მთავარი,სიახლეები

მამამ 11 წლის შვილს სასტიკად სცემა

01.11.2016 • 3076
მამამ 11 წლის შვილს სასტიკად სცემა

ბათუმში 11 წლის ბიჭს მამამ სასტიკად სცემა. მან არც ათი წლის გოგონა დაინდო, როცა დამ ძმაზე ძალადობის გამო ყვირილი ატეხა. „თმები მოქაჩა და წიგნი ჩაარტყა თავში“. მოძალადე მამა პოლიციამ მომხდარიდან 11 დღის შემდეგ დააკავა. ბრალდებული წლების განმავლობაში ძალადობდა ბავშვების დედაზეც, თუმცა პოლიცია რეაგირებას არ ახდენდა.

შემთხვევა ბათუმში, 18 ოქტომბერს, საღამოს მოხდა. ბავშვის დედის თქმით, მან 11 და 10 წლის შვილები მამასთან ერთი საათით დატოვა. მშობლები უკვე დაშორებულები არიან და ბავშვებს მამა მხოლოდ შაბათ-კვირას ნახულობდა.

„საღამოს ცხრა საათზე დავტოვე და თერთმეტ საათზე ბიჭმა დამირეკა, „დედიკო სასწრაფოდ მომაკითხეო“. რომ მივედი, ჭიშკართან ფეხშიშველი გამოვიდა, ფეხსაცმელი ხელში ეჭირა. იქ არაფერი უთქვამს. როცა სახლში მივედით და ტანზე გაიხადა, მაშინ შევნიშნე, რომ სასტიკი ნაცემი იყო. ორივე ბეჭი დალურჯებული ჰქონდა, გაწითლებული ჰქონდა შუბლიც. რა მოხდა-მეთქი, ვკითხე. მამაჩემმა იმის გამო მცემა, სკოლა რატომ გააცდინე და აქ რატომ მოხვედიო“.

ცემის კვალი 11 წლის მოზარდის სხეულზე, რამდენიმე დღის შემდეგაც შეიმჩნევა

ცემის კვალი 11 წლის მოზარდის სხეულზე, რამდენიმე დღის შემდეგაც შეიმჩნევა

დედის თქმით, ლუკა წინა დღით რაჭაში იყო ექსკურსიაზე, სადაც გაცივდა. „დიდი სიცხე ჰქონდა და მე არ გავუშვი. ბავშვს თავი ტკიოდა საშინლად, როცა მამამისს დაურტყამს, წაქცეულა და თავი კედელზე მიუხეთქებია. ასე სასტიკად ნაცემი რომ ვნახე, სასწრაფო გამოვიძახე, სასწრაფომ კი საპატრულო გამოიძახა. ექიმმა დაწერა, რომ ბავშვი ნაცემია. პოლიციელიც გაგიჟდა, ასეთი ნაცემი რომ ნახა ბავშვი“, – გვიყვება დედა.

ნაცემი ბიჭი და დედა პოლიციის პირველ განყოფილებაში გადაიყვანეს, სადაც ორივე დაკითხეს. „მეც და ბავშვმაც ყველაფერი დავწერეთ. პოლიციელმა მითხრა, „მასეთ რამეებს რატომ წერთ, ბავშვის გამო უნდა დააჭერინოთო?“ – ვუთხარი, რომ ჩემი შვილები ჩემთვის ყველაზე მნიშვნელოვანია და მათზე ძალადობას არ ვაპატიებდი“.
დედის თქმით, პოლიციას შემაკავებელი ორდერი არ გამოუწერია. მოძალადე დაკითხვიდან მხოლოდ მე-11 დღეში, ანუ მას შემდეგ დააკავეს, როცა საქმეში „ძალადობისგან დაცვის ეროვნული ქსელი“ ჩაერთო.

