Batumelebi

მწვანე კონცხზე, იქ, სადაც რამდენიმე დღის წინ მატარებელი მოზარდს დაეჯახა, სარკინიგზო გადასასვლელები აყარეს, ყვითელი ლენტები გააბეს და რკინიგზის ორივე მხარეს ინსპექტორები დააყენეს, რომლებიც მოქალაქეებს ლიანდაგის გადაკვეთის უფლებას არ აძლევენ.

გადასასვლელები საქართველოს რკინიგზამ მოშალა, ასევე რკინიგზის თანამშრომლები არიან ის ადამიანები, რომლებიც მოქალაქეების გადაადგილებას აკონტროლებენ.

ჩაქვი-ბათუმის სარკინიგზო მონაკვეთზე უსაფრთხოების ზომები მას შემდეგ გაამკაცრეს, რაც 13 აგვისტოს, მწვანე კონცხზე მდებარე ერთ-ერთ სარკინიგზო გადასასვლელზე მატარებელი 16 წლის გოგოს დაეჯახა და მოკლა.

„ფლოსტი გაძვრა, მის ასაღებად დაიხარა. მატარებელი მოდიოდა, უყვიროდნენ, ამ ყვირილზე ბათუმის მხარეს გაიხედა, რაღაც მომენტში მიაბრუნა თავი მეორე მხარეს, მაგრამ მატარებელი უკვე ეჯახებოდა. მემანქანეს უთქვამს – თვალი თვალში გამიყარა, სიკვდილამდე ვერ დავივიწყებ იმ მზერასო,“ – უყვება „ბათუმელებს“ უბედური შემთხვევის ერთ-ერთი თვითმხილველი.

მწვანე კონცხზე ერთადერთი გადასასვლელი დატოვეს – ბოტანიკური ბაღის შესასვლელთან. ამ ადგილას შუქნიშანი დგას. ასევე ირთვება ხმოვანი სიგნალი, რომელიც მატარებლის მოახლოების შესახებ აფრთხილებს ადამიანებს და ასევე დგას ერთი თანამშრომელი, რომელიც ტურისტებს მიუთითებს, რომ მხოლოდ გადასასვლელზე გადაკვეთონ რკინიგზა.

ბოლო 17 დღეში ჩაქვი – ბათუმის მონაკვეთზე მატარებელმა სამი ადამიანი იმსხვერპლა.

აქედან ორ შემთხვევაში სატვირთო მატარებელი დაეჯახა მოქალაქეს, ერთ შემთხვევაში კი სამგზავრო.

ღიად, კამერის წინ საუბარი არ სურთ მწვანე კონცხზე მომუშავეებს, მაგრამ ამბობენ, რომ უბედური შემთხვევების მიზეზი, მათი აზრით, „აჩქარებული მატარებელია“.

„გამოვიდნენ და თავი მოიწონეს – ნახევარი საათით ადრე ჩავა მატარებელი ბათუმშიო. ნახევარი საათით გვიან რომ ჩავიდეს და ეს ტურისტულად დატვირთული მონაკვეთი დიდი სიჩქარით არ გაიაროს მატარებელმა არ შეიძლება?“ – გვეკითხება მწვანე კონცხზე მცხოვრები და მომუშავე ერთ-ერთი ადგილობრივი.

მისივე თქმით, გადასასვლელი, რომელიც 15 აგვისტოს მოშალა რკინიგზამ, „რაც თავი ახსოვს“ ფუნქციურია და ამით როგორც მწვანე კონცხზე მცხოვრები მოსახლეობა, ისე დამსვენებლები სარგებლობდნენ. ის გამოსავალს არა გადასასვლელის მოშლაში, არამედ რკინიგზის სახიფათო მონაკვეთების შეღობვაში ხედავს.

„შეხედეთ იმ ყვითელ ლენტებს. ეს ლენტი დააკავებს მოქალაქეს? აქ არ გადადიან მართალია, მაგრამ ცოტა ზემოთ მიდიან და იქ კვეთენ რკინიგზას, სადაც ლენტი არაა გაბმული. მწვანე კონცხის გადასასვლელამდე მაინც არ მიდიან. ამ კონკრეტულ მონაკვეთზე აკრძალვის აზრს ვერ ვხედავ. აქეთ მეწარმეები ზარალდებიან მხოლოდ.

გააკეთონ ღობე, შემოღობონ და აქ გააკეთონ გადასასვლელი, რომელიც აქტიურ სეზონზე გაკონტროლდება. გაიმეტოს ფული რკინიგზამ, დაასაქმოს ერთი ადამიანი, რომელიც გადასასვლელის მეთვალყურე იქნება. როგორც ბოტანიკურის შესასვლელთანაა შუქნიშანი ისე გააკეთონ აქაც და დაიცვან უსაფრთხოება“, – უთხრა „ბათუმელებს“ ერთ-ერთმა ადგილობრივმა.

მწვანე კონცხზე მცხოვრებთა და დასაქმებულთა თქმით, ისინი ელიან, რომ რკინიგზაში გონივრულ გადაწყვეტილებას მიიღებენ, სახიფათო მონაკვეთს შეღობავენ, ძველ გადასასვლელს აღადგენენ და უსაფრთხოების ისეთ ნორმებს დანერგავენ, რაც მოქალაქეების ლიანდაგზე გადასვლას საფრთხეს აღარ შეუქმნის.

„ბათუმელებს“ ასევე უთხრეს, რომ ლიანდაგის შეღობვა უკვე დაწყებულია.

„როგორც ვიცი, ლანჩხუთიდან მოყვებიან და ყველა იმ ადგილს შეღობავენ, სადაც კრიტიკული წერტილებია,“ – უთხრა „ბათუმელებს“ ინფორმირებულმა პირმა.

• რას ამბობს საქართველოს რკინიგზა

3 აგვისტოს ჩაქვში სატვირთო მატარებელი ახალგაზრდა კაცს დაეჯახა. 13 აგვისტოს 16 წლის გოგოს მწვანე კონცხზე, ხოლო 16 აგვისტოს ისევ ახალგაზრდა კაცი დაიღუპა ჩაქვში მატარებლის შეჯახების შედეგად.

შინაგან საქმეთა სამინისტროს ინფორმაციით, სამივე შემთხვევაში გამოძიება სისხლის სამართლის კოდექსის 275-ე მუხლით დაიწყო, რაც რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას  გულისხმობს.

არცერთ შემთხვევაზე თავად საქართველოს რკინიგზას რაიმე ოფიციალური განმარტება არ გაუკეთებია.

საქართველოს რკინიგზას არ უპასუხა არც „ბათუმელების“ მიერ გაგზავნილ კითხვებს.

„ბათუმელებმა“ არაოფიციალურად შეძლო გარკვევა, რომ სარკინიგზო ლიანდაგის უსაფრთხოების დასაცავად, საქართველოს რკინიგზამ მართვის ცენტრალური აპარატიდან – გენერალური ინსპექციიდან რამდენიმე ინსპექტორი ბათუმში მიავლინა.

უსაფრთხოების ჯგუფის წევრები რკინიგზის გასწვრივ რამდენიმე ადგილას არიან განლაგებული, მათ შორის, მწვანე კონცხზე, ბუკნარში და მახინჯაურში – იქ, სადაც ყველაზე მეტი ტურისტი მოძრაობს.

რა გონივრული გამოსავალი არსებობს იმისათვის, რომ ერთი მხრივ არც მოსახლეობა დაზარალდეს და მეორე მხრივ, დამსვენებელი იქნება თუ ადგილობრივი, უსაფრთხოდ გადაკვეთოს რკინიგზა?

საერთაშორისო პრაქტიკა ამბობს, რომ საუკეთესო საინჟინრო გადაწყვეტილება ასეთ დროს, არის შეღობვა, სპეციალური შუქნიშნების მოწყობა ან/და ლიანდაგის სხვადასხვა დონეზე გადაკვეთა – საფეხმავლო ხიდის ან მიწისქვეშა გადასასვლელის გაკეთება.

რამდენად რეალურია შეიღობოს არა მთლიანად რკინიგზა, არამედ სახიფათო ე.წ. შავი წერტილები და მოწესრიგდეს გადასასვლელები – ამ კითხვებზე პასუხის მიღებას „ბათუმელები“ შეეცადა.

„არასანქცირებული პირების გადაადგილება უნდა შეიზღუდოს რკინიგზაზე, ცნობიერება უნდა ამაღლდეს, ამასთან, რკინიგზამ და მუნიციპალიტეტმა ერთად უნდა მოიფიქროს გამოსავალი,“ – ამბობს „ბათუმელებთან“ შპს Georail-consulting-ის დამფუძნებელი და დირექტორი ლევან ლომსაძე. მას აკადემიური ხარისხი აქვს დაცული სარკინიგზო ინჟინერიის მიმართულებით და თავადაც უმუშავია რკინიგზაში.

შეიძლება თუ არა იყოს გამოსავალი ფიზიკური ბარიერი, ღობის გავლება – ვკითხეთ ლევან ლომსაძეს.

„რეალურად უნდა შევხედოთ, რომ ნამდვილად ვიპოვოთ გამოსავალი. მოსახლეობას რა რეაქცია ექნება, როდესაც [ღობის გამო] მოუწევთ შემოვლითი გზით სიარული? ადრე, როცა არაოფიციალური გადასასვლელების მოშლა ხდებოდა, მოსახლეობის მხრიდან ძალიან დიდი უკმაყოფილება და პროტესტი მოჰყვებოდა ხოლმე. ვიღაცას ეზარება 100 მეტრის გავლა და გადადის იქ, სადაც არ შეიძლება.

სამტრედია-ბათუმის მონაკვეთზე ჩემი თვალითაც მინახავს ბევრჯერ, რომ მოსახლეობა აწყობდა თვითნებურ გადასასვლელებს. იდეალური სიტუაცია იქნებოდა, რკინიგზა რომ იყოს შეღობილი, მაგრამ ჩვენთან ახლა სიჩქარეები არ არის ისეთი და ტექნიკური რეგლამენტით არ არის მოთხოვნა, რომ ჩვეულებრივ რკინიგზაზე ყველაფერი შეღობილი იყოს. ამიტომ ვამბობ, რომ ცნობიერება არის ნომერ პირველი. უნდა იყოს კამპანიები სარკინიგზო უსაფრთხოების კუთხით.

მოქალაქეებმა უნდა იცოდნენ, რომ არ შეიძლება ლიანდაგის გადაკვეთა დაუშვებელ ადგილებში. ვხედავთ კადრებს, როგორ იღებენ სელფებს მატარებლის ფონზე – ეს სიკვდილთან თამაშია,“ – ამბობს „ბათუმელებთან“ შპს Georail-consulting-ის დამფუძნებელი და დირექტორი ლევან ლომსაძე.

ლევან ლომსაძე საუბრობს პასუხისმგებლობა უსაფრთხოებაზე ეკისრება არამხოლოდ რკინიგზას, არამედ მუნიციპალიტეტს და მოქალაქესაც.

„ალბათ რაღაცა პასუხისმგებლობა გარშემო ტერიტორიაზე სხვადასხვა ობიექტების მფლობელებმაც უნდა გაიზიარონ. არ ვიცი, ზედამხედველს დანიშნავს თუ ვის დანიშნავენ, მაგრამ აუცილებელია, რომ გადასასვლელები გაკონტროლდეს.

ჩემი აზრით, საქართველოში უნდა აღირიცხოს და გამოვლინდეს სარკინიგზო ინფრასტრუქტურაზე მსგავსი კრიტიკული ადგილები და მაქსიმალურად უნდა შეიღობოს. მაგრამ აქ შემოდის მეორე საკითხი – რა რეაქცია ექნება ამაზე მოსახლეობას.

მეორე მხრივ, ეს მარტო რკინიგზის პრობლემა არ არის, აქ უნდა ჩაერთოს ადგილობრივი მუნიციპალიტეტებიც, რკინიგზის ტრანსპორტის სააგენტო და ერთიანი ხედვა უნდა არსებობდეს. კრიტიკული ადგილები უნდა გამოვლინდეს და ეტაპობრივად შეიღობოს“, – ამბობს ლევან ლომსაძე.

სპეციალისტის თქმით, საქართველოს რკინიგზაზე სამგზავრო მატარებელი 120 კმ/სთ-ზე მეტი სიჩქარით არ მოძრაობს.

ხოლო არსებობს განსაზღვრული უბნები, სადაც მატარებელი სიჩქარეს ამცირებს 60 ან 80 კმ-საათამდე.

როდესაც მემანქანე საფრთხეს აღიქვამს და მუხრუჭს იყენებს, გაჩერების მანძილი შეიძლება იყოს 100-200 მეტრი.

„მუხრუჭის გამოყენების შემდეგ მატარებლის გაჩერება დამოკიდებულია სიჩქარეზე, რელიეფზე და კლიმატურ პირობებზეც კი. საფრთხიდან 10 და 15 მეტრში მატარებელი ვერ გაჩერდება, გამორიცხული თემაა. სველ ლიანდაგზე სამუხრუჭე მანძილიც იცვლება. გარდა ამისა, მემანქანეების ემოციური მდგომარეობაც ძალიან რთულია ასეთ დროს – უყურებენ საფრთხეს და ვერაფერს აკეთებენ მუხრუჭის მოქმედებაში მოყვანის გარდა,“ – ამბობს „ბათუმელებთან“ შპს Georail-consulting-ის დამფუძნებელი და დირექტორი ლევან ლომსაძე.

• როგორ იქცეოდა რკინიგზა წინა წლების ტრაგედიებზე

გასულ წლებში ბათუმში ორი შემთხვევა იყო, როდესაც მატარებელი მოქალაქეს დაეჯახა და მოკლა. 2025 წლის თებერვალში, მახინჯაურში, ლიანდაგზე ახალგაზრდა ქალს დაეჯახა მატარებელი, 2025 წლის აპრილში კი ბარცხანის ხიდის ქვეშ, სკოლასთან ახლოს მდებარე სარკინიგზო გადასასვლელზე 13 წლის მოზარდი დაიღუპა.

„ბათუმელებმა“ – ორივე ადგილი გადაამოწმა. მახინჯაურში არაფერი შეცვლილა, სარკინიგზო ლიანდაგი ისევ ღიაა, რაც შეეხება ბარცხანას, აქ მთელს სიგრძეზე, ქუჩის მხრიდან მწვანე მესრითაა ტერიტორია შეღობილი, თუმცა უშუალოდ ხიდის ქვეშ, რკინიგზაზე  გადასასვლელი ღიაა.

„თვალებიდან არ ამომდის ის ტრაგედია, ის პატარა ბავშვი, რომელიც აქ მატარებელმა გაიტანა. ამ ამბიდან მალევე შეღობეს ეს ტერიტორია. ამას გარდა, მატარებელი როცა მოდის, ამ ადგილას უკვე ძალიან აქვს სიჩქარე დაკლებული. სულ ვაკონტროლებთ მეზობლები – ბავშვებიც და დიდებიც. აქ ისეთი ადგილია, გარეთ ვუშვებთ ბავშვებს თავისუფლად და ყველას ვაფრთხილებთ, რომ რკინიგზას არ გაეკარონ. თუ ვინმე უფროსი დაინახავს, რომ ვინმეს ბავშვი ლიანდაგისკენ მიდის, ეგრევე ეძახის და გამოჰყავს.

კარგია, რომ შეღობეს, ოღონდ თქვენც ხედავთ, როგორაა შეღობილი – სკოლისკენ გასასვლელი დატოვეს. ხალხმა მოითხოვა, რომ გახსნილიყო.

რამდენად უსაფრთხოა რა ვიცი, მაინც რკინიგზის გადავლა გიწევს. უბრალოდ, ნებისმიერ ადგილას ვეღარ გადადიხარ და ხალხიც უფრო ფრთხილად ვართ იმ ამბის შემდეგ,“ – უთხრა „ბათუმელებს“ ბარცხანაში, რკინიგზის გადასასვლელთან ახლოს მცხოვრებმა ერთ-ერთმა მოქალაქემ.

ერთსა და იმავე გეოგრაფიულ არეალში, მცირე დროში, სამი ადამიანის დაღუპვას, საქართველოს რკინიგზა განიხილავს როგორც ცალკეულ შემთხვევას, თუ ეს მიუთითებს სისტემური უსაფრთხოების პრობლემის არსებობაზე.

„ბათუმელებმა“ საქართველოს რკინიგზას კითხვებით მიმართა, თუმცა პასუხები არ მიგვიღია. მათთვის გაგზავნილ კითხვებს, აქვე საჯაროდაც ვსვამთ:

1. რამდენი ქვეითთა გადასასვლელია მწვანე კონცხის  მონაკვეთზე და რამდენია მათგან აღჭურვილი შლაგბაუმით, შუქნიშნით, ხმოვანი სიგნალით, განათებით ან სხვა დაცვის სისტემით?
2. რას გეგმავს საქართველოს რკინიგზა უკანონო გადასასვლელებთან დაკავშირებით?
3. რა არის მატარებლების საშუალო სიჩქარე ამ კონკრეტულ მონაკვეთებზე?
4. შეუძლია თუ არა მატარებლის მემანქანეს დროულად დაინახოს ადამიანი ლიანდაგზე იმ მონაკვეთზე, სადაც ეს შემთხვევები მოხდა?
5. ადგილობრივები ამბობენ, რომ „მატარებელი საგრძნობლად აჩქარდა ამ მონაკვეთების გავლისას“ და სწორედ ამას უკავშირებენ გახშირებულ უბედურ შემთხვევებს. როგორია ამ საკითხზე საქართველოს რკინიგზის პასუხი?
6. არსებობს თუ არა კამერები, სენსორები, თერმული კამერები ან სხვა სისტემა, რომელიც ლიანდაგზე ადამიანის აღმოჩენას უზრუნველყოფს?
7. ბოლო სამ  შემთხვევაზე მოკვლევა თუ ჩატარდა და რა დაადგინა თითოეულზე შიდა მოკვლევამ?
8. რა მანძილზე შეამჩნია მემანქანემ ადამიანი? რა დროს მისცა სიგნალი?
9. რა სიჩქარით მოძრაობდა მატარებელი შეჯახების მომენტამდე და იყო თუ არა ტექნიკურად შესაძლებელი მისი გაჩერება?

„ქართული ოცნების“ ყოფილი ლიდერი,  ექს-პრემიერი ირაკლი ღარიბაშვილი, რომელიც პატიმრობაში იმყოფება, მორიგ განცხადებას ავრცელებს. მიმართვა მის ვერიფიცირებულ ფეისბუქგვერდზე გამოქვეყნდა.

ღარიბაშვილი აცხადებს, რომ 17 აგვისტოს გამოქვეყნებული წერილი მას ივლისში „ქართული ოცნების“ ერთ-ერთმა ლიდერმა, მამუკა მდინარაძემ გაუგზავნა.

ღარიბაშვილის მტკიცებით, „კორუფციის წინააღმდეგ ბრძოლის“ კამპანიის მთავარი მიზანი მისი ციხეში ჩასმა და „პოლიტიკური განადგურება“ იყო და რომ ყველაფერი გააკეთა იმისთვის, რომ თავიდან აერიდებინა „გუნდთან და ძვირფას ადამიანთან დაპირისპირებაში შესვლა“.

ყოფილი პრემიერი ამბობს, რომ „იძულებულს ხდიან“ დაიწყოს ბრძოლა.

„საზოგადოებას მინდა ვუთხრა სიმართლე, თუ რატომ ვზივარ ციხეში. შარშან დაწყებული ე.წ. „კორუფციის წინააღმდეგ ბრძოლის” კამპანიის მთავარი მიზანი იყო ჩემი ციხეში ჩასმა და პოლიტიკურად განადგურება.

სრული პასუხისმგებლობით ვაცხადებ, მე ყველაფერი გავაკეთე იმისთვის, რომ თავიდან ამერიდებინა გუნდთან და ჩემთვის ძვირფას ადამიანთან დაპირისპირებაში შესვლა. სწორედ ამ მიზნით, მე უარი ვთქვი სამართლებრივ ბრძოლაზე და ბოლომდე გავყევი ჩემთვის გამანადგურებელ პროცესს, რათა არ დამეზიანებინა სახელმწიფოსა და გუნდის ინტერესები.

სამწუხაროდ, სანაცვლოდ მივიღე დადგმული ბინძური პროვოკაცია, ბევრი ტყუილი და უსამართლობა. საზოგადოებას ჩემგან არცერთი სიტყვა არ სმენია მთელი ამ ხნის განმავლობაში. მე სრული მოთმინებით მივიღე ეს განსაცდელი.

მაგრამ ჩემთვის მოულოდნელად, ივლისში მივიღე ჩემს მიერ გუშინ გამოქვეყნებული წერილი, რომელიც გამომიგზავნა მამუკა მდინარაძემ. იმავე დღეს, მე მას გავაგებინე ჩემი პოზიცია, კიდევ ერთხელ დავუფიქსირე, რომ არ ვაპირებდი პოლიტიკაში დაბრუნებას და აღნიშნული „რისკის“ გადაზღვევის მიზნით შევთავაზე ჩემი ხედვა. მაგრამ მათ საპასუხოდ შემომითვალეს, რომ მაინც რჩებოდა 1%-იანი რისკი იმისა, რომ მე პოლიტიკაში დავბრუნდებოდი და ამისთვის აუცილებელი იყო ჩემთვის კორუფციული ბრალის წარდგენა და ჩემ მიერ მისი აღიარება.

ეს იყო წითელი ხაზი, რამაც გადამადგმევინა ჩემს ცხოვრებაში ყველაზე რთული ნაბიჯი. შესაბამისად, რადგან სხვა გამოსავალი აღარ მაქვს, იძულებულს მხდიან, დავიწყო ბრძოლა“ – წერს ღარიბაშვილი.

იგი ახალ წერილში პირდაპირ აღარ ახსენებს ბიძინა ივანიშვილს, თუმცა, „ჩემთვის ძვირფას ადამიანში“, სავარაუდოდ, სწორედ მას გულისხმობს. გუშინ, 17 აგვისტოს, ღარიბაშვილის განცხადებაში ეწერა, რომ იგი იგი მასზე და მისი ოჯახის უსაფრთხოებაზე პასუხისმგებლობას ბიძინა ივანიშვილსა და ხელისუფლებას აკისრებდა.

• რა ხდება?

პატიმრობაში მყოფი ყოფილი პრემიერ-მინისტრი, ირაკლი ღარიბაშვილი აცხადებს, რომ ივანიშვილის სახელით მიიღო წერილი, სადაც მას კორუფციის ახალი საქმის თავის თავზე აღებას სთავაზობენ.

ამის შესახებ 17 აგვისტოს, ღარიბაშვილის ვერიფიცირებულ ფეისბუქ გვერდზე გამოქვეყნდა მისი განცხადება და ნაწყვეტი წერილიდან, რომელზეც ღარიბაშვილი აცხადებს, რომ ივანიშვილის სახელით მიიღო.

„ქართული ოცნების“ ყოფილ, ორგზის პრემიერ-მინისტრს, ირაკლი ღარიბაშვილს, რომელიც სხვადასხვა დროს იკავებდა შს და თავდაცვის მინისტრის პოსტებსაც, 2025 წლის 24 ოქტომბერს ბრალი წაუყენეს უკანონო შემოსავლის ლეგალიზაციის (ფულის გათეთრება) მუხლით, რასაც თან ახლდა განსაკუთრებით დიდი ოდენობით შემოსავლის მიღება (სსკ-ის 194-ე მუხლის მესამე ნაწილის „გ“ ქვეპუნქტი). აღნიშნული დანაშაული 9-დან 12 წლამდე პატიმრობას ითვალისწინებს, თუმცა საპროცესო შეთანხმებით  მას 5 წლით თავისუფლების აღკვეთა განესაზღვრა. იგი პატიმრობაშია.

