ლიმიტი ამოიწურა – წადით! სწორედ ამ შინაარსის მოწოდებებით გამართეს ბათუმის „დინამოს“ ფან–კლუბის – „შავი ზღვის მეკობრეების“ წევრებმა აქცია ქალაქის მერიასთან, რომლებიც „დინამოს“ ხელმძღვანელობისა და მისი პრეზიდენტის, სულხან გოგიბერიძის წასვლას მოითხოვდნენ.
„მათ საკმაო ხანი დაჰყვეს კლუბის სათავეში და არაფერი სასიკეთო ცვლილებები არ მომხდარა, გუნდი პირველი ლიგიდან წელს გადმოვიდა უმაღლეს ლიგაში, და ახლა ისევ დაქვეითება ემუქრება, ეს კი პირველ რიგში, გუნდში გატარებული არასწორი პოლიტიკის ბრალია“, – განუცხადა ბათუმელებს „მეკობრეთა“ ერთ-ერთმა წევრმა გივი თალაკვაძემ.
ქომაგთა განცხადებით, ბათუმის „დინამო“ მარტო ხელმძღვანელობას არ ეკუთვნის, ეს ქალაქის და თითოეული ბათუმელის გუნდია. „პირველ რიგში მოვითხოვთ ხელმძღვანეობის გადადგომას. საჭიროა კლუბში ახალი სახეები მოვიდნენ და ისე წარმართონ მუშაობა, რომ ჩვენ, გულშემატკვირბესა და რა თქმა უნდა, თავად ფეხბურთელებს, მხოლოდ იმაზე არ უწევდეთ ფიქრი, გავარდებიან თუ არა. ამის გარდა, მოვითხოვთ, დაჩქარდეს სტადიონის მშენებლობის საკითხი. დიდი ხანია გვპირდებიან მაგრამ საშველი არ ჩანს. ნუთი ვერ გამოყვეს ერთი ტერიტორია ამხელა ქალაქში?“ – აცხადებენ ფან-კლუბის წევრები.
„თქვენზე არანაკლებ გვაღელვებს ბათუმის „დინამოს“ ბედი, ეს საკითხი უკვე შესწავლის პროცესშია და გპირდებით, აუცილებლად გავითვალისწინებთ თქვენს ინტერესებს და სწორედ იმ გადაწყვეტილებას მივიღებთ, რომელიც ჩვენს „დინამოს“ ეკადრება“, – ასეთი გახლდათ მერიის ოფიციალური პოზიცია.
