Batumelebi

„რესპუბლიკელების“ ბათუმის ორგანიზაციის თავმჯდომარე ზაურ ახლვლედიანი თანამდებობიდან გადადგა. მისივე თქმით, პარტია უახლოეს მომავალში საერთო კრებაზე ახალ თავმჯდომარეს აირჩევს.

პარტიის ბათუმის ორგანიზაციის ხელმძღვანელის თანამდებობის დატოვება ზაურ ახვლედიანმა მოუცლელობით ახსნა: „დრო არ მქონდა, რომ პარტიისთვის უფრო მეტი მემუშავა. გარდა ამისა, იყო რიგი საკითხები, რაც სხვაგვარად უნდა წასულიყო და არ წავიდა.“

ზაურ ახვლედიანის თქმით, ის ჯერჯერობით პარტიის დატოვებას არ გეგმავს: „ველოდები სიახლეებს, თუ ეს სიახლეები არ იქნება, შეიძლება წავიდე.“

კითხვაზე, ამ სიახლეების არარსებობას პარტიაში სხვას ხომ არ აბრალებთ, როცა თქვენ იყავით პარტიის თავმჯდომარე? – ზაურ ახვლედიანმა უპასუხა: „დიახ, საკუთარ წვლილსაც ვხედავ და სხვას არ ვაბრალებ.“

8 ოქტომბრის არჩევნების პირველი ტურის დასრულების შემდეგ ზაურ ახვლედიანმა „ბათუმელებთან“ ოფიციალურად განაცხადა, რომ პარტიის წარმომადგენლებმა საუბნო-საარჩევნო კომისიებში არათუ პარტიის ინტერესები არ დაიცვეს, არამედ მათ პარტიისთვის ხმაც კი არ მიუციათ.

ზაურ ახვლედიანი ბათუმის საკრებულოს წევრი და აჭარის კულტურული მემკვიდრეობის დაცვის სააგენტოში ძეგლებზე ნებართვების გაცემისა და მონიტორინგის განყოფილების უფროსია.

72 წლის ნათელა ბერიძე პენსიიდან და სოციალური შემწეობიდან მხოლოდ ათ ლარს იტოვებს თავისთვის, დანარჩენს კი სტუდენტ შვილიშვილს უგზავნის. დღეში ერთხელ ის უფასოდ სადილობს მუნიციპალურ სასადილოში, საღამოს კი თითქმის დანგრეულ სახლში მარტო დარჩენილი იმაზე დარდობს, ან იატაკი არ ჩაინგრეს, ან წვიმისას ჭერიდან ჩამოსულმა წყალმა ღიად დარჩენილი ელექტროსადენები არ დაასველოს და ხანძარი არ გაჩნდეს.

ნათელა ბერიძე შუახევის მუნიციპალიტეტის გამგეობის მიმდებარე ტერიტორიაზე, ორსართულიანი ხის ძველი შენობის მეორე სართულზე, ორ ოთახში ცხოვრობს. ოთახებში მთელი არც იატაკია და არც სახურავი, შენობაში წვიმის წყალი ჩამოდის. იატაკის ფიცრები ნათელას ხის ჭოკებით აქვს გამაგრებული.

ძველ შენობაში ელექტროგაყვანილობა ხის ძელებზე ღიადაა გაყვანილი. ნათელა შიშობს, რომ, რადგან შენობაში წყალი ჩამოდის, შეიძლება სადენები დასველდეს და ხანძარი გაჩნდეს. სახლში ცხოვრება სიცოცხლისთვის სახიფათო რომაა, ეს თვითონაც კარგად იცის, მაგრამ მას წასასვლელი არსად აქვს.

„ერთხელ, ღამით, ნათურასთან გაეკიდა ცეცხლი. ხმაზე გამეღვიძა, გამოვრთე. ასე გადავურჩი ხანძარს. როცა წვიმს, შუქს ჩართულს ვერ ვტოვებ, მეშინია, ისევ არ გაეკიდოს“, – ამბობს ქალი.

ნათელა ბერიძე ამ შენობაში შვიდი წლის წინ შემოვიდა, როდესაც საკუთარი სახლი დაეწვა. მაშინ გირაოთი ერთი ოთახი ახლანდელი საცხოვრებელი ოთახის გვერდით აიღო, იქ ოთხი წელი იცხოვრა, ხოლო გირაოს ვადის ამოწურვის შემდეგ უსახლკაროდ დარჩენილი მოხუცი, იმავე შენობაში მაშინდელმა შუახევის გამგებელმა, თამაზ დავითაძემ შემოასახლა.

„ხალხი აქედან გაჰყავდათ, მე კი შემომასახლეს. საკუთარი სახლიც მქონდა და ყველაფერი გამაჩნდა, მაგრამ ხანძარმა გამინადგურა, დავრჩი უსახლკაროდ. ერთი შვილი მყავს, გათხოვილია, არც მას აქვს შესაძლებლობა დამეხმაროს. ჩემი მთავარი პრობლემა საცხოვრებელი სახლია, იატაკი რომ არ ჩაინგრეს, ძელებში ხეები მოვათავსე და სარდაფი მთიდან ჩამოტანილი ხეებით გამოვავსე. თუ იატაკი ჩავარდება, ძირს არ ჩავვარდები“, – ამბობს ნათელა.

სახლის შესასვლელთან, აივანზე რამდენიმე კილოგრამი უხარისხო და გადარჩეული კარტოფილი ყრია. ნათელა ბებო ამბობს, რომ ეს მისი ზამთრის მარაგია. რამდენიმე ქილა საწებელი და მურაბა ოთახის შესასვლელში აწყვია. ნათელას სოციალურად დაუცველის სტატუსი აქვს და დღეში ერთხელ მუნიციპალურ სასადილოში უფასოდ იკვებება.

„რაც მაქვს, მთელ ზამთარს უნდა მეყოს. დღეში ერთხელ, შუადღით მუნიციპალურ სასადილოში ვჭამ. ესეც კარგია, საღამოს ან ჩაის ვსვამ, ან კარტოფილს ვიმზადებ. ასე გამაქვს თავი“, – ამბობს ნათელა.

მას არც ტელევიზორი აქვს, არც ელექტროღუმელი და მაცივარი. ზაფხულში საჭმელი რომ არ გაუფუჭდეს, წყალში ინახავს.

„თქვენც ხედავთ, არაფერი გამაჩნია შეშის ღუმელის გარდა. ღუმელი მაქვს, მაგრამ შეშა სარდაფიდან ვერ გამომაქვს, რომ არ ჩამოინგრეს იატაკი. მთიდან ჩამომაქვს ფიჩხი, მაგრამ სველს ძნელად ეკიდება. ტელევიზორიც კი არ მაქვს. რამდენიმე წლის წინ ძველი მაცივარი მაჩუქეს, მოვიტანე, მაგრამ რადგან იატაკი ძველია, მაცივარმა ვერ გაუძლო და ისიც სხვას ვაჩუქე. ზაფხულში საჭმელი რომ არ ამიმჟავდეს, წყალში ვდგამ და ისე ვინახავ“, – გვიყვება ნათელა.