„პლაჟზე რა გინდა, სადაც რუსი ტურისტები არიან? რუს ტურისტთან რა გინდა? როცა მიდიხარ პოლიტიკური ბანერით ეს არის რუსოფობიური კამპანიის ხელოვნურად გაღვივება. სამარცხვინოა. საკრუიზო გემს რომ დახვდით, ესეც სამარცხვინოა“, – ამბობს ირაკლი კობახიძე.

არის თუ არა ანტისაოკუპაციო მოძრაობა ფობია და რატომ ცდილობს „ქართული ოცნება“ ეს მოძრაობა რუსოფობიად მონათლოს? – ამ თემაზე „ბათუმელები“ ქართული ენისა და ლიტერატურის მასწავლებელს, სოფო გოგოხიას ესაუბრა.

სოფო გოგოხია იმ აქტიურ მოქალაქეებს შორისაა, რომლებიც 500 დღეზე მეტია ქუჩაში დგანან და ამ ქვეყნის თავისუფლებას იცავენ. ის, იმ დღესაც იმყოფებოდა ბათუმის პლაჟზე, როცა ოკუპანტი ქვეყნიდან ჩამოსულ „ტურისტებს“ შეახსენეს, რომ საქართველო არასდროს შეეგუება ოკუპაციას.

• ქალბატონო სოფო, კობახიძე ამბობს, რომ ის, ვინც რუს ტურისტს დისკომფორტს უქმნის საქართველოში ოკუპაციის შეხსენებით, აგენტია და ხელოვნურად აღვივებს სიძულვილს. თქვენ როგორ ფიქრობთ, ოკუპაციის, მიუღებლობა რაციონალური, გააზრებული საშიშროებაა თუ ფობია, როგორც ამას კობახიძე უწოდებს?

ეს შემოგორებული ტერმინი „რუსოფობია“, პირდაპირ მეხება მეც, რადგან მეც და ჩემი თანამოაზრეები ჩხოროწყუში, ყოველდღე შევახსენებთ ადამიანებს, რომ რუსეთი ოკუპანტია და ჩვენ არასოდეს შევეგუებით რუსულ რეჟიმს.

ამიტომ, კობახიძის განცხადება მეხება მეც, რადგან სწორედ ის კადრები აფრიალეს ამ დღეებში, როცა ბათუმის პლაჟზე დავდიოდით ბანერით – „რუსეთი ოკუპანტია“ და ვახსენებდით აქ ჩამოსულ რუსეთის მოქალაქეებს, რომ ჩვენი ქვეყნის 20%-ი მიტაცებული აქვთ. აი, ამას ეძახის კობახიძე რუსოფობიას.

ყველაზე ცუდ სიზმარშიც კი ვერ წარმოვიდგენდი, რომ ჩვენ ამის მტკიცება მოგვიწევდა ვინმესთვის. იმის მტკიცება, რომ გიორგი ანწუხელიძე გმირია და არა „პროპაგანდის მსხვერპლი“ [როგორც ეს წულუკიანმა თქვა].

ამდენი ბრძოლის, მსხვერპლის და სისხლის ღვრის შემდეგ თუ კიდევ მოგვიწევდა იმის მტკიცება, რომ რუსეთი ოკუპანტია. ამისთვის მოვიდა „ოცნება“, ამისთვის იყო 2012 წელი, ამისთვის მოხდა ყველაფერი, რომ ოკუპირებულ ქვეყანაში ვიღაცამ „სლავა რასია“ დაიძახოს და მტრის მიუღებლობას ფობია დაარქვან.

• მიტაცებული 20%-ის გარდა, ჩვენ გვყავს ათასობით დევნილი, რომლებსაც წაართვეს მიწა-წყალი, გადაუწვეს სახლ-კარი. ალბათ ბუნებრივია, რომ ამის მოქმედი ქვეყანა მიგაჩნდეს მტრად. ამას ეძახის კობახიძე ფობიას?

დიახ, ამას ეძახის ფობიას. ანუ მტერს, რომელმაც ორი საუკუნე-ნახევრის განმავლობაში უდიდესი ზიანი მოგვაყენა და ჰქონდა ჩვენი გაქრობის მცდელობა, არ უნდა ვუწოდოთ მტერიო.

კობახიძეს, ამ რუსულ მთავრობას უნდა, ჩვენ დავივიწყოთ, რომ მტერი მტერია და კომფორტი შევუქმნათ მტერს. დავივიწყოთ, რომ წაგვართვეს ტერიტორიები, დავივიწყოთ, რომ გვყავს ასიათასობით დევნილი, რომ არაფერია გიგა ოთხოზორიას მკვლელობა, რომ ამ ყველაფერს წავაყაროთ ნაცარი, დავიბრმაოთ თვალები და მათი და პუტინის დაკვეთა შესრულდეს ბოლომდე და კარგად.

მათი ლოგიკით დავით აღმაშენებელსაც ფობია ჰქონია, როცა არაბებს ან თურქ-სელჩუკებს ებრძოდა და განდევნა მტერი საქართველოდან. ფობია ჰქონია გიორგი ბრწყინვალეს და ყველა იმ ადამიანს, რომლებიც ამ ქვეყნის თავისუფლებისთვის იბრძოდნენ.

ეს არის „ოცნების“ ლოგიკა, რომ მტერი არ უნდა შეიძულო, რომ მტერს უნდა გაუგო ხალიჩა, ხაჭაპური გამოუცხო, ელარჯი გაუწელო და იყო ასე „ბედნიერად“. ეს არის საბჭოთა სკოლის ცნებები, რომელსაც კობახიძე გვახვევს თავს.

ფობია არის, როცა აუხსნელი და არალოგიკური, საფუძველს მოკლებული შიში გაქვს რაღაცის მიმართ. მაგრამ როცა გეუბნებიან, რომ 20%-ი მიწის წამრთმევი და კიდევ ათასი უბედურების ჩამდენი, ადამიანების თავებით მოთამაშე ოკუპანტის მიმართ პროტესტი ფობიაა, ეს, უბრალოდ, წარმოუდგენელია.

• „რუს ტურისტთან რა გინდა?“ – გკითხათ კობახიძემ. აუხსენით რაც გინდათ.

რუს ტურისტთან რა გვინდა, რუსთაველზე რა გვინდა, კახეთში ქორწილები ჩაშალონ რუსებმა და არც აქ გვინდა, ბოლოს და ბოლოს თქვან, რომ უნდათ დავუთმოთ ეს ქვეყანა რუსებს.

ესენი ამისთვის მოვიდნენ, რომ ამ ქვეყნიდან გაგვყარონ, გაგვაქციონ, დაგვიჭირონ, გაგვაჩუმონ და ბოლოს მათ დარჩეთ ეს ქვეყანა – 250 წელია ამას ვერ მიაღწია რუსეთია და ახლა აღწევს „ქოცების“ ხელით. თუმცა, ამ ქვეყანაში ყოველთვის იქნებიან ადამიანები, რომლებიც ამას შეეწინააღმდეგებიან.

რუსოფობია კი არა, ვფიქრობ, რაც შეიძლება მეტმა ადამიანმა უნდა დაიწეროს მაისურზე, ბანერზე და ყველგან, რომ „რუსეთი ოკუპანტია“. ეს პროტესტის მშვიდობიანი გამოხატვის ფორმაა და ბევრმა უნდა გავაკეთოთ ასე.

იმ დღესაც, როცა ბათუმის პლაჟზე დავდიოდით ბანერით, ბევრ რუსს უკვირდა და ამბობდა, რომ არ იცოდა, თუ ტერიტორიების პრობლემა გვქონდა რუსეთთან. ჩვენც ვუხსნიდით და მერე თვითონაც სხვანაირად შეხედეს ჩვენ პროტესტს. ბევრმაც იცოდა, მაგრამ „არ გვაინტერესებს პოლიტიკაო“ და ჩუმად იყვნენ.

ყველას, ვინც აქ გემრიელად მიირთმევს ხაჭაპურს და ჰგონია, რომ იმპერიის მიყრუებულ ნაწილში ჩამოვიდა გასართობად, უნდა შევახსენოთ, თუ რას აკეთებდა და აკეთებს აქ მათი ქვეყანა.

ყველამ დაინახა რეალურად რა აწუხებთ რუსებს – უკრაინაში ამოხოცილი ბავშვები არ ადარდებთ, მაგრამ ადარდებთ მათ დაბომბილ საწარმოებში დამწვარი ტანსაცმელი, ფეხსაცმელი და ნივთები. თავიანთი ქონებას რომ წაეკიდა ცეცხლი, მაშინ ამოიღეს ხმა, თორემ მათი ჯარისკაცები საშინელებებს რომ სჩადიოდნენ უკრაინაში, ამაში არ ერეოდნენ.

ამიტომ, ეს საპროტესტო აქციებიც და ის ბანერებიც ამის შეხსენებაა მათთვის, რომ საქართველო არ არის მათი ტერიტორია და არც არასდროს იქნება რუსეთი. რომ ამ ქვეყანაში, სადაც სისხლი ღვარეს მათმა ჯარისკაცებმა, მოიქცნენ მოკრძალებით და პატივისცემით. თავმოდრეკით იყვნენ და პატივი სცენ ჩვენს ღირებულებებს და ფასეულობებს. თუ ჩვენ დაგვაჯერეს, რომ რუსეთი მოყვარეა და არა მტერი, იქ დამთავრდება ყველაფერი.

• კობახიძე ამბობს, რომ ანტირუსული განწყობები მოგონილია, რომ რეალურად არ არსებობს და „Deep State“-ის დაკვეთაა. ამაზე რას ფიქრობთ?

ეს „Deep State“-იც ხომ რაღაც ბუაა, გუდიანი, რომელსაც ყველაფერს მიაწერენ და თვითონაც არ იციან რას აბრალებენ.

არავის დაკვეთა არ მჭირდება იმისთვის, რომ მე, როგორც მოქალაქემ, როგორც მასწავლებელმა, როგორც მშობელმა, რომელსაც უნდა, რომ მისი შვილები საქართველოში გაიზარდონ და საქართველოში იცხოვრონ, ვიცოდე, ვინ არის მტერი და ვინ მოყვარე, ვისთან ვიყო, რა ვთქვა და, საერთოდაც, ვიცოდე, გავარჩიო ერთმანეთისგან მტერი და მოყვარე.

• „აგენტები“ ცდილობენ, რომ სპეციალურად გააღვივონ სიძულვილიო, კობახიძემ.

„Deep State“-ის აგენტებს როცა ამბობენ, ჩემთვის ეს უკვე კომპლიმენტია, რადგან ამაში იგულისხმება საქართველოს სიყვარული, საქართველოს ერთგულება, პატრიოტიზმი და საერთოდ, თავდადება და თავგანწირვა ჩვენი ქვეყნისთვის.

იმდენჯერ გაუსვეს ხაზი ამ გამოგონილ „რუსოფობიას“, უფრო მეტმა ადამიანმა ამოიღო ხმა და უფრო მეტმა ადამიანმა დაინახა სიმართლე. რაც მეტს მოგვიჭერენ და რაც მეტს აგვიკრძალავენ, მეტი იქნება წინააღმდეგობაც.

რაც შეეხება ანტირუსული განწყობების სიყალბეს, ჯობია კობახიძემ სწორად შეაფასოს ისტორიული მოვლენები, რადგან საქართველოში ანტირუსული განწყობები არსებობდა ჯერ კიდევ ტრაქტატის დროიდან და ასე იყო ცარიზმის პერიოდშიც.

