Batumelebi

ფესტივალი „ბათუმური საღამოები“ გაიხსნა

ფესტივალის ფარგლებში სხვადასხვა ღონისძიებებია დაგეგმილი. დღეს „ბათუმური საღამოები“ ალეკო აბაშიძის ფოტოგამოფენით – „ფესტივალიდან ფესტივალამდე“ გაიხსნა და ახალგაზრდა რეჟისორის ნინელი გოგიტიძის დუკუმენტური ფილმის, „ბათუმური შემოდგომის“ ჩვენებითა და კლასიკური მუსიკის კონცერტით გაგრძელდა.

ფოტოგამოფენაზე წარმოდგენილი იყო ალეკო აბაშიძის მიერ 2013 წლის განმავლობაში მუსიკალურ ცენტრში ჩატარებული სხვადასხვა ღონისძიების დროს გადაღებული ფოტოები. ნინელი გოგიტიძის ფილმი კი ფესტივალ „ბათუმურ შემოდგომას“ ასახავდა.

ფესტივალი ბათუმის სახელმწიფო მუსიკალური ცენტრის ორგანიზებით პირველად 2013 წლის შემოდგომაზე ჩატარდა – სახელწოდებით „ბათუმური შემოდგომა“. როგორც ბათუმის მუსიკალური ცენტრის პრესსპიკერი სალომე ცეცხლაძე განმარტავს, ფესტივალს სამომავლოდ ტრადიციული სახე მიეცემა და წელიწადში ოთხჯერ ყოველ სეზონზე ჩატარდება.

„ფესტივალის მიზანია ბათუმის სახელმწიფო მუსიკალურ ცენტრში შემავალი ხუთი მუსიკალური კოლექტივისა და ბათუმში მოღვაწე იმ ახალგაზრდა მუსიკოსებისთვის, რომლებიც ახლა იკვლევენ გზას, საშუალების მიცემა, რომ უფრო ხშირად წარდგნენ მაყურებლის წინაშე“-აღნიშნა სალომე ცეცხლაძემ.

დღევანდელი დღის გარდა ღონისძიებები 15, 18, 21, 23, 26, 27 თებერვალსა და 1 მარტს ჩატარდება. პირველ მარტს „ბათუმური საღამოები“ ანრი ჯოხაძის კონცერტით დასრულდება.

აბონემენტის საშუალებით ყველა კონცერტზე დასწრება 10 ლარადაა შესაძლებელი. აბონემენტის გარეშე კონცერტის ბილეთის ფასი 5 ლარია.

გაზიფიცირება 20 დღეში, განვადებით

„ბოდიშს ვუხდით ჩვენს აბონენტებს, რომლებსაც დღემდე არსებული სუბიექტური თუ ობიექტური მიზეზებიდან გამომდინარე, გასულ პერიოდში გაზიფიცირების პროცესებთან დაკავშირებით დისკომფორტი შეექმნათ, – აღნიშნულია კომპანიის მიერ გავრცელებულ განცხადებაში – „სოკარ ჯორჯია გაზი აჭარა“ სრულ პასუხისმგებლობას იღებს დადგენილი წესით მოქალაქის მიერ განცხადების შემოტანიდან კანონმდებლობით დადგენილი 30 სამუშაო დღის ნაცვლად არაუმეტეს 20 კალენდარული დღის განმავლობაში უზრუნველყოს გაზმომარაგების სრული ტექნოლოგიური პროცესების ჩატარება“.

„მოსახლეობის იმ ნაწილს, რომელთაც ამ ეტაპისათვის არ აქვთ ერთიანი ფინანსური სახსრები და სურთ საკუთარი საცხოვრებელი ბინის ერთ წერტილში (ერთ გაზის დანადგარზე) მოხდეს ბუნებრივი გაზის მიწოდება, მარეგულირებელი კომისიის მიერ დადგენილი წესებით აქვთ შესაძლებლობა, რომ გაზიფიკაციის სამუშაოების საფასური გადაიხადონ ეტაპობრივად, განვადებით, თვეში მხოლოდ 25 ლარის გადახდის პირობით.

საფასურის გადახდას აბონენტი მოახდენს მხოლოდ მას შემდეგ, რაც მის ბინაში ბუნებრივი გაზის მიწოდება მოხდება და რა გადასახადიც მას წარედგინა ქვითრით, მოხმარებული ბუნებრივი გაზის საფასურთან ერთად 24 თვის განმავლობაში. მას ასევე აქვს უფლება ერთჯერადად გაზიფიცირების საფასური გადაიხადოს ხარჯთაღრიცხვის მიხედვით, არაუმეტეს 600 ლარისა, მიუხედავად იმისა თუ გაზიფიცირების ფაქტიური ღირებულება შეადგენს უფრო მეტს, ამ ვალდებულების შესრულება მხოლოდ გაზგანაწილების ლიცენზიის მქონე კომპანიას აკისრია, ესე იგი შპს „სოკარ ჯორჯია გაზ აჭარას“ და არა სხვა კერძო სამონტაჟო კომპანიას“, – აცხადებენ კომპანიაში.

არჩილ ხაბაძე: „ბიძინა აფხაზავასთან კითხვები გვაქვს“

პრესსამსახურის ინფორმაციით, არჩილ ხაბაძე აჭარის კულტურულ მემკვიდრეობის სააგენტოს უფროსის, ბიძინა აფხაზავას საკითხსაც შეეხო და აღნიშნა, რომ მთავრობას მასთან კითხვები აქვს:

„ბიძინა აფხაზავასთან კითხვები არსებობს. არის შეცდომები, რომელიც დაუშვა და არა ერთი. შესაბამისად კითხვები გვაქვს და მასთან კონსულტაციას აუცილებლად გავივლით ამ თემაზე.

ჩვენ ვმუშაობთ და ორგანიზაციისა და საქვეუწყებო დაწესებულებებში, ასევე აპარატში, მოხდება თანამდებობრივი ცვლილებები, ეს იქნება როგორც ვერტილაკური, ისე ჰორზონტალური მიმართულებით. შესაბამისად ამას მოჰყვება თანამდებობრივი ცვლილებებიც“. – განაცხადა არჩილ ხაბაძემ.

„ადრეული ჩარევის“ პროგრამის პრეზენტაცია ბათუმის მერიაში

შეხვედრას სპეციალური საჭიროების მქონე ბავშვების მშობლები და ბათუმში მოქმედი სამედიცინო დაწესებულებების წარმომადგენლებიც ესწრებოდნენ. ორგანიზაცია „პირველი ნაბიჯი საქართველო“ „ადრეული ჩარევის“ პროგრამას, რომელიც სახელმწიფოს მიერ ფინანსდება და 7 წლამდე ასაკის სპეციალური საჭიროების მქონე ბავშვების განვითარებასა და მათ სოციალურ ინტეგრაციაზე ზრუნვას ითვალისწინებს, 2012 წლიდან ახორციელებს.

პროგრამის შედეგების შეფასება და სამომავლო თანამშრომლობის გეგმები იყო შეხვედრის მიზანი, რომელიც პრეზენტაციის ფორმატში მიმდინარეობდა და დისკუსიის ნაწილსაც მოიცავდა. ბათუმში ადრეული ჩარევისა და განვითრების პროგრამა 2012 წელს ამოქმედდა და ამ ეტაპზე, 7 წლამდე ასაკის სპეციალური საჭიროების მქონე 40 ბავშვს აერთიანებს, რომლებიც თავიანთ ოჯახებში სამედიცინო, ფსიქო-სოციალურ და საგანმანათლებლო კურსს გადიან.

“პირველი ნაბიჯი საქართველო“ ჯეინ ქორბოისა და ნინო ქადაგიძე-ჟვანიას მიერ დაფუძნებული არასამთავრობო საქველმოქმედო ორგანიზაციაა, რომელიც ემსახურება ფიზიკური და ინტელექტუალური შეზღუდული შესაძლებლობის მქონე ბავშვებს.

ბათუმში ავტობუსის მძღოლები გაიფიცნენ

ქალაქის მერიაში აცხადებენ, რომ ამ დროისთვის საზოგადოებრივი ტრანსპორტით გადაადგილების შეზღუდვები არ არის.

„დღეს საგანგებო რეჟიმში ვმუშაობთ. არც ერთ გაჩერებასთან ხალხმრავლობა არ არის. ხალხი გაფრთხილებულია, რომ ავტობუსები არ მოძრაობს და მათ ნაცვლად, მიკროავტობუსები იქნებიან, ყველა მიმართულებით, გარდა რუსთაველის ქუჩისა. ავტობუსები #1 და #1ა, რომელიც წრიულს ასრულებს რუსთაველის და ხიმშიაშვილის ქუჩაზე, ვცდილობთ გამოვიყვანოთ. მოლაპარაკება მიმდინარეობს მძღოლებთან, რომ მუშაობა გააგრძელონ“ – განუცხადა „ბათუმელებს“ ბათუმის მერიის ეკონომიკური პოლიტიკის სამსახურის უფროსის მოადგილემ, ტიტე აროშიძემ.

მისივე განმარტებით მოსახლეობიდან პრეტენზია არ ყოფილა.

ბათუმში ყოველდღიურად სულ 140 ავტობუსი დადის.

ბათუმის მერი დასვენებას და მოვლენების გადაფასებას გეგმავს

„პირველი ისაა, რომ ამას მთელი ოთხი წლის გააზრება და გუნდური მუშაობა სჭირდება, რაც ძალიან რთულია. გარდა ამისა თვითმმართველობის არჩევნებზე მერი უნდა წარადგინოს პარტიამ, საინიციატივო ჯგუფს ამის უფლება არ ექნება. მე კი არცერთი პარტიის წევრი არ ვარ.“ – უთხრა ჯემალ ანანიძემ „ბათუმელებს“.

ჯემალ ანანიძის განცხადებას თანამდებობიდან წასვლის თაობაზე საკრებულო ხვალ, 13 თებერვალს განიხლავს.

დღეს „აპოლოში“ „მელანქოლიას“ აჩვენებენ

ასევე ნახავთ:

12:00 ტარზანი 3D – 7 ლარი

14:00 ტარზანი 3D – 7 ლარი

16:00 ფრანკენშტეინი 3D – 8 ლარი

18:00 ევროკავშირის ფილმი „მელანქოლია“- 0 ლარი

22:00 უოლ სტრიტის მგელი -8 ლარი

მე-16 სკოლის დირექტორი გასაუბრების შედეგებს გაასაჩივრებს

„მართალი გითხრათ, არ ვაპირებდი გასაჩივრებას, მაგრამ მხარდაჭერა, რაც ამ დღეებში ვიგრძენი, პასუხისმგებლობასაც მაკისრებს.“ – ამბობს თამთა კვარაცხელია.

მე-16 სკოლის მოსწავლეებს დღეს, გაკვეთილების შემდეგ დირექტორის მხარდასაჭერად აქციის გამართვა სურდათ, თუმცა თამთა კვარაცხელიამ ფეისბუქის საშუალებით მოსწავლეებს სთხოვა გაკვეთილების შემდეგ სახლში წასულყვნენ:

„ჩემს მოსწავლეებს: არავითარი აქცია; გაკვეთილების შემდეგ ყველანი შინ! გმადლობთ გულშემატკივრობისთვის, მაგრამ ეს სულელური გასაუბრება არ წყვეტს თქვენი მასწავლებლისა და დირექტორის ბედს. მე კვლავ გავალ ტესტირებასა და გასაუბრებაზე! ყველაფერი კარგად იქნება. თან არ არსებობს შეუცვლელი დირექტორი! მიყვარხართ ყველანი, მაგრამ გთხოვთ თქვენი კარგი სწავლითა და საქციელით გამახაროთ და დამიჭიროთ მხარი!“ – მიმართა სკოლის დირექტორმა მოსწავლეებს.

საკრებულოს თანხმობის შემთხვევაში გიორგი ერმაკოვი ბათუმის მერის მოვალეობას შეასრულებს

ბათუმის საკრებულოს თავმჯდომარე მერის ჯემალ ანანიძის გადადგომის საკითხს მხარს დაუჭერს, ის ამბობს რომ „სხვა გზა არ აქვს, რადგან ეს ჯემალ ანანიძის სურვილია და მას ხელოვნურ ბარიერებს ვერ შეუქმნის.“

საკრებულოს თავმჯდომარე ირაკლი ჩავლეიშვილი ადასტურებს, რომ ბათუმის მერის პოსტზე ჯემალ ანანიძეს გიორგი ერმაკოვი ჩაანაცვლებს.

„ შევთავაზე დავით ლეკვეიშვილსაც, რადგან ის უფრო გამოცდილია, მაგრამ როგორც მითხრა ცოტა ხნით საზღვარგარეთ აპირებს წასვლას. ზურაბ პატარაია კი ტერიტორიული ორგანოს პრობლემების მოგვარებაშია ჩართული.“

„მე ვამბობ, რომ არ ვარ პარტიული, თუმცა ჩემს საქმიანობას მაინც პარტიას მიაწერენ ხოლმე“ – ასე ახსნა ჯემალ ანანიძემ სამსახურიდან წასვლის მიზეზი.

„ჩვენ არა მერის წასვლას, არამედ მერის გადაყენებას მხარს არ დავუჭერთ. გადაყენება, ეს ტერმინი არის ამ შემთხვევაში აბსოლუტურად სწორი, რადგან მივიჩნევთ რომ ახლა მერის გადაყენება არ არის სწორი გადაწყვეტილება. “ – ამბობს საკრებულოს თავმჯდომარის მოადგილე „ნაციონალური მოძრაობიდან“ ჯუმბერ კახიძე. მისი ინფორმაციით მერის გადადგომის საკითხს მხარს არც ის ფრაქციები დაუჭერენ, რომელებიც საკრებულოში „ნაციონალური მოძრაობის“ კვოტით მუშაობენ.

ბათუმის მერის ჯემალ ანანიძის გიორგი ერმაკოვის კანდიდატურით ჩანაცვლებაზე გაზეთი „ბათუმელები“ მანამდე წერდა ვიდრე ჯემალ ანანიძე თანამდებობის დატოვებაზე დაწერდა განცხადებას. მაშინ ის „ბათუმელებთან“ აცხადებდა, რომ თანამდებობიდან წასვლას არ აპირებდა. მალევე მან ხელი მოაწერა გიორგი ერმაკოვის ვიცე-მერად დანიშვნას, რამდენიმე დღეში კი განცხადება დაწერა თანამდებობიდან წასვლაზე.

საგაზაფხულო სამუშაოების ხელშეწყობის პროექტით აჭარაში 67 ათასამდე ფერმერი ისარგებლებს

შეხვედრაზე ასევე წარმოდგენილი იქნება აჭარის სოფლის მეურნეობის სამინისტროს 2014 წლის პროგრამების პრეზენტაცია.

მცირემიწიან ფერმერთა 2014 წლის საგაზაფხულო სამუშაოების ხელშეწყობის პროექტის ბენეფიციარები იქნებიან ფერმერები, რომელთაც საკუთრებაში სარგებლობაში ან ფაქტობრივ მფლობელობაში გააჩნიათ 1.25 ჰექტარის ფართობის სასოფლო-სამეურნეო დანიშნულების მიწის ნაკვეთები, რომლებსაც ერთწლიანი ან მრავალწლიანი კულტურების წარმოებისთვის იყენებენ.

2014 წლის საგაზაფხულო სამუშაოების ხელშეწყობის პროექტით აჭარაში დაახლოებით 67 ათასამდე ფერმერი ისარგებლებს.

2014 წლის საგაზაფხულო სამუშაოების ხელშეწყობის პროექტით წელს საქართველოს მასშტაბით დაახლოებით 800,000-მდე მცირემიწიანი ფერმერი ისარგებლებს. პროექტის ბიუჯეტი 90 მილიონამდე ლარს შეადგენს. პროექტს სახელმწიფო ბიუჯეტი და სოფლისა და სოფლის მეურნეობის განვითარების ფონდი დააფინანსებს, ხოლო პროექტს სოფლის მეურნეობის პროექტების მართვის სააგენტო განახორციელებს.

2014 წელს აჭარის სოფლის მეურნეობის სამინისტრო განახორციელებს „ფერმერული მეურნეობების განვითარების ხელშეწყობის“ პროგრამას რომელიც 6 ქვეპროგრამას მოიცავს და მისი საერთო ბიუჯეტი 3 030 000 ლარია.

აღნიშნული ქვეპროგრამების ფარგლებში ფერმერები თანადაფინანსების პრინციპით შეიძენენ მრავალფუნქციურ მოტობლოკებს, სასათბურე კონსტრუქციებსა და მრავალწლიან ხეხილოვან კულტურებს, რომელთა საერთო ღირებულების 30% გადაიხდის ფერმერი.

რაც შეეხება ფუტკრის თანამედროვე ტიპის სკების, თაფლის საწურ მოწყობილობების და ნიადაგის ნაყოფიერების დონის ამაღლების მიზნით ქიმიური მელიორაციისათვის დეფეკატს – ფერმერებს მათი შეძენა შეეძლებათ საერთო ღირებულების 40%- იანი თანაგადახდით.

რატომ შეიძლება დაითხოვონ „ბათომის“ დამფუძნებელი სარეკომენდაციო საბჭოდან

ბიძინა აფხაზავამ ჩვენთან საუბარში დაადასტურა, რომ შესაძლოა განიხილოს სააგენტოსთან არსებული საბჭოდან თქვენი დათხოვნის საკითხი, რადგან არ მიაჩნია სწორად ერთი არასამთავრობო ორგანიზაციიდან – „ბათომიდან“ – ორი წარმომადგენლის ყოფნა საჭიროდ. თქვენ როდის გაიგეთ ამის შესახებ და ესაუბრეთ თუ არა სააგენტოს დირექტორის?

მე გავიგე ორი დღის წინ. ჭორებისთვის რომ არ მესმინა, დავურეკე ბიძინა აფხაზავას და მან დაადასტურა, რომ კი, ასე აპირებდა. მხოლოდ მას არ უხსენებია საზოგადოება „ბათომი“. მიზეზი რომ ვკითხე, მან თქვა, რომ არ მინდა იყოს ორი ადამიანი არასამთავრობოდან. არასამთავრობო ორგანიზაციაში ყოფნა რატომ არის დამაბრკოლებელი გარემოება – ეს ვერ ახსნა. თან, იმ შემთხვევაში, თუ გამიშვებს, მაინც არასამთავრობო ორგანიზაციის ორი წარმომადგენელი რჩება საბჭოში. რამდენიმე თვის განმავლობაში მთავარი რეჟისორი ვიყავი აჭარის ტელევიზიაში და არავითარი დაბრკოლება ამას არ შეუქმნია, ასევე, არასამთავრობო ორგანიზაციის წევრი ვიყავი, როცა ბიძინა აფხაზავამ ამ კომისიაში მიმიღო თავისი ინიციატივით. აქვე ვიტყვი, კი არ გიშვებ, უკეთეს ადგილზე გადაგიყვანო, ასე მითხრა.

რამდენი ხანია ხართ საბჭოს წევრი და ვისი რეკომენდაციით მოხვდით საბჭოში?

დაახლოებით ერთი წელია საბჭოს წევრი ვარ. არ ვიცი, ბიძინამ რატომ ჩათვალა, რომ სადმე უნდა გადავეყვანე, სამსახურის პრობლემა ნამდვილად არ მაქვს, არაერთ პროექტში ვარ დაკავებული. მითხრა, შენ ამოგიღებ და არქიტექტორს ჩავსვამო. არაფერი უშლის ხელს, არქიტექტორიც იყოს, ეს კომისიას არანაირი დამატებითი ხარჯი არ უჯდება, თუ არ ჩავთვლით ერთი ზედმეტი ფურცლის ამობეჭდვას.

საბჭოს წევრობა გულისხმობს პრივილეგიებს? გაქვთ ხელფასი?

არავითარი პრივილეგიები არ გვაქვს, ჩვენ არ ვიღებთ ხელფასს. საბჭო არის სარეკომენდაციო, ამ რეკომენდაციას სააგენტოს თავმჯდომარე შეიძლება დაეთანხმოს ან არ დაეთანხმოს. თუ რამე უარყოფითი აქვს საბჭოში ყოფნას, აქვს ის, რომ ძალიან ბევრი ადამიანი გადავიმტერე ამის გამო, მაგრამ მე ვფიქრობ, რომ ბათუმი ამ შემთხვევაში უფრო მნიშვნელოვანია, ვიდრე ნებისმიერი ერთი ადამიანის ინტერესი. ხან მელანდება კიდეც აგურმომარჯვებული ხალხი სადარბაზოში. პრაქტიკულად არ ყოფილა შემთხვევა, როცა გამომიტოვებია სხდომა, გარდა იმ შემთხვევისა, თუ არ ვარ ქალაქში. სიმართლე რომ გითხრათ, ვერაფერს ვერ ვაკეთებ, მაგრამ შეიძლება ვიღაცამ გადახედოს თავის გადაწყვეტილებას, რამე შეიცვალოს. მეჩვენება, რომ ადრე უფრო ჰარმონიული იყვნენ გადაწყვეტილების მიღებაში, ახლა მეჩვენება, რომ დისონანსი შემაქვს.

თქვენ რას უკავშირებთ სააგენტოს ხელმძღვანელისგან საკითხის ასე დასმას, რეალურად რა მიზეზით შეიძლება დატოვო საბჭო?

ეს ერთი ამბავია, რომელსაც თან ახლავს თავისი შლეიფები. მე ვარ რეჟისორი და ვიცი, დრამატურგიას აქვს თავისი კანონები. ადამიანებმა, რომლებიც ამ ამბავში მონაწილეობენ, არ იციან ეს კანონები და უნებურად იცავენ წესებს. აქ ძალიან ადვილია დასკვნის გამოტანა, რომ ეს არის ერთი ადამიანის ხელწერა. რატომ, არ ვიცი, მაგრამ შურისძიების სუნი მცემს, თუმცა არგუმენტაცია ფანტაზიის კრიზისს ნამდვილად განიცდის, ისევე როგორც მე მექნებოდა ფანტაზიის კრიზისი, რომ წარმომედგინა ცოტა ხნის წინ, ბიძინა აფხაზავა თუ ძეგლთა დაცვის კომისიიდან გამიშვებდა, როცა ერთად ვაპროტესტებთ ძეგლების ხელყოფას.

ბოლო ხანებში საუბრობდი რამდენიმე კულტურული მემკვიდრეობის ძეგლზე. ეს იყო ზუბალაშვილის ქუჩაზე სახლის მშენებლობა, კლდიაშვილის ქუჩაზე სახლს დანგრევის საკითხი და წმ. ბარბარეს ეკლესიის უკანონო რესტავრაცია. თუ ხედავთ კავშირს ამ საქმეებსა და თქვენ შესაძლო გათავისუფლებას შორის?

კლდიაშვილის ქუჩაზე მდებარე სახლის საკითხი ჩვენს საბჭოში არ განხილულა, რადგან სახლს ძეგლის სტატუსი არ აქვს, არ განხილულა წმ. ბარბარეს ეკლესიის საკითხიც, რადგან საკულტო ნაგებობაა და ეს საკითხი პირდაპირ საქართველოს კულტურული მემკვიდრეობის დაცვის სააგენტოს პრეროგატივაში შედის. ზუბალაშვილის ქუჩაზე დაგეგმილ მშენებლობასთან კი კავშირს ვერ ხედავ.

თქვენ მიმართეთ შს სამინსიტროს კულტურული მემკვიდრეობის ძეგლის, ბარბარეს ეკლესიის ხელყოფის გამო. როგორ მოხდა ეს?

გავიგე ძეგლის ხელყოფის შესახებ. სამსახურში ვიყავი, აჭარის ტელევიზიაში, ჩავედი საინფორმაციო სამსახურში და პროდიუსერს ვაცნობე. მაშინვე გაუშვეს აჭარის ტელევიზიიდან ჯგუფი და მეც გავედი ადგილზე. მუშები ანგრევდნენ ეკლესიის ფასადს. გამოვიდა ახალგაზრდა მღვდელი, რომელიც სხვათა შორის ძალიან თავაზიანად მესაუბრა და ვუთხარი, რომ ამას სჭირდებოდა ნებართვა. ვიღაცები აგრესიულადაც იქცეოდნენ, მოგზავნილი მეძახეს, ვთხოვე დაეკონკრეტებინათ, ვისი მოგზავნილი ვიყავი, მაგრამ რატომღაც ვერ მიპასუხეს. მივხვდი, რომ სხვა გამოსავალი არ იყო, საქმე გვქონდა დანაშაულთან და გავაჩერე ქუჩაში პატრული. ვუთხარი, რომ დანაშაულია კულტურული მემკვიდრეობის ძეგლის ხელყოფა და იქნებ როგორმე შეაჩეროთ-მეთქი. კონსტიტუციაში წერია, რომ საქართველოს ყოველი მოქალაქე ვალდებულია, დაიცვას ქვეყნის კულტურული მემკვიდრეობა. არ სჭირდება ამას არანაირი კომისია და არასამთავრობო ორგანიზაცია. პატრულმა გამოიძახა მერიის ზედამხედველობის სამსახური, მოვიდა უბნის პოლიციის უფროსი, მერე დაუკავშირდნენ ძეგლთა დაცვის სააგენტოს ტელეფონით და ყველა ცალ-ცალკე ამბობდა, რომ არ აქვთ უფლება ამ პროცესის გაჩერების. მე ვამბობდი, რომ ეს არის შემთხვევა, როცა დანაშაული ხდება ჩვენ თვალწინ და ეს უნდა გაჩერდეს. მოგვიანებით შეჩერდა სამუშაო, არ ვიცი ცვლა დამთავრდა, თუ პოლიციამ გააჩერა. ბოლოს მითხრეს, რომ საქმე უნდა აღიძრას, რადგან ეს არის გამოძახება. წამიყვანეს პოლიციაში და მოვყევი ის, რაც ახლა გიამბეთ. ჩემი მოთხოვნა იყო, შეწყდეს კულტურული მემკვიდრეობის ძეგლის ხელყოფა და აღდგენილ იქნას თავდაპირველ მდგომარეობაში.

ეკლესიის წინამძღვარმა, გიორგი მამალაძემ, ჩვენთან აღნიშნა, რომ მათ არ ჰქონდათ ნებართვა, მაგრამ ჰქონდათ ეპისკოპოსის კურთხევა. თქვენთან თუ ისაუბრა მან ამ თემაზე?

იყო ასეთი საუბარი. რამდენიმე დღის მერე ქუჩაში მიცნო წინამძღვარმა და დამიძახა. შემდეგ კიდევ ერთხელ დამიბარეს პოლიციაში სასაუბროდ.

პოლიციაში მეორედ მისვლის შემდეგ თქვენს ჩვენებაში რამე შეიცვალა?

არ ვიცი, დეტალებზე საუბრის უფლება მაქვს თუ არა, მაგრამ გეტყვით, ჩემი პოზიცია არ შემიცვლია.

თუ კი დატოვებთ საბჭოს, რა შეიცვლება თქვენთვის და რა შეიცვლება თავად საბჭოში?

ვფიქრობ, ბევრი რამ არ შეიცვლება, ბევრ რამეს ვერ ვახერხებდი, როცა იყო ხელისუფლების სურვილი მომხდარიყო ძეგლის გადაკეთება-მიშენება – მაინც კეთდებოდა, შეიძლება ითქვას, რაღაც დაბრკოლებებს ვქმნიდი. ხშირ შემთხვევაში უბრალოდ საკონტროლო წერასავით ვიწერ დასკვნებს გია რამიშვილისგან. მე უბრალოდ არ შემიძლია გავჩერდე, თუნდაც იმ შემთხვევაში, როცა ვიცი, რომ ეს შედეგს არ გამოიღებს. საბჭომდეც ყველგან ვამბობდი რაც შემეძლო და სადაც ვწვდებოდი, ამ მხრივ არც წამოსვლის შემდეგ შეიცვლება რამე.

აჭარაში მაღალი ძაბვის ქვესადგური აშენდება

მალე აჭარაში მაღალი ძაბვის ქვესადგურის მშენებლობა დაიწყება და საქართველოს ენერგო რესურსების საექსპორტო პოტეციალის გაზრდა დაიწყება. კომპანია „ენერგო–პრო ჯორჯია“ ხელვაჩაურში 220/154 კვ ძაბვის, 350 მეგავატი სიმძლავრის ქვესადგურს ააშენებს.

ქვესადგურიდან გამომავალი ელექტროენერგიის გადამცემი ხაზი სოფელ კირნათს საქართველო–თურქეთის საზღვართან გადაკვეთს და თურქეთის მხარეს გადავა, სადაც მურათლი ჰესის გამანაწილებელ მოწყობილობას დაუკავშირდება.

შესაბამისად, ენერგო–პრო ჯორჯია 154 კვ მაღალი ძაბვის ელექტროენერგიის გადამცემ ხაზ „ბათუმი–მურათლის“ ააშენებს.

„აჭარის მთავრობა ამ პროექტის განხორციელებაში თავიდან ბოლომდე იქნება ჩართული. თავდაპირველად ამ ტერიტორიაზე მცხოვრები ადგილობრივების განსახლების საკითხი იქნება შესწავლილი და გათვალისწინებული. უკვე შექმნილია სამთავრობო ჯგუფი და დაწყებულია ადგილობრივი ოჯახების შესწავლა. გამოიყოფა კატეგორიები და მათი განსახლების პირობები. პროექტის ღირებულება 60 მილიონი ლარია და ეს სტრატეგიული ობიექტია რეგიონისთვის და ქვეყნისთვის“, – განაცხადა არჩილ ხაბაძემ.

ილია ელოშვილის თქმით, “ესაა კერძო კომპანია, რომელიც ქვესადგურს აშენებს აჭარაში. მისი მთავარი დანიშნულება იქნება წარმოებული ელექტროენერგიის თურქეთში ექსპორტი.

მშენებლობა რამდენიმე კვირაში დაიწყება და ორ წელიწადში დასრულდება.

აჭარის მთავრობის ინფორმაციით, ბათუმი–მურათლის ხაზის მშენებლობის პროექტის განხორციელება ხელს შეუწყობს ქართული და თურქული ენერგოსისტემების პარალელურ რეჟიმში მუშაობას.

უფასო გამოკვლევები

ტრავმატოლოგ–ორთოპედი ბათუმში სამედიცინო ცენტრ „მედინას“ მოწვევით იმყოფება და ახორციელებს სამედიცინო საქმიანობას.

ვიზიტის ფარგლებში პროფესორი გოროხოვი უფასო სამედიცინო გამოკვლევებს ჩაატარებს ქედის, შუახევის, ხულოსა და ქობულეთის მუნიციპალიტეტებში.

კონსულტაციები ჩატარდება შემდეგი განრიგით:

I. 2014 წლის 13 თებერვალი, ხუთშაბათი, ქედა, მახუნცეთის პირველადი ჯანდაცვის ცენტრი, 10:30-დან 14:00-საათამდე.

II. 2014 წლის 14 თებერვალი, პარასკევი, შუახევი, ზამლეთის პირველადი ჯანდაცვის ცენტრი, 10:30-დან 14:00-საათამდე.

III. 2014 წლის 19 თებერვალი, ოთხშაბათი, ხულო, მუნიციპალიტეტის ცენტრში არსებული პირველადი ჯანდაცვის დაწესებულება, 10:30-დან 14:00-საათამდე

IV. 2014 წლის 20 თებერვალი, ხუთშაბათი, ქობულეთი, ჩაისუბნის პირველადი ჯანდაცვის ცენტრი, 10:30-დან 14:00-საათამდე.

პროგრამით სარგებლობა ნებისმიერ მსურველს შეუძლია.

