთ.

მიუხედავად იმისა, რომ საარჩევნო უბნების დახურვიდან 8 საათი გავიდა, ცესკოს ვებგვერდზე ამ დრომდე არ ატვირთულა არც ერთი შემაჯამებელი ოქმი ბათუმიდან.

„ბათუმელები“ გთავაზობთ 3 ოქმის მონაცემებს იმ უბნებიდან, სადაც ჩვენი გამოცემის ჟურნალისტები იმყოფებოდნენ. შეგახსენებთ, ეს არის მხოლოდ 3 უბნის მონაცემები, ბათუმში დასათვლელია კიდევ 103 საარჩევნო უბანი.

ბათუმის #75 საარჩევნო უბანზე ოპოზიციის მერობის კანდიდატმა ბათუმში, გიორგი კირთაძემ მიიღო 282 ხმა, „ოცნების“ კანდიდატმა არჩილ ჩიქოვანმა – 241. დანარჩენი ხმები მერობის სხვა კანდიდატებზე გადანაწილდა.

ამავე უბანზე პარტია „ქართულმა ოცნებამ“ მიიღო 251 ხმა, „ნაციონალურმა მოძრაობამ“ – 271 ხმა, „გახარია – საქართველოსთვის“ – 62 ხმა, „ლელომ“ – 17 ხმა, „ზურაბ გირჩი – ჯაფარიძემ“ – 17 ხმა. დანარჩენი ხმები სხვა პარტიებზე გადანაწილდა.

ამავე უბანზე მაჟორიტარული საარჩევნო სისტემით 141 ხმა მიიღო „მესამე ძალის“ კანდიდატმა ბექა დიასამიძემ, 143 ხმა – ჯემალ ანანიძემ, რომელიც გახარიას პარტიის კანდიდატია და 249 ხმა – „ოცნების“ კანდიდატმა, ლევან დოლიძემ.

ამ უბანზე 668-მა ამომრჩეველმა მისცა ხმა.

ბათუმის #23 საარჩევნო უბანზე ოპოზიციის მერობის კანდიდატმა ბათუმში, გიორგი კირთაძემ მიიღო 430 ხმა, „ოცნების“ კანდიდატმა არჩილ ჩიქოვანმა – 354 ხმა. დანარჩენი ხმები მერობის სხვა კანდიდატებზე გადანაწილდა.

ამავე უბანზე პარტია „ქართულმა ოცნებამ“ მიიღო 339 ხმა, „ნაციონალურმა მოძრაობამ“ – 429 ხმა, „გახარია – საქართველოსთვის“ – 94 ხმა, „ლელომ“ – 15 ხმა, „ზურაბ გირჩი – ჯაფარიძემ“ – 10 ხმა. დანარჩენი ხმები სხვა პარტიებზე გადანაწილდა.

ამავე უბანზე მაჟორიტარული საარჩევნო სისტემით 442 ხმა მიიღო „ნაციონალური მოძრაობის“ კანდიდატმა ნუგზარ ფუტკარაძემ, 345 ხმა – „ოცნების“ კანდიდატმა, მამუკა კაკაბაძემ.

ამ უბანზე 943-მა ამომრჩეველმა მისცა ხმა.

ბათუმის #40 საარჩევნო უბანზე ოპოზიციის მერობის კანდიდატმა ბათუმში, გიორგი კირთაძემ მიიღო 361 ხმა, „ოცნების“ კანდიდატმა არჩილ ჩიქოვანმა – 339.

ამავე უბანზე პარტია „ქართულმა ოცნებამ“ მიიღო 351 ხმა, „ნაციონალურმა მოძრაობამ“ – 334 ხმა, „გახარია – საქართველოსთვის“ – 67 ხმა, „ლელომ“ – 22 ხმა. დანარჩენი ხმები სხვა პარტიებზე გადანაწილდა.

ამავე უბანზე მაჟორიტარული საარჩევნო სისტემით 360 ხმა მიიღო „ნაციონალური მოძრაობის“ კანდიდატმა ნაზი ფუტკარაძემ, 364 ხმა – „ოცნების“ კანდიდატმა, მამული ლომაძემ.

ამ უბანზე 869-მა ამომრჩეველმა მისცა ხმა.

შეგახსენებთ, ბათუმში 106 საარჩევნო უბანია. ცესკოს ცნობით წინასწარი შედეგების გამოქვეყნება დაიწყება 3 ოქტომბრის დილას.