იყო აჯანყებები, შეთქმულებები. საქართველოში არ ყოფილა დრო და წამი, რომ მტრის წინააღმდეგ საზოგადოებას არ ებრძოლა. საქართველოსთვის კეთილის მსურველი არასდროს ყოფილა რუსეთი და ეს ყოველთვის ვიცოდით.

თუმცა, 2022 წლის მერე, რაც რუსეთმა უკრაინაში ომი დაიწყო, გამძაფრებულია ეს ბრალდებები და კამპანია, რომ თურმე მტრის სიძულვილი ფობიაა.

დღესაც არიან ადამიანები, რომლებიც უკრაინის ან ევროკავშირის დროშის დანახვაზე ელეთ-მელეთი მოსდით და ისტერიკაში ვარდებიან. სწორედ ეს არის ამ ადამიანების მორალის განმსაზღვრელი, რადგან არ შეიძლება მტრის მხარეს იდგე. ეს ომი ჩვენი ომიცაა, ჩვენი გადარჩენის შანსიცაა, მით უფრო, რომ 120-მდე მებრძოლი დავკარგეთ ამ ომში, შანსია, რომ დავიბრუნოთ სუვერენიტეტი, რადგან ახლა რაშიც ვცხოვრობთ, ეს არის კატასტროფა.

როცა ისტორია ყველაფერს შეაფასებს, უნდა დაინახონ ჩვენმა შვილებმა, სად ვიდექით ამ დროს, რომ სწორად მოვიქეცით და სწორი პოზიციები გვქონდა. მე, როგორც მოქალაქეს და მასწავლებლებს, არ მაქვს უფლება უარი ვთქვა იმაზე, რასაც ილია შეეწირა, რა სიბრძნეც დაგვიტოვა ბარათაშვილმა, არ შემიძლია თვალი დავხუჭო და ვუღალატო.

• „რა შუაშია რუსული თეატრი“, „რა შუაშია რუსი მომღერალი?“, „რუსი ტურისტი“ – სულ გვესმის ასეთი ფრაზები. შეგიძლიათ აუხსნათ ჩვენს მკითხველს, რატომ არის ეს ყველაფერი ოკუპაციასთან შუაში?

ეს „რა შუაშია“ პროპაგანდაა და ზუსტად იმ ყველაფრის ნაწილი, რომ გამოგთიშონ პროცესებიდან, პასიურ მოქალაქედ გვაქციონ. ამ დროს, ყველაფერი შუაშია, ყველაფერი პოლიტიკაა.

მაგალითად, თბილისში გვაქვს გრიბოედოვის თეატრი და ცხადია თეატრის საწინააღმდეგო არაფერი მაქვს, მაგრამ კიბეებზე რომ ადიხარ, სულ გხვდება თვალში რუსული წარწერა. რუსულადაა აფიშაც. მით უმეტეს, რომ გრიბოედოვი აქტიური მომხრე იყო იმპერიალისტური პოლიტიკის და ატარებდა რუსულ პოლიტიკას.

ამიტომ, ეს წარწერაც და აფიშაც უნდა იყოს ქართულად.

რაც შეეხება რუსებთან შერიგებას, თუ ბოდიშს მოიხდიან, თუ ტერიტორიებს დაგვიბრუნებენ, თუ კომპენსაციასაც გადაგვიხდიან და ყველა პრობლემას მოვაგვარებთ, მერე შეიძლება კულტურულ დათმობაზე წავიდეს ადამიანი. თორემ ახლა, როცა ამდენი დევნილი გვყავს, ამდენი ცრემლი, ამდენი უბედურება დაგვატეხეს თავს და ამხელა ტერიტორიები წაგვართვეს, აქ ჩამოსულები კი თავისუფლად, ბედნიერად აგრძელებენ ზემოდან ყურებას, დამამცირებელი და შეურაცხმყოფელია.

ასე ცალკე აღებული, ჩვენ არც ენა გვძულს მათი და არც თეატრი და მწერალი. პირადი სიძულვილი კი არ გვამოძრავებს, არამედ გვძულს მტერი, რომელიც საქართველოს არ აძლევს განვითარების, ამოსუნთქვის და ნორმალურად არსებობის საშუალებას ორ საუკუნეზე მეტია.

• კობახიძე ერთგან ამბობდა – „ჩვენ არ უნდა დავუშვათ პოლიტიკური უთანხმოებები“, „წარსულში დაშვებული შეცდომები მტრობის საფუძვლად არ უნდა ვაქციოთო“. თქვენ როგორ ფიქრობთ?

ამით ამართლებენ იმას, რომ ოკუპირებულ აფხაზეთში ბენზინი გადააქვთ, როცა უკრაინა რუსეთის ნავთობის მარაგებს ანადგურებს.

თითქოს აფხაზების დახმარების მოტივით გადააქვთ, მაგრამ აფხაზები ამბობენ, რომ ისევ ისეთი კრიზისია იქ და მოსახლეობას არაფერს აწვდიან. ჩვენ რომ გვამუნათებენ, „ომი გინდა, ომი გინდა“, ახლა ვხედავთ ვის უნდა ომი. საერთოდ ამ ხალხმა გულში ჩაიხედოს და რუკას დახედონ. ომი არის იქ, სადაც რუსეთმა ფეხი დადგა. სადაც კი გაჭაჭანდნენ, ყველგან ომი და უბედურება შეიტანეს.

ტრაგედია ის არის, რომ გამოვლილი გვაქვს ეს ყველაფერი და წესით უნდა ვიცოდეთ, ჩვენი ისტორიაა და იმავე წრეზე არ უნდა გვევლო.

პირველად რომ დაგემართოს ადამიანს, იტყვი, რომ არ იცოდი და რაღაცაში გავყავით თავი, მაგრამ მერამდენედ გვემართება ეს, ბოლოს და ბოლოს, საკუთარ შეცდომებზე ხომ უნდა ვისწავლოთ?

• ფიქრობთ, რომ ეროვნულ ინტერესებს პირადი სარგებელი წონის. „რუსი ტურისტი გვჭირდება“, ეკონომიკა ჩამოგვეშლება – ხომ გვესმის ასეთი ფრაზებიც?

უკეთესი ტურისტები გვეყოლება, თუ ვიქნებით ევროკავშირში. ეს უნდა იცოდეს ნორმალურმა ადამიანმა, რომ ხაჭაპურზე და დღევანდელ ლუკმაზე არ გაცვალოს ღირსება და ალტერნატივა მოძებნოს. ბალტიისპირეთის ქვეყნები მახსენდება ასეთ დროს, როცა მხარში დაუდგნენ ერთმანეთს და ყველა კრიზისი გადალახეს. ჩვენც ერთხელ ხომ უნდა გადავლახოთ ეს.

რუსი ტურისტი ხომ არ არის უბრალო ტურისტი? რეალურად ისინი სხვა ზრახვებით მოდიან, სხვა ქვეგრძნობები აქვთ. თან არ გცემს პატივს, არ გიყურებს, როგორც სუვერენულ და დამოუკიდებელ ქვეყანას. ჰგონიათ, რომ მათი ბოსტანია ეს ქვეყანა და ეტყობათ კიდეც ქცევაში.

• იქნებ ჩვენ ვაძლევთ ამის საბაბს, როცა ვესაუბრებით რუსულად და ვუქმნით კომფორტს სახლში იგრძნონ თავი?

დიახ, ეს ჩვენი ბრალიცაა. თუ მათ ყოველ ნაბიჯზე შევახსენებთ ოკუპაციას, იქნებ რამეს მიხვდნენ. თუმცა ამაშიც ეჭვი მეპარება. მეხუთე წელია ომია და ჯერ კიდევ ვერ გაიაზრეს.

ჩვენ მაინც ჩვენი უნდა ვცადოთ. იქნება ეს სტიკერი, წარწერა, wi-fi-ის პაროლი, ბანერი თუ პლაკატი, ყველგან უნდა იყოს დატანილი ინფორმაცია, რომ რუსეთი ოკუპანტია და ჩვენ არ ვეგუებით რუსულ ოკუპაციას.

ყოველთვის, ყველას უნდა შევახსენოთ დაკარგული 20%, ჭუბერიდან დაწყებული ყველა ცრემლი, ყველა ტრაგედია, ყველა ტკივილი, სამაჩაბლო, ყველაფერი, შინდისის ბიჭები… უკრაინაში დაღუპული ჩვენი მეომრებიც ხომ ამ ყველაფრის ნაწილია, ამის გაგრძელებაა.

არავის არაფერი არ უნდა შერჩეს, ისტორიული სიმართლე უნდა აღდგეს. მით უფრო, რომ ახლა ამ ომის ფონზე კიდევ არსებობს ამის შანსი და ამ შანსის გაშვება არაფრით არ შეიძლება.

აჭარის პროკურატურამ ადვოკატი დააკავა დაზარალებულზე განხორციელებული ზემოქმედების ბრალდებით.

გამოძიების ვერსიით, არასრულწლოვანის მიმართ სქესობრივი კავშირის იძულების ფაქტზე ბრალდებულის ადვოკატმა, მისი დაცვის ქვეშ მყოფისთვის ნაკლები სასჯელის მიღების მიზნით, დაზარალებულის მეგობარს და დედას შესთავაზა, რომ დაზარალებულს გამოკითხვისას მოწოდებული ინფორმაცია შეეცვალა და გამოძიებისთვის არასწორი ფაქტები მიეწოდებინა, სანაცვლოდ კი თანხას და  სხვა ქონებრივ სარგებელს დაჰპირდა.

„დაკავებულს ბრალდება სისხლის სამართლის კოდექსის 372-ე მუხლის მე-2 ნაწილით (დაზარალებულზე განხორციელებული ზემოქმედება) წარედგინა, რაც სასჯელის სახედ და ზომად 6 წლამდე თავისუფლების აღკვეთას ითვალისწინებს“ – წერს პროკურატურა.

პრინსტონის უნივერსიტეტის სტუდენტი, 19 წლის მანო კვარაცხელია მომავალი ენერგეტიკოსია, რომელსაც სურს საქართველოს ჰიდროლოგიური მახასიათებლები აკადემიურ დონეზე შეისწავლოს. იგი ფიქრობს, რომ ეს ხელს შეუწყობს ქვეყნის ენერგეტიკის სწორად განვითარებას.

მანო ამბობს, რომ ეს იდეა კომპანია „აჭარისწყალი ჯორჯიაში“ სტაჟირების დროს გაუჩნდა.

2-კვირიანი სტაჟირება „შუახევი ჰესზე“ მანომ მას შემდეგ გაიარა, რაც პრინსტონის უნივერსიტეტში, ინჟინერიის საბაკალავრო პროგრამის 1-ელი კურსი დაასრულა და აშშ-დან საქართველოში დაბრუნდა.

მანომ გადაწყვიტა საზაფხულო არდადეგები ნაყოფიერად გაეტარებინა, ამიტომ, საქართველოს ერთ-ერთ წამყვან ენერგოკომპანიას, „აჭარისწყალი ჯორჯიას“ სტაჟირების გავლის თხოვნით მისწერა.

„პრინსტონში ვსწავლობ. როგორც მოგეხსენებათ, აქ ყველანი ძალიან კონკურენტუნარიანები არიან. სასურველია პირველივე კურსიდან გარკვეული გამოცდილების დაგროვება დაიწყო. გადავწყვიტე, ზაფხულში რამე გამეკეთებინა. მინდოდა, პირველ რიგში საქართველოში მეცადა ბედი და საქართველოს გამოცდილება მენახა. მოვიძიე ინფორმაცია და მივწერე რამდენიმე კომპანიას. „აჭარისწყალი ჯორჯიაში“ ქალბატონმა იზა გოცაძემ ისე თბილად მიმიღო… ჩემი CV გადავუგზავნე და დამთანხმდა სტაჟირების გავლაზე.

