დღეს, 3 ოქტომბერს, „ლელომ“ საგანგებო ბრიფინგი გამართა, სადაც განაცხადა, რომ ოპოზიცია ბათუმის მე-7 ოლქში, ცამეტივე საარჩევნო უბანზე, ხმების ხელმეორედ გადათვლას მოითხოვს.„ლელოს“ განცხადებით, 13-ივე საარჩევნო უბანზე ბათილად არის ცნობილი 925 ბიულეტენი და ხელოვნურად არის შექმნილი დისბალანსი.
„როგორც ვხედავთ, „ქართულმა ოცნებამ“ მანიპულაციის გზით მოახერხა, რომ პირველივე ტურში გაეყალბებინა მისი კანდიდატის, მინდია გოგუაძის გამარჯვება, მხოლოდ და მხოლოდ 0,6 პროცენტით. ჩვენ გვაქვს ინფორმაცია, რომ ეს ბიულეტენები არის ჩამალული, უსამართლოდ გაყალბებული და გაბათილებული.
შესაბამისად, კატეგორიულად ვითხოვთ საოლქო საარჩევნო კომისიის მხრიდან თავმჯდომარის პასუხისმგებლობის დაყენებას და 13-ვე საარჩევნო უბნის ხელმეორედ გადათვლას“, – ამბობს ირაკლი კუპრაძე, „ლელოს“ სიის პირველი ნომერი.
ლელოს ინფორმაციით, 5 ხმა აღმოჩნდა გადამწყვეტი, რომ ბათუმის მე-13 უბანზე მეორე ტური აღარ გაიმართოს. მანამდე არსებობდა ინფორმაცია, რომ 37 % ჰქონდა „ქართული ოცნების“ კანდიდატს მეშვიდე საარჩევნო ოლქში და შემდეგ სრულიად შემთხვევით, გაბათილებული ბიულეტენების ხარჯზე აღმოჩნდა, რომ მხოლოდ და მხოლოდ 0,6 მეასედი პროცენტით გადაუსწრო 40- პროცენტიან ბარიერს, რაც ნიშნავს, რომ ეს ოლქი არის გაყალბებული,“- ამბობს კუპრაძე.
მისი თქმით, ამ მოთხოვნაში „ლელოს“ უერთდება ყველა ოპოზიციური პარტია, რომლებიც შეთანხმებულნი არიან აჭარაში საერთო კანდიდატსა და მაჟორიტარებზე. ოპოზიცია მოუწოდებს ცენტრალურ და საოლქო საარჩევნო კომისიას, მიიღონ რაციონალური გადაწყვეტილება და გამჭვირვალობის გზით, გადაითვალოს 13-ვე საარჩევნო უბანი.
„ჩვენ ვიბრძოლებთ, მივმართავთ ნებისმიერ ფორმას, როგორც მანიფესტაციებსა და აქციებს, ასევე სამართლებრივ გზებსაც. ვითხოვთ ვიდეოკამერების წინ გადაითვალოს ეს უბნები, სადაც ვნახავთ, რომ გვექნება ფაქტობრივი მტკიცებულება, რომ ეს ხმები არის მიკერძოებული და მითვისებული. ბოლომდე ვაპირებთ ბრძოლას ამ უფლებისთვის და არანაირ დათმობას არ ვაპირებთ“, – ამბობს ირაკლი კუპრაძე.