ნათელას შემოსავალი, პენსიასთან ერთად, ის 50 ლარია, რასაც სახელმწიფო ქალს არსებობისთვის აძლევს. იგი ამბობს, რომ პენსიიდან და საარსებო შემწეობიდან თავისთვის 10 ლარს იტოვებს, დანარჩენს კი თბილისში სასწავლებლად წასულ შვილიშვილს უგზავნის.

„შვილიშვილს ბავშვობიდან მე ვზრდი, აქ ჩემთან ერთად მანამდე ცხოვრობდა, ვიდრე სტუდენტი გახდებოდა. შარშან თბილისში ჩააბარა და ახლა იქ ცხოვრობს, მეორე კურსის სტუდენტია. ფასიანზეა, მაგრამ სწავლის საფასურს მამამისი უხდის, არსებობისთვის საჭირო თანხას კი მე ვუგზავნი. არც მამამისს აქვს ფული, დანგრეული „მარშუტკა“ ჰყავს, მძღოლია, დედამისი კი – უმუშევარი. პენსიიდან ჩემთვის მხოლოდ 10 ლარს ვინახავ, დანარჩენს მას ვუგზავნი. იმ ათი ლარით შაქარს, ერთ ცალ საპონს, მარილს, ერთ ბოთლ ზეთს ვყიდულობ და ერთ თვეს მყოფნის. „კოფეს“ მე ვერ ვყიდულობ და ტკბილეულს“, – ამბობს ნათელა.

შენობის იმ ნაწილის გადასახურად, სადაც ასაკოვანი ქალი ცხოვრობს, გამგეობამ ექვსი ცალი თუნუქის ფურცელი მისცა, მაგრამ რადგან სახლის სხვენი დამპალია, ნათელას ნათესავებმა სახლის გადახურვა ვერ შეძლეს.

„სხვენი დამპალი და უსწორმასწორო რომ იყო, ვერ გადახურეს, ისევ ისე დატოვეს და ისევ მაწვიმს. არც აბაზანა მაქვს, არც წყალი სახლში და არც სამზარეულო ოთახი, მაგრამ რაც მაქვს, აქ რომ შიშით არ ვიძინებდე, კარგი იქნება. სახლი ზედ მთაზეა, ზამთარში ზვავი ჩამოდის და ხშირად ქვებიც ცვივა. აქვე, ახლოს, ხეები იყო, შარშან გამგებელს ვთხოვე და მოჭრეს, მაგრამ ქვის ცვენას რა შეაჩერებს?!“ – წუხს ნათელა.

ბათუმი-ახალციხის ცენტრალური საავტომობილო გზის ქედის მონაკვეთზე, უსაფრთხოების მიზნით სარკეების მოწყობასა და ინფრასტრუქტურის გამართვას ადგილობრივები თვითმართველობას პეტიციით სთხოვენ. გზის ამ მონაკვეთში მუდმივად ხდება ავტოსაგზაო შემთხვევები და ადამიანები იღუპებიან. საავტომობილო გზების დეპარტამენტში, ვისაც ეს მაგისტრალი ეკუთვნის, მოსახლეობის მოთხოვნას უსაფუძვლოს უწოდებენ. აქ ფიქრობენ, რომ ავტოსაგზაო შემთხვევები შემცირდება, თუ აჭარის მთაში საპატრულო პოლიცია იარსებებს.

ბათუმი-ახალციხის ცენტრალური საავტომობილო გზის მაღალმთიანი აჭარის მონაკვეთზე, წლის განმავლობაში ბევრი ავტოსაგზაო შემთხვევა მსხვერპლით სრულდება. ორ ახალგაზრდა დაიღუპა ავტოავარიის შედეგად გასულ კვირასაც, ცენტრალური მაგისტრალის ქედის მონაკვეთზე, სოფელ გობრონეთთან. ავტომობილი, რომელშიც სამი მგზავრი იმყოფებოდა, გზის სავალი ნაწილიდან მდინარე აჭარისწყალში ჩავარდა. სამი მგზავრიდან მხოლოდ ერთი გადარჩა.

ზუსტად გზის იგივე მონაკვეთზე მსხვერპლით დასრულდა ავტოავარია ორი წლის წინაც.

საავტომობილო გზის ეს ნაწილი რთულ მონაკვეთადაა მიჩნეული და აქ ავტოავარიის შემთხვევები გაცილებით ხშირია. მსგავსი სირთულის მონაკვეთები ბათუმი-ახალციხის გზაზე იშვიათობა ნამდვილად არ არის – მაგალითად, ერთ-ერთი ასეთი მონაკვეთი ქედაში, სოფელ დოლოგანთან მდებარეობს, სადაც ერთსა და იმავე ადგილზე წელს სამი ავტოსაგზაო შემთხვევა მოხდა.

სტატისტიკური მონაცემებით, ავარიები, ძირითადად, გადამეტებული სიჩქარით არის გამოწვეული. ასეთ ფონზე, საავტომობილო გზაზე სიჩქარის შემანელებელი ხელოვნური ბარიერები თუ რადარები თითქმის არ არსებობს.

ცენტრალურ მაგისტრალზე საგზაო უსაფრთხოების მიზნით სარკეებისა და შესაბამისი ინფრაქტრუქტურის მოწყობას ქედის მოსახლეობა ახლა პეტიციით ითხოვს. პეტიცია, რომელსაც 300-ზე მეტი მოქალაქე აწერს ხელს, ქედის საკრებულოში 26 აგვისტოს შევიდა.

„საავტომობილო გზების სახიფათო მონაკვეთებში არ არის სიჩქარის შემზღუდავი ხელოვნური ბარიერები და საგზაო ნიშნები განთავსებული, რაც ზრდის ავტოსაგზაო შემთხვევების რისკს“, – წერია პეტიციაში. პეტიციის ხელმომწერი და წარმდგენი სოფელ პირველ მაისის მკვიდრი ვლადიმერ თებიძე ამბობს, რომ გამგეობა ამ მოთხოვნის შესრულებას ქედელებს 2017 წლისთვის ჰპირდება.

„გამგეობამ გვიპასუხა, რომ აღნიშნული პრობლემების მოგვარებისთვის 2017 წლის ბიუჯეტის განხილვის დროს, თანხის გამონახვას შეეცდება და ამ პრობლემას თვითმართველობის პრიორიტეტში შეიტანს“, – ამბობს ვლადიმერ თებიძე.

