Batumelebi | „წულუკიძეების საქმეზე“ მე-7 პირი, ელდარ ანთაძეც დააკავეს „წულუკიძეების საქმეზე“ მე-7 პირი, ელდარ ანთაძეც დააკავეს – Batumelebi
RU | GE  

„წულუკიძეების საქმეზე“ მე-7 პირი, ელდარ ანთაძეც დააკავეს

„წულუკიძეების და ჭელიძეების საქმეზე“ დღეს, 23 აპრილს, ბათუმში ელდარ ანთაძეც დააკავეს. საუბარია რიონის ხეობის დაცვისთვის გამართულ აქციის მონაწილეებთან სოლიდარობაზე, რომლის შემდეგაც ბათუმიდან ჩასული 6 პირი დააკავეს.

შინაგან საქმეთა სამინისტროს ინფორმაციით, „ბრალდებულმა და ამჟამად პატიმრობაში მყოფმა მისმა [ელდარ ანთაძის] 6-მა თანამზრახველმა 2021 წლის 12 აპრილს, ქალაქ ქუთაისში, გუმათჰესის დასახლებაში, ნამახვანჰესის მშენებლობასთან დაკავშირებით მიმდინარე საპროტესტო აქციაზე ყოფნისას, ჯგუფურად იძალადეს და ფიზიკური დაზიანებები მიაყენეს აქციაზე მყოფ სამ პირს. ასევე, დააზიანეს ერთ-ერთი დაზარალებულის კუთვნილი ავტომანქანა,“ – აღნიშნულია შსს-ს მიერ გავრცელებულ ინფორმაციაში.

ელდარ ანთაძეს გამოძიება 225-ე მუხლის მიხედვით ედავება, რაც გულისხმობს ჯგუფური ძალადობის ორგანიზებას და მასში მონაწილეობას.

ბრალდებულ რეზო წულუკიძის ცოლის ინფორმაციით, ელდარ ანთაძე იმ დროს დააკავეს, როცა ის დაკავებულების მხარდასაჭერად საპროტესტო აქციას ამზადებდა და ხულოდან ბრუნდებოდა ბათუმში.

წულუკიძეების და ჭელიძეების ახლობლები კვირას ბათუმში აქციის მოწყობას აპირებენ.

წულუკიძეებს და ჭელიძეებს წინასწარი პატიმრობა ქუთაისის საქალაქო სასამართლომ 17 აპრილს შეუფარდა. ისინი ბათუმში 15 აპრილს დააკავე.

ელდარ ანთაძე რეზო წულუკიძესთან ერთად გასულ წელსაც მისცეს პასუხისგებაში. 2020 წლის 6 ნოემბერს ბათუმის საქალაქო სასამართლომ ჯგუფური ხულიგნობა არ დაუდასტურა, რაც პროკურატურის ვერსია იყო, მაგრამ ფიზიკური ძალადობისთვის დასაჯა.

ნეტგაზეთის მასალების სხვა გამოცემებში გადაბეჭდვის წესი
ავტორი