„როცა მივხვდი, რომ რეაგირება არ უნდოდათ, დავუკავშირდი ამ ორგანიზაციის წარმომადგენელს და ვთხოვე დახმარება. ნაცემი ბავშვი რომ ვნახე, მამამისს დავურეკე და ვუთხარი, რატომ სცემე-მეთქი, – მითხრა, ეგ მასაჟია მაგისთვის, უარესი ელოდებაო“. მის მშობლებს რომ არ შეეშალათ ხელი, მოკლავდა ბავშვს ცემისგან“, – გვეუბნება დედა.

დედის თქმით, სასწრაფოს პატრული რომ არ გამოეძახებინა, თვითონ არ აპირებდა შეტყობინების გაგზავნას: ქმარი მასზე წლების განმავლობაში ძალადობდა, თუმცა პოლიცია სათანადოდ არ რეაგირებდა.

„15 წლის ასაკში დავქორწინდით. ბავშვები ვიყავით. ქორწინებიდან მესამე დღეს დამარტყა. მისმა სიძემ დაინახა და გააფრთხილა, რომ მსგავსი რამ აღარ განმეორებულიყო. მაინც მცემდა. სვამდა, მაგრამ როცა ნასვამი არ იყო, მაშინაც მეჩხუბებოდა.

ერთხელ, ჩემი ბიძაშვილის ქორწილიდან რომ დავბრუნდით მე და დედამთილი, ოთახში ჩამკეტა და ისე მცემა, კინაღამ მომკლა. ჩემმა მულმა პატრული გამოიძახა, მაგრამ აივნიდან გადახტა. პოლიციას არც მოუძებნია და არც შემაკავებელი ორდერი გამოუწერია. ბოლოს დანა მომიქნია“, – გვეუბნება ქალი და სხეულზე ჭრილობისგან დარჩენილ შრამს გვაჩვენებს.

„დანაც აქვს დარტყმული ჩემთვის, ჩანგალიც, ჭიქაც აქვს ნასროლი და ბევრჯერაც შეურაცხმყო, მაგრამ ვპატიობდი. ბავშვს ადრეც სცემდა, მაგრამ ასე სასტიკად არა“.

დედის თქმით, მამამ ბავშვზე ორი წლის წინაც იძალადა: „ახალი წლის ღამე იყო, ბავშვმა ტელეფონი დაუბლოკა შემთხვევით და ისე სცემა, შიშისგან ჩაისველა ბიჭმა. სკოლაში მითხრეს, ბავშვი შეცვლილიაო. გულჩათხრობილი გახდა. მასწავლებელმა მითხრა, „შტეფცელში“ მაკრატელი ჩატენა, ბეწვზე მივუსწარითო. ბავშვები წლებია საკუთარი თვალით უყურებდნენ როგორ მცემდა მათი მამა“.

ქალი ქმარს სამი წელია რაც დაშორდა, თუმცა ოფიციალურად ჯერ არ განქორწინებულან. იგი ამბობს, რომ უნდა მისი შვილები მამის ძალადობისგან სახელმწიფომ დაიცვას და მოძალადემ კანონის წინაშე აგოს პასუხი.

დედის თქმით, ბავშვებს ფსიქოლოგის დახმარება ესაჭიროებათ, თუმცა ჯერ არავინ გამოხმაურებია.

იმ შემთხვევაში თუ მამაკაცს ჩადენილი დანაშაული დაუდასტურდება, კანონის მიხედვით, პირობითი მსჯავსი, საზოგადოებისთვის სასარგებლო შრომა ან თავისუფლების აღკვეთა ელოდება.

11 წლის შვილზე მოძალადე მამას, სასამართლომ აღმკვეთი ღონისძიების სახით  5000 ლარიანი გირაო შეუფარდა, წინასწარი პატიმრობის ნაცვლად.

შს სამინისტროს ოფიციალური მონაცემებით, საქართველოში იანვრიდან აგვისტოს  პერიოდში ოჯახში ძალადობის 1894 შემთხვევაა გამოვლენილი.

გადაბეჭდვის წესი


ასევე: