Batumelebi | ეკომიგრანტების აქცია ბათუმის მერიასთან ეკომიგრანტების აქცია ბათუმის მერიასთან – Batumelebi
RU | GE  

ეკომიგრანტების აქცია ბათუმის მერიასთან

 

 

დღეს ბათუმის მერიის წინ ეკომიგრანტებმა საპროტესტო აქცია გამართეს. აქციის მონაწილეები პარკირებისთვის დაწესებული ჯარიმისგან გათავისუფლებას და საკვებით უზრუნველყოფას ითხოვდნენ. 

წალკიდან ჩამოსული აქციის მონაწილეები  მეორე დღეა აჭარის მთავრობის სახლის წინ აქციას მართავენ და საცხოვრებელი ფართებით დაკმაყოფილებას ითხოვენ. ავტომანქანებს, რომლითაც ისინი ბათუმში ჩამოვიდნენ, პარკირების საფასური გადახდილი არ აქვთ, ბათუმში პარკირება კი ფასიანია. მას შემდეგ რაც აქციის მონაწილეებმა ჯარიმის შესახებ შეიტყვეს მთავრობის სახლიდან მერიასთან გადაინაცვლეს და დაკისრებული ჯარიმისგან გათავისუფლება მოითხოვეს.

„ბათუმში დახმარების  სათხოვნელად ჩამოვედით.  წალკაში, იმ სახლებში რომელშიც ვცხოვრობდით, ბერძნები დაბრუნდნენ. დახმარების ნაცვლად მანქანებზე ათლარიანი ჯარიმები აგვიკრეს. მაშინ როცა პატრულმა დაგვაყენა იქ. რა გამოვიდა, ერთმა დაგვაყენა, მეორემ დაგვაჯარიმა. რა ვქნათ, არ ვიცით. მერიას ვთხოვთ  გაგვიუქმოს ეს ჯარიმა,  ანდა კეთილი ინებოს და თვითონ გადაიხადოს. 9 მანქანა დააჯარიმეს, ჯამში 90 ლარია,“ – განუცხადა „ბათუმელებს“ აქციის ერთ-ერთმა მონაწილემ მევლუდ ვაშაყმაძემ.

აქციის შემდეგ ბათუმის მერიამ გამონაკლისი დაუშვა და ის ავტოსატრანსპორტო საშუალებები, რომლითაც ეკომიგრანტები გადაადგილდებოდნენ ჯარიმისგან გაათავისუფლა. რაც შეეხება საკვებით და წყლით უზრუნველყოფას, ადგილობრივ თვითმმართველობაში  აცხადებენ, რომ მსგავსი მუხლი ბიუჯეტში, რომელიც მსგავსი ტიპის ღონისძებებს დააფინანსებს არაა, შესაბამისად ეკომიგრანტებს ვერ დაეხმარებიან.

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი