„ქართული ოცნების“ პარლამენტის თავმჯდომარე შალვა პაპუაშვილი ფეისბუქზე პოსტს აქვეყნებს და თავს ესხმის ონლაინ გამოცემა „პუბლიკას”.
კერძოდ, პაპუაშვილმა გააზიარა „პუბლიკის” ქარდი, ხვალ, 2 თებერვალს, თბილისი მოლთან დაგეგმილი საპროტესტო აქციის შესახებ და დაწერა, ამ ტიპის ინფორმაციის საზოგადოებისთვის მიწოდება, დანაშაული იყო.
პაპუაშვილი აქციაზე ინფორმაციის გავრცელებას წარმოაჩენს დანაშაულის რეკლამირებად და საუბრობს პასუხისგებაზე.
ონლაინგამოცემა პუბლიკა შალვა პაპუაშვილის განცხადებას მუქარად აფასებს და საგანგებო განცხადებას ავრცელებს: „პუბლიკა“ ჟურნალისტური საქმიანობის ფარგლებში აშუქებს ქვეყანაში მიმდინარე მოვლენებს, მათ შორის საპროტესტო აქციებს, ანონსებს და ა.შ.
აქვე აღვნიშნავთ, რომ „პუბლიკამ“ დღეს გააშუქა ბრძანება, რომლის მიხედვითაც საერთაშორისო მნიშვნელობის გზები სტრატეგიული ობიექტების ნუსხაში შევიდა და საზოგადოებას განუმარტა, რომ მისი ბლოკირება სისხლის სამართლის დანაშაულია.
ასევე გაშუქდა შინაგან საქმეთა სამინისტროს პრევენციული განცხადება ხვალ დაანონსებულ აქციაზე.
შალვა პაპუაშვილი ცდილობს ზეწოლას ჩვენს სარედაქციო დამოუკიდებლობაზე, ახალისებს ჩვენ მიმართ სიძულვილს და ძალადობას, რაც დასტურდება მის პოსტზე კომენტარებით.
პაპუაშვილის ამ განცხადებას „პუბლიკის“ თანამშრომლები აღვიქვამთ მუქარად,“ – ნათქვამია „პუბლიკას“ განცხადებაში.
