თემურ კახიძე: ბილიარდის ფედერაცია აჭარაში 1996 წელს დაარსდა, თუმცა, მაშინ მას ბილიარდის დამოუკიდებელი ფედერაცია ერქვა. ორი წლის განმავლობაში ტურნირები მხოლოდ ბათუმის მასშტაბით ტარდებოდა. საბოლოოდ, მიხვდა მაშინდელი ხელმძღვანელობა, რომ ასე კარჩაკეტილი დიდხანს ვერ იქნებოდა, უბრალოდ, ვერ იარსებებდნენ და ე.წ. „დამოუკიდებელი ფედერაცია“ აჭარის საზღვრებს ვერ გასცდებოდა. სწორედ ამიტომ, 1998 წელს, მათ თხოვნით მიმართეს საქართველოს ბილიარდის ფედერაციას და გაწევრიანდნენ კიდეც ამ ორგანიზაციაში, რის შემდეგაც ჩვენი მობილიარდეები უკვე ეროვნულ ჩემპიონატებსა თუ სხვადასხვა ტურნირში იღებდნენ მონაწილეობას. მართალია, 1997 წლიდან აქ, ბათუმში ვატარებდით ტურნირს რუსული ბილიარდის ერთ-ერთ სახეობაში – თავისუფალ ან კლასიკურ პირამიდაში, თუმცა, ეროვნულ ფედერაციაში გაწევრიანებამ დამატებითი სტიმული მისცა სპორტსმენებს და ყველაფერს რომ თავი დავანებოთ, ბილიარდი, როგორც სპორტის სახეობა, განვითარების ახალ ეტაპზე გადავიდა, სპორტსმენთა დონეც ამაღლდა, მარტო დავით ფიფიას სახელიც კმარა, რომელიც საქართველოს მრავალგზის ჩემპიონია.
– მახსოვს, ლერმონტოვის ქუჩაზე, სადაც ამჟამად ქალაქ ბათუმის მერია მდებარეობს, საკმაოდ კარგი დარბაზი იყო და ტურნირებსაც ხშირად მასპინძლობდით…
– დიახ, თუმცა, მოგვიანებით, ე.წ. ვარდების რევოლუციის შემდეგ, ის შენობაც ჩამოერთვა მობილიარდეებს და მაგიდებიც სადღაც გაქრა (!). არადა, ყველაფერი მართლა ისე იყო მოწყობილი, რომ თავისუფლად შეიძლებოდა მსოფლიო თასის, ასევე სხვადასხვა რანგის საერთაშორისო ტურნირის მასპინძლობა. თითოეულ მაგიდასთან 6-8 ვიდეოკამერა იყო დამონტაჟებული, მოკლედ რომ გითხრათ, ყველაფერი ევროსტანდარტების დონეზე იყო მოწყობილი. ამას გარდა, საქართველოს უძლიერეს მობილიარდეთა ათეულში ყოველთვის შედიოდა 2-3 კაცი ბათუმიდან. შემდეგ კი იყო უქმად ყოფნის პერიოდი. ფაქტობრივად, ბოლო ოთხი წლის განმავლობაში სპორტის ეს სახეობა მკვდარი იყო. არც ტურნირი ჩატარებულა და არც ჩვენი სპორტსმენები გამგზავრებულან სადმე. მართალია, იყვნენ ადამიანები, ვინც შეძლებისდაგვარად პატრონობდნენ სპორტის ამ სახეობას და გვერდში უდგნენ სპორტსმენებს, მაგრამ ეს ვერაფერი ნუგეში იყო. ადრე საქართველოს ბილიარდის ფედერაციის ვიცე-პრეზიდენტი ვიყავი, სპორტი მიყვარს და გული მტკიოდა, როდესაც ასეთ სავალალო მდგომარეობაში ვხედავდი ამ სახეობას. ასე რომ, შევიკრიბეთ თანამოაზრეები და ფაქტობრივად, თავიდან დავაარსეთ ფედერაცია, ხელახლა დავარეგისტრირეთ 2012 წლის დეკემბერში. პრეზიდენტად მე ამირჩიეს. ტრაბახში ნუ ჩამომართმევთ, მაგრამ მიმაჩნია, რომ ამის შემდეგ ბათუმში ბილიარდის აღმასვლა დაიწყო. მარტო ის