Batumelebi

ამ წუთებში ბათუმში, ბარათაშვილის 24 ნომერში, ისტორიული შენობის დემონტაჟის გამო საზოგადოება „ბათომის“ წევრები და სხვა პირები საპროტესტო აქციას მართავენ. ისინი ქალაქის მერისგან, გიორგი ერმაკოვისგან ოფიციალური განცხადების გაკეთებას მოითხოვენ ისტორიული სახლის დემონტაჟთან დაკავშირებით.

„საზოგადოებამ უნდა იცოდეს, როგორია ქალაქის არჩეული მერის პოლიტიკა,  კულტურული მემკვიდრეობისa და ისტორიული ძეგლების დაცვის კუთხით. ტერიტორიის ურბანული განვითარების კუთხით, ძველი ბათუმის ისტორიული არქიტექტურისა და ურბანული ქსოვილის შენარჩუნების კუთხით. არსებული სამშენებლო ნებართვებიდან გამომდინარე, გვაქვს ეჭვი, რომ ბათუმის მერიას არ აქვს პოლიტიკური ნება შეინარჩუნოს ქალაქის ისტორიული ნაწილი და ძველი ბათუმის ისტორიული შენობები მაღალსართულიანი კორპუსებით არ ჩაანაცვლოს,“- აცხადებენ საპროტესტო აქციის მონაწილეები.

საზოგადოება „ბათომის“ ერთ-ერთი დამფუძნებელი შოთა გუჯაბიძე ამ აქციის  შემდეგ, ფართომასშტაბიან საპროტესტო აქციას აანონსებს მოთხოვნით, გამოცხადდეს მორატორიუმი ძველ ბათუმში ნგრევასა და მშენებლობასთან დაკავშირებით, „რომელსაც  ამ ხელისუფლების მოსვლის დღიდან ვითხოვთ“.

„ჩვენ მალე დავგეგმავთ უფრო ფართომასშტაბიან აქციას და მოვითხოვთ, ქალაქის მერმა ამ პრობლემასთან დაკავშირებით გააკეთოს ამომწურავი განცხადება ისე, რომ ეჭვები გაფანტოს. ქალაქის მერმა, რომელსაც ამ ქალაქის მოსახლეობის მიმართ აქვს  ვალდებულებები, განმარტოს არის თუ არა ამ შეთქმულების და პირდაპირ ვიტყვი, დანაშაულის თანამონაწილე. თუნდაც ბარათაშვილის 24-ში დანგრეულ სახლთან დაკავშირებით  საზოგადოება „ბათომს“ დიდი ხანია  სასამართლოში სარჩელი გვაქვს შეტანილი და აშკარაა, რომ ძალიან ბევრი დანაშაულია ჩადენილი. შესაბამისად, ხელისუფლებაც ამ დანაშაულის თანამონაწილეა,“-ამბობს შოთა გუჯაბიძე.

ბარათაშვილის 24-ში ისტორიული სახლის დანგრევის ნებართვა არ ჰქონდა მშენებელ კომპანიას , რის გამოც ის სამი ათასი ლარით დაჯარიმდა.

დანგრეული ისტორიული სახლის ადგილზე 7- სართულიანი სახლის აგება იგეგმება. 

დღეს, 13 თებერვალს, ბათუმის საქალაქო სასამართლომ აჭარის უმაღლესი საბჭოს წევრის ელგუჯა ბაგრატიონისა და ქობულეთის საკრებულოს წევრის ბონდო თედორაძის ადმინისტრაციული წესით დაჯარიმების საკითხზე იმსჯელა.

სასამართლომ ელგუჯა ბაგრატიონს პასუხისმგებლობა არ დააკისრა, ბონდო თედორაძე კი გააფრთხილაა.

ელგუჯა ბაგრატიონი და ბონდო თედორაძე პოლიციამ 6 თებერვალს ბათუმი-ქობულეთის საავტომობილო გზის გადაკეტვის დროს დააკავა და მათ ადმინისტრაციული წესით პოლიციელის კანონიერი მოთხოვნის დაუმორჩილებლობას ედავებოდნენ. აღნიშნული პირები აქციას მართავდნენ გზაზე, სადაც ციხისძირიდან ხეების გადატანის გამო მოძრაობა შეფერხებული იყო.

სამოქალაქო ინტეგრაციისა და ეროვნებათაშორისი ურთიერთობის ცენტრის ხელმძღვანელმა, განათლების სპეციალისტმა, შალვა ტაბატაძემ, რომელიც ავტორიზაციის საბჭოს წევრიცაა, საბჭო დატოვა, ამის შესახებ ის სოციალურ ქსელში, საკუთარი ფეისბუკის გვერდზე წერს.  შალვა ტაბატაძე საბჭოს დატოვების მიზეზად შაჰინის სკოლისთვის ავტორიზაციის შეჩერებას ასახელებს.