ცესკოს ოფიციალური მონაცემებით, აჭარაში, 2 ოქტომბრის თვითმმართველობის არჩევნებში ხმა მისცა 177 457-მა მოქალაქემ ანუ რეგისტრირებულ ამომრჩეველთა 56.4 პროცენტმა.

მუნიციპალიტეტების მიხედვით სტატისტიკა ასე გამოიყურება:

• ბათუმი – ხმა მისცა 77 494-მა მოქალაქემ – 52.36%
• ქედა – ხმა მისცა 11 252-მა მოქალაქემ – 71.93%
• ქობულეთი – ხმა მისცა 37 936 მოქალაქემ – 56.34%
• შუახევი – ხმა მისცა 9988 მოქალაქემ – 66.25%
• ხელვაჩაური – ხმა მისცა 25 908 მოქალაქემ – 58.31%
• ხულო – ხმა მისცა 14 879 მოქალაქემ – 61.61%

საარჩევნო უბნები საღამოს 20:00 საათზე დაიხურა. ამჟამად მიმდინარეობს ხმების დათვლა საარჩევნო უბნებზე.

ბოლო 10 წელში ბათუმში არჩევნებზე ამომრჩევლების აქტიურობას რომ გადავავლოთ თვალი, ყველაზე მაღალი აქტივობა 2012 წლის საპარლამენტო არჩევნებზე დაფიქსირდა – 58 პროცენტი. მაღალი იყო ამომრჩეველთა აქტივობა ბათუმში 2020 წლის საპარლამენტო არჩევნებზეც – 55.14 პროცენტი.

____________

ფოტოზე: ადგილობრივი თვითმმართველობის არჩევნები ბათუმში

ბათუმის მე-15 უბანზე დღეს, 2 ოქტომბერს 3 საჩივარი დაიწერა, მათ შორის ერთი საჩივარი – დამკვირვებლების წინააღმდეგ. საჩივრის ავტორიც დამკვირვებელია.

რამდენიმე დამკვირვებლის წინააღმდეგ საჩივარი უბანზე ახალგაზრდა იურისტთა ასოციაციის დამკვირვებელმა, ლიკა გოგაძემ დაწერა. მანამდე მან კომისიის თავმჯდომარეს უთხრა, რომ სხვა დამკვირვებლები რეგისტრატორების მაგიდებთან კანონით დაშვებულზე უფრო ახლოს იდგნენ და ამომრჩეველთა სამაგიდო სიებიდან ამომრჩეველთა პერსონალურ მონაცემებს ამუშავებდნენ.

„ასეთი შემთხვევები სხვა უბნებზეც იყო“, – ამბობს საია-ს იურისტი, მირზა მამულაძე. ის განმარტავს, რომ კონკრეტული დამკვირვებლები საეჭვოდ ამუშავებდნენ პერსონალურ მონაცემებს.

„საეჭვოდ ხდებოდა ამ მონაცემების დამუშავება… ამ დროს არსებობს რისკი, რომ დამკვირვებელი, რომელიც აფილირებულია რომელიმე პოლიტიკურ ძალასთან, პარტიას ამომრჩევლების გამოცხადება-არგამოცხადების შესახებ აწვდიდეს მონაცემებს, ვინ მოვიდა, არ მოვიდა და ასე შემდეგ“- აღნიშნა მირზა მამულაძემ „ბათუმელებთან“.

„დამკვირვებელს აქ დგომას მე ვერ დავუშლიდი, მეტი სივრცე არაა,”- აცხადებს ბათუმის მე-15 საარჩევნო უბნის თავმჯდომარე, ლია შუბლაძე.

ამ უბანზე კიდევ ორი საჩივარი დაიწერა: ერთის მიხედვით, რეგისტრატორმა სამი ერთნაირი ბიულეტენი მიაწოდა ერთი და იგივე ამომრჩეველს, რაც მან გადაღლილობით ახსნა, ხოლო კიდევ ერთი საჩივრის მიხედვით, ერთ რეგისტრატორთან სამი ამომრჩეველი იყო ერთად.

მე-15 საარჩევნო უბნის კომისიის წევრებს დილით კენჭისყრის შენობაზე (ტექნოლოგიური ფაკულტეტი, ფიროსმანის ქუჩა) წარწერა დახვდათ “მიშა ჩამოვიდა”. წარწერა შუადღეზე წაშალეს, თუმცა უბნის კომისიის თავმჯდომარის თქმით, მას არავისთვის მიუმართავს, რადგან „შენობის გარეთ რა ხდება, ეს მისი საქმე არ არის“.