ფაქტი რად ღირს, რომ 2013 წლის იანვარში სარეიტინგო ტურნირი ჩავატარეთ ბათუმში. აუცილებლად უნდა აღვნიშნო და მადლობა გადავუხადო ჩემს მეგობარს, შპს „მოდერნის“ დირექტორს გიორგი გუბელაძეს, რომელმაც დააფინანსა ეს ტურნირი. მარტში აჭარის ჩემპიონატი ჩავატარეთ, აპრილში კი ეროვნულ ჩემპიონატზე წარვგზავნეთ ორი მონაწილე – დავით ფიფია და ნუგზარ თებიძე, სადაც ფიფიამ მესამე ადგილი დაიკავა. ეროვნული ფედერაციის კვოტით საქართველოს მომდევნო ჩემპიონატზე, რომელიც ახლახან გაიმართა, მხოლოდ ორი ადგილი გვქონდა გამოყოფილი, მაგრამ ორი სპორტსმენი შესარჩევ ეტაპზე გავგზავნეთ, ორივემ გაიმარჯვა და საბოლოოდ, ჩემპიონატზე აჭარამ ოთხი მონაწილე წარადგინა. ტურნირი კომბინირებულ პირამიდაში ჩატარდა. აღსანიშნავია, რომ ბათუმელებმა დავით ფიფიამ და დავით ჯორბენაძემ 16 მონაწილეს შორის, შესაბამისად, მესამე და მეოთხე ადგილები დაიკავეს, ეს კი ურიგო შედეგი ნამდვილად არ არის. 20 წლის გიორგი დიმიტრაძე კი მეშვიდე ადგილზე გავიდა, სამწუხაროდ, ამ ტურნირზე ნუგზარ თებიძეს ხელი მოეცარა, მაგრამ დარწმუნებული ვარ, ის თავის სიტყვას აუცილებლად იტყვის.
– ამჟამად სად ვარჯიშობენ სპორტსმენები?
– სამწუხაროდ, სავარჯიშო ბაზა არ გაგვაჩნია. პირადად მე სახლში მიდგას ერთი მაგიდა, სადაც ხშირად მოდიან და ვარჯიშობენ, ამას გარდა, გიორგი გუბელაძესთანაც დადიან და კერძო კლუბებშიც. წარმოიდგინეთ, ორი მაგიდით კონკურენციას ვუწევთ თბილისს, სადაც სულ მცირე, 25 კლუბია.
– არავინ გეხმარებათ?
– მადლობა ღმერთს, გვაქვს იმის საშუალება, ჩვენს სპორტსმენებს თავადვე ვუპატრონოთ, თუმცა, არ შემიძლია არ აღვნიშნო ის ფაქტი, რომ აჭარის სპორტის დეპარტამენტმა დაფინანსების სახით 5 ათასი ლარი გამოგვიყო, რისთვისაც მის ხელმძღვანელს მერაბ ნაგერვაძეს მადლობას მოვახსენებ. მართალია, წლიურად ეს თანხა მიზერულია, მაგრამ მთავარი თანადგომა და ყურადღებაა. აგრეთვე, დაგვპირდნენ, რომ თუ დადებითი შედეგი გვექნებოდა, მომავალი წლიდან დაფინანსებასაც გაგვიზრდიდნენ.
– სამომავლო მიზანი და უახლოესი პერსპექტივა…
– პირველ რიგში, გვინდა ის ტრადიცია დავუბრუნოთ ჩვენს ქალაქს, რაც ჰქონდა, ამჟამად საქართველოს 16 საუკეთესოთა შორის სამი ბათუმელია და მათი რიცხვის გაზრდა გვსურს. აგვისტოში აჭარის ჩემპიონატს ჩავატარებთ, სექტემბერში კი საქართველოს ჩემპიონატს ვუმასპინძლებთ თავისუფალ პირამიდაში. გარდა ამისა, ქალაქ ბათუმის მერიის თანადგომით, ვაპირებთ ბათუმის ღია პირველობის ჩატარებას, სადაც საქართველოს ყველა უძლიერეს მობილიარდეს მოვიწვევთ. მართალია, წელს ეს ტურნირი რესპუბლიკური მასშტაბის იქნება, თუმცა, მომავალი წლიდან ვაპირებთ მისთვის საერთაშორისო სტატუსის მინიჭებას.