საბოლოოდ, ძალიან კარგად დაიგეგმა ყველაფერი. ივლისის შუა რიცხვებში გავიარე 2-კვირიანი სტაჟირება. სამოქალაქო ინჟინერთან ერთად დავდიოდი სხვადასხვა ობიექტზე შუახევში და ვაკვირდებოდი ყოველდღიურ მუშაობას, ვესაუბრებოდი ჰესზე დასაქმებულ პერსონალს. მაგალითად, ელექტროინჟინერს, ოპერაციების ინჟინერს… ისინი მიხსნიდნენ და მეხმარებოდნენ იმის გაგებაში, თუ ვის რა როლი ჰქონდა და როგორ მუშაობდა ჰესი. რადგან ეს ჰესი დამთავრებულია, მე უფრო მეტად ვკონცენტრირდი ჰესის შეკეთებისა და მისი მუშაობის პროცესებზე. ვნახე წყალსაცავები, ხიდები… მილების გაყვანის პროცესებზეც ვისაუბრეთ. ჩემთვის ძალიან საინტერესო იყო ეს ყველაფერი“, – გვიყვება მანო კვარაცხელია.

„შუახევი ჰესზე“ სტაჟირების დროს მანომ აღმოაჩინა, რომ საქართველოში ჰიდროლოგიის მიმართულებით საკმაოდ მწირი მეცნიერული ინფორმაციაა. ის ფიქრობს, რომ ქვეყნის ენერგეტიკული პოტენციალის განვითარება ზუსტი მონაცემების გარეშე შეუძლებელია, ამიტომ, გადაწყვიტა, პრინსტონში სწავლის პერიოდში ეს საკითხი იკვლიოს.

„აღმოვაჩინე, რომ ჰიდროლოგიის მიმართულებით ძალიან მწირი ინფორმაცია გვაქვს საქართველოში. აქედან გამომდინარე, ვიფიქრე, იქნებ უნივერსიტეტში სწავლის განმავლობაში ჰიდროლოგიაზე და მდინარეების მახასიათებლების შესახებ უფრო მეტი ინფორმაცია გამეგო და გამომეკვლია, თუ რა არის საჭირო ჰიდროლოგიის შესასწავლად. როგორც მოგეხსენებათ, ზოგადად ჰიდროლოგიაზე არის დაფუძნებული ჰესების აშენება-არაშენების საკითხი. რაც უფრო მეტი ინფორმაციაა, რაც უფრო მეტი მასალაა ამ მიმართულებით, მით უფრო მაღალი ხარისხის დასკვნის გაკეთება შეიძლება.

პრინსტონში მიწევს, რომ ორი კვლევითი ფურცელი დავწერო. ჩემი აზრით, ამ მიმართულებით უნივერსიტეტში მუშაობა, დამეხმარება, რომ ამ საკითხს კიდევ უფრო მეტად ჩავუღრმავდე და ზუსტად ამ პრობლემაზე დავწერო – ჰიდროლოგიის მახასიათებლების და მონაცემების ნაკლებობის საკითხი.

ეს არა მარტო საქართველოში, არამედ მსოფლიოშიც საკმაოდ დიდი პრობლემაა. მასალის არქონა და ინფორმაციის ნაკლებობა მეცნიერებაში ძალიან ბევრი შეცდომის დაშვებას იწვევს. ამიტომ, მინდა მონაწილეობა მივიღო ისეთ კვლევაში, რომელიც ამ პრობლემის აღმოფხვრაში დაგვეხმარება“, – ამბობს 19 წლის სტუდენტი.

„აჭარისწყალი ჯორჯიაში“ სტაჟირების დროს მანო კვარაცხელიამ კიდევ ერთი მნიშვნელოვანი გადაწყვეტილება მიიღო – როგორც გვიყვება, პირველ კურსზე მან საბაზისო საგნები გაიარა, მეორე კურსიდან კი უნდა აერჩია ინჟინერიის კონკრეტული მიმართულება, რომელსაც უფრო საფუძვლიანად შეისწავლიდა.

საზაფხულო არდადეგების დასრულების შემდეგ პრინსტონში ჩასულმა მანომ მომავალ პროფესიად სამოქალაქო და გარემოს ინჟინერია აირჩია. ამის ერთ-ერთი მიზეზი კი, როგორც თავად ამბობს, „შუახევი ჰესზე” მიღებული ცოდნა და გამოცდილება გახდა.

სწავლის შემდგომ საფეხურებზე ის კვლევითი მიმართულების კიდევ უფრო დაკონკრეტებას აპირებს.

„სანამ „აჭარისწყალი ჯორჯიაში“ სტაჟირებას გავივლიდი, მე არ ვიცოდი დარწმუნებით, სამოქალაქო და გარემოს ინჟინერიის მიმართულებას ავირჩევდი თუ არა. ვყოყმანობდი. ფიქრობდი მექანიკურ ინჟინერიაზეც, ელექტროინჟინერიაზეც. ფიზიკა ძალიან მიყვარს და სიმართლე გითხრათ, ფიზიკა სადაც იყო ჭარბად, ყველა მიმართულებას განვიხილავდი.

სტაჟირება რომ გავიარე, მივხვდი, თუ რამდენად მრავალფეროვანია სამოქალაქო ინჟინერია. სტაჟირების პერიოდში დღეს ვატარებდი მენტორთან ერთად, რომელიც არა მარტო ოფისში, არამედ ობიექტებზეც დადიოდა, მუშაობდა და ჩემთვის ეს ძალიან მომხიბლავია. ძალიან მინდა, რომ მომავალში ჩემი დღეები მარტო ოფისში ჯდომით არ განისაზღვრებოდეს. მინდა, რომ შევძლო ჰესებზე წასვლა-წამოსვლა და დაკვირვება.

„შუახევი ჰესზე“ სტაჟირების გამოცდილებამაც ძალიან დიდი გავლენა იქონია ჩემზე: მივხვდი, რომ ჰიდროლოგია, წყალი, ენერგოეფექტურობა და ენერგეტიკა ძალიან მნიშვნელოვანია. ეს ისეთი სფეროა, რომელიც ორივე მიმართულებას – გარემოს და სამოქალაქო ინჟინერიასაც მოიცავს, შეიძლება გააერთიანოს კიდეც. წელს ჩემს გეგმაში სწორედ ის არის, რომ დავკონკრეტდე და ზუსტად ავირჩიო რომელი მიმართულება მინდა“, – გვიყვება მანო კვარაცხელია.

რაც უკვე ზუსტად იცის ისაა, რომ საბოლოოდ სამშობლოში დაბრუნდება. ბაკალავრიატის შემდეგ მაგისტრატურისა და დოქტორანტურის საფეხურებზე სურს კვლევის გაგრძელება და უნდა აშშ-ში დაგროვილი ცოდნა საქართველოს ენერგეტიკულ განვითარებას მოახმაროს.

„აჭარისწყალი ჯორჯიაში“ სტუდენტების სტაჟირების პროგრამა მრავალი წელია მოქმედებს. კომპანიაში პრაქტიკა უკვე ათობით ახალგაზრდა ინჟინერმა გაიარა. მნიშვნელოვანია, რომ კომპანიის მოქმედი ინჟინრების დიდი ნაწილი სწორედ ის ახალგაზრდები არიან, რომლებმაც პირველი ნაბიჯები სწორედ „შუახევი ჰესის“ მშენებლობის ეტაპზე, სტაჟიორის სტატუსით გადადგეს.

კომპანიაში ამბობენ, რომ სტაჟირების პროგრამის წარმატების ერთ-ერთი მთავარი მიზეზი სტუდენტების კითხვებისა და ინტერესების პრაქტიკულ სამუშაო პროცესში დაკმაყოფილებაა.

2 კვირის განმავლობაში სტაჟიორები აკვირდებიან შუახევის ჰიდროელექტროსადგურის, სხალთა ჰესის, დიდაჭარის კაშხლისა და ჩირუხის დამბის მუშაობას. გარდა ამისა, სწავლობენ ტექნიკურ მონიტორინგს, ავტომატიზაციას, ელექტრულ და მექანიკურ სისტემებს და ეცნობიან საინჟინრო რისკების მართვის საერთაშორისო მეთოდოლოგიას.

„ყველაზე მნიშვნელოვანი ის პირველი ნაბიჯია, როდესაც სტუდენტი პირისპირ დგება რეალურ ენერგოობიექტთან. უნივერსიტეტში შეიძლება ზუსტად იცოდე, როგორ მუშაობს კაშხალი ან ტურბინა, მაგრამ სრულიად სხვა რეალობაა, როცა ტექნიკურ ზონაში დგახარ, აკვირდები მონიტორინგის პროცესს და გამოცდილი ინჟინრისგან ისმენ, თუ როგორ იმართება ეს სისტემა ყოველდღიურად.

მეორე საკვანძო ელემენტი უსაფრთხოების კულტურაა.

ენერგეტიკაში ტექნიკური ცოდნა უსაფრთხოების პროტოკოლების გარეშე არაფერს ნიშნავს – ჩვენ გვინდა, ეს აზროვნება პირველივე ნაბიჯებიდანვე ჩამოუყალიბდეთ. ჩვენი მიზანი მარტივია: სტუდენტმა აქედან არ წაიღოს უბრალოდ „ფურცელზე გავლილი პრაქტიკა“. მათ უნდა ჰქონდეთ პირდაპირი კონტაქტი მოქმედ პროფესიონალებთან, დასვან ტექნიკური კითხვები და ზუსტად დაინახონ, რა სჭირდებათ ამ სექტორში წარმატებული კარიერისთვის“, – ამბობს „შუახევი ჰესის“ სამოქალაქო ინჟინერი გოგიტა ბოლქვაძე.

ის ერთ-ერთია იმ ინჟინრებს შორის, რომელიც იყო მანო კვარაცხელიას კურატორი „შუახევი ჰესზე“. მანოზე საუბრისას ის აღნიშნავს ბოლო წლების ტენდენციას იმის შესახებ, თუ როგორ იზრდება ახალგაზრდა ქალების ინტერესი ენერგეტიკული თუ საინჟინრო სფეროსადმი.

„შუახევი ჰესი არ არის მხოლოდ ენერგეტიკული ინფრასტრუქტურა – მან საქართველოში ახალი თაობის საინჟინრო გუნდის ჩამოყალიბებას შეუწყო ხელი. მშენებლობიდან ოპერირების ეტაპამდე არაერთმა ახალგაზრდამ მიიღო პრაქტიკული გამოცდილება საერთაშორისო სპეციალისტების გვერდით. ამ ტრადიციას ვაგრძელებთ და მომავალშიც აქტიურად დავუჭერთ მხარს ახალგაზრდა პროფესიონალებს.

წელს „შუახევი ჰესზე“ კიდევ ერთ მომავალ ქალ ინჟინერს, მანო კვარაცხელიას ვუმასპინძლეთ. მისი მომზადების დონე, ტექნიკური ინტერესი და მოტივაცია ნამდვილად შთამბეჭდავია. დარწმუნებული ვარ, წინ დიდი პროფესიული გზა ელოდება.

ბოლო წლებში განსაკუთრებით საინტერესო დინამიკას ვხედავთ – იზრდება ახალგაზრდა ქალების ინტერესი ტექნიკური და საინჟინრო მიმართულებებისადმი. ეს სექტორი იცვლება და მნიშვნელოვანია, რომ კარიერული შესაძლებლობები ყველასთვის თანაბრად ღია იყოს“, – ამბობს გოგიტა ბოლქვაძე.