ბათუმში, #12-ე საარჩევნო უბანზე, რომელიც ბათუმის მერვე საჯარო სკოლაშია განთავსებული, სამი საჩივარი დაიწერა. პირველი საჩივარი, რომელიც „ნაციონალური მოძრაობის“ დამკვირვებელმა დაწერა, შეეხება საარჩევნო უბნების წინ „ქართული ოცნების“ აგიტატორების მობილიზებას.

როგორც ენმ-ს დამკვირებელი ამბობს, მან საჩივარი დაწერა იმის გამო, რომ უბნის თავმჯდომარემ არ შეატყობინა საოლქოს არსებული სიტუაცია, რათა საოლქოს თავის მხრივ მიემართა შსს-სთვის და  შეეწყვიტათ „ქართული ოცნების“ აგიტატორებს უბანთან მობილიზება.

ამავე უბანზე მეორე საჩივარი დაიწერა იმის გამო, რომ უბანზე ერთ-ერთ მარკირებულ ამომრჩეველს ხმის მიცემის უფლება მისცეს. „ქალი ამბობდა, რომ სხვა უბანზე შეცდომით შევიდა და ამიტომ ჰქონდა მარკირება“ – ამბობს დამკვირვებელი.

ამ უბანზე მესამე საჩივარიც დაიწერა, რადგან რეგისტრატორმა ამომრჩეველს ერთიან სამაგიდო სიაში ხელი არ მოაწერინა და ისე მისცა საარჩევნო ბიულეტენი.

“მიშა ჩამოვიდა”, “მიშა აქაა”, “თავისუფლება მიშას” – ეს და კიდევ სხვა შინაარსის წარწერები ბათუმის ქუჩებში, საქართველოს ექს-პრეზიდენტის, მიხეილ სააკაშვილის ჩამოსვლის შემდეგ გაჩნდა.

1-ელი ოქტომბრის დილით, მიხეილ სააკაშვილმა ფეისბუკზე გამოაქვეყნა ორი ვიდეო და თქვა, რომ ის ბათუმშია. ხელისუფლების წარმომადგენლები მთელი დღის განმავლობაში ირწმუნებოდნენ, რომ ვიდეო ყალბია.

1-ელი ოქტომბრის საღამოს საქართველოს პრემიერ-მინისტრმა ირაკლი ღარიბაშვილმა, მიხეილ სააკაშვილის დაკავების შესახებ განაცხადა.

მიხეილ სააკაშვილს ბრალი უკვე წაუყენეს საზღვრის უკანონო კვეთის ბრლადებით, თუმცა ჯერჯერობით, ხელისუფლებას არ უთქვამს, როგორ და სად გადმოკვეთა მან საქართველოს საზღვარი.

ფიროსმანის ქუჩა:

ჰაიდარ აბაშიძის ქუჩა:

26 მაისის ქუჩა:

რუსთაველის ქუჩა:

გორგასლის ქუჩა:

ვაჟა-შაველას ქუჩა:

რუსთაველის ქუჩა:

„ნაციონალური მოძრაობის“ განცხადებით, 13:00 საათისთვის ბათუმის საარჩევნო უბნებზე ჯამში 56 საჩივარი დაიწერა. საარჩევნო დარღვევების შესახებ განცხადება გააკეთა ენმ-ს წარმომადგენელმა მირდატ ქამადაძემ. მისი თქმით, ბათუმის საარჩევნო უბნებზე გამოვლინდა შემდეგი სახის დარღვევები:

• მე-14 უბანზე მარკირების სითხე უხარისხოა, რის გამოც ფაქტობრივად ვერ ხერხდება მარკირება. პრობლემა საჩივრის დაწერის მიუხედავად აღმოფხვრილი არ არის.
• 22-ე საარჩევნო უბანზე, ამომრჩეველს არ გაუკეთეს მარკირება.
• 37-ე საარჩევნო უბანზე, კომისიის თავმჯდომარეს ხათუნა ბერაძეს შსს-ს წარმომადგენელმა მოსთხოვა საათობრივი ინფორმაცია ამომრჩევლის აქტივობის შესახებ. თავმჯდომარე დათანხმდა. ფაქტზე დაიწერა საჩივარი.
• მე-40, მე-8, 41-ე და 48-ე უბნებზე მობილიზებული არიან „ქართული ოცნების“ აგიტატორები, არ იცავენ 100-მეტრიან დისტანციას, აწარმოებენ ამომრჩევლის აღრიცხვას და მათ ნებაზე ზეწოლას.
• მე-6 და მე-18 საარჩევნო უბნებზე კომისიის თავმჯდომარეები ხელს უშლიან დამკვირვებლებს მუშაობაში, არ აძლევენ ამომრჩევლის სიებში გადამოწმების საშუალებას.
• მე-5 და 98-ე საარჩევნო უბნებზე ამომრჩეველს ხელი მოაწერინეს სხვის ნაცვლად, ერთს კი საერთოდ არ მოაწერინეს. „ამ ფაქტს ეძახიან ტექნიკურ ხარვეზს, თუმცა ჩვენს გვაქვს ეჭვი, რომ „ქართული ოცნება“ აპირებს ე.წ კარუსელს“ – ამბობს მირდატ ქამადაძე.
• 56-ე და მეორე უბნებზე ხმის მიცემას ცდილობდნენ პირები, რომლებიც არ იყვნენ საარჩევნო სიაში. „ეს ფაქტი აღკვეთეს ჩვენმა დამკვირვებლებმა, თუმცა ფაქტია, რომ ადგილი ჰქონდა „კარუსელის“ მცდელობას“.
• ბონი-გოროდიკის მაჟორიტარის, „ელენე ხოშტარია – დროა“ პარტიიდან, დიმიტრი დარჩიას ოფისთან იმყოფებოდნენ სუს-ის წარმომადგენლები, რომლებიც ოფისში შემსვლელ პირებს ფოტოებს უღებდნენ, რაც შეფასდა ამომრჩეველზე ზეწოლად.

„საღამოს საათებში ქართული ოცნების ხელისუფლება ემზადება კარუსელებისთვის“ – აცხადებს ირაკლი კუპრაძე, პარტია„ლელოს“ საარჩევნო სიის პირველი ნომერი ბათუმის საკრებულოში.

„ამისთვის მონიშნულია 20 ძირითადი საარჩევნო უბანი, რომლებიც მამუკა მდინარაძემ დააანონსა წინმსწრებით. ეს არის ის 20 საარჩევნო უბანი, სადაც ოპოზიციური ერთობის მიერ წარდგენილ კანდიდატებთან მიმართებით, “ქართული ოცნება” სასტიკად მარცხდება ყველა მაჩვენებლის მიხედვით.

ამ 20 უბანზე ჩვენ ველოდებით განსაკუთრებულ დაძაბულობას, რათა შეძლონ შედეგების გაბათილება ან გავლენის მოხდენა, ამას არ დავუშვებთ, რადგან ჩვენი კომისიის წევრები, წარმომადგენლები, მობილიზებულები არიან და არიან მზად ნებისმიერ პროვოკაციას უპასუხონ მშვიდობიანად და სამართლებრივად” – განაცხადა ირაკლი კუპრაძემ ბრიფინგზე.

მან ასევე აღნიშნა, რომ საარჩევნო უბნებთან მიკროავტობუსებში კოორდინატორების მობილიზება აღინიშნება.

„ფულის გადაცემის პროცესში ჩვენ ვერ მოვახერხეთ გადაღება … და სწორედ “ბათუმელებმა” გააშუქა ის ორი მიკროავტობუსი, საიდანაც ხდებოდა რეალურად თანხების გადაცემა. ამას ადასტურებენ თავად ის ადამიანები, ვინც თავის დროზე ინფორმაცია მოგვაწოდა იქ არსებული მდგომარეობის შესახებ. ჩვენ ვცდილობთ მაქსიმალურად. რომ ეს დავაფიქსიროთ, თუმცა საქმე ეხება დაბურულმინებიან მიკროავტობუსებს, სადაც არის ათობით კოორდინატორი და თავიანთი სიების მიხედვით არიგებენ ფულს“ – ამბობს ირაკლი კუპრაძე.

30 სექტემბერს „ქართული ოცნების“ ფრაქციის თავმჯდომარემ, მამუკა მდინარაძემ განაცხადა, რომ „ნაციონალური მოძრაობა“ 20-მდე საარჩევნო უბანზე არჩევნების ჩაშლას აპირებს.

მდინარაძის ბრიფინგს ბათუმში ოპოზიციის მერობის კანდიდატი, გიორგი კირთაძე გამოეხმაურა, რომელიც ამბობს, რომ მდინარაძემ ან ფაქტები და დოკუმენტები წარმოადგინოს, ან „შეეშვას ჭორაობას“.

#28 სარჩევნო უბანზე კომისიის თავმჯდომარესა და დამკვირვებელს შორის სიტყვიერი დაპირისპირება მოხდა. დამკვირვებელმა უბანზე პოლიცია გამოიძახა.