ქედის გამგებელი დავით დუმბაძე კი ამბობს, რომ პრობლემა, რის მოგვარებასაც ადგილობრივები თვითმართველობისგან ითხოვენ,  მათ კომპეტენციას სცდება.

„ცენტრალური საავტომობილო გზა, საქართველოს საავტომობილო გზების დეპარტამენტის დაქვემდებარებაშია, შესაბამისად ჩვენ რაიმეს მოწყობას ვერ გადავწყვეტთ, ხოლო იმ შიდა საუბნო გზებზე, რაც ჩვენი საკუთრებაა თუ შემოვა პეტიცია საკითხს განვიხილავთ და თანხებს გამოვყოფთ“ – ამბობს გამგებელი.

ბათუმი-ახალციხის ცენტრალური საავტომობილო გზა მეოთხე კატეგორიის მაგისტრალია და ის საქართველოს სააბტომობილო გზების დეპარტამენტის დაქვემდებარებაშია. შესაბამისად, გზებზე ინფრაქსტრუქტურის მოწყობა დეპარტამენტის პრეროგატივაა, მოსახლეობის მოთხოვნას – საავტომობილო მაგისტრალზე ინფრასტრუქტურა მოეწყოს, ზურაბ სიხარულიძე უსაფუძვლოდ მიიჩნევს და ამბობს, რომ მაგისტრალის, მაღალმთიანი აჭარის მონაკვეთზე ინფრასტრუქტურა გამართულია, ავტოსაგზაო შემთხვევების ზრდას ის საპატრულო ეკიპაჟის არარსებობით ხსნის.

„აქ ინფრასტრუქტურა მოწესრიგებულია, მძღოლების მოძრაობაა მოუწესრიგებელი, პატრული რომ არ არის, ამიტომ დადიან გადამეტებული სიჩქარით. საჭიროა პატრულის ეკიპაჟმა იმოძრაოს აღნიშნულ მონაკვეთზე. ამ მიმართულებით 2013-14 წლებში მდინარისა და ხევების მხარეს რკინ-ბეტონის პარაპეტები და ლითონის ბაგირები მოეწყო, გასულ კვირას მომხდარი ტრაგიკული შემთხვევა ბოლო სამი წლის განმავლობაში აღნიშნულ მონაკვეთზე პირველია, შემთხვევის ადგილზე მონაკვეთის გასაფართოვებლად დეპარტამენტს წერილობით მივმართე, დაგეგმილი გვაქვს გავაფართოოთ გზა“, – ამბობს ზურაბ სიხარულიძე.

მოსახლეობა ამბობს, რომ მსხვერპლით დასრულებული ავტოსაგზაო შემთხვევის დღეს, დამცავი პარაპეტი არ იყო. აქ ამბობენ, რომ ავარია წინა დღითაც მოხდა. პარაპეტი სწორედ მაშინ გადავარდა ხევში, თუმცა ავტომობილი აღარ გადაჩეხილა. დამცავი პარაპეტი ჯერ არ აღუდგენიათ.

შუახევის გამგებელი ტარიელ ებრალიძე მაგისტრალის შუახევის მონაკვეთზე, რიგ ადგილებზე, გზის გაფართოებასა და ქვათაცვენის საფრთხის ასაცილებლად ბადეების მოწყობის საჭიროებაზე საუბრობს:

„მას შემდეგ, რაც გზაზე დამცავი პარაპეტები და ჯაჭვები მოეწყო, მნიშვნელოვნად შემცირდა ავტომობილის გზიდან ხევში გადავარდნის ფაქტები. ამ მხრივ ნაბიჯები ისევ უნდა გადაიდგას. არის მონაკვეთები, სადაც გზების გაფართოებაა საჭირო. ქვათა ცვენის შესამცირებლად კი დამცავი ბადეები უნდა მოეწყოს. ბევრი რამ მძღოლებზეცაა დამოკიდებული. ჩვენი მხრიდან რაც გასაკეთებელია, უნდა გავაკეთოთ. ასევე, უნდა გამკაცრდეს ზომები იმათთვის, ვინც მანქანას ნასვამ მდგომარეობაში, ან გადამეტებული სიჩქარით მართავს“.

არასამთავრობო ორგანიზაცია „ჩვენი უფლებებისთვის“ ხელმძღვანელის თამაზ ბაკურიძის განცხადებით, კომპანია „აჭარისწყალი ჯორჯია“, რომელიც სოფლებში ჰესის მშენებლობის პროექტს ახორციელებს, მოსახლეობის უფლებებს არ იცავს.

„აჭარისწყალი ჯორჯია“ თავის წილ პასუხისმგებლობას გაურბის. რადგან ჰესის მშენებლობის გამო დაზარალებული მოსახლეობის ინტერესები დაუცველია. მსგავსი შემთხვევებია სოფელ ჩანჩხალოს, დიაკონიძეების, ღურტას და ყინჩაურის შემთხვევაში.

სანამ მოსახლეობა პროტესტით არ გამოვა, მანამდე არც კომპანია და არც სახელმწიფო არ აქცევს ყურადღებას სოფლებში მიმდინარე პროცესებს. პროტესტის შემდეგ აღმოჩნდება რომ საფრთხეები თურმე მატულობს. სოფლებში იკლო მოსავალმა, წყლები დაშრა, ბზარები გაუჩნდა სახლებს, გაჩნდა ეკოლოგიური საფრთხეები. ამ ყველაფერზე სახელმწიფო დაზარალებული ოჯახისთვის 5 ათასი ლარის შეთავაზებით შემოიფარგლება, გამონაკლის შემთხვევებში კი 25-30 ათას ლარის კომპენსაციაზე მიდის საუბარი. ეს არ არის კანონიერი და სამართლებრივი მიდგომა“-ამბობს თამაზ ბაკურიძე.

თამაზ ბაკურიძის თქმით, არჩევნებამდე მაჟორიტარი კანდიდატები, რომლებიც ახლა უკვე პარლამენტში და უმაღლეს საბჭოში არიან შესული, პირდებოდა მოსახლეობას რომ  მათ პრობლემებზე ექნებოდათ რეაგირება.  „მოსახლეობა ითხოვს, რომ ჩაერიონ ისინი ამ საკითხში და დაიცვან მათი უფლებები. წინააღმდეგ შემთხვევაში, გაიზრდება მოსახლეობის პროტესტი“-ამბობს თამაზ ბაკურიძე.

აჭარის  განათლების  სამინისტრო საბაკალავრო და სამაგისტრო საგანმანათლებლო პროგრამებზე ჩარიცხული სტუდენტების დაფინანსებისთვის,  დამატებით კონკურსს აცხადებს.   კონკურსში მონაწილეობის მიღება შეუძლიათ სტუდენტებს, რომლებიც 2013, 2014 და 2015 წელს ჩაირიცხნენ უმაღლეს საგანმანათლებლო დაწესებულებებში აკრედიტებულ საბაკალავრო და სამაგისტრო პროგრამებზე;

ბოლო ექვსი წლის განმავლობაში სწავლობდნენ და ატესტატი მიიღეს აჭარის ავტონომიურ რესპუბლიკაში.

