აჭარის მთავრობის თავმჯდომარე თორნიკე რიჟვაძემ დღეს, 2 ოქტომბერს, არჩევნებთან დაკავშირებულ დარღვევებზე ისაუბრა და განაცხადა, რომ „ქართულმა ოცნებამ” არაერთი დარღვევა დააფიქსირა, თუმცა მხოლოდ „ნაციონალური მოძრაობის“ და სხვა ოპოზიციური პარტიების მხრიდან. ამასთან, თორნიკე რიჟვაძის შეფასებით, ადგილობრივი თვითმმართველობის არჩევნები მშვიდობიან გარემოში მიმდინარეობს.
„დღის განმავლობაში ჩვენ დავაფიქსირეთ არაერთი დარღვევა, როგორც ნაცმოძრაობის, ასევე სხვა ოპოზიციური პარტიების მხრიდან, რომლებიც არღვევენ საარჩევნო კანონმდებლობას. რა თქმა უნდა ეს, ყველაფერი იქნება დაფიქსირებული და გადაეცემა სადამკვირვებლო ორგანიზაციებს, ვინაიდან წელს, ამ თვითმმართველობის არჩევნებს არაერთი რეპუტაციული საერთაშორისო ორგანიზაციის წარმომადგენელი აკვირდება” – თქვა მან.
თორნიკე რიჟვაძის თქმით, ძირითადად საუბარია აგიტაციის წესების დარღვევაზე:
„როგორც მოგეხსენებათ, შესაბამის საარჩევნო კანონმდებლობით განსაზღვრულ ასმეტრიან რადიუსზე დაფიქსირდა როგორც ნაცმოძრაობის წარმომადგენლები, ასევე სხვა ოპოზიციური პარტიის წარმომადგენლები შესაბამისი სიებით. ასევე იყო გარკვეული მცდელობები პროვოკაციის, თუმცა ჩვენ უზრუნველვყოფთ, რომ ყველა ეს პროვოკაცია იქნას განეიტრალებული და არჩევნებმა ჩაიაროს მშვიდ გარემოში“.
დღეს დარღვევებზე ისაუბრა „ქართული ოცნების“ წევრმა, ტიტე აროშიძემაც. მისი თქმით, ბათუმში 46-ე, 55-ე და 64-ე უბანთან 5 მეტრის რადიუსში „ნაციონალური მოძრაობის“ წარმომადგენლები მათი მხარდამჭერების სიებით დგანან.
„ეს არის კანონდარღვევა, რადგან უბანთან ახლოს დგანან სიებით მათი წარმომადგენლები. ასევე, ისინი ცდილობენ პროვოცირებას და შედიან კონფლიქტი ამომრჩეველთა და კომისიის წევრებთან“.
დარღვევებზე საუბრობს ოპოზიციაც. ერთიანი „ნაციონალური მოძრაობის“ განცხადებით, დღის პირველი საათისთვის პარტიის დამკვირვებლებმა 54 საჩივარი დაწერეს.
დღეს ბათუმში ბრიფინგი გამართა პარტია „ლელომაც“, რომლის განცხადებითაც საღამოს „ქართული ოცნება“ ემზადება კარუსელებისთვის.
არჩევნებს მთელი დღის განმავლობაში აკვირდება „ბათუმელები“. თითქმის ყველა საარჩევნო უბნის მიმდებარედ შეინიშნება მიკროავტობუსების და მანქანების მობილიზება. კითხვაზე, რას აკეთებენ აქ, მანქანაში მსხდომები ჟურნალისტებს აგრესიით პასუხობენ.