ენერგეტიკითა და ინჟინერიით დაინტერესებული ახალგაზრდა ქალების მხარდაჭერის მნიშვნელობაზე საუბრობს „აჭარისწყალი ჯორჯიას“ აღმასრულებელი დირექტორი,

აღმასრულებელი დირექტორის თქმით, კომპანიაში ხელმძღვანელი პოზიციების დაახლოებით 60%-ს ქალები იკავებენ და ისინი უშუალოდ მონაწილეობენ კომპანიის მართვისა და გადაწყვეტილების მიღების პროცესში. სატიშ ბჰატი ამბობს, რომ ამ მაჩვენებლით ამაყობს და აქვე აღნიშნავს, რომ გენდერული თანასწორობის მიმართულებით კომპანია არ აჩერებს ძალისხმევას.

მისი თქმით, მნიშვნელოვანია, რომ ქალების გადაწყვეტილებებს იღებდნენ არა მხოლოდ მენეჯერულ საფეხურზე, არამედ მუშაობდნენ ტექნიკურ და საინჟინრო პოზიციებზეც და გრძელვადიან პერიოდში, ამ შედეგის მისაღწევად, საჭიროა ახალგაზრდა გოგონების დაინტერესება, წახალისება და მხარდაჭერა, რათა გახდნენ პროფესიონალები ამ სფეროში.

 

„ჩვენი მიზანია ისეთი გარემოს შექმნის ხელშეწყობა, სადაც ქალებსა და კაცებს ექნებათ თანაბარი შესაძლებლობები, შევიდნენ სექტორში, მიიღონ პრაქტიკული გამოცდილება და პროფესიულად განვითარდნენ. ამ მიდგომის მნიშვნელოვანი ნაწილია სტაჟირება და ახალგაზრდა პროფესიონალებთან მუშაობა. ბოლო წლებში სტუდენტმა ქალებმა, მომავალმა ინჟინრებმა, პრაქტიკული გამოცდილება მიიღეს ჩვენს კომპანიაში. მათ შესაძლებლობა ჰქონდათ, ჰიდროელექტროსადგურში ჩვენს პროფესიონალებთან ერთად ემუშავათ და უშუალოდ სამუშაო პროცესში გაცნობოდნენ, როგორ ოპერირებს ენერგეტიკული ობიექტი. სტაჟირებას განვიხილავთ, როგორც წარმატებული პროფესიული კარიერისკენ გადადგმულ ერთ-ერთ მნიშვნელოვან ნაბიჯს“, – ამბობს სატიშ ბჰატი.

სატიშ ბჰატის ენერგეტიკულ ინდუსტრიაში მუშაობის მრავალწლიანი გამოცდილება აქვს და საქართველოს გარდა არაერთ ქვეყანაში უმუშავია. ამბობს, რომ ენერგეტიკის სექტორში ტექნიკური და საოპერაციო პოზიციები ისტორიულად მამაკაცებით დომინირებული იყო და რეალური ცვლილების მიღწევას თანმიმდევრული, სისტემური და გრძელვადიანი მუშაობა სჭირდება.

სატიშ ბჰატი ყურადღებას ამახვილებს იმაზე, რომ მნიშვნელოვანია ქალების ხელშეწყობა, არა მხოლოდ დაინტერესდნენ ამ სფეროთი, არამედ დაინახონ დასაქმების რეალური პერსპექტივები.

„საქართველოში სულ უფრო მეტი ახალგაზრდა ქალი ირჩევს ტექნიკურ მიმართულებებს. შემდეგი მნიშვნელოვანი ნაბიჯია განათლებასა და ინდუსტრიის საჭიროებებს შორის კავშირის გაძლიერება, რათა აკადემიური ცოდნა პრაქტიკულ გამოცდილებად და გრძელვადიან კარიერულ შესაძლებლობებად გარდაიქმნას.

ამ პროცესში ენერგეტიკულ კომპანიებს მნიშვნელოვანი როლი აქვთ. სტუდენტებს უნდა ჰქონდეთ შესაძლებლობა, პრაქტიკული გამოცდილება მიიღონ მოქმედ ენერგეტიკულ ობიექტებზე, იმუშაონ პროფესიონალ ინჟინრებთან და რეალურ სამუშაო გარემოში განივითარონ საკუთარი უნარები“, – ამბობს “აჭარისწყალი ჯორჯიას” აღმასრულებელი დირექტორი.

სატიშ ბჰატის თქმით, ქალების ხელშეწყობა – დაინტერესდნენ, ისწავლონ და დასაქმდნენ ენერგეტიკის სფეროში. მნიშვნელოვანია არა მხოლოდ ადამიანის უფლებებისა და თანაბარი შესაძლებლობების მხარდასაჭერად, არამედ ეკონომიკური განვითარებისთვისაც.

„გენდერული მრავალფეროვნება მნიშვნელოვანია ეფექტიანი გადაწყვეტილებების მიღებისთვისაც. განსხვავებული პროფესიული გამოცდილების, ცოდნისა და პერსპექტივების მქონე ადამიანების ერთ გუნდში მუშაობა ორგანიზაციებს საშუალებას აძლევს, საკითხებს უფრო ფართო პერსპექტივიდან შეხედონ, სხვადასხვა მოსაზრება გაითვალისწინონ და უფრო დაბალანსებული გადაწყვეტილებები მიიღონ.

არანაკლებ მნიშვნელოვანია პროფესიული მაგალითების არსებობა.

როდესაც ახალგაზრდა ქალი ხედავს ინჟინერ ქალს, ტექნიკური გუნდის ხელმძღვანელად ან ენერგეტიკული კომპანიის მართვაში ჩართულს, ენერგეტიკის სექტორში კარიერა მისთვის უფრო ხილული, მიღწევადი და რეალური პროფესიული არჩევანი ხდება.

ამიტომ ქალთა მონაწილეობა ენერგეტიკაში მხოლოდ ცალკე აღებულ სოციალურ ინიციატივად არ უნდა განვიხილოთ. ეს არის უფლებებისა და თანაბარი შესაძლებლობების საკითხი და, ამასთანავე, სექტორის გრძელვადიანი მდგრადი განვითარებისთვის მნიშვნელოვანი ფაქტორი“, – ამბობს სატიშ ბჰატი.

ირაკლი ღარიბაშვილის ადვოკატი, მიხეილ შაყულაშვილი ამბობს, რომ სავარაუდოდ თვითონ არ გამოიტანს საპყრობილედან ირაკლი ღარიბაშვილის წერილს. ამის შესახებ მან „ტვ პირველს“ უთხრა.

„ალბათ დღის მეორე ნახევარში შევალ [ციხეში]. არა არა, არ ვიცი, არა მგონია მე გამოვიტანო, სხვა ადვოკატებიც არიან…

რომელ საათზე იქნება და როგორ იქნება, ეგ არ ვიცი. შეიძლება ჩემს დროს შევიდნენ, შეიძლება ჩემამდე შევიდნენ“ – უთხრა მიხეილ შაყულაშვილმა მედიას.

მიხეილ შაყულაშვილმა გუშინ, 17 აგვისტოს დაადასტურა ირაკლი ღარიბაშვილის წერილის ავთენტურობა. მან ასევე აღნიშნა, რომ წერილი, რომელიც ღარიბაშვილმა ფეისბუქზე განცხადებას დაურთო, მას არ მიუტანია ირაკლი ღარიბაშვილისთვის.

• რა ხდება?

პატიმრობაში მყოფი ყოფილი პრემიერ-მინისტრი, ირაკლი ღარიბაშვილი აცხადებს, რომ ივანიშვილის სახელით მიიღო ახალი წერილი, სადაც მას კორუფციის ახალი საქმის თავის თავზე აღებას სთავაზობენ.

ამის შესახებ 17 აგვისტოს, ღარიბაშვილის ვერიფიცირებულ ფეისბუქ გვერდზე გამოქვეყნდა მისი განცხადება და ნაწყვეტი წერილიდან, რომელზეც ღარიბაშვილი აცხადებს, რომ ივანიშვილის სახელით მიიღო.

„ქართული ოცნების“ ყოფილ, ორგზის პრემიერ-მინისტრს, ირაკლი ღარიბაშვილს, რომელიც სხვადასხვა დროს იკავებდა შს და თავდაცვის მინისტრის პოსტებსაც, 2025 წლის 24 ოქტომბერს ბრალი წაუყენეს უკანონო შემოსავლის ლეგალიზაციის (ფულის გათეთრება) მუხლით, რასაც თან ახლდა განსაკუთრებით დიდი ოდენობით შემოსავლის მიღება (სსკ-ის 194-ე მუხლის მესამე ნაწილის „გ“ ქვეპუნქტი). აღნიშნული დანაშაული 9-დან 12 წლამდე პატიმრობას ითვალისწინებს, თუმცა საპროცესო შეთანხმებით  მას 5 წლით თავისუფლების აღკვეთა განესაზღვრა. იგი პატიმრობაშია.

ამავე თემაზე:

ღარიბაშვილი აცხადებს, რომ ივანიშვილის სახელით კორუფციის ახალი საქმის თავის თავზე აღებას სთავაზობენ

See more

„ოცნების“ მთავრობა გარდაბანში მდებარე 2,5 ჰექტარ სახელმწიფო მიწას, 99 წლით უსასყიდლოდ, მართლმადიდებელ ეკლესიას გადასცემს.

„მიეცეს თანხმობა სახელმწიფო ქონების ეროვნულ სააგენტოს, საქართველოს სამოციქულო ავტოკეფალურ მართლმადიდებელ ეკლესიას შესაბამისი ხელშეკრულების გაფორმებიდან 99 წლის ვადით, უსასყიდლო უზუფრუქტის უფლებით გადასცეს ამ განკარგულების დანართით გათვალისწინებული უძრავი ქონება“, – წერია 2026 წლის 11 აგვისტოს განკარგულებაში, რომელსაც ხელს ირაკლი კობახიძე აწერს.

ეკლესიისთვის გადასაცემი მიწა, რომელიც გარდაბანში, სოფელ მარტყოფში მდებარეობს, სამ საკადასტრო ერთეულადაა დარეგისტრირებული და მათი საერთო ფართობი 25 000 კვადრატული მეტრია.

საჯარო რეესტრის მონაცემებით ჩანს, რომ ერთ-ერთ მიწის ნაკვეთზე, რომელიც შემაღლებულ ადგილზეა, ეკლესიაა უკვე აშენებული. ასევე მოწყობილია ეკლესიამდე მისასვლელი საცალფეხო გზაც [ასასვლელი კიბე].

ზემოთ აღნიშნული განკარგულებით სახელმწიფო ქონების ეროვნულ სააგენტოს დაევალა განახორციელოს ქონების ეკლესიისთვის გადასაცემად საჭირო შესაბამისი  ღონისძიებები.

„19 წელია ემიგრაციაში ვარ. ემიგრაციაში ყოფნის დროს ვიყიდე ბინა ბათუმში 2021 წელს, ერთიანად გადავიხადე თანხა. ბინა 2022 წელს უნდა ჩამბარებოდა, მაგრამ კორპუსი დღესაც დაუსრულებელია… ბოლოს მითხრეს, გასაღები წაიღეთო. ახლა კი, საერთოდ აღარავინ არ გვპასუხობს,“ – ამბობს „ბათუმელებთან“ ნინო მუმლაძე. იგი აშშ-ში ცხოვრობს შვილთან ერთად.

ემიგრაციაში მყოფ დედა-შვილს ცალ-ცალკე უყიდია ბინები ბათუმში, მშენებარე კორპუსში. ბინა ახალ ბულვართან ახლოსაა. გრიგოლ ელიავას 53-ში კორპუსი კომპანია „ციტრონ გრუპს“ უნდა აეშენებინა.

„2022 წლის მაისში ჩამოვედი ამერიკიდან საქართველოში და მივედი ბინის სანახავად,“ – გვიყვება ემიგრანტი ნინო მუმლაძე, – „ბინა უკვე იყო ბოლომდე აშენებული, ანუ ჩონჩხი, მაგრამ გამოტიხვრა, კარ-ფანჯრები, შიდა კომუნიკაცია და სხვა სამუშაოები არ მიმდინარეობდა. მაშინ სამშენებლო კომპანიაში მითხრეს, რომ დროებით რაღაც პატარა შეფერხება ჰქონდათ და მალე გაკეთდებოდა ყველაფერი… “ – ამბობს ნინო.