სკოლის მოსწავლეების აქცია

ამ მოთხოვნით, მოსწავლეები ხვალ, 12 თებერვალს, 14:30-ზე მე-16 საჯარო სკოლის ტერიტორიაზე შეიკრიბებიან, საპროტესტო აქციის გამართვის მიზნით.

გასულ კვირას გაირკვა, რომ თამთა კვარაცხელია განათლების სამინისტროს საკონკურსო კომისიამ „გასაუბრების გზით ჩაჭრა“.

მანამდე თამთა კვარაცხელიას გავლილი ჰქონდა ტესტირება, სადაც დაწესებული 70 ქულის ნაცვლად 79 ქულა მიიღო. ანალოგიური შედეგი საქართველოს მასშტაბით კიდევ ხუთ დირექტორობის კანდიდატს ჰქონდა.

სამართლის სკოლა მოსწავლეებისთვის

„სამართლის სკოლა“ ეს არის დემოკრატიული ჩართულობის ცენტრისა და საქართველოს ახალგაზრდა იურისტთა ასოციაციის (საია) ერთობლივი პროექტი, რომლის პრეზენტაცია დღეს ბათუმის დემოკრატიული ჩართულობის ცენტრში გაიმართა.

როგორც დემოკრატიის ცენტრის წარმომადგენელი თეონა დიასამიძე ამბობს, პროექტი დაახლოებით რვა წელია არსებობს, თუმცა აქამდე ფართო აუდიტორიას არ ჰქონდა მონაწილეობის საშუალება.

პროექტის მიზანია, სკოლის მოსწავლეებში იურიდიული განათლების დანერგვა და პრაქტიკული ცოდნის გაუმჯობესება. სწავლების პროცესში მოსწავლეები დაეუფლებიან კონფლიქტების მოგვარებას, გადაწყვეტილების მიღებასა და სხვა საჭირო უნარჩვევებს.

„სამართლის სკოლა“ გაზრდის ბავშვებს სამაგალითო მოქალაქეებად, რომელთაც რეაგირება ექნებათ არა მარტო საკუთარი ინტერესების, არამედ სხვისი ინტერესების დასაცავადაც,“- აღნიშნა საიას აჭარის ფილიალის თავმჯდომარის მოადგილე ნინო ტავლალაშვილმა.

პრეზენტაციას ბათუმის სხვადასხვა სკოლის მოსწავლეები ესწრებოდნენ.

„ჩემი მომავალი პროფესია არის იურიდიული. მინდა რაც შეიძლება ბევრი გავიგო სამართალზე. გვექნება იმიტირებული სასამართლო პროცესები. შევხვდებით ამ სფეროში წარმატებულ ადამიანებს. არ მინდა ეს შანსი გამოვტოვო“, – ლიკა ცინცაძე, სკოლა-ლიცეუმ „მასტერ კლასის“ მე-11 კლასის მოსწავლე.

სწავლება 4 მარტს დაიწყება და სამი თვეს გაგრძელდება. სულ შეირჩევა 30 მოსწავლე. მათთვის ტრენინგებს შესაბამის საკითხის მცოდნე პირები ჩაატარებენ.

გაკვეთილები დემოკრატიული ჩართულობის ცენტრში, კვირაში ერთხელ, შაბათს ან ან კვირა დღეს, ორი საათის განმავლობაში ჩატარდება.

მოსწავლეების სააპლიკაციო ფორმების მიხედვით შეირჩევიან. მეორე ეტაპზე კი გაივლიან გასაუბრებას. აპლიკაციის ფორმების მისაღებად მსურველებმა დემოკრატიული ჩართულობის ცენტრს უნდა მიმართონ, მისამართი ბათუმი, ფარნავაზ მეფის ქუჩა #62/64, ტელ.: (0422) 22 55 40

აპლიკაციების მიღება 20 თებერვლის ჩათვლით გაგრძელდება.

ადვოკატების აქცია პროკურატურასთან

როგორც „ბათუმელებს“ იურისტმა და საქართველოს ადვოკატთა ასოციაციის წევრმა ლელა ბჟალავამ უთხრა, ადვოკატები აქციით პროკურატურის ჩაკეტილობას გააპროტესტებენ;

„არჩილ კბილაშილის დროს საქართველოს პროკურატურასა და ადვოკატთა ასოციაციას შორის გაფორმდა ურთიერთთანამშრომლობის მემორანდუმი. ეს საშუალებას გვაძლევდა, სისხლის სამართლის საქმეებზე მომუშავე ადვოკატებს გავცნობოდით საქმეებს, თუმცა მას შემდეგ რაც კბილაშვილი უწყებიდან წავიდა, პროკურატურას ისე ჩაიკეტა, ადვოკატები საქმეების გაცნობასაც კი ვერ ვახერხებთ“, – განმარტა აქციის ორგანიზატორმა და იურისტმა ლელა ბჟალავამ.

„ქართული ოცნება“ ქედაში: მურმან დუმბაძე გუნდის დაშლას ცდილობს

„საუბრობენ, რომ შტაბის ხელმძღვანელად სხვა ინიშნება, გუნდის დაშლა უნდათ, ჩვენი მოთხოვნაა ასლან ლორთქიფანიძე დარჩეს შტაბის თავმჯდომარედ“, – განაცხადა გოჩა გათენაძემ.

პარტიის აქტივისტის, გია გოგიაშვილის თქმით, ერთიანი გუნდის დაშლას მურმან დუმბაძე ცდილობს.

„დღეს გაჟღერდა ინფორმაცია, ცდილობენ გუნდი დაშალონ, გუნდის დაშლა მურმან დუმბაძის სურვილია, რადგან ჩვენ არ ვართ მისი გუნდი, თუმცა ვის მოიაზრებენ შტაბის ხელმძღვანლად, არ ხმაურდება. ჩვენ მოვითხოვთ პარტიის რაიონული ორგანიზაციის ხელმძღვანელად ასლან ლორთქიფანიძე დარჩეს.

ქედაში გამგებლიდან დაწყებული სატყეოს ხელმძღვანელით დამთავრებული ყველა მურმან დუმბაძის კადრი დანიშნეს, მურმან დუმბაძისა და იაშა შერვაშიძის ჩარევით ინიშნებიან თანამდებობებზე. გათიშე და იბატონე – ამ პრინციპით მოქმედებს მურმან დუმბაძე“, _ განაცხადა ქართული ოცნების ქედის შტაბის წევრმა გია გოგიაშვილმა.

ბრიფინგს არ დასწრებია პარტიის მოქმედი თავმჯდომარე ასლან ლორთქიფანიძე.

ბათუმში ბარაკული ტიპის სახლს ცეცხლი გაუჩნდა

სახანძრო სამსახურის უფროსის ინფორმაციით, ცეცხლი ბარაკული ტიპის სახლს გაუჩნდა და ხანძრის ლიკვიდაცია თითქმის დასრულებულია.

დამწვარია ოთხი კვადრატული მეტრი ფართი, დაშავებული არავინ არ არის.

ბათუმში ერთი დღით მიკროავტობუსების რაოდენობა გაიზრდება

მიკროავტობუსების მოძრაობაში ცვლილებები შპს ,,ბათუმის ავტოტრანსპორტის“ პროფკავშირის კომიტეტის მიერ დაგეგმილმა აქციამ გამოიწვია. როგორც კომიტეტის ოფიციალური შეტყობინებით ირკვევა, 12 თებერვალს, შპს ,,ბათუმის ავტოტრანსპორტში“ ავტობუსების მძღოლთა გაფიცვა დაიწყება.

აქედან გამომდინარე, თვითმმართველობამ მიიღო გადაწყვეტილება კორექტირება შეეტანა საქალაქო-სამარშრუტო მიკროავტობუსების მოძრაობის გრაფიკში. გადაწყვეტილების შესაბამისად, ხვალ მიკროავტობუსები სრული დატვირთვით იმოძრავებს, რათა ქალაქში გადაადგილების პრობლება არ შეიქმნას. ასევე, იმოძრავებს მუნიციპალური ავტობუსების ნაწილიც.

სოფელ ვაშლოვანში კორპუსის აშენებაზე ტენდერი გამოცხადდა

პრეტენდენტთა წინადადებების მიღება 22 თებერვალს დაიწყება და 27 თებერვალს დასრულდება. სახლი 72 ბინიანი იქნება.

აღნიშნული სამუშაოების შესრულების საბოლოო ვადა ხელშეკრულების გაფორმების თარიღიდან არაუგვიანეს 18 თვეა. სატენდერო პირობების თანახმად, პრეტენდენტის მიერ შესრულებული სამუშაოების საგარანტიო ვადა უნდა შეადგენდეს სამუშაოების დასრულების მომენტიდან არანაკლებ 3 წელს (ქანობიანი სახურავი ბურულით, მოსაპირკეთებელი სამუშაოები (ბათქაში, სამღებრო სამუშაოები, კერამიკული ფილების მოწყობა).

რაც შეეხება ელექტრო და სანტექნიკურ ფურნიტურს (ონკანი, წყალმომარაგების და წყალარინების გარე მომარაგებისა და მიერთების მილები, ელექტრომომარაგების ჩამრთველები და როზეტები, საკეტები და სახელურები) საგარანტიო ვადად განისაზღვრა ობიექტის ექსპლუატაციაში შესვლის თარიღიდან არანაკლებ 8 თვე.

ტენდერი 6 თებერვალს გამოცხადდა. სატენდერო დოკუმენტაციას თან ახლავს შესასრულებელი სამუშაოებისა და ასაშენებელი კორპუსის დეტალური გეგმა-პროექტი. შესყიდვის ობიექტის საბოლოო მიღება-ჩაბარებას განახორციელებს აჭარის ავტონომიური რესპუბლიკის ფინანსთა და ეკონომიკის სამინისტროს მიერ შექმნილი ინსპექტირების ჯგუფი.

„აჭარის ეკომიგრანტების მდგრადი განვითარების პროგრამის“ ფარგლებში “თავისუფალ ჟურნალისტთა სახლმა” და აჭარის ჯანდაცვის სამინისტრომ 2007 წელს I კატეგორიის დაზარალებულ ოჯახთა ერთობლივი მონიტორინგი განახორციელეს. აჭარის ყველა მუნიციპალიტეტში ადგილზე გადამოწმდა 150-მდე ოჯახი, შედგა დაზარალებულებთან გასაუბრება, ნასახლარების, დაზიანებული საკარმიდამო ნაკვეთებისა და სახლების ფოტოგადაღება.

ამ პროცესში ჩართული იყვნენ შესაბამისი მუნიციპალიტეტების გამგეობებიც. დაზარალებულთა სია სამინისტრომ ცალკე ბროშურადაც გამოსცა.

პროექტის დასრულების დროს, ანუ 2008 წლის გაზაფხულზე, აჭარაში სტიქიის შედეგად დაზარალებული 4535 ოჯახი იყო რეგისტრირებული. ამათგან 115 ოჯახი ღია ცის ქვეშ იყო დარჩენილი, ხოლო 691 ოჯახის საცხოვრებელი სახლი იმდენად იყო დაზიანებული, რომ შიგნით აღარ იცხოვრებოდა.

“აპოლოში” დღეს

16 თებერვლამდე ევროკავშირის მიერ წარმოდგენილი ფილმები 18:00 საათზე გაიმართება და მათი ნახვა უფასო იქნება. დღეს ნაჩვენები იქნება ბულგარეთის ფილმი „სამყაროს დასასრულის შემდეგ“.

„აპოლოში“ 11 თებერვლის სეანსები ასეთია:

12:00 ტარზანი 3D – 7 ლარი

14:00 ტარზანი 3D – 7 ლარი

16:00 ფრანკენშტეინი 3D – 8 ლარი

18:00 ევროკავშირის ფილმი „სამყაროს დასასრულის შემდეგ“- 0 ლარი

22:00 უოლ სტრიტის მგელი -8 ლარი

აჭარაში სისხლის ბანკით 6000 ადამიანმა ისარგებლა

დაწესებულებაში განხორციელბულ ცვილილებებს აჭარის მთავრობის თავმჯდომარე არჩილ ხაბაძე და აჭარის ავტონომიური რესპუბლიკის ჯანმრთელობისა და სოციალური დაცვის მინისტრი ნუგზარ სურმანიძე გაეცნობიან.

შ.პ.ს „ჰემა-2012’–ის სისხლის ბანკი შ.პ.ს „აჭარის სისხლის გადასხმის რესპუბლიკური სადგურის“ ბაზაზე შეიქმნა.

იგი ერთ–ერთი ლიცენზირებული სამედიცინო დაწესებულებაა აჭარის რეგიონში, რომელიც სისხლითა და სისხლის კომპონენტებით უწყვეტად ამარაგებს, როგორც აჭარის რეგიონში, ასევე გურიასა და ფოთში განთავსებულ სამედიცინო დაწესებულებებს.

სისხლის ბანკში დამზადებული სისხლის 50 % უანგარო დონორებისგანაა მიღებული. ყოველწლიურად მზადდება 3000-მდე დონორული სისხლი 3000 ხ 500 მლ = 1500 ლიტრი, რომელსაც მოიხმარს 6000-მდე ავადმყოფი.

შპს „ჰემა-2012“-ი მონაწილეობს უსაფრთხო სისხლის სახელმწიფო პროგრამაში – რაც გულისხმობს დონორის სისხლის კვლევას HBsAg და HCV ჰეპატიტზე, შიდსზე და ათაშანგზე.

სისხლის ბანკის ახალი შენობის მშენებლობა გასულ წელს დაიწყო. სამსახური აღიჭურვა ახალი სამედიცინო აპარატურითა და ინვენტარით. სამსახურში დასაქმებულია 28 თანამშრომელი.

როგორ გავხდე კაპიტანი

40-წლიანი პაუზის შემდეგ, კაპიტნობის სურვილი ორმა ქართველმა გოგონამ გამოთქვა. ბათუმის აკადემიის რექტორი გვეუბნება, რომ 70-იან წლებში ოთხი ქალი სწავლობდა გემთწამყვანის სპეციალობაზე, რომლებიც წარმატებული მეზღვაურები გახდნენ, „მას შემდეგ აღარავინ გამოჩენილა“. თუმცა ტენდენცია იცვლება და ქალები ზღვას უბრუნდებიან.

რა აუცილებელ პირობებს უნდა აკმაყოფილებდეს გემის კაპიტანი? _ ირაკლი შარაბიძის თქმით, კაპიტანი რომ გახდე, მინიმუმ ათი წელია საჭირო. ჯერ ეროვნული გამოცდები უნდა ჩააბარო და გემთწამყვანის სპეციალობაზე ოთხი წელი ისწავლო, ბაკალავრის დიპლომის აღების შემდეგ, ოთხი წლის განმავლობაში ექვსთვიანი პრაქტიკაც უნდა გაიარო, თუმცა წარმატებისთვის მხოლოდ დიპლომი არ კმარა _ მეზღვაურმა საერთაშორისო კონვენციის მოთხოვნებიც უნდა დააკმაყოფილოს.

„დიპლომის შემდეგ მეზღვაურს უნდა ჰქონდეს საზღვაო პრაქტიკის დამადასტურებელი სტაჟი, რომელიც საზღვაო ტრანსპორტის სააგენტოში უნდა წარადგინოს. ამის შემდეგ ეძლევა მას ე.წ. „კომპეტენციის სერტიფიკატი“, ანუ ლიცენზია შორეული ნაოსნობისთვის“, _ განმარტავს საზღვაო აკადემიის რექტორი.

სერტიფიკატის აღების შემდეგ გემთწამყვანობის მსურველს შეუძლია კაპიტნის მესამე თანაშემწედ დაიწყოს მუშაობა. 18 თვის შემდეგ კი, როცა მესამე თანაშემწის საზღვაო ცენზს მიიღებს, მეორე და პირველი თანაშემწის ცენზის მიღებაზეც უნდა იზრუნოს. იმისთვის, რომ კაპიტნის თანაშემწე გახდეს, მსურველს დამატებით კიდევ სჭირდება 24-თვიანი საცურაო ცენზი. მხოლოდ ამის შემდეგ შეუძლია მას გაიაროს საკვალიფიკაციო გამოცდა და აიღოს შორეული ნაოსნის კაპიტნის სერტიფიკატი.

აკადემიაში გვეუბნებიან, რომ ევროპული კომპანიების გემებზე კაპიტნის ხელფასი თვეში 13 000 ევროა, სხვა განვითარებული ქვეყნების გემებზე კი _ 13 000 დოლარი.

„რა თქმა უნდა, კაპიტნის კარიერა პრესტიჟულია და მაღალანაზღაურებადი, მაგრამ ხელფასთან ერთად იზრდება პასუხისმგებლობაც. ადრე, როცა საზღვრები ჩაკეტილი იყო, მეზღვაურები ხელფასზე მეტად უცხო ქვეყნებში გასვლაზე ოცნებობდნენ, მაგრამ დღეს ხელფასი უფრო მნიშვნელოვანია“, _ ამბობს ირაკლი შარაბიძე.

კაპიტნის პროფესიას აქვს ეთიკითა და სამართლით გათვალისწინებული მოთხოვნებიც. საზღვაო კატასტროფის დროს კაპიტანი ყველაზე ბოლოს ტოვებს გემს. ამ ნორმის დარღვევის გამო კაპიტანს სამუდამო დისკვალიფიკაცია ენიჭება.

კაპიტნობის უფლებას საზღვაო სამართალი სამუდამოდ უზღუდავს პირს, თუკი მისი მართვის ქვეშ მყოფი გემი დააბინძურებს გარემოს, გადაიტანს კონტრაბანდულ ტვირთს, კაპიტანი ვერ დაიცავს გემის უსაფრთხოებას ან შემჩნეული იქნება ტრეფიკინგში. „ამ ნორმების დარღვევის შემთხვევაში, რაც არ უნდა გამოცდები აბარო, კაპიტნის ლიცენზიას ვეღარ მიიღებ“, _ განმარტავს ირაკლი შარაბიძე.

მომავალი გემთწამყვანებისთვის მნიშვნელოვანია საზღვაო პრაქტიკა, რასაც ბათუმის საზღვაო აკადემიის სტუდენტები მოკლებულნი არიან. ამის მიზეზია ის, რომ აკადემიას არ აქვს თავისი საწვრთნელი გემი და არც საქართველოს აქვს საკუთარი გემები. აკადემია ამ პრობლემის მოსაგვარებლად ოთხი წელია იბრძვის. „იქნებ 2015 წლისთვის მაინც შევძლოთ გემის ყიდვა. მანამდე კი მოლაპარაკებას კომერციულ გემებთან ვაწარმოებთ, ჩვენი სტუდენტები პრაქტიკაზე რომ აიყვანონ. ეს მათ ინტერესებშიც შედის, რადგან შემდეგ ეს მეზღვაურები მათ გემებზე რჩებიან. ამჟამად მოლაპარაკება იაპონურ და კორეულ კომპანიებთან გვაქვს“, _ გვეუბნება რექტორი.

ბათუმის საზღვაო აკადემიის სერტიფიკატები ევროკავშირმა 2010 წელს, გაყალბების სიხშირისა და სასწავლო პროგრამების საერთაშორისო სტანდარტებთან შეუსაბამობის გამო შავ სიაში შეიყვანა. „დიპლომები იბეჭდებოდა სირიაში, არაბეთში, თურქეთში. შევიდოდა, ვთქვათ, გემი ესპანეთში, ნავსადგურის კონტროლი შეამოწმებდა გემს და აღმოჩნდებოდა, რომ 20 კაციდან ყველას ქართული და თან გაყალბებული დიპლომი ჰქონდა. ახლა ეს პრობლემა მოხსნილია, რადგან ჩვენი დიპლომები უკვე დაცულია“.

აი ია

2013 წელს ჩემი 6 წლის გოგონა პირველ კლასში შევიდა და მიუხედავად იმისა, რომ ზეპირად ახსოვს დინოზავრის მრავალი სახეობის რთულად წარმოსათქმელი სახელები: ბრაქიოზავრი, ტერადაქტილი, დიპლოტოკი და სხვა (თვითონ მკარნახობს), აგრეთვე უამრავი მულტფილმის სიუჟეტი და გმირი, ვერ ამოიკითხა, როცა ამოიკითხა, ვერ მიხვდა და მრავალჯერადი ახსნის შემდეგაც ვერ მიხვდა, რას ნიშნავდა „ეს ძიძიას სათითეა“ ან „შიო შოთას ძიაა“; ლექსის – „მე პატარა ქართველი ვარ~ წაკითხვა როგორც კი დავიწყე, ბავშვის გამომეტყველებამ ცალსახად მიკარნახა, რომ სასწრაფოდ უნდა შემეწყვიტა, თუ არა და, მომიწევდა ამეხსნა 6 წლის ბავშვისთვის, მისთვის გასაგებ ენაზე ფრაზა „მე განცხრომით სხვაგან ყოფნას, მირჩევნია აქ სიკვდილი“ და ნებისმიერ მცდელობაში ტრაფარეტული პატრიოტიზმის ენას ვერ ავცდებოდი. არც წავიკითხეთ და არც დავიზეპირეთ; ამის ნაცვლად წავიკითხეთ ზღაპარი პატარა დინოზავრზე, რომელსაც ძილის წინ კბილების გახეხვა ავიწყდებოდა და ამის გამო კბილი დაკარგა. ეს ისტორია ჩემს შვილს ყოველ საღამოს ახსენდება და კბილების გახეხვაც არ ავიწყდება, პატრიოტიზმის გაუფასურებას კი გადავრჩით, არა იმიტომ, რომ საქმე ცუდ ნაწარმოებთან გვქონდა, არამედ იმიტომ, რომ ჩემი შვილის ასაკისთვის შეუფერებელი იყო.

ვფიქრობ, იაკობ გოგებაშვილი ყველაზე ცუდ სიზმარშიც ვერ წარმოიდგენდა, რომ თითქმის საუკუნე-ნახევრის შემდეგ ციფრული ტექნოლოგიების ეპოქაში ქართული პედაგოგიკა ვერ შეძლებდა XXI საუკუნის ქართველი ბავშვის რეალობიდან გამომდინარე დედა ენის თუნდა უმარტივეს ლექსიკურ ადაპტაციას. გოგებაშვილის დაწყებული დიდი საქმე რომ არ გავაგრძელეთ, ეს ერთია, ათწლეულებით რომ ჩამოვრჩით მეცნიერების, მათ შორის ბავშვის ფსიქოლოგიის, პედაგოგიური მეთოდოლოგიების და სხვათა განვითარებას, ეს მეორეა და დღეს, როდესაც ძალიან ბევრი ველოსიპედი უკვე გამოიგონეს, იმით სარგებლობაც რომ გვიჭირს, ეს მესამეა.

ჩვენი სკოლა ჯერ კიდევ ქართული პედაგოგიკის ჩანასახში შექმნილი პროდუქტით და დატრენინგებული საბჭოთა სკოლის მეთოდოლოგიით ებრძვის XXI საუკუნის გამოწვევებს; მშობლების შეკვეთაც დომინანტურად იგივეა, რაც 20 წლის წინ დიპლომის ჟინით შეპყრობილი საზოგადოების ყველა ფენის მშობელს ჰქონდა – „ჩემი შვილი ძალიან დატვირთეთ და მკაცრად მოსთხოვეთ“. არადა, მსოფლიოში ყველაზე წარმატებულად რეფორმირებულ ფინურ განათლების მოდელში ბავშვებს ყველაზე ცოტა დავალებას აძლევენ, ყველაზე ცოტა დროს ატარებენ სკოლაში, ყველაზე ცოტა გამოცდას აბარებენ და აკადემიური მაჩვენებლებით ნორვეგიელ და დანიელ ბავშვებსაც გაუსწრეს. მაგრამ მშობელს საქართველოში ნაკლებად აინტერესებს რაში და როგორ გამოიყენებს ბავშვი იმ ცოდნას, რომელსაც მიიღებს, მიიღებს თუ არა ბავშვი სიამოვნებას სწავლის პროცესში, შეიყვარებს თუ არა წიგნს, ტექსტს, ლიტერატურას, ციფრებს, გეომეტრიულ სხეულებს, შეეცდება თუ არა უფრო ღრმად შეიმეცნოს ფიზიკური ან ქიმიური პროცესები, ისწავლის თუ არა ფიქრს, აზროვნებას, კითხვების დასმას და პასუხების ძიებას _ მაგრამ საზეპიროდ მიცემული ქართული კლასიკური პოეზიის ნიმუში მეორე დღისთვის აუცილებლად უნდა დაიზეპიროს, თუნდაც სინამდვილეში იმავე ავტორის სულ სხვა ლექსი უფრო მოსწონდეს, მერე სკოლაში აუცილებლად მაღალი შეფასება უნდა მიიღოს, მერე რა, რომ ის ლექსი ან შეფასების მიღებისთანავე დაავიწყდება, ან მთელი ცხოვრება ლექსიც და ავტორიც სიძულვილით გაახსენდება.

აი ასე, დასაწყისშივე ვთესავთ სიძულვილს და მერე სიყვარული გვინდა, რომ მოვიმკათ.

იზაურა & სავაში

თაყვანისმცემლებთან ერთად მტრებიც გამოჩნდნენ. რას აღარ აბრალებდნენ სერიალებს _ ისინი ხომ დამშეული ხალხის გასართობად, გამოსათაყვანებლად და რაც მთავარია, ტრადიციების დასანგრევად გამოიგონეს, ბევრი იმასაც ამბობდა, რომ _ სპეციალურად საქართველოსთვის. ამის მიუხედავად ლათინო-ამერიკული საპნის ოპერა ყველა ქართული სატელევიზიო არხის საეთერო ბადის მთავარი მკვებავი გახდა.
და ასე ჩაიარა სერიალებით ცხოვრების 20 წელიწადზე მეტმა…

ყველაფერს გაუდის ყავლი და ბოლო რამდენიმე წელია სერიალების მიმართ ინტერესი, უნდა ვაღიაროთ, რომ მნიშვნელოვნად შემცირდა. მეგონა, რომ უზომოდ მირთმეულმა ერთფეროვანმა სანახაობამ ქართველ მაყურებელს თავი მოაბეზრა. სერიალები აღარ იყო აქტუალური და მათ პერსონაჟებზე თითქმის აღარ ლაპარაკობდნენ არც სამეზობლოში, არც ტრანსპორტში და წარმოიდგინეთ, აღარც სამსახურებში.
რაღაც იყო საჭირო, რაღაც სხვა, რომელიც სერიალებით ცხოვრების მიძინებულ პროცესს გააცოცხლებდა…
ევრიკა „მაესტროს“ ეკუთვნის.

… და გამოჩნდა „სავაში“, საქართველოში კი თურქული სერიალებით ცხოვრების ეპოქა დაიწყო. არავითარი დეჟავიუ, ისტორია ხომ მეორდება და ისევ გახდა სერიალები სამსჯელო თემა სამეზობლოში, ტრანსპორტსა და სამსახურებშიც კი.
ქართულმა ტელეარხებმაც უცებ შეაქციეს ზურგი ამდენი წლით მათ ერთგულ მკვებავ ლათინო-ამერიკულ სერიალებს და თითქმის სრულად ჩაანაცვლეს თურქულით.

თაყვანისმცემლებთან ერთად ისევ გამოჩნდნენ მტრებიც. თურქოფობიით, ეკონომიკური ექსპანსიის მოლოდინითა და ვაღიაროთ, ხშირად ქსენოფობიით შეპყრობილებისთვის ეს ნამდვილი უბედურების ზარი აღმოჩნდა _ ეს ხომ უკვე იდეოლოგიური ექსპანსიის საშიშროებასაც ქმნის… ყველა მოსაზრებას აქვს არსებობის უფლება. მოდი და ნუ შეშინდები _ თითქმის ყველა წამყვანი ქართული ტელეარხი, დღის ყველა ძვირფას მონაკვეთს ერთდროულად უთმობს მხოლოდ თურქულ სერიალს. თითქოს ის არ გვეყოფა, რომ ლამის ყველაფერი თურქულით ვსაზრდოობთ…

მე კი მგონია, რომ ცოტა ვაზვიადებთ. მგონია, რომ ტელესერიალები ისევ რჩება ქართული ტელეარხებისთვის საეთერო ბადის შევსების წყაროდ. თანაც, რაც იაფი და განსხვავებული იქნება ეს წყარო, მით უკეთესი. უნდა ვივარაუდოთ, რომ ტელესერიალების თურქმა მესვეურებმა ამ ეტაპზე ოკეანისგადაღმელ კოლეგებს ქართული ბაზარი წაართვეს. რას იზამ, კონკურენცია დაუნდობელია.

გაზვიადებული მგონია თურქული სერიალების მიმართ გაჩენილი შიში იმის გამო, რომ ისინი ათეულობით ქვეყანაში იყიდება და არა მგონია, სპეციალურად საქართველოსთვის იქმნებოდეს. ვერც შემოსავლისთვის იქნებოდა გათვლილი საქართველო. ჩვენ ხომ იმდენად მცირე აუდიტორია ვართ, საკუთარ ტელეარხებსაც ვერ ვარჩენთ.

თანაც ისტორია მეორდება. ქართული არხები იმავე დოზით გვაწვდიან თურქულს, როგორითაც ლათინო-ამერიკულს გვთავაზობდნენ. ამდენი ერთფეროვნება ხომ ისევ მოგვბეზრდება. ყველაფერს გაუვა ყავლი და თურქულ სერიალებზეც შეწყდება მალე მსჯელობა სამეზობლოში, ტრანსპორტსა და სამსახურებშიც კი.

P.S. თურქული სერიალების გამოჩენას, მგონი, ერთი მეტად მნიშვნელოვანი პოზიტივი მოჰყვა. მეც და, ალბათ, ბევრი ჩემი თანამემამულეც დაფიქრდა იმაზე, რომ ძალიან ცუდად ვიცნობთ მეზობელ, უდიდესი გავლენის მქონე ქვეყანას. თითქმის არაფერი ვიცით მათ ტრადიციებზე, ისტორიასა და კულტურაზე. მხოლოდ აღებ-მიცემობითი ურთიერთობებით გაჩენილი სტერეოტიპები კი, უმჯობესია დაიმსხვრეს.

მერაბ წულუკიძე-საზოგადოებრივი მაუწყებლის ჟურნალისტი

აქცია „ჭაჭის შადრევანთან“

„მწვანე ჯგუფმა“ იდეა ქალაქის საკრებულოს გააცნო. მათ პარკის გასაშენებლად „ჭაჭა თაუერის“ მიმდებარე ტერიტორია შესთავაზეს, თუმცა საკრებულომ იმის გამო, რომ ეს ტერიტორია სხვის მფლობელობაშია, ალტერნატივად ბარბარეს ეკლესიასთან არსებული ადგილი შესთავაზა.

„მწვანე ჯგუფის“ ხელმძღვანელი თემურ ხასია ამბობს, რომ ადგილი, სადაც ახალგაზრდული სკვერი გაშენდება შერჩეული ჯერ არ არის.

