„წარმომადგენლობითი ორგანო საკუთარი რეგლამენტით განსაზღვრავს, რა იქნება მისთვის პრიორიტეტული, ამდენი წლის განმავლობაში უმაღლესი საბჭოსთვის ადამიანის უფლებები არ ყოფილა პრიორიტეტული. ბოლო დროს განვითარებულმა მოვლენებმა ჟურნალისტებთან დაკავშირებით, სხვა თემებთან დაკავშირებით, გადამაწყვეტინა, რომ კანონპროექტი უნდა იყოს აუცილებლად ინიცირებული და ხარჯებს აღარ ვუყურებ. უმაღლესი საბჭოს ხარჯებს ეს კომისია დიდად არ გაზრდის – დამატებითი 3-4 თანამშრომელი იმუშავებს ისე, როგორც ნებისმიერ კომისიაში, – ამბობს სულხან ღლონტი. – შეირჩევა კომპეტენტური და პრინციპული კადრები“.
სულხან ღლონტი ამბობს, რომ საკუთარ თავს ამ კომისიის თავმჯდომარედ არ განიხილავს. მისი აზრით, უმაღლეს საბჭოს აქვს იმის საშუალება, რომ ამ კომისიის შესაქმნელად უმაღლესი საბჭო გარკვეულ ხარჯებს თავად გამოათავისუფლებს. ამის ერთ-ერთ სავარაუდო წყაროდ ასახელებს გენერატორს, რომლისთვისაც ბიუჯეტიდან 100 ათას ლარზე მეტია გამოყოფილი.
დეპუტატი ფიქრობს, რომ ამ კომისიის შექმნის შემდეგ მოამზადებს ინიციატივას პატიმრობის შესახებ კანონში ცვლილებების შესატანად.
„ეს ცვლილება გამიზნული იქნება იმისკენ, რომ უმაღლესი საბჭოს დეპუტატებს მიეცემათ უფლება შევიდნენ საპატიმრო დაწესებულებებში მონიტორინგის მიზნით“, – ამბობს სულხან ღლონტი.
„ბათუმელების“ კითხვაზე, თუ იმსჯელეს დეპუტატებმა ორი დღის წინ ჟურნალისტ ტარიელ ცეცხლაძესა და უმაღლესი საბჭოს პრესსამსახურის ხელმძღვანელს, მარინე კუპრეიშვილს შორის მომხდარი ინციდენტის შესახებ, სულხან ღლონტი პასუხობს: „ამ თემასთან დაკავშირებით შევიკრიბეთ უმრავლესობა და თავმჯდომარეს [ავთანდილ ბერიძე] მოვთხოვეთ კონკრეტული ქმედება. მე ვთქვი, რომ თუ უახლეს პერიოდში არ გადაიდგმება კონკრეტული ნაბიჯები, ავტონომიურ რეჟიმში გავაკეთებ განცხადებას, რასაც სწორად ჩავთვლი. დეპუტატების მოთხოვნა იყო ძალიან კატეგორიული, პირდაპირ გეტყვით, ასეთი კატეგორიული უმრაველოსობა ჯერ არ მინახავს. ეს ძალიან ბევრისთვის აღმოჩნდა პრინციპული საკითხი“.
სულხან ღლონტის ინფორმაციით, მარინე კუპრეიშილმა უკვე დაწერა მოხსენებითი ბარათი, მასზე რეაგირება კი დაევალა უმაღლესი საბჭოს აპარატს. „თავმჯდომარემ განაცხადა, რომ ის მზად არის ამ საკითხებზე იმუშავოს და ნდობა უმაღლესი საბჭოს აპარატს გამოუცხადა. ვნახოთ, რა დასკვნას დადებს აპარატი, რის შემდეგაც ჩვენ გვექნება კონკრეტული რეაქცია – ეს დასკვნა ან იქნება მისაღები ან მიუღებელი და ჩვენ შეფასებებს გავაკეთებთ“.