მას და მის შვილსაც ბინა რეესტრში 2022 წლიდან დარეგისტრირებული აქვთ.

ემიგრანტის თქმით, დაპირების შესრულების ნაცვლად, კომპანიის მენეჯმენტი ნელ-ნელა გაქრა, შემდეგ ოფისიც გამოკეტეს, ხოლო ვისგანაც პასუხი მიიღო, მან სამუშაოების გაჭიანურების მიზეზად, ხან რა დაუსახელა და ხან – რა.

„თავდაპირველად მითხრეს, რომ პროექტი შეიცვალა და თავზე აუზი უნდა მოეწყოსო. ადამიანები ვართ, შევედით მდგომარეობაში და კარგი-მეთქი.

გავიდა დრო და კომპანიამ სურათები გამომიგზავნა სოციალურ ქსელში: ნახეთ, როგორ გაკეთდა ბინაო და ტყუილი აღმოჩნდა. ჩემი ახლობელი მივიდა, ვიდეოთვალი რომ ჩამირთო და მაჩვენა, რა მდგომარეობაში იყო ბინა, ცუდად გავხდი… სურო იყო ამოსული ჩემს ბინაში და წყალი იდგა.

მერე, როგორც იქნა, დამაკავშირეს ვინმე სალომესთან, რომელმაც მომწერა, შეგიძლიათ რემონტი დაიწყოთ, ჩაიბაროთ გასაღებიო. დამაინტერესა და თბილისში მცხოვრები ჩემი შვილი გავუშვი ბინის სანახავად უკვე წელს. ჩემი შვილი კორპუსში არ შეუშვა დაცვამ, მაგრამ ნახა, რომ კორპუსი დასრულებული არ არის და არც სამშენებლო სამუშაოები მიმდინარეობს. შიგნით არ არის ისე, როგორიც უნდა ყოფილიყო, კიბეები არ არის მოწესრიგებული, ლიფტი არ არის ჩართული.

ეს რომ მივწერე იგივე სალომეს, მომწერა, რომ გზებია გადათხრილი და ტექნიკა ვერ შედის ადგილზეო. მერე თქვა, ახალი კომპანია უნდა შემოვიდეს, მეპატრონე დაიღუპაო. ვერ გაიგებ მოკლედ სიმართლეს. ამდენი წელია მუდმივად ტყუილებს ვისმენ, ძალიან დავიღალე,“ – გვითხრა ნინო მუმლაძემ.

მისამართზე მისულ „ბათუმელებს“ კორპუსის მეზობლად, კერძო სახლებში მცხოვრებმა მოქალაქეებმა უთხრეს, რომ კორპუსში რემონტი მხოლოდ ერთმა ოჯახმა წამოიწყო, რადგან ნაქირავებში ცხოვრობს, მაგრამ იმის გამო, რომ კორპუსში გამართულად ჯერ კიდევ არაა კომუნიკაციები, მან აქ საცხოვრებლად გადმოსვლა ვერ შეძლო.

ადგილზე „ბათუმელებს“ არავინ დახვდა. სამუშაოები აქ შეჩერებულია. დაუსრულებელი კორპუსი სამშენებლო ღობითაა გარშემორტყმული და ჩაკეტილია კარით. კორპუსის ეზო და შესასვლელი სავსეა სამშენებლო ნივთებითა და ნარჩენებით. „ბათუმელებისთვის“ უცნობია, რა მდგომარეობაა კონკრეტულად კორპუსის შიგნით.

კომპანია „ციტრონ გრუპი“ ნუგზარ ბაკურიძეს ეკუთვნის. მასთან დაკავშირებას ამ დრომდე ცდილობს „ბათუმელები“.

ამ კომპანიის ფეისბუქგვერდზე მითითებულ საკონტაქტო ტელეფონის ნომერზე გვიპასუხეს, რომ ეს სრულიად სხვა კომპანიის ტელეფონის ნომერია, ეს კომპანია კი მუშაობს კონკრეტული პროექტის გაყიდვებზე.

კომპანიაში, რომელიც „ციტრონ გრუპის“ ერთ-ერთი პროექტის გაყიდვებზე მუშაობს, „ციტრონ გრუპთან“ დაკავშირებაზე უარი გვითხრეს და აღნიშნეს, რომ „ციტრონ გრუპიდან“ სურვილის შემთხვევაში თავად დაგვიკავშირდებიან.

ემიგრანტებმა მოგვაწოდეს რამდენიმე პირის საკონტაქტო მონაცემები, ვისთანაც სხვადასხვა დროს მათ ჰქონიათ კომუნიკაცია. ემიგრანტებმა იციან ამ პირების მხოლოდ სახელი და არა ზუსტი სტატუსი. ტელეფონის ზოგიერთ ნომერზე „ბათუმელებს“ საერთოდ არ უპასუხეს.

გამონაკლისი იყო ორი ზარი, სადაც ერთმა პირმა, რომელიც აჩიკოდ გაგვეცნო, თქვა, რომ ამ პროექტზე აღარ მუშაობს და კითხვებს ვერ უპასუხებს, ხოლო კიდევ ერთმა საკონტაქტო პირმა, სახელად სულხანმა, „ბათუმელებს“ უთხრა, რომ „მშენებლობა აუცილებლად დასრულდება“:

„მე არ ვარ ხელმძღვანელი… მშენებლობაზე ვმუშაობდი მხოლოდ, მეტ შეკითხვაზე ვერ გიპასუხებთ, შეხვედრაზე ვარ“ – გვითხრა მან.

კომპანიისგან პასუხის მიღების შემთხვევაში მასალა განახლდება. 

ეს არაა პირველი შემთხვევა, როცა მოქალაქეებს აქვთ პრობლემა სამშენებლო კომპანიასთან. „ბათუმელები“ წერდა სხვა ემიგრანტი ქალის შესახებ, რომელმაც ასევე ემიგრაციაში ყოფნის დროს ბათუმში ბინა იყიდა, ბათუმში ჩამოსულმა კი აღმოაჩინა, რომ ბინა უკვე სხვისი საკუთრება იყო.

ამავე თემაზე:

 

ემიგრანტი: ბათუმში ბინა ვიყიდე, ჩამოვედი და ჩემი ბინა სხვისი აღმოჩნდა

See more

 

 

 

სურსათის ეროვნული სააგენტოს ინფორმაციით, ქობულეთში, სოფელ კვირიკეში წარმოებულ სვანურ მარილში აკრძალული საღებავი Sudan I და Sudan IV აღმოჩნდა.

„შპს „ნთკ 2016“-ში წარმოებულ სვანურ მარილში, რომელიც 2026 წლის 2 თებერვალს არის დამზადებული, აკრძალული საღებავები აღმოჩნდა.

გამოვლენილ დარღვევასთან დაკავშირებით, ბიზნესოპერატორს აეკრძალა სვანური მარილის რეალიზაცია და სააგენტოს ზედამხედველობით განხორციელდა აღნიშნული სურსათის ბაზრიდან ამოღება/გამოთხოვა“ – წერს სააგენტო.

სურსათის ეროვნული სააგენტო მოუწოდებს მომხმარებელებს, რომ თუ შეძენილი აქვს აღნიშნული სურსათი, არ გამოიყენონ.

მათივე ინფორმაციით, ქვეყნის მასშტაბით არსებულ სხვადასხვა სარეალიზაციო ობიექტებიდან 50 ნიმუში აიღეს და გამოიკვლიეს აკრედიტირებულ ლაბორატორიაში.

„2026 წელს დაგეგმილია სხვადასხვა კატეგორიის სურსათის 177 ნიმუშის ლაბორატორიული გამოკვლევა სუდანის ჯგუფის საღებავების შემცველობაზე.

სურსათში საღებავების [Sudan I; Sudan II; Sudan III; Sudan IV; Sudan orange G; Sudan Red G; Sudan Red 7 B და Sudan red B] გამოყენება აკრძალულია.

„სუდანის“ ჯგუფის საღებავები ბუნებრივად არ გვხვდება სურსათში, იგი მიეკუთვნება ხელოვნურ აზო-საღებავების ჯგუფს, არ წარმოადგენს ნებადართულ საკვებ დანამატს.“ – წერს სააგენტო.

ემიგრანტებისთვის საარჩევნო უფლების წართმევას „ლელო“ საკონსტიტუციო სასამართლოში ასაჩივრებს.

დღეს, 17 აგვისტოს, „ლელომ“ სარჩელი საკონსტიტუციო სამარულოში შეიტანა.

სარჩელის დარეგისტრირების შემდეგ სასამართლოსთან გამართულ ბრიფინგზე  „ლელოს“ ერთ-ერთმა ლიდერმა, გიორგი სიორიძემ ემიგრანტებს მოუწოდა ამ საჩივარს შეუერთდნენ:

„ათასობით ჩვენს თანამემამულეს პრაქტიკულად წაართვეს საარჩევნო ხმის უფლება, საზღვარგარეთ საარჩევნო უბნები აღარ გაიხსნება. განსაკუთრებით ცინიკური იყო მათი პასუხი და გზავნილი ჩვენი ემიგრანტებისადმი, რომ ჩვენ არ ვართმევთ მათ საარჩევნო უფლებას, არჩევნების დღეს ყველას შეუძლია ჩამოვიდესო.

რამდენად არარეალურია ეს ყველაფერი საზოგადოებას კარგად მოეხსენება, რადგან ადრე პრობლემა იყო სწორედ არასაკმარისი, არასათანადო რაოდენობის საარჩევნო უბნების გახსნა საზღვარგარეთ, ჩვენ ამისთვის ვიბრძოდით წლების განმავლობაში, რომ მეტი ადამიანი ყოფილიყო საზღვარგარეთ ჩართული პოლიტიკურ პროცესში.

ის ადამიანები, რომლებსაც შეაქვთ უზარმაზარი წვლილი ეკონომიკურ ცხოვრებაში, ყოფილიყვნენ პოლიტიკურ ცხოვრებაშიც და პოლიტიკური ნების ფორმირებაში ჩართულები, ამიტომაც, „ქართულმა ოცნებამ“ რეალურად წაართვა მათ საარჩევნო უფლება. მე მინდა, ჩვენი კოალიციის სახელით, მივმართო ემიგრანტებს, შემოგვიერთდით, ერთად დავიწყოთ ბრძოლა.

ეს სარჩელი გამოქვეყნდება და თითოეულ ემიგრანტს ექნება შესაძლებლობა, ფორმალურად გახდეს ამ სასარჩელო მოთხოვნის მონაწილე მხარე, იდავოს საკონსტიტუციო სასამართლოში და ჩვენი კოალიციის კვალიფიციური იურისტები გაუწევენ მათ სამართლებრივ წარმომადგენლობას საკონსტიტუციო სასამართლოში“, – განაცხადა სიორიძემ.

„ლელოს“ შეფასებით „2025 წელს ქართველ ემიგრანტებს „ოცნებამ“ საარჩევნო უფლება პრაქტიკულად წაართვა და ცინიკურად განუცხადა, რომ მათ შეუძლიათ არჩევნების დღეს საქართველოში დაბრუნდნენ და ამგვარად მონაწილეობა არჩევნებში.

2024 წლის საპარლამენტო არჩევნებმა აჩვენა, რომ საზღვარგარეთ შექმნილ საარჩევნო უბნებზე, იქ, სადაც რეჟიმს არ ჰქონდა მანიპულაციებისა და ზეწოლის შესაძლებლობა და არჩევნები შედარებით თავისუფალ გარემოში ჩატარდა, „ქართული ოცნება“ პირწმინდად დამარცხდა და მხოლოდ 13% მიიღო.