ბოლო  სემესტრის საშუალო აკადემიური მოსწრება ტოლია, ან მეტი 71 % -ს. სამინისტროს ინფორმაციით, დაფინანსება გაიცემა შემდეგი კატეგორიის სტუდენტებზე:

სტუდენტები მაღალმთიანი აჭარიდან: ქედა, შუახევი, ხულო;

დედით ან მამით ობოლი, უდედმამო;

მრავალშვილიანი ოჯახის წევრი: ოთხი და მეტი შვილი;

სოციალურად დაუცველი: 100 000 ქულა და ნაკლები.

კონკურსში მონაწილეობის მსურველებმა განცხადებები და პროგრამით გათვალისწინებული დოკუმენტები უნდა წარმოადგინონ  სამინისტროში 2016  წლის 7 ნოემბრიდან 11 ნოემბრის ჩათვლით.

სააღმზრდელო საქმიანობის ლიცენზირების შესახებ კანონში შესული ცვლილების თანახმად, ლიცენზირებას ექვემდებარება ყველა დაწესებულება, რომელშიც ბავშვი 24 საათის განმავლობაში იმყოფება. ამ ტიპის დაწესებულებებმა შესაბამისი ლიცენზია 2017 წლის პირველ სექტემბრამდე უნდა მიიღონ. დაწესებულება, რომელიც ლიცენზიის პირობებს ვერ დააკმაყოფილებს, ჯერ დაჯარიმდება, შემდეგ კი სისხლის სამართლის პასუხისგებლობა დაეკისრება. ცვლილება არ ეხება საპატრიაქროს ბავშვზე ზრუნვის დაწესებულებებს და განათლების სამინისტროს სკოლა-პანსიონებს. არასამთავრობო ორგანიზაცია „პარტნიორობა ბავშვებისთვის“ ხელმძღვანელი ანდრო დადიანი, ცვლილებას დისკრიმინაციულს უწოდებს.

განხილვის გარეშე მიღებული ლიცენზიის კანონი

„ამ კანონის მოქმედება ვრცელდება სააღმზრდელო საქმიანობის განმახორციელებელ პირებზე, მიუხედავად მათი ორგანიზაციულ-სამართლებრივი ფორმისა“, – წერია სააღმზრდელო საქმიანობის ლიცენზირების შესახებ კანონში. ლიცენზირებას ექვემდებარება რელიგიური ორგანიზაციების მიერ დაარსებული სააღმზრდელო დაწესებულებებიც, სადაც ბავშვი, მოზარდი 24 საათის განმავლობაში, სამ თვეზე მეტი ხნით ცხოვრობს.

„ბათუმელების“ კითხვაზე, ეხება თუ არა ლიცენზირება მუსლიმი თემის მიერ დაარსებულ სკოლა-პანსიონებს? – საქართველოს ჯანდაცვის სამინისტროს სოციალური პროგრამების სამმართველოს უფროსი, ამირან დათეშიძე დადებითად პასუხობს.

„ამაში იგულისხმება რელიგიური ორგანიზაციების, მათ შორის სამუფთოს დაქვემდებარებაში მყოფი პანსიონებიც. ოღონდ, თუ იქ არის მხოლოდ საგანმანათლებლო პროცესი და ბავშვი არ რჩება 24 საათი, მაშინ ასეთ დაწესებულებებს არ ეხება ლიცენზირება. მაგრამ, თუ ბავშვი რჩება დაწესებულებაში 24 საათის განმავლობაში, სამ თვეზე მეტი ხნით, მაშინ ასეთი დაწესებულება ჩაითვლება სააღმზრდელო საქმიანობის განმახორციელებლად და საჭიროებს შესაბამის ლიცენზიას“, – აცხადებს ამირან დაშეთიძე.

ახალი კანონის მიხედვით, დაწესებულება, რომელიც მიიჩნევა სააღმზრდელო საქმიანობის განმახორციელებელად, უნდა აკმაყოფილებდეს ბავშვზე ზრუნვის სტანდარტებს. ამ სტანდარტების მიხედვით კი, შენობაში, სადაც ბავშვებსა და მოზარდებს 24 საათის განმავლობაში უხდებათ ყოფნა, ათზე მეტი ბავშვი არ უნდა იმყოფებოდეს. გარდა ამისა, ერთ საძინებელ ოთახში მხოლოდ ორ ბავშვს უნდა ეძინოს და ერთ ბავშვზე, მინიმუმ 6კვ/მ ფართობი უნდა იყოს გათვალისწინებული. სტანდარტი მოითხოვს საძინებელში, კვების ობიექტებსა და სველი წერტილებში ჰიგიენური ნორმების დაცვას და დაწესებულების შესაბამისი კვალიფიკაციის კადრებით დაკომპლექტებას.

კვლევის მიხედვით, რომელიც არასამთავრობო ორგანიზაცია „პარტნიორობა ბავშვებისთვის“ განახორციელა, მუსლიმური სკოლა-პანსიონების უმეტეს ნაწილში, არასრულწლოვანი ბავშვები სამ თვეზე მეტი ხნით ცხოვრობენ. ეს იმას ნიშნავს, რომ ახალი კანონით, ისინი სააღმზრდელო საქმიანობის განმახორციელებელ დაწესებულებად შეიძლება ჩაითვალოს და დაექვემდებაროს ლიცენზირებას. თუკი ასე მოხდება, მაშინ ლიცენზიის მოპოვების მიზნით, პანსიონებმა ბავშვზე ზრუნვის სტანდარტიც უნდა დააკმაყოფილონ. ეს იმას გულისხმობს, რომ ერთ ოთახში ვერ დაიძინებს ათი ან ათზე მეტი ბავშვი, რადგან სტანდარტი, ერთ ოთახში მხოლოდ ორი ბავშვის ცხოვრებას ითვალისწინებს.

„ბათუმელები“ ხულოში რელიგიური სკოლა-პანსიონების ხელმძღვანელებს დაუკავშირდა. ერთ-ერთი პანსიონის ხელმძღვანელი შამილ კაკალაძე გვეუბნება, რომ პანსიონში არასრულწლოვნებიც არიან და ერთ ოთახში ათ და მეტ ბავშვს სძინავს: „მე როგორც მითხრეს, ლიცენზია საგანმანათლებლოს არ ეხება. შემდეგ თქვეს, ნორმები უნდა დადგინდესო. ჩვენ სამუფთო სამმართველოდან ველოდებოდით ინფორმაციას სტანდარტებთან დაკავშირებით, მაგრამ არ შეგვხმიანებიან“.

