Batumelebi | რომელი უწყება რამდენს დახარჯავს აჭარის ბიუჯეტიდან 2017 წელს რომელი უწყება რამდენს დახარჯავს აჭარის ბიუჯეტიდან 2017 წელს – Batumelebi
RU | GE  
ფული

რომელი უწყება რამდენს დახარჯავს აჭარის ბიუჯეტიდან 2017 წელს

აჭარის ავტონომიური რესპუბლიკის რესბუბლიკური ბიუჯეტის 2017 წლის პროექტის მიხედვით, აჭარის ბიუჯეტი 238 მილიონი ლარით განისაზღვრა, რაც 6,1 მილიონი ლარით მეტია მიმდინარე წლის შესაბამის მაჩვენებელზე. თუმცა, აქ გასათვალისწინებელია, რომ წელს ბიუჯეტში ასახული იყო უმაღლეს საარჩევნო კომისიისთვის [უსკო] არჩევნების ჩასატარებლად გამოყოფილი 3,2 მილიონი ლარიც. ანუ, მომავალი წლის ბიუჯეტი ჯამში, ფაქტობრივად, 2,9 მილიონი ლარით მეტი იქნება.

მომავალი წლის ბიუჯეტის პროექტის მიხედვით, მიმდინარე წელს იმ საჯარო მოხელეთა ხელფასებისთვის, რომლებიც აჭარის რესპუბლიკური ბიუჯეტიდან ფინანსდებიან, 39,1 მილიონი ლარი დაიხარჯება, მომავალ, 2017 წელს კი – 36,6 მილიონი ლარი.

თუ აქაც მიმდინარე წლის არჩევნების დაფინანსებას გავითვალისწინებთ, 2017 წელს ხელფასებისთვის განკუთვნილი თანხა მთლიანობაში 251 ათას 600 ლარითაა გაზრდილი [მიმდინარე წელს არჩევნების ჩატარების უზრუნველსაყოფად ხელფასებისთვის აჭარის ბიუჯეტში 2,3 მილიონზე მეტი ლარი იყო გათვალისწინებული].

წარმოდგენილი პროექტის მიხედვით, აჭარის 2017 წლის ბიუჯეტიდან მხარჯავი დაწესებულებები თანხას შემდეგი ოდენობით დახარჯავენ:

  • აჭარის უმაღლესი საბჭო – 4 846 800 ლარი;
  • აჭარის საარჩევნო ადმინისტრაცია [უსკო] – 627 200 ლარი;
  • აჭარის მთავრობის აპარატი – 3 477 800 ლარი;
  • აჭარის გარემოს დაცვისა და ბუნებრივი რესურსების სამმართველო – 4 257 800 ლარი;
  • აჭარის ტურიზმისა და კურორტების დეპარტამენტი – 7 496 500 ლარი;
  • აჭარის საარქივო სამმართველო – 2 053 800 ლარი;
  • აჭარის საავტომობილო გზებისა და სამელიორაციო სისტემების მართვის დეპარტამენტი – 45 060 800 ლარი;
  • აჭარის სავაჭრო-სამრეწველო პალატა – 308 900 ლარი;
  • აჭარის ფინანსთა და ეკონომიკის სამინისტრო – 5 252 000 ლარი;
  • აჭარის განათლების, კულტურისა და სპორტის სამინისტრო – 44 704 400 ლარი;
  • აჭარის ჯანმრთელობისა და სოციალური დაცვის სამინისტრო – 14 659 900 ლარი;
  • აჭარის სოფლის მეურნეობის სამინისტრო – 11 365 500 ლარი;
  • საერთო დანიშნულების რესპუბლიკური გადასახდელები – 93 888 700 ლარი.

აჭარის ბიუჯეტიდან აღარ დაფინანსდება ბათუმის ბულვარი, რომლის მართვასა და ინფრასტრუქტურის მოვლა-შენახვა-განვითარებისთვის წელს ბიუჯეტში 11 მილიონ ლარზე მეტია გათვალისწინებული.

ბიუჯეტის პროექტზე მუშაობის პერიოდში, მხარჯავ დაწესებულებებს ძირითადი მოთხოვნები აჭარის ფინანსთა და ეკონომიკის სამინისტროში 15 სექტემბრამდე უნდა წარედგინათ.

აჭარის რესპუბლიკური ბიუჯეტის 2017 წლის პროექტი უმაღლესმა საბჭომ დღეს, პირველ ნოემბერს გაასაჯაროვა. აჭარის მთავრობა კანონით იყო ვალდებული უმაღლესი საბჭოსთვის მომავალი წლის რესპუბლიკური ბიუჯეტის პროექტი სწორედ პირველ ნოემბრამდე წარედგინა.

2017 წლის რესპუბლიკური ბიუჯეტის დამტკიცება ახალარჩეულ უმაღლეს საბჭოს მოუწევს.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com