აჭარის ტურიზმისა და კურორტების დეპარტამენტი აცხადებს, რომ „შუამთობის სახალხო დღესასწაულის ფარგლებში“ ხულოს მუნიციპალიტეტში, ზორტიყელის მთაში დაგეგმილია ღონისძიება, რისთვისაც მუსიკალური პროგრამა უნდა შეისყიდოს.
მუსიკოსებს კი ჰონორარებში [ყველა ხარჯის გათვალისწინებით] ჯამში 46 ათას ლარს გადაუხდის.
ღონისძიება ზორტიყელში 2026 წლის 18 აგვისტოს არის დაგეგმილი. „თარიღის ცვლილება ეცნობება შემსრულებლებს“ – წერს დეპარტამენტი.
ხელშეკრულებები გამარტივებული წესით შემდეგ მუსიკოს-შემსრულებლებთან გაფორმდება:
ჯგუფი „გორდელა“ – მუსიკალური შესრულება / 1 საათი – 15 000 ლარი
ჯგუფი „ბანი“ – მუსიკალური შესრულება / 1 საათი – 15 000 ლარი
ჯგუფი La Fiesta [„ლა-ფიესტა“] – მუსიკალური შესრულება / 1 საათი – 7 000 ლარი
დიჯეი ნუგო – ნუგზარ ხიმშიაშვილი – DJ მუსიკალური მომსახურება / 1 საათი – 3 000 ლარი
დიჯეი ბენე – გიორგი ცინცაძე – DJ მუსიკალური მომსახურება / 1 საათი – 3 000 ლარი
დიჯეი ჩიკი – არჩილ დავითაძე – DJ მუსიკალური მომსახურება / 1 საათი – 3 000 ლარი
„ცნობილია, რომ შუამთობის ღონისძიებები ჩატარდა კურორტ ბეშუმში და ჩირუხის მთაში. ღონისძიებების მიზანია აჭარაში სოფლად ტურიზმის განვითარების ხელშეწყობა, სტუმრებისთვის ადგილობრივი ტრადიციების გაცნობა და ზოგადად, აჭარის მაღალმთიანი რაიონების პოპულარიზაცია.
შიდა ტურიზმის სტიმულირებისათვის, მთებში, რიგი პიარ და მარკეტინგული ღონისძიებების ფარგლებში მოხდება მაღალმთიანი აჭარის ტურისტული პოტენციალის წარმოჩენა, კიდევ უფრო მეტი ადამიანისათვის გაცნობა და მთებში მოგზაურობის წახალისება.
აღნიშნული ღონისძიების სრულყოფილად ორგანიზების მიზნით, საჭიროა მუსიკალური პროგრამის სწორად დაგეგმვა და შემსრულებლების მოწვევა მათი შემოქმედების, რეპერტუარის, მაღალი რეიტინგისა და ცნობადობის გათვალისწინებით.“ – წერს დეპარტამენტი.
რაც შეეხება ზორტიყელში დაგეგმილ ღონისძიებას, ტურიზმის დეპარტამენტი შესყიდვების სააგენტოს წერს, რომ „წარმოდგენილი მუსიკალური შემსრულებლები შერჩეული იქნენ მათი ცნობადობის, მუსიკალური რეპერტუარის და რეიტინგის გათვალისწინებით. ასევე იმის გათვალისწინებით, რომ მთაში ღონისძიებას ესწრება ყველა ასაკის ადამიანი და მუსიკალური პროგრამის შერჩევა და მორგება უნდა მოხდეს სხვადასხვა სეგმენტის, ასაკისა და მუსიკალური გემოვნების აუდიტორიისთვის.
მუსიკალური პროგრამა მორგებულია მაღალმთიან აჭარაში ჩასატარებელი ღონისძიების სპეციფიკაზე. ეს კონკრეტული რეპერტუარი ჩამოყალიბებულია ერთიან პროგრამად. შესაბამისად, ვთვლით, რომ მიზანშეწონილი ალტერნატივით ჩანაცვლება შეუძლებელია.“
კურორტ ბეშუმში და მთა ჩირუხში ჩატარებულ „შუამთობაზე“ კი, მუსიკოს-შემსრულებლებისთვის ჯამში 107 800 ლარი იყო გათვალისწინებული.
ამავე თემაზე:
რომელ მუსიკოსს რამდენს გადაუხდიან შუამთობაზე – ბიუჯეტიდან დაიხარჯება 107 800 ლარი