ზურაბ ცეცხლაძე, რომელიც ასევე პანსიონის ხელმძღვანელია, ამბობს, რომ სტანდარტები მისთვის ცნობილია და მზად არიან ყველა ნორმა დააკმაყოფილონ. „ჩვენთან მაღალი კლასის მოსწავლეები სწავლობენ და ცხოვრობენ პანსიონში. ინფრასტრუქტურაც ლიცენზიის მოთხოვნებთან შესაბამისობაში გვექნება“.

„პარტნიორობა ბავშვებისთვის“ ხელმძღვანელი, ანდრო დადიანი ამბობს, რომ ყველაზე დიდი პანსიონი, რომელიც მუსლიმ თემს ეკუთვნის, არის გარდაბანში, სადაც 80 ბავშვი ჰყავთ: „ამ დაწესებულებამ ინფრასტრუქტურული საკითხები რომც მოაგვაროს, მათ ლიცენზიის მიღება მაინც გაუჭირდებათ, რადგან ბავშვზე ზრუნვის სტანდარტი ეწინააღმდეგება ქვეყანაში ისეთი ტიპის ბავშვთა დაწესებულებების არსებობას, სადაც ათზე მეტი ბავშვი ცხოვრობს“.

ეს იმას ნიშნავს, რომ მუსლიმური პანსიონების მეპატრონეებმა, ან ისე უნდა გააუმჯობესონ ინფრასტრუქტურა, რომ თითოეულ შონობაში ათ-ათი ბავშვი იმყოფებოდეს, ან ლიცენზიის პირობების დაუკმაყოფილებლობის გამო, შესაძლებელია დაჯარიმდნენ სამი ათასი ლარით, მოგვიანებით კი დაიხურონ.

ვის არ ეხება ლიცენზირება და რატომ?

ამირან დათეშიძის განცხადებით, სააღმზრდელო საქმიანობის შესახებ საკანონმდებლო ცვლილება არ ეხება ბავშვთა იმ დაწესებულებებს, სადაც მზრუნველობამოკლებული ბავშვები ცხოვრობენ. ასევე, ლიცენზირება არ ეხება განათლების სამინისტროს მიერ დაარსებულ სკოლა-პანსიონებს და მინდობით აღზრდას. საკანონმდებლო ცვლილება არც საპატრიარქოს დაქვემდებარებაში მყოფ სააღმზრდელო დაწესებულებებს ეხება. „მართალია, საპატრიარქოს დაწესებულებები ფართობის მხრივ ბავშვთა ზრუნვის სტანდარტს ვერ აკმაყოფილებენ, მაგრამ, რადგან ამ სახლებში მზრუნველობამოკლებული ბავშვები ცხოვრობენ, ისინი ახალი წესით ლიცენზირებას არ ექვემდებარებიან“, – გვეუბნება ამირან დათეშიზე.

ბავშვზე ზრუნვის სტანდარტების დასაკმაყოფილებლად საპატრიქროს ვადა 2020 წლამდე აქვს მიცემული.

„ბათუმელების“ კითხვაზე, რატომ მიეცათ სხვა დაწესებულებებს სტანდარტის მისაღწევად ერთი წელი, საპატრიარქოს კი – ოთხი? – ამირან დათეშიძე ამბობს, რომ რადგან საპატრიარქოს დაწესებულებებში მზრუნველობას მოკლებული ბავშვები ცხოვრობენ, „განსხვავებული პირობები მათთვის ამიტომ იქნა შემოღებული“.

„საპატრიარქოს ბავშვთა დაწესებულებებს სოციალური მომსახურების სააგენტო ვერ ამონიტორინგებს და ბავშვები სახელმწიფოს მეთვალყურეობის გარეშე იმყოფებოდნენ… მათთვის სხვა სტანდარტი მოქმედებს – სახელმწიფოსა და საპატრიარქოს შორის გაფორმდა მემორანდუმი, რის საფუძველზე შესაბამისი ლიცენზია მან 2013-2014 წლებში მიიღო“, – გვეუბნება ის.

რამდენად სამართლიანია სახელმწიფოს პოლიტიკა იმ სააღმზრდელო დაწესებულებების მიმართ, ვისაც მხოლოდ ერთი წელი მიეცა ლიცენზირების სტანდარტების დასაკმაყოფილებლად? არასამთავრობო ორგანიზაცია „პარტნიორობა ბავშვებისთვის“ ხელმძღვანელი, ანდრო დადიანი „ბათუმელებთან“ ამბობს, რომ „პარლამენტმა გაუაზრებელი ცვლილება მიიღო“, რადგან „ლიცენზიის ნორმები ცალსახად არ უნდა გავრცელებულიყო ყველა ტიპის დაწესებულებაზე და ჯერ ამ დაწესებულებების შინაარსი უნდა შეესწავლათ“.

„ძალიან იმედგაცრუებულები ვართ. ჩვენ ბავშვზე ზრუნვის დაწესებულებები, გასულ წელს, ჰოლანდიის მთავრობის ხელშეწყობით გამოვიკვლიეთ. კვლევის არსი სწორედ ის იყო, რომ შეგვესწავლა რა განსხვავებები იყო ამ დაწესებულებებს შორის და აქედან გამომდინარე შეგვეთავაზებინა მიდგომები. პარლამენტმა არც კი განიხილა კანონპროექტი – ისე მიიღო, რა ფორმითაც დარეგისტრირდა“.

ანდრო დადიანის აზრით, ამის მიზეზი კერძო პირების მიერ დაარსებული პანსიონები იყო, რომელსაც სახელმწიფო ვერ აკონტროლებდა.

„დაჯარიმების მიუხედავად, ვერ დახურეს ლეონიდ ჩერნოვეცკის ბავშვთა პანსიონი, მექანიზმი არ იყო. თუმცა ეს არ ნიშნავს, რომ სახელმწიფოს ისეთი კანონი უნდა მიეღო, რომელიც ჩიხში შეიყვანს სიტუაციას“, – გვეუბნება ის.

ეს ჩიხი კი, როგორც ანდრო დადიანი გვეუბნება, იმაში მდგომარეობს, რომ ერთი ჩანაწერის მიხედვით, „ლიცენზირება ეხება მხოლოდ სააღმზრდელო და არა საგანმანათლებლო დაწესებულებებს“. თუმცა, კანონში არსებობს სხვა ჩანაწერიც – „ლიცენზიას ექვემდებარება ყველა, ვინც ბავშვზე 24 საათის განმავლობაში ზრუნავს“. ეს იმას ნიშნავს, რომ კანონი მაინც უნდა შეეხოს იმ საგანმანათლებლო დაწესებულებებს, სადაც ბავშვები 24 საათის განმავლობაში რჩებიან, მათ შორის რელიგიური კონფესიების მიერ დაარსებულ სკოლა-პანსიონებს.
ანდრო დადიანის ორგანიზაციამ ერთი წლის განმავლობაში 35-ზე მეტი ბავშვთა ზრუნვის დაწესებულება შეისწავლა. ბავშვთა ზრუნვის სტანდარტს, აქედან ვერც ერთი ვერ აკმაყოფილებს.