ამის პასუხად, რეჟიმმა ასობით ათას ჩვენს თანამემამულეს, პრაქტიკულად, წაართვა საარჩევნო უფლება. ეს არის საქართველოს კონსტიტუციის დარღვევა და „ძლიერი საქართველო-ლელო“ ახალი რეგულაციების კონსტიტუციორობაზე საკონსტიტუციო სასამართლოში იდავებს.

„ძლიერი საქართველო-ლელო“ თვეების განმავლობაში მუშაობდა კონსტიტუციურ სარჩელზე და მზადაა ყველა ქართველ ემიგრანტს გაუწიოს წარმომადგენლობა და სამართლებრივად იბრძოლოს მათთვის საარჩევნო უფლების დასაბრუნებლად.“

---

„ქართული ოცნება“ ემიგრაციაში მყოფ ქართველებს საზღვარგარეთიდან არჩევნებში მონაწილეობას უკრძალავს. ზუსტი მონაცემი იმის შესახებ, თუ რამდენი ხმის უფლების მქონე საქართველოს მოქალაქე იმყოფება ქვეყნის საზღვრებს გარეთ, ცნობილი არაა.

„ქართული ოცნების“ საგარეო საქმეთა სამინისტროს 2025 წლის მარტის ინფორმაციით, არაოფიციალური მონაცემებით, საზღვარგარეთ 1.5 მილიონზე მეტი ქართველი ცხოვრობს.2025 წელს, მხოლოდ 9 თვეში,  ემიგრანტებმა საქართველოში 2.7 მილიარდი დოლარი გადმორიცხეს, 2024 წელს – 3.4 მილიარდი დოლარი, 2023 წელს – 4.1 მილიარდი დოლარი.ემიგრანტები საზღვარგარეთ საარჩევნო უბნების დამატებას ითხოვდნენ, რომ არჩევნებზე ხმის მიცემა შესძლებოდათ.

ვინაიდან, როგორც წესი, სხვა სახელმწიფოში შექმნილი საარჩევნო უბნები საზღვარგარეთ საქართველოს დიპლომატიურ წარმომადგენლობასა და საკონსულო დაწესებულებაში იხსნებოდა.

ემიგრანტებს კი, რომლებიც მათ ადგილსამყოფელ ქვეყანაში არსებული დიპლომატიური წარმომადგენლობისგან შორს ცხოვრობდნენ, არჩევნებში მონაწილეობა უჭირდათ, რადგან საარჩევნო უბნამდე მისაღწევად დიდი დრო და შესაბამისი ფინანსები სჭირდებათ.2024 წლის საპარლამენტო არჩევნების დროს ემიგრანტებმა კამპანიებიც წამოიწყეს, რომ „ქართულ ოცნებას“ უცხოეთში საარჩევნო უბნები დაემატებინა.

თუმცა  2024 წლის საპარლამენტო არჩევნების დროს  „ქართულმა ოცნებამ“ საზღვარგარეთ მხოლოდ 67 საარჩევნო უბანი გახსნა, წინა არჩევნებთან შედარებით 15 უბნით მეტი.

ახალი გადაწყვეტილებით კი, „ქართული ოცნება“  ემიგრაციაში მყოფ ქართველებს საზღვარგარეთიდან არჩევნებში მონაწილეობას უკრძალავს და ამტკიცებს, რომ ვისაც არჩევნებში მონაწილეობა სურს, მას საქართველოში ჩამოსვლაც შეუძლია.

აღსანიშნავია, რომ 2012 წლის შემდეგ (მაშინ ხმა ემიგრანტთა 54,43%-მა მისცა)  საზღვარგარეთ შექმნილ უბნებზე  „ქართული ოცნების“ მხარდაჭერა საგრძნობლად მცირდება  და ის უცხოეთში არჩევნებს ტრადიციულად აგებს.

საზღვარგარეთ შექმნილ საარჩევნო უბნებზე „ქართული ოცნების“ მიერ მიღებული შედეგები წლების მიხედვით:

• 2016 წელს –  39,6%  (ეროვნულ დონეზე 48,68%)
• 2020 წელს – 29,03% (ეროვნულ დონეზე  48,22%)
• 2024 წელს – 13,49% (ეროვნულ დონეზე 53.93%).

ამჟამად პატიმრობაში მყოფი ყოფილი პრემიერ-მინისტრი, ირაკლი ღარიბაშვილი აცხადებს, რომ ივანიშვილის სახელით მიიღო ახალი წერილი, სადაც მას კორუფციის ახალი საქმის თავის თავზე აღებას სთავაზობენ.

ამის შესახებ დღეს, 17 აგვისტოს, ღარიბაშვილის ვერიფიცირებულ ფეისბუქ გვერდზე გამოქვეყნდა ღარიბაშვილის მიმართვა:

„ეს წერილი გამომიგზავნეს ბიძინა ივანიშვილის დავალებით.

მე ყველაფერი ვცადე და გავაკეთე, რომ ეს ნაბიჯი არ გადამედგა. სამწუხაროდ, სხვა გზა არ დამიტოვეს, რომ წინ არ აღვუდგე ამ ღირსების შემლახავ ბოროტებას! ამ დაუნდობელ სისასტიკეს, ჩაგვრას/უსამართლობას, ჩემი და ჩემი ოჯახის განადგურების ბინძურ გეგმას!

ხვალ გავავრცელებ ვრცელ წერილს და საზოგადოებას ვეტყვი ჩემს სიმართლეს!

დღეიდან, ჩემი და ჩემი ოჯახის უსაფრთხოებაზე სრული პასუხუსმგებლობა ეკისრება ბიძინა ივანიშვილს და მთელ ხელისუფლებას” – წერს ღარიბაშვილი და მიმართვას თან ურთავს წერილს:

„ქართული ოცნების“ ყოფილ, ორგზის პრემიერ-მინისტრს, ირაკლი ღარიბაშვილს, რომელიც სხვადასხვა დროს იკავებდა შს და თავდაცვის მინისტრის პოსტებსაც, 2025 წლის 24 ოქტომბერს ბრალი წაუყენეს უკანონო შემოსავლის ლეგალიზაციის (ფულის გათეთრება) მუხლით, რასაც თან ახლდა განსაკუთრებით დიდი ოდენობით შემოსავლის მიღება (სსკ-ის 194-ე მუხლის მესამე ნაწილის „გ“ ქვეპუნქტი). აღნიშნული დანაშაული 9-დან 12 წლამდე პატიმრობას ითვალისწინებს, თუმცა საპროცესო შეთანხმებით  მას 5 წლით თავისუფლების აღკვეთა განესაზღვრა. იგი პატიმრობაშია.

2026 წლის II კვარტალის ბოლოსათვის მსხვილფეხა რქოსანი პირუტყვის სულადობა წინა წლის შესაბამის მაჩვენებელთან შედარებით 5.4 პროცენტით შემცირდა და 820.8 ათასი სული შეადგინა.

ამის შესახებ საქართველოს სტატისტიკის ეროვნული სამსახურის წინასწარ მონაცემებშია აღნიშნული.

საქსტატის ცნობით, ფურისა და ფურკამეჩის ჯამური რაოდენობა 380.4 ათასი სულით განისაზღვრა, რაც წინა წლის შესაბამისი მაჩვენებელს 6.2 პროცენტით ჩამორჩება.
ღორის რაოდენობა 171.9 ათასი სულით განისაზღვრა, რაც 5.5 პროცენტით ნაკლებია წინა წლის შესაბამის მაჩვენებელზე.

ამავე დროს, წინასწარი მონაცემებით, 2026 წლის II კვარტალის ბოლოსათვის ფრინველის რაოდენობა წინა წლის ანალოგიურ მაჩვენებელთან შედარებით 4.8 პროცენტით შემცირდა და 10.6 მილიონი ფრთა შეადგინა.

იკლო რძის, ხორცის და კვერცხის წარმოებამაც.

2026 წლის II კვარტალში რძის წარმოებამ 168.8 მილიონი ლიტრი შეადგინა, რაც წინა წლის ანალოგიურ მაჩვენებელზე 8.9 პროცენტით ნაკლებია.

ხორცის წარმოებამ 18.2 ათასი ტონა შეადგინა, რაც 2025 წლის შესაბამის პერიოდის მაჩვენებელზე 12.1 პროცენტით ნაკლებია.

ასევე, საანგარიშო პერიოდის განმავლობაში წარმოებულია 178.2 მილიონი კვერცხი, რაც წინა წლის ანალოგიურ მაჩვენებელზე 1.8 პროცენტით ნაკლებია.

ამავე თემაზე: 

აჭარაში პირუტყვის რაოდენობა 1/3-ით შემცირდა, მიზეზი – თურქეთში მუშაობა

See more

 

ფინანსთა სამინისტროს საგამოძიებო სამსახურის ინფორმაციით, სამ სხვადასხვა სისხლის სამართლის საქმეზე ქრთამის აღებისა და კომერციული მოსყიდვის ფაქტებზე სამი პირი დააკავეს.

„აჭარის სატყეო სააგენტოს ხულოს სატყეო ადმინისტრაციის ტყის მცველმა ნ.ბ.-მ, სახელმწიფო ტყის ფონდის ნაკვეთით სარგებლობის სანაცვლოდ, მოქალაქეს ქრთამის სახით 1 000 აშშ დოლარი გამოართვა. იგი თანხის აღების მომენტში, დანაშაულის ადგილზე დააკავეს.

ასევე, სურსათის ეროვნული სააგენტოს რაჭა-ლეჩხუმისა და ქვემო სვანეთის რეგიონული სამსახურის ვეტერინარმა ა.ლ.-მ, დადგენილი პროცედურების გვერდის ავლით, დაურეგისტრირებელი საქონლის იდენტიფიკაცია-რეგისტრაციის სანაცვლოდ მოქალაქეს ქრთამის სახით 650 ლარი გამოართვა.

გამოძიება სისხლის სამართლის კოდექსის 338-ე მუხლის პირველი ნაწილით ქრთამის აღების ფაქტზე მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.

შპს „საქართველოს მყარი ნარჩენების მართვის კომპანიის“ ოპერატორმა ბ.ზ.-მ, ქვემო ქართლის რეგიონში მდებარე ნაგავსაყრელზე ნარჩენების უნებართვო განთავსების სანაცვლოდ, მოქალაქეს 500 ლარი მოსთხოვა და გამოართვა, რა დროსაც საგამოძიებო სამსახურის თანამშრომლებმა დააკავეს.

გამოძიება საქართველოს სისხლის სამართლის კოდექსის 221-ე მუხლით-კომერციული მოსყიდვის ფაქტზე მიმდინარეობს“- წერს საგამოძიებო.

ჩაქვში სატვირთო მატარებელი ახალგაზრდა კაცს დაეჯახა.

შეჯახების შედეგად კაცი ადგილზე გარდაიცვალა.

შემთხვევა დღეს, 16 აგვისტოს, ნაშუადღევს მოხდა.

შინაგან საქმეთა სამინისტროს ინფორმაციით, მომხდარ ფაქტზე გამოძიება სისხლის სამართლის კოდექსის 275-ე მუხლით დაიწყო, რაც გულისხმობს რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას.

ბოლო რამდენიმე დღეში ეს უკვე მესამე შემთხვევაა, როდესაც მატარებელი მოქალაქეს ეჯახება.

3 აგვისტოს, ასევე ჩაქვში, მატარებელი 35 წლამდე კაცს დაეჯახა, რომელიც ადგილზე დაიღუპა.

13 აგვისტოს კი მწვანე კონცხზე, სარკინიგზო გადასასვლელზე თბილისი-ბათუმის სამგზავრო მატარებელი 16 წლის გოგოს დაეჯახა, რომელიც ადგილზე გარდაიცვალა.

ამავე თემაზე:

რა ხდება ადგილზე, სადაც მატარებელი მოზარდ გოგოს დაეჯახა

See more