„უახლოეს დღეებში დავიწყებთ მოლაპარაკებებს აჭარის მთავრობასთან. ქალაქის საკრებულომ და ბათუმის სხვადასხვა საჯარო სამსახურებმა მხარდაჭერა გამოგვიცხადეს. არსებობს ალტერნატიული ადგილები, რომლებზეც საბოლოოდ შევთანხმდებით“.

თემურ ხასიას ინფორმაციით, ახალგაზრული პარკის გაშენება 1 მლნ 200 ათასი ლარი დაჯდება. პროექტი ჯერ დასრულებული არ არის და მიმდინარეობს მუშაობა.

მშვიდობიან აქციას სტუდენტები, უნივერსიტეტის ლექტორები და ახალგაზრდები შეუერთდნენ. აქციას მხარდაჭერა გამოუცხადა აჭარის ქართული საბრძოლო ხელოვნების ფედერაცია „შავფაროსნებმა“, რომლის წევრებმაც საჩვენებელი ნიმუში შეასრულეს.

მძღოლები ისევ გაიფიცებიან

პროფკავშირების განცხადებით, ხელფასების გაზრდით მოტივით, „ბათუმის ავტოტრანსპორტსა“ და შპს „სინოჰიდრო“-ში დასაქმებულმა მძღოლებმა, პირველი საპროტესტო აქცია გასული წლის თებერვალში გამართეს. გაფიცული მძღოლები დამსაქმებლისგან ხელფასების გაზრდას მოითხოვდნენ.

„ავტოტრანსპორტის ხელმძღვანელობასთან წერილობით შევთანხმდით, რომ მძღოლებს ხელფასები გაეზრდებოდათ, თუმცა ეს პრობლემა ამ დრომდე არ მოგვარდა. გია ლორიამ პასუხიც კი არ მოგვწერა თუ რატომ არ დააკმაყოფილა მძღოლების მოთხოვნა“ – აცხადებს პროფკავშირების აჭარის გაერთიანების ხელმძღვანელი, ილია ვერძაძე.

შპს „აჭარის ავტოტრანსპორტის“ ხელმძღვანელობისგან განსხვავებით, მძღოლების მოთხოვნები დადებითად გადაწყვიტა შპს „სინოჰიდროდის“ ხელმძღვანელობამ და ავტობანის მშენებლობაზე დასაქმებულ მძღოლებს, ხელფასი გაუზარდა.

შპს „აჭარის ავტოტრანსპორტის“ ხელმძღვანელის გია ლორიას განცხადებით, ოპტიმიზაციის ხარჯზე კომპანიის შემოსავლები არ გაზრდილა.

„ხელფასები უნდა გაზრდილიყო თანხების ოპტიმიზაციის ხარჯზე, მაგრამ არ მოხერხდა, რადგან გამოჩნდა სხვა ხარჯები, გაძვირდა საშენი და ტექნიკური მასალები და ამან გადაფარა ხელფასების საკითხი. მძღოლები მითხოვდნენ ხელფასის 50 თეთრით გაზრდას, რაც წელიწადში ნახევარი მილიონი ლარი გამოდის. ამხელა თანხის ოპტიმიზაციას კი ვერ გავაკეთებთ“-აცხადებს გია ლორია.

ავტოტრანსპორტის ხელმძღვანელის განცხადებით, ავტობუსის მძღოლების ხელფასი თვეში საშუალოდ 600-700 ლარია.

ხელფასების გაზრდას მოითხოვდნენ ავტობანის მშენებლობაზე დასაქმებული მძღოლებიც.

„შპს „აჭარის ავტოტრანსპორტის“ ხელმძღვანელობისგან განსხვავებით, შპს „სინოჰიდრომ“ მძღოლების მოთხოვნები დადებითად გადაწყვიტა და მათი ხელფასები 4 ლარით გაიზარდა“-აცხადებენ პროფკავშირებში

„ჩაჭრა“ გასაუბრებაზე, წარმატებული ტესტირების შემდეგ

ქალბატონო თამთა, განათლებისა და მეცნიერების სამინისტრომ გამოაქვეყნა დირექტორობის უფლების მქონე პირთა სია. ამ ჩამონათვალში თქვენ არ ხართ. კონკურსის პირველ ეტაპზე 800 კონკურსანტიდან 120 შორის მოხვდით, ვინც სერტიფიკატი მიიღო. გასაუბრებაზე რა მოხდა?

როგორც ჩანს ჩამჭრეს, სიაში არა ვარ. ამბის გასაგებად როცა დავრეკე ცხელ ხაზზე, მითხრეს, სასამართლოს მიმართეო. კარგი იყო გასაუბრება, არ დარღვეულა ჩემი უფლება… ახლა სასამართლოს მივმართო გასაუბრების გამო, რომლის დოკუმენტიც არ არსებობს?!- ვფიქრობ, არ ღირს.

რა იყო გასაუბრების კრიტერიუმები?

გასაუბრების კრიტერიუმები განსაზღვრული არ იყო, საკუთარი ფსიქოლოგიური პორტრეტი უნდა შეგვექმნა 15 წუთის განმავლობაში. ზოგიერთ კომისიაში ხუთი ადამიანი იყო, ზოგიერთში – სამი და ოთხი. არ ვიცი, რა მოხდა. კომისია, რომელთანაც მომიწია მუშაობა, იყო ძალიან კარგი, კორექტული, ინტერესით გამომკითხეს ბევრი რამე და მეც ვიყავი გულწრფელი.

ასევე მითხრეს, რომ შეამოწმებდნენ დირექტორობის კანდიდატების მეტყველების კულტურას, როგორ გამოიყურება, ასაკი, ჩაცმის კულტურა, თავდაჭერის მანერას. ყველას გვეკითხებოდნენ ერთსა და იმავეს, როგორ განვითარდით პიროვნულად, მოგვიყევით თქვენი სწავლის შესახებ. მკითხეს ასევე, თქვენი აზრით, რა არის საქართველოს განათლების სისტემის შავი ჭირიო. ჩემი თვალსაზრისით რაც იყო, გულწრფელად ვუპასუხე; ეს არ იყო ცოდნის შემოწმება, ასე მოწმდებოდა მეტყველების კულტურა.

ნაყოფიერი მომეჩვენა ეს გასაუბრება, თუმცა აღმოჩნდა, რომ სიაში არა ვარ.

როდის ჩაგიტარდათ გასაუბრება და ტესტირებაზე როგორი შედეგი გქონდათ?

ტესტირება მე გავიარე 2012 წელს, ბარიერი მაშინ იყო 70 ქულა, მე 79 ქულა დავაგროვე. ასეთი შედეგი საქართველოს მასშტაბით კიდევ 5 ადამიანს ჰქონდა. გასაუბრების ეტაპი მერე გადაიდო და ჩაგვიტარდა ახლა – ოქტომბერში, მე 30 ოქტომბერს გავიარე გასაუბრება თბილისში. სამ თვეზე მეტი გავიდა…

გუშინ ბრძანებით 2012 წელს სერტიფიცირებული დირექტორები გამოაცხადეს, 2013 წელს სერტიფიცირებულები ცალკე ბრძანებით გამოაქვეყნეს. მე ვვარაუდობ, რომ რაღაც ხარვეზია, თუმცა როცა გარკვევა ვცადე, მითხრეს სასამართლოში მეჩივლა. ამას არ ვაპირებ, რადგან აბსურდია.

პროკურატურის განმარტება გაუპატიურების მცდელობაზე

პროკურატურის პრესსამსახურის თანამშრომლის, ეკა ჩიჩუას განმარტებით, უწყებაში საჩივარი შევიდა, თუმცა მოკვლევის ეტაპზე გარემოს დაცვის თანამშრომლის მხრიდან დანაშაულის ჩადენის ნიშნები არ გამოკვეთილა, ამიტომაც, საქმეზე გამოძიება არ დაწყებულა.

ახალი ცხელი ხაზი სასწრაფო სამედიცინო სამსახურში

მიმდინარე წელს სასწრაფო სამედიცინო დახმარების ცენტრისთვის სპეციალური, ბავშვთა რეანომობილის შეძენა იგეგმება, რომელიც ერთ თვემდე ჩვილების ტრანსპორტირებისათვის საჭირო ტექნიკით იქნება აღჭურვილი.

სასწრაფო სამედიცინო ცენტრის დახმარების პროგრამისთვის წელს 727 440 ლარია გათვალისწინებული.

გარემოს დაცვის სამმართველოს თანამშრომელს გაუპატიურების მცდელობაში ადანაშაულებენ

„არანაირი კორპორატიული საღამო არ ყოფილა. როგორც ამას ამბობენ. იანვრის დასაწყისში შემოვიდა თანამშრომლის მოხსენებითი ბარათი, ამ გავრცელებულ ინფორმაციასთან დაკავშირებით, ჩვენ არაფერს არ ვმალავთ, ჩვენ იმ დღესვე ეს ინფორმაცია გადავუგზავნეთ შესაბამის სამსახურებს“.

როგორც ვახტანგ წულაძე აცხადებს, საჯარო მოხელემ, რომლის წინააღმდეგაც შევიდა ახსნა-განმარტებითი ბარათი, თანამდებობა საკუთარი განცხადების საფუძველზე დატოვა.

კინო აფიშა

დისკვალიფიცირებულები და „შავ სიაში“ მოხვედრილები

გასული წლის აგვისტოში სახელმწიფო შესყიდვების სააგენტომ შპს „ოლდ ბათუმის“ სახელით საჩივარი მიიღო. კომპანია სააგენტოსგან „კანონმდებლობასთან შეუსაბამო გადაწყვეტილების“ გაუქმებას ითხოვდა. დავის მიზეზი 33 თეთრი გახდა.

სასაზღვრო პოლიციის მიერ გამოცხადებული ელექტრონული ვაჭრობისას „ოლდ ბათუმმა“ სამუშაოს შესრულებისთვის საბოლოო თანხად 31 200 ლარი დაასახელა და შემსყიდველთან შეთანხმებასაც მიაღწია. ხარჯთაღრიცხვაში კი, როგორც კომპანიის წარმომადგენელი განმარტავს, „ტექნიკური შეცდომის გამო“ 33 თეთრით მეტი გაწერა. იმის გათვალისწინებით, რომ „დაზუსტებული ხარჯთაღრიცხვა აღემატებოდა ელექტრონული ვაჭრობის დროს დაფიქსირებულ ფასს“, შემსყიდველმა კომპანიას დისკვალიფიკაცია მისცა, მასთან დადებული შეთანხმება კი გააუქმა და იმავე ტენდერში მონაწილე პრეტენდენტს შპს „რემარტს“ შეუთანხმდა.

