შსს ინფორმაციით, დააკავეს პირი, ვის საცხოვრებელ ბინაშიც იმყოფებოდა მიხეილ სააკაშვილი თბილისში, დაკავების დროს.
„დანაშაულის დაფარვის ბრალდებით დაკავებულია საცხოვრებელი ბინის მეპატრონე, 1958 წელს დაბადებული პირი, გამოძიება სსკ-ის 375-ე მუხლის პირველი ნაწილით მიმდინარეობს“ – აცხადებს შსს.
მათივე ინფორმაციით, საქართველოს მესამე პრეზიდენტი მიხეილ სააკაშვილი გუშინ, პირველ ოქტომბერს, თბილისში, გლდანი-ნაძალადევის რაიონის ტერირორიაზე ერთ-ერთ საცხოვრებელ ბინაში დააკავეს.
შეგახსენებთ, რომ მიხეილ სააკაშვილის ვიდეოები პირველ ოქტომბერს გავრცელდა ფეისბუკის გვერდზე, სადაც ის ამბობდა, რომ იმყოფებოდა ბათუმში. მთელი დღის განმავლობაში ხელისუფლების წარმომადგენლები უარყოფდნენ სააკაშვილის საქართველოში ყოფნას, თუმცა საღამოს, დაახლოებით 20:00 საათისთვის, პრემიერ-მინისტრმა ირაკლი ღარიბაშვილმა საგანგებო ბრიფინგზე განაცხადა რომ სააკაშვილი დააკავეს. მას რამდენიმე მუხლით აქვს ბრალი წაყენებული, რასაც ახალი ბრალდება, – საზღვრის უაკნონო კვეთაც დაემატა.
„შინაგან საქმეთა სამინისტრომ მიხეილ სააკაშვილის მიერ საქართველოს სახელმწიფო საზღვრის უკანონო კვეთის ფაქტთან დაკავშირებით გამოძიება საქართველოს სისხლის სამართლის კოდექსის 344-ე მუხლით დაიწყო.“ – აცხადებს შსს.