„სახელმწიფომ პირდაპირ გადმოიღო ბავშვზე ზრუნვის სტანდარტი, რომელიც მცირე საოჯახო ტიპის სახლებისთვისაა განსაზღვრული [სახლები, სადაც 10-ზე მეტი ბავშვის შესახლება დაუშვებელია]. ეს არასწორია. ამ ტიპის ლიცენზირება, რომელიც საკანონმდებლო ცვლილებით დადგინდა, წესით არ უნდა შეხებოდა რელიგიურ-საგანმანათლებლო დაწესებულებებს, მაგრამ, რადგან ჩვენი კანონმდებლობა არ ცნობს რელიგიურ-საგანმანათლებლო დაწესებულებებს, მათ ბავშვზე ზრუნვის სტანდარტი მიუსადაგა“, – გვეუბნება ანდრო დადიანი.
მისი აზრით, სახელმწოფოს რელიგიური სასწავლებლებისთვის დაწესებულებაში ჩარიცხვის წესი უნდა განესაზღვრა, რის შედეგადაც უნდა აკრძალულიყო ამ სასწავლებლების რეზიდენტულ ნაწილში 15 წლამდე ბავშვის მოხვედრა.

„კვლევის დროს ვნახეთ, რომ მედრესეებში 15-20-25 ბავშვი ერთ ოთახში წევს, 40 ბავშვზე ერთი ზედამხედველი მოდის, რაც ბავშვზე ზრუნვის სტანდარტში არ ჯდება. არც ლიცენზირებული პედაგოგები ჰყავთ. თუმცა რას ითვალისწინებს პედაგოგების ლიცენზირება, ესეც ბუნდოვანია.

გარდა ამისა, თუკი ჩვენ რელიგიურ დაწესებულებებს ლიცენზიას ბავშვზე ზრუნვის სტანდარტით მოვთხოვთ, მაშინ იგივე პირობებს უნდა დაექვემდებაროს საპატრიარქოს მფლობელობაში არსებული საგანმანათლებლო დაწესებულებებიც“.

ანდრო დადიანის თქმით, საპატრიარქოს ასეთი სამი დაწესებულება აქვს: `დუშეთის მუნიციპალიტეტში სკოლა-პანსიონი „ყაზბეგი“, მარტვილში – „სალხინო“ და საჩხრეში – „საირხე“. ესენი არა სააღმზრდელო, არამედ საგანმანათლებლო დაწესებულებებია, მაგრამ გამომდინარე იქედან, რომ კანონში წერია – „ყველა დაწესებულება, სადაც ბავშვი 24 საათის განმავლობაში იმყოფება~, ნიშნავს იმას, რომ კანონი ამ ტიპის საგანმანათლებლო დაწესებულებებსაც უნდა შეეხოს“.

ანდრო დადიანის თქმით, საკანონმდებლო ცვლილების გამო, შესაძლებელია დაიხუროს შატილში არსებული სკოლა-პანსიონი, რომელიც 6 ბავშვს ემსახურება და ერთადერთი საგანმანათლებლო საშუალებაა ამ ბავშვებისთვის.

სახელმწიფო დეინსტიტუციონალიზმის წინააღმდეგ?

ახალი საკანონმდებლო ცვლილება არ შეეხება განათლების სამინისტროს მიერ დაარსებულ სკოლა-პანსიონებს, სადაც ბავშვები ასევე, 24 საათის განმავლობაში არიან. ორგანიზაციამ – „პარტნიორობა ბავშვებისთვის“ გამოიკვლია განათლების სამინისტროს მიერ დაარსებულ სკოლა-პანსიონებიც. კირიტიკას ვერც იქ არსებული სიტუაცია უძლებს.

„მიუხედავად იმისა, რომ სახელმწიფოს ოფიციალური პოლიტიკა ბავშვთა სახლების დეინსტიტუციონალიზაციაა, სახელმწიფო ამის საპირისპიროდ დებს ინვესტიციას დიდი ზომის ბავშვთა სახლებში“, – გვეუბნება ანდრო დადიანი, რომელსაც კონკრეტული მაგალითები მოჰყავს. – „დღეს აჭარაში – ჩაისუბანში, შუახევში, სალიბაურსა და მერისში, ოთხი დიდი ზომის ბავშვთა დაწესებულებაა, რომელსაც განათლების სამინისტრო აფინანსებს. აჭარის მთავრობამ 2015-16 წელს, 4 მილიონი ლარი დახარჯა თავიდან რომ აეშენებინათ ზოგიერთი ეს დაწესებულება. მაგალითად, შუახევში თავიდან ააშენეს 120 ბავშვზე შენობა. რატომ? როცა ვიკითხეთ, ვერ გვიპასუხეს. ჩაისუბანი 150 ბავშვზეა გათვლილი. ერთი ოთახი საცხოვრებლად 6-იდან 10 ბავშვზეა გათვლილი. ეს იმას ნიშნავს, რომ ხელისუფლება ბავშვთა სახლების დეინსტიტუციონალიზაციის საწინაარმდეგო ინვესტიციას ახორციელებს.

სალიბაურში 208 ბავშვია, რაც წარმოუდგენელია, რადგან ეს სკოლა-პანსიონები, ფაქტობრივად, ბავშვთა სახლებია და იმ პრინციპით მუშაობენ, როგორც საბჭოთა ბავშვთა სახლები.

ანდრო დადიანის თქმით, ყველა ბავშვი, რომელსაც სოციალური მუშაკი პრობლემას ვერ უწყვეტს, სალიბაურის პანსიონში მიჰყავთ. „ესენი სტატუსით არ არიან ბავშვთა სახლები, მაგრამ დე ფაქტო ბავშვთა სახლებია, რადგან იქ, ძირითადად, მზრუნველობამოკლებული ბავშვები ცხოვრობენ“.

„პარტნიორობა ბავშვებისთვის“ კვლევის მიხედვით, საქართველოში არსებულ ოთხ სკოლა-პანსიონში 475 ბავშვი ირიცხება. აქედან სამი პანსიონი აჭარაშია.

„ეს არ არის ჩვენი საქმე, ჩვენ რატომ უნდა განვიხილოთ?” – ასე გვიპასუხა ბათუმის N79 საოლქო საარჩევნო კომისიის თავმჯდომარემ, ციალა შავაძემ კითხვაზე, როდის მოახდენდა ოლქი რეაგირებას პირველ უბანზე გადაღებულ ვიდეო ჩანაწერზე?