„ოლდ ბათუმის“ კომპანიის წარმომადგენელმა ჯამბულ დავითაძემ სახელმწიფო შესყიდვების დავების განხილვის საბჭოს დაზუსტებულ ხარჯთაღრიცხვაში თანხის 33 თეთრით გაზრდა ტექნიკური ხარვეზის მიზეზით ახსნა და დისკვალიფიკაციის შესახებ შემსყიდველის გადაწყვეტილების გაუქმება მოითხოვა.

„ჩვენ მიერ ატვირთული ტექნიკური დოკუმენტაცია არ შეიცავს ისეთ უზუსტობას, რომელთა დაზუსტებაც გამოიწვევს ტექნიკური დოკუმენტაციის არსებით ცვლილებას და მოახდენს გავლენას წინადადების ფასზე. ამიტომ ხელშეკრულება უნდა გაფორმდეს ჩვენ მიერ ვაჭრობის დროს შეთავაზებულ თანხაზე“.

სააგენტოს დავების განხილვის საბჭომ საჩივარი განიხილა და არ დააკმაყოფილა.

„დაზუსტებისას ფასის გაზრდა დაუშვებელია. საბჭოს მიაჩნია, რომ შემსყიდველი ორგანიზაცია უფლებამოსილი იყო განეხორციელებინა კომპანიის დისკვალიფიკაცია“, _ ნათქვამია საბჭოს გადაწყვეტილების ტექსტში.

სააგენტოში შესული დავების შესახებ არსებული დოკუმენტებით ირკვევა, რომ ტექნიკური დეტალების დაზუსტება და მცირე შეუსაბამობა ხარჯთაღრიცხვის ცხრილებში კომპანიისთვის დისკვალიფიკაციის მინიჭების მიზეზი ხშირად გამხდარა. დისკვალიფიკაცია ყოველთვის ტენდერებში მონაწილეობის აკრძალვას არ გულისხმობს. თუმცა ეს კომპანიას, რომელიც, ძირითადად, სახელმწიფო შეკვეთებზე მუშაობს, სერიოზულად აზარალებს. გარდა ამისა, დისკვალიფიცირებული კომპანიები სახელმწიფო სტრუქტურებში კარგი რეპუტაციით ვერ სარგებლობენ. შესაბამისად, იგივე დამფუძნებლები ახალ კომპანიას აფუძნებენ და საქმიანობას ახალი დასახელებით აგრძელებენ. ასეთ ხერხს დამფუძნებლები კომპანიის შავ სიაში მოხვედრის შემთხვევაშიც მიმართავენ.

ამის მაგალითია „გრინ სერვისის“ შემთხვევა _ როცა მათ პრობლემები შეექმნათ, დააფუძნეს ახალი კომპანია „გრინ სერვისი+“. ასეთ შემთხვევებზე სააგენტოს აქვს პასუხი, რომ კომპანია, რომელიც აკეთებს ახალ რეგისტრაციას, ის კარგავს გამოცდილებას, რაც ძალიან მნიშვნელოვანია ტენდერში მონაწილეობისას“, _ ამბობს გიორგი ჭანტურია არასამთავრობო ორგანიზაცია „საერთაშორისო გამჭვირვალობა საქართველოს“ თანამშრომელი. ეს ორგანიზაცია უკვე მეორე წელია სახელმწიფოს მიერ გამოცხადებული ტენდერებს უწევს მონიტორინგს.

სახელმწიფო სტრუქტურების მიერ გამოცხადებული ტენდერების უარყოფითი შედეგებით დასრულების ტენდენციაზე „ბათუმელები“ ცოტა ხნის წინათაც წერდა. აქვს თუ არა ამას კავშირი ზემოთ აღნიშნულ მიზეზებთან, ამაზე არც სახელმწიფო მოხელეები და არც ტენდერებში მონაწილე კომპანიების წარმომადგენლები არ საუბრობენ. სახელმწიფო შესყიდვების სააგენტოს მიერ გამოქვეყნებული მონაცემებით კი ჩანს, რომ ტენდერების ჩაშლის მიზეზი ხშირად პოტენციურ მონაწილეთა პასიურობაა. კერძო კომპანიები სახელმწიფო სტრუქტურების მიერ გამოცხადებულ ტენდერებში მონაწილეობისგან თავს იკავებენ.

„ტენდერი არ შედგა“, _ ამ ჩანაწერს შესყიდვების სააგენტოს ვებგვერდზე არამარტო ბათუმის მერიის მიერ გამოცხადებული ტენდერების შედეგებში ხშირად ვხვდებით.

კომპანიების წარმომადგენლები, რომლებსაც სახელმწიფო სტრუქტურებთან პრობლემები თუნდაც ტექნიკური ხარვეზების გამო შეექმნათ, მედიასთან საუბარს ერიდებიან. „ამ თემაზე საუბარი არ მინდა და არც ის მინდა, დაიწეროს ამაზე“, _ უთხრა „ბათუმელებს“ ერთ-ერთი კომპანიის დამფუძნებელმა, რომლის კომპანიასაც დისკვალიფიკაცია ტექნიკური ხარვეზის გამო მისცეს. იმავეს ამბობენ სხვებიც. ისინი პირად საუბარში პრობლემებზე საუბარს არ ერიდებიან, საუბრის დასრულების შემდეგ კი ითხოვენ, რომ მათი იდენტიფიცირება არ მოვახდინოთ.

ხშირია შემთხვევა, როცა გამოვლენილი გამარჯვებული კომპანია შეთანხმებულ მოვალეობებს თავს ვეღარ ართმევს, რის შემდეგაც სახელმწიფო სტრუქტურა იძულებულია დადებული ხელშეკრულება გააუქმოს და ახალი ტენდერი გამოაცხადოს. ამის გამო დაგეგმილი სამუშაოები დროში იწელება, აუთვისებელი თანხა კი ბიუჯეტში ნაშთის სახით რჩება. ბათუმის საკრებულოში შიშობენ, რომ ნაშთიანი ბიუჯეტის შემთხვევაში შესაძლებელია ცენტრალურმა მთავრობამ კონკრეტული პროექტების დაფინანსებაზე უარი თქვას.

ამჟამად სახელმწიფო შესყიდვების სააგენტოს „შავ სიაში“ 187 კომპანიაა რეგისტრირებული, მათგან უმეტესობის „შავ სიაში“ მოხვედრის მიზეზად „ნაკისრი ვალდებულებების არასრულად შესრულებაა“ მითითებული, დეტალები კი გამოქვეყნებული არ არის.

„საერთაშორისო გამჭვირვალობა საქართველოს“ წარმომადგენლის თქმით, ხშირად ჩნდება ეჭვი იმის თაობაზეც, რომ „ზოგიერთი ტენდერი კონკრეტულ კომპანიაზეა მორგებული“.

„მაგალითად, მანქანების შესყიდვისას, ხშირად იმდენად დეტალურადაა მოთხოვნაში მონაცემები გაწერილი, რომ ბევრი კომპანია ტენდერში მონაწილეობას ვერ იღებს. მხოლოდ ერთი აკმაყოფილებს მოთხოვნებს სრული სიზუსტით, ის ერთი იღებს ტენდერში მონაწილეობას და იგებს“, _ ამბობს გიორგი ჭანტურია.

აჭარის ექვსი ჩემპიონი ჭადრაკში

გამარჯვებულები დიპლომებითა და მედლებით დაჯილდოვდნენ.

ჩემპიონატი ბათუმის კომპლექსურ სასპორტო სკოლაში 1 თებერვლიდან მიმდინარეობდა. მასში აჭარის მასშტაბით 100 ბავშვი მონაწილეობდა. შეჯიბრება ფიდეს წესების თანახმად შვეიცარიულად და წრიული სისტემით 9 ტურად ჩატარდა.

ღონისძიება აჭარის სპორტისა და ახალგაზრდობის საქმეთა დეპარტამენტის ფინანსური მხარდაჭერითა და აჭარის ჭადრაკის ფედერაციის ორგანიზებით ჩატარდა.

გამარჯვებულები საქართველოს ჩემპიოანატისთვის იბრძოლებენ, რომელიც აპრილსა და მაისში გაიმართება.

2014 წელს აჭარის ჩემპიონები გახდნენ:

7 წლამდე ასაკობრიც ჯგუფში:

ანა გოგიტიძე

ანრი სურმანიძე

12 წლამდე ასაკობრიც ჯგუფში:

ია საფარიძე

დიმიტრი ჯიბუტი

16 წლამდე ასაკობრიც ჯგუფში:

ნატა ჯიბუტი

ირაკლი ახვლედიანი

როდის შეწყდება ანსამბლის წევრების აქცია

ანსაბლის 60 წევრი ამ მოთხოვნით ბათუმის დრამატულ თეატრთან შეიკრიბა. მათი თქმით, პროტესტს მანამდე გააგრძელებენ, სანამ ანსამბლის დირექტორი თანამდებობაზე თემურ ქორიძეს არ დააბრუნებს.

აჭარის სიმღერისა და ცეკვის სახელმწიფო ანსამბლში 75 წევრია. მათგან მხოლოდ 15 ადამიანი არ იღებს აქციაში მონაწილეობას.

ვინ მიიღებს შავ ქამარს

სემინარი, რომელიც აჭარის კიოკუშინკაი კარატეს ფედერაციის პრეზიდენტმა ზაალ მოისწრაფიშვილმა ჩაატარა, საკვალიფიკაციო გამოცდისთვის მომზადებას ითვალისწინებდა. აღმოსავლური ბრძოლის სპორტსმენებს საკვალიფიკაციო გამოცდა დღეს ჩაუტარდებათ და მათ სხვადასხვა სირთულის ილეთების შესრულება მოუწევთ. გამოცდას ვინც გადალახავს, აჭარის კიოკუშინკაი კარატეს ფედერაციის პრეზიდენტ ზაალ მოისწრაფიშვილისგან შავ ქამარს ჩაიბარებს.

ზაალ მოისწრაფიშვილის თქმით სემინარი წელიწადში ორჯერ, ზამთარში და ზაფხულში ტარდება. მისი მიზანი კი სპორტსმენის ხარისხის ამაღლებაა. სემინარს ასევე ესწრებოდნენ და ინსტრუქტორობას უწევდნენ სპორტის ამ სახეობის წარმომადგენლები არტურ უსტიანი, ჯუმბერ კაკულია, ლევან ცინცაძე და ედნარ დიდმანიძე, ასევე კემპო-კარატე კობუდოს ფედერაციის პრეზიდენტი ავთანდილ დილანჩიევი.