ბათუმის მერიამ ცელმხრივად შეწყვიტა ხელშეკრულება შპს „კონვენტ ჯორჯიასთან“, რომელსაც ბათუმში ე.წ „იაფი სახლი“ უნდა აეშენებინა. მშენებლობა შეჩერებულია. კომპანიამ კი, რომელმაც ბათუმის მერიის ოთხმილიონიანი ტენდერი მოიგო, არც მუშების ხელფასი გადაიხადა და არც ნისიად წამოღებული სამშენებლო მასალების თანხა. ბათუმის მერიას ამ კომპანიისთვის 1 894 785 ლარი ავანსად აქვს გადახდილი. „ბათუმელებმა“ ამ თემაზე ვრცელი სტატია ორი კვირის წინ გამოაქვეყნა.
ხელშეკრულების გაფორმებისას, მასში პროექტის დამზღვევი პუნქტების გათვალისწინება მერიის მოვალეობაა, ბიუჯეტის ხარჯვის კონტროლი კი, საკრებულოს ერთ-ერთი ყველაზე მთავარი ფუნქცი. ამჯერად „ბათუმელები“ დაინტერესდა თუ რა ინფორმაციას ფლობენ ბათუმის საკრებულოში იმასთან დაკავშირებით, შეძლებს თუ არა მერია ბიუჯეტიდან ავანსად ჩარიცხული ფულის უკან დაბრუნებას. მითუმეტეს, რომ მსგავსი პრობლემების გამო მერიას ცუდი გამოცდილება დაუგროვდა.
როგორც აღმოჩნდა, საკრებულოს თავმჯდომარის მოვალეობის შემსრულებლი, ლაშა სირაბიძე „კონვენტ ჯორჯიასთან“ ხელშეკრულების შეწყვეტაზე ინფორმაციას არ ფლობს. თუმცა იცის, რომ კომპანიასთან მერიას პრობლემები შეექმნა:
ლაშა სირაბიძე: „ვინ გითხრათ, რომ გაუჩინარდა? – კომპანიასთან დაკავშირებით ნამდვილად ვერაფერს გეტყვით. მე გეტყვით მერიის დამოკიდებულებას. მერიას აქვს ხელშეკრულებები გაფორმებული ყველანაირი კანონის დაცვით. თუ ფირმის რაღაც ნაწილში არის პრობლემები, მერია მიიღებს ზომებს, რაც შესაძლებელია კანონის ფარგლებში. ან უჩივლებს ან შუწყვეტს ხელშეკრულებას… თუ შეწყვეტილია, სხვა ადეკვატურ ნაბიჯებს განახორციელებს. გასაგებია, რომ ავანსი გადახდილი აქვს. მე ავანსთან დაკავშირებითაც მოვიკითხე, არის უკვე გარკვეული სამუშაოები ჩატარებული, რომელიც დაითვლება და იმის მიხედვით გაირკვევა ყველაფერი. რა თქმა უნდა დავიბრუნებთ ამ თანხას. თქვენ მგონი ინფრომაციას არ ფლობთ, ინფრომაცია არის ასეთი. საგარანტიო წერილია ერთ-ერთი სოლიდური ბანკიდან, ინგლისური ბანკიდან“.