„შაჰინის სკოლა-ლიცეუმში დღეს სწავლის პროცესი შეჩერდა. შაჰინის სკოლის ავტორიზაციის გაუქმებასთან დაკავშირებით დუმილს ვინარჩუნებდი, მიუხედავად ჟურნალისტების თუ სხვათა თხოვნისა კომენტარი გამეკეთებინა. ჩემი დუმილი გამოწვეული იყო იმ ფაქტით, რომ საბჭოს წევრი გახლდით და მიმაჩნდა, რომ სწორედ საბჭო იყო ის ადგილი, სადაც გადაწყვეტილების მიღება ხდებოდა და იქ იყო მნიშვნელოვანი პოზიციების დაფიქსირება. საბჭოში მიმდინარე განხილვაზე საჯარო საუბარი ჩემი მხრიდან არაკორექტულად მიმაჩნია და ამიტომ დღესაც არაფერს ვამბობ იქ არსებულ ვითარებაზე. რამდენიმე საკითხი მინდა მხოლოდ მოკლედ ვთქვა და აქ დავამთავრებ. მე, როგორც ავტორიზაციის საბჭოს წევრს, შაჰინის სკოლის საკითხთან დაკავშირებით პირადად 3 მიზანი მქონდა:

(1) მაქსიმუმი გამეკეთებინა სკოლისთვის ავტორიზაციის შესანარჩუნებლად; (2) შემენარჩუნებინა ავტორიზაციის საბჭოს, როგორც ინსტიტუტის ავტორიტეტი; (3) თუ პოლიტიკური საფუძველი გააჩნდა შაჰინის სკოლის საკითხს და საგარეო პოლიტიკის თვალსაზრისით შეიქმნებოდა რაიმე ტიპის უთანხმოება, ოპტიმალური ვარიანტი იყო საქმის სასამართლოში ხანგრძლივად გადატანა. სამივე ეს ურთიერთდამოკიდებული მიზანი მარტივად მისაღწევი იყო, მიუხედავად ამისა, საბჭომ იმ დღესვე მიიღო ის გადაწყვეტილება რაც მიიღო.

რა თქმა უნდა, მეორე დღესვე მე საბჭო ოფიციალურად დავტოვე და შევიწყვიტე საბჭოს წევრის უფლებამოსილება. ერთსაც ვიტყვი, შაჰინის სკოლას ვერ ედავებოდნენ და ვერც შეედავებოდნენ საგანმანათლებლო სტანდარტებთან შეუსაბამობას. ედავებოდნენ ჩარიცხვის წესის დარღვევას, რაც სამართლებრივად ძალიან საკამათო იყო და საბჭოს არც გააჩნდა კომპეტენცია სამართლებრივად სწორად შეეფასებინა იყო თუ არა დარღვევა და მეორე მხრივ, თუ დარღვევა იყო, სკოლაზე დიდი წილი ამ დარღვევაში იმავე საბჭოს მიუძღოდა, რომელმაც ავტორიზაცია შეუჩერა სკოლას, აღარაფერს ვამბობ, რამდენად არის ის დარღვევები არსებითი ავტორიზაციის შესაჩერებლად. დანარჩენი თქვენ განსაჯეთ,“- წერს სოციალურ ქსელში შალვა ტაბატაძე.

შალვა ტაბატაძე „ბათუმელებთან“ საუბარში ამბობს, რომ ავტორიზაციის საბჭო, რომელიც დღევანდელი ფორმით არსებობს, მიუკერძოებელი ვერ იქნება. „ადამიანები, რომლებიც რაიმე ფორმით არიან დაკავშირებულნი განათლების სამინისტროსთან ან არიან კერძო სკოლების დირექტორები, ვერ იქნებიან ბოლომდე დამოუკიდებლები თავიანთ გადაწყვეტილებებში. მე რომ ვიყო, მაგალითად, რომელიმე სკოლის დირექტორი, ჩემი პოზიცია მყარი ვერ იქნება. ამიტომ, საბჭო უნდა იყოს დაკომპლექტებული დამოუკიდებელი ადამიანებით, ვინც  მიუკერძოებლად შეძლებს გადაწყვეტილებების გამოტანას,“-გვეუბნება ის.

ავტორიზაციის საბჭოში ცხრა წევრია, მათგან მხოლოდ ორი – შალვა ტაბატაძე და გიორგი გახელაძე – იყო ავტორიზაციის შეჩერების წინააღმდეგი. ავტორიზაციის საბჭომ შაჰინის სკოლას ავტორიზაცია 3 თებერვალს შეუჩერა.