ბათუმის პირველი საარჩევნო უბნის კომისიის თავმჯდომარემ, მაია ბლადაძემ დღეს, 2 ნოემბერს საკუთარ ფეისბუკ გვერდზე ვიდეო მასალა დადო, სადაც ჩანს, რომ კომისიის წევრები კენჭისყრის შენობაში “ქართული ოცნების” კანდიდატების გამარჯვებას ზეიმობენ და ცესკოს უნიფორმებს აფრიალებენ. 

ცესკოს ინფორმაციით ეს შემთხვევა ოლქმა უნდა განიხილოს. “ცესკო რასაც გვეტყვის, იმის მიხედვით გავაკეთებთ,” – გვითხრა ციალა შავაძემ, თუმცა აღარ უპასუხა მორიგ შეკითხვას, რატომ არ ჩათვალა ოლქმა საჭიროდ ფაქტზე რეაგირება ცესკოს დავალების გარეშე.

ციალა შავაძემ რამდენიმე წუთში თავად დაგვირეკა ტელეფონზე და გვითხრა, რომ პირველ უბანზე გადაღებული ვიდეო ჯერ მხოლოდ მან ნახა და “როცა კომისიის სხვა წევრებიც ნახავენ, შემდეგ განვიხილავთ ამ საკითხს”. მან ისევ უპასუხოდ დატოვა კითხვა, როდის განიხილავს ოლქი პირველი უბნის ამბავს.

„რა მოხდება იმ შემთხვევაში, თუკი ოლქი პირველი უბნის შემთხვევას არ განიხილავს?“ – ცესკოში გვითხრეს, რომ ოლქი რეკომენდაციას გაითვალისწინებს. „საოლქო საარჩევნო კომისია საკუთარი კომპეტენციის ფარგლებში განიხილავს აღნიშნულ საკითხს, რაც კომისიას ჯერ არ დაუწყია. საუბარია საარჩევნო მოხელის ეთიკის კოდექსის დარღვევასთან დაკავშირებით. თუკი ოლქი არ განიხლავს, ამაზე შეგვიძლია მოგვიანებით ვისაუბროთ. რა თქმა უნდა, ცესკოსაც აქვს შესაბამისი გადაწყვეტილების მიღების უფლება“ – გვითხრა ანა მიქელაძემ, ცესკოს პრესსპიკერმა.

ბათუმის 79-ე საოლქო საარჩევნო კომისიამ არც ერთი ის საჩივარი არ დააკმაყოფილა, რომლითაც უბნის შედეგების ბათილად ცნობას ითხოვდნენ. ხმების ხელახლა გადათვლას “სამართლიანი არჩევნები” და “ახალგაზრდა იურისტთა ასოციაცია” 70-ე მაჟორიტარული ოლქის 86-ე უბანზე მოითხოვდა, სადაც ამომრჩევლის ხელმოწერაზე მეტი რაოდენობის ბიულეტენი დაფიქსირდა.

“სამართლიანი არჩევნები” ხმების ხელახლა გადათვლას მოითხოვდა 68-ე ოლქის 98-ე უბანზეც, სადაც შემაჯამებელ ოქმში გადასწორებული იყო მიღებული ბიულეტენების რაოდენობა და არ შედგენილა შესწორების ოქმი.

მესამე სექტორის სარჩელებიდან ბათუმის საოლქო კომისიამ ყველაზე მკაცრი სანქცია – უფლებამოსილების შეწყვეტა მხოლოდ ბათუმის 69-ე ოლქის 58-ე უბანზე გამოიყენა, სადაც წილისყრის პროცედურებთან ერთად დაირღვა საკონტროლო ფურცლის შევსების წესი. საოლქო კომისიამ ამ უბნის თავმჯდომარეს და მდივანს ვადამდე ადრე შეუწყვიტა უფლებამოსილება. ეს იმას ნიშნავს, რომ ისინი 8 წლის განმავლობაში საარჩევნო ადმინისტრაციაში ვეღარ დასაქმდებიან.

“სამართლიანი არჩევნების” 11 საჩივრიდან 7 სრულად დააკმაყოფილმა ოლქმა. საჩივრები, ძირითადად, კენჭისყრის დღის პროცედურების დარღვევას, ორი კი შემაჯამებელ ოქმებში აუცილებელი რეკვიზიტების არარსებობას ეხებოდა. საოლქომ კომისიამ ამ შემთხვევებში დისციპლინური პასუხისმგებლობის ფორმა – გაფრთხილება გამოიყენა.

“ახალგაზრდა იურისტთა ასოციაციის” 5 საჩივრიდან სრულად 3 დააკმაყოფილა ბათუმის საოლქო კომისიამ. სამივე პროცედურულ დარღვევებს ეხებოდა და კომისია მხოლოდ გაფრთხილებით შემოიფარგლა. საოლქო კომისიამ ბათუმის 70-ე ოლქის 86-ე უბანზე დაწერილი საჩივარი ნაწილობრივ დააკმაყოფილა, სადაც ხმების ხელახლა გადათვლა არ დაკმაყოფილდა, მაგრამ კომისიის ერთ-ერთ რეგისტრატორს გაფრთხილება მისცეს.

ბათუმის საოლქო კომისიამ 20-მდე საჩივარი განიხილა.

საკონსტიტუციო სასამართლოს ახალი თავმჯდომარის, ზაზა თავაძის მოადგილეები იქნებიან: ლალი ფაფიაშვილი და თეიმურაზ ტუღუში. გადაწყვეტილება პლენუმმა ახლახანს მიიღო.

საკონსტიტიტუციო სასამართლოში შეკრებილმა პლენუმმა სასამართლოს პირველი კოლეგიის თავმჯდომარედ ლალი ფაფიაშვილი, მეორე კოლეგიაში კი, თეიმურაზ ტუღუში აირჩია. სასამართლოს მდივნის პოზიციას მერაბ ტურავა დაიკავებს.

პლენუმის დადგენილების მიხედვით, პირველი კოლეგიაში ლალი ფაფიაშვილის გარდა იქნებიან: მაია კოპალეიშვილი, გიორგი კვერენჩხილაძე და მერაბ ტურავა,  ხოლო მეორე კოლეგიაში თეიმურაზ ტუღუში, თამაზ ცაბუტაშვილი და ირინე იმერლიშვილი.

მეორე კოლეგიის მეოთხე წევრის ადგილი ჯერ-ჯერობით ვაკანტურია და მას საქართველოს პარლამენტის მიერ არჩეული წევრი დაიკავებს.

