პარასკევს, 31 იანვარს, ბათუმში პროტესტისა და სოლიდარობის მარში გაიმართება პროევროპულ აქციებზე უსამართლოდ დაკავებული, დაჯარიმებული და ციხეში მყოფი ადამიანების მხარდასაჭერად.
საპროტესტო მარში შეიკრიბება პარასკევს, 31 იანვარს, 16 საათზე, ბათუმის საფეხბურთო სტადიონის მიმდებარედ. გაიმართება მსვლელობა ქალაქის ქუჩებში.
მარშში მონაწილეობა შეუძლია ყველას:
- ვინც სოლიდარობას უცხადებს საქართველოში მიმდინარე საპროტესტო მოძრაობაში მონაწილე დაკავებულ, დაჯარიმებულ და დაშავებულ ადამიანებს, მათი ოჯახის წევრებსა და მეგობრებს;
- ვინც ხმამაღლა ან ჩუმად აპროტესტებს საქართველოს ევროპული კურსის ცვლილებას;
- ვისთვისაც მიუღებელია ქვეყნის რუსულ ორბიტაზე დაბრუნება;
- ვინც მიიჩნევს, რომ სასამართლო უნდა ემსახურებოდეს ხალხს და არა ერთ პოლიტიკურ ჯგუფს;
- ვისაც აწუხებს სიღარიბე, ჯანდაცვისა და განათლების სისტემის პრობლემები ქვეყანაში.
31 იანვარს ზუსტად 65 დღე შესრულდება თბილისში, ბათუმსა და საქართველოს სხვა ქალაქებში მიმდინარე უწყვეტი საპროტესტო აქციების დაწყებიდან.
- რა ხდება?
საქართველოში მიმდინარეობს მასშტაბური პროტესტი, რომელმაც არა მარტო თბილისი, არამედ საქართველოს სხვა ქალაქებიც მოიცვა.
პროტესტი გამწვავდა 28 ნოემბერს, მას შემდეგ, რაც ირაკლი კობახიძემ განაცხადა, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი ასობით ადამიანი.
საპროტესტო აქციებზე ორგანიზებულად გამოდიან სხვადასხვა პროფესიული სფეროს და, ასევე, საქართველოს სხვადასხვა ქალაქისა და რეგიონის წარმომადგენლები.
ამ დროისათვის საპროტესტო მოძრაობის ძირითადი მოთხოვნა ორია: ხელახალი საპარლამენტო არჩევნები და აქციებზე დაკავებული პირების გათავისუფლება.
______________
ფოტო „ბათუმელების“ არქივიდან