„კომისიის თავმჯდომარე არცერთ დამკვირვებელს არ გვაძლევს უბანზე გადაადგილების უფლებას. არც პირადობის მოწმობების გადამოწმების საშუალებას გვაძლევს, ფაქტობრივად შეგვიზღუდა გადაადგილება. არც ნაკადების რეგულირება ხდება, ერთ რეგისტრატორთან 7-8 ამომრჩეველი დგას“ – ამბობს ირმა ხოროშვილი, „ნაციონალური მოძრაობის“ წარმომადგენელი საოლქო საარჩევნო კომისიაში.

მისი თქმით, კომისიის თავმჯდომარე მანანა კახიძეს ცოტა ხნის წინ, „ქართული ოცნების“ შტაბიდან ესაუბრა ვინმე დავით ქარცივაძე. „არ ვიცი რა მითითებები მიიღო ამ ადამიანისგან, მაგრამ ჩვენ მუშაობის საშუალებას არ გვაძლევს“ – ამბობს ირმა ხოროშვილი.

„ბათუმელები“ კომისიის თავმჯდომარესაც ესაუბრა და ჰკითხა, თუ რამ გამოიწვია დაპირისპირება მასა და დამკვირვებელს შორის. მანანა კახიძე ამბობს, რომ მან მხოლოდ ერთხელ მისცა ხოროშვილს შენიშვნა, რაზეც მას აგრესიული რეაქცია ჰქონდა.

„დილიდან იღებენ ყველაფერს, არანაირი შეზღუდვა არ ჰქონიათ, შენიშვნებსაც ვაძლევდი გონივრულს, რადგან რეგისტრატორის უკან რომ დგანან დამკვირვებლები, რამდენიმემ ტელეფონი ამოიღო რაზეც შენიშვნა მივეცი. ეს გოგო შემომივარდა, გამოიწია ხელით, უკანასკნელი სიტყვებით მომმართა -„ვინ აგდიხარ, იცი რას გიზამ“ და ასე შემდეგ. ვერ გავაჩერეთ“-ამბობს ის დამკვირვებელზე.

უბანზე გამოძახებულია პოლიცია.

__________________________

ფოტოზე: ბათუმის 28-ე საარჩევნო უბანი

ბათუმის #2 საარჩევნო უბანზე დღის 14:00 საათისთვის ოთხი საჩივარია დაწერილი.

ოთხივე საჩივარი ენმ-ის წევრებმა დაწერეს საარჩევნო პროცესში აღმოჩენილი პროცედურული დარღვევების გამო.

ორი საჩივარი დილით, უბნის გახსნის დროს დაიწერა.

ერთ-ერთ რეგისტრატორს პირადობის მოწმობა დაავიწყდა და ისე იყო საარჩევნო უბანზე მისული. რეგისტრატორს პირადობა სახლიდან მოუტანეს. მე-2 საარჩევნო უბნის კომისიის თავმჯდომარის თქმით, რეგისტრატორს საარჩევნო პროცესში პირადობის მოწმობის მიტანამდე არ მიუღია მონაწილეობა.

მეორე დარღვევა ისევ პირადობის მოწმობის საკითხს ეხება.

ამომრჩეველმა მარკირება მართვის მოწმობით გაიარა, რაც მოგვიანებით რეგისტრატორმა აღმოაჩინა.

მოქალაქე საარჩევნო უბანზე დააყოვნეს და მან ხმა მხოლოდ მას შემდეგ მისცა, რაც სახლიდან პირადობა მიუტანეს.

მე-2 საარჩევნო უბნის კომისიის თავმჯდომარის გიული დუმბაძის თქმით, სანამ მოქალაქისთვის ხმის მიცემის პროცედურაში მონაწილეობის უფლებას მისცემდა, მან საოლქო საარჩევნო კომისიასთან გაიარა კონსულტაცია.

„ოლქიდან დამირეკეს და მითხრეს, რომ მოქალაქეს შეეძლო ხმის მიცემა თუკი უკვე თან ჰქონდა პირადობის მოწმობა. ჩვენ ამის საშუალება მივეცით იმიტომ, რომ მისი ხმა არ დაკარგულიყო,”- გვითხრა გიული დუმბაძემ.

ამ შემთხვევაზეც ორი საჩივარი დაიწერა.

დღეს, 2 ოქტომბერს, საქართველოში ადგილობრივი თვითმმართველობის არჩევნები მიმდინარეობს. რამდენიმე საარჩევნო უბანზე დილის 8 საათიდან რიგია – ამომრჩევლები ხმის მიცემას ელოდებიან.