ქალს, რომლის 11 წლის შვილს მამამ სასტიკად სცემა, „ფეისბუკის“  პირადი გვერდი გაუტეხეს. ფაქტი გუშინ, გვიან ღამით მოხდა. მას შემდეგ, რაც ბავშვის  ცემის შესახებ სტატია „ბათუმელებში“ გამოქვეყნდა, მოგვიანებით კი ფაქტი ტელევიზიებმაც  გააშუქეს.  სავარაუდო კიბერდანაშაულზე გამოძიება ჯერ არ დაწყებულა.

„ღამის პირველი საათი იქნებოდა, როცა ჩემმა დამ დამირეკა და მითხრა, რომ ჩემი „ფეისბუკი“ გატეხილი იყო და საჯაროდ ჩანდა მიმოწერები, ჩემთვის უცნობ პირთან. თითქოს მე ვწერდი ვიღაც მამაკაცს, ჩვენი შეხვედრის შესახებ“. დედის აზრით,  მისი სახელის დისკრედიტაციას მიზანმიმართულად ცდილობენ.

„სასწრაფოდ ავიღე ტელეფონი, ინტერნეტში შევედი, მაგრამ „ფეისბუკი“ ვერ გავხსენი, რადგან პაროლი შეცვლილი იყო. რადგან ტელეფონში ცუდი ინტერნეტი მქონდა, გვიან ღამით მეზობელთან გადავედი, ბავშვებიც თან გამყვნენ და ისევ შევეცადე „ფეისბუკზე“ შესვლა. თავის დროზე მეილი და „ფეისბუკიც“ ჩემი ყოფილი ქმრის ბიძაშვილმა გამიკეთა, ამიტომ ეჭვი მაქვს, რომ „ფეისბუკის“ გვერდი მან გატეხა.

„ფეისბუკში“ შესვლა როგორც იქნა მოვახერხეთ, სხვა პაროლი დავაყენე, მიმოწერა წავშალე და გამოვედი. მოგვიანებით  გადავწყვიტე, რომ საერთოდ გამეუქმებინა გვერდი უსაფრთხოების მიზნით. თუმცა, პარილი ისევ შეცვლილი დამხვდა. როგორც ჩანს, ვინც ანგარიში გამიტეხა ისიც ქსელში იყო და ჩემს ანგარიშთან ჰქონდა წვდომა.

ისევ შევცვალე პაროლი და ჩემი ფოტოები და მეგობრები გვერდიდან წავშალე. მთლიანად გაუქმება ვერ მოვახერხე, რადგან არ ვიცი, როგორ წავშალო გვერდი“, – აცხადებს ქალი.

11 წლის ნაცემი ბავშვის დედა გვეუბნება, რომ ის გვიან ღამით, ქმრის ბიძაშვილსაც დაუკავშირდა, რომ გაეგო მან ხომ არ გატეხა ფეისბუქის პირადი ანგარიში.

„რა თქმა უნდა, უარყო და მითხრა, ამ ნომერზე მეორედ აღარ დარეკოო. ვფიქრობ, ჩემი ყოფილი ქმარი ამას ვერ გააკეთებდა, რადგან მეილი და პაროლი მან არ იცოდა. სხვაგვარად კი ის ამას ვერ მოახეხებდა“, – გვეუბნება ის.

ქალი ამბობს, რომ პოლიციაში განცხადების დაწერას დღეს, 2 ნოემბერს აპირებს.

შს სამინისტროში აცხადებენ, რომ ინფორმაცია სავარაუდო კიბერდანაშაულის შესახებ მათთან არ შესულა. „გამოძიება მხოლოდ მოქალაქის განცხადებით მიმართვის შემდეგ დაიწყება“.

კიბერდანაშაული სსსკ-ის 158-ე მუხლის მიხედვით ისჯება ჯარიმით, თავისუფლების შეზღუდვით, ან თავისუფლების აღკვეთით 2-იდან 5 წლამდე.

ახალი მოწვევის უმაღლესი საბჭოს პირველ სხდომას დავით თედორაძე გახსნის. ის დეპუტატების ახალი შემადგენლობის უხუცესი წევრია. წინა მოწვევის პირველი სხდომა ირაკლი ჯაშმა გახსნა. მან ლექსი მაშინდელ პრემიერს, ბიძინა ივანიშვილს მიუძღვნა. ჯაშისგან განსხვავებით, დავით თედორაძე პოეტია და აჭარის მწერალთა კავშირის ხელმძღვანელი, თუმცა ის ლექსის წაკითხვას პირველ სხდომაზე არ აპირებს

“ლექსს მე ვკითხულობ მწერალთა კავშირში, საზოგადოებასთან… უმაღლესი საბჭო ლექსის წაკითხვის ადგილი არ არის. რა ფორმით გავხსნი, გადაწყვეტილი არ არის. ამაზე ჯერ არავისთან მისაუბრია,” – უთხრა დავით თედორაძემ “ბათუმელებს”. ის  უმაღლეს საბჭოში პარტია “ქართული ოცნების” სიით შევიდა. მანამდე დავით თედორაძე ბათუმის საკრებულოში “პატრიოტთა ალიანსს” წარმოადგენდა. წინასაარჩევნოდ მიცემულ ინტერვიუში მან “ბათუმელებს” უთხრა, რომ „ალიანსის“ ღირებულებების ერთგული რჩება. 

უმაღლესი საბჭოს პირველი სხდომის თარიღს საქართველოს პრეზიდენტი ნიშნავს მას შემდეგ, რაც აჭარის უმაღლესი საარჩევნო კომისია არჩევნების საბოლოო შედეგს გამოაცხადებს. უსკოს შეჯამებისთვის კენჭისყრის დღიდან 19 დღეს აქვს, თუმცა პარმენ ჯალაღონია, უსკოს თავმჯდომარე, “ბათუმელებთან” ამბობს, რომ საბოლოო შედეგს კომისია 18 ნოემბრამდე ბევრად ადრე გამოაცხადებს: “ეს დამოკიდებულია ოლქების შემაჯამებელ ოქმებზე და საჩივრების განხილვაზე”. უმაღლესი საბჭოს პირველ სხდომაზე სწორედ პარმენ ჯალაღონია გააცნობს საზოგადოებას არჩევნების შედეგს. ჯალაღონიას შემდეგ დაიკავებს ტრიბუნას დავით თედორაძე, რის შემდეგაც სხდომა გახსნილად ჩაითვლება.

უმაღლესი საბჭოს 21 წევრიდან 14 “ქართულ ოცნებას” წარმოადგენს, ხუთი – “ერთიან ნაციონალურ მოძრაობას”. თითო-თითო წევრით იქნებიან საკანონმდებლო ორგანოში წარმოდგენილი “პატრიოტთა ალიანსი” და “ნინო ბურჯანაძე – დემოკრატიული მოძრაობა”. აჭარის 2017 წლის ბიუჯეტის პროექტის მიხედვით, უმაღლესი საბჭო მომავალ წელს 4 მილიონ 846 ათას ლარს დახარჯავს.