ამავე თემაზე:

ბათუმში შაჰინის სკოლა-ლიცეუმმა სასწავლო პროცერსი შეაჩერა;

ავტორიზაციის საბჭოს წევრი შაჰინის კოლისთვის ავტორიზაციის გაუქმებაზე;

შაჰინის სკოლის დირექტორი: „ეჭვი გვაქვს, სკოლის დახურვა პოლიტიკური საკითხია“.

აჭარის განათლების სამინისტრო სტუდენტების დასაფინანსებლად კონკურსს აცხადებს. დაფინანსება გამოცხადდა იმ სტუდენტებისთვის, რომლებიც 2016 წელს უმაღლეს საგანმანათლებლო დაწესებულებებში აკრედიტებულ საბაკალავრო და სამაგისტრო პროგრამებზე ჩაირიცხნენ.

სამინისტროში განცხადებების მიღების ვადა 2017 წლის 13 თებერვლიდან 2 მარტის ჩათვლითაა.

კონკურსში მონაწილეობის მიღება შეუძლიათ სტუდენტებს, რომლებიც

• ბოლო ექვსი წლის განმავლობაში სწავლობდნენ და ატესტატი მიიღეს აჭარის ავტონომიურ რესპუბლიკაში;
• ბოლო  სემესტრის საშუალო აკადემიური მოსწრება ტოლია, ან მეტი 71% -სა;

დაფინანსება გაიცემა შემდეგი კატეგორიის სტუდენტებზე:

• სტუდენტები მაღალმთიანი აჭარიდან: ქედა, შუახევი, ხულო;
• დედით ან მამით ობოლი, უდედმამო;
• მრავალშვილიანი ოჯახის წევრი: ოთხი და მეტი შვილი;
• სოციალურად დაუცველი: 100 000 ქულა და ნაკლები.

კონკურსში მონაწილეობის მსურველებმა განცხადებები და პროგრამით გათვალისწინებული დოკუმენტები აჭარის განათლების სამინისტროში უნდა წარმოადგინონ.

სრუდენტების დაფინანსება „სტუდენტთა დახმარების“ ქვეპროგრამის ფარგლებში ხორციელდება.

აჭარის უმაღლესი საბჭოს ყოფილი წევრი, ანზორ თხილაიშვილი, არქივის სამმართველოს უფროსის მოადგილედ დანიშნეს. იგი სავარაუდოდ ფინანსურ მიმართულებას ჩაიბარებს.

„ეს იყო ჩემი და აჭარის მთავრობის თავმჯდომარის ერთობლივი გადაწყვეტილება. მნიშვნელოვანია, როცა დასაყრდენი პიროვნება არის შენ გვერდით. ბატონი ანზორი ძალიან კომპეტენტურია“, – გვიპასუხა არქივის სამმართველოს უფროსმა, მაკა ივანიშვილმა.

რატომ მიიჩნია მთავრობამ ფინანსურ ნაწილში კომპეტენტურად უმაღლესი საბჭოს ყოფილი დეპუტატი? – კითხვაზე მაკა ივანიშვილმა გვითხრა, რომ კიდევ ორი მოადგილეა შესარჩევი და ამის შემდეგ გადაწყდება, ვინ რა მიმართულებით იმუშავებს: „არ გამოვრიცხავ, შესაძლოა, სამეცნიერო მიმართულებით იმუშაოს. ამ ეტაპზე ვერ გეტყვით, ვინ იქნებიან სხვა მოადგილეები “.

აჭარის არქივის სამმართველოს უფროსის მოადგილედ რამდენიმე თვის წინ აღადგინეს ნარგიზ ბასილაძე. მან აჭარის მთავრობას საქმე სამივე ინსტანციის სასამართლოში მოუგო და სამსახურში აღადგინეს. ნარგიზ ბასილაძე 2013 წელს გაათავისუფლა არქივის მაშინდელმა უფროსმა, გურამ სალაძემ. აჭარის ახალი მთავრობის დამტკიცების შემდეგ  კი ყველა მოადგილე ავტომატურად გათავისუფლდა თანამდებობიდან.

ბათუმის მერიის არქიტექტურის სამსახურის უფროსი ირაკლი ახალაძე ამბობს, რომ ბათუმის მერიას არ გაუცია ბარათაშვილის #24-ში მდებარე შენობის დემონტაჟის ნებართვა.

ქალაქის არქიტექტურის სამსახურის უფროსი აქვე დასძენს, რომ სახლის პროექტი, რომელიც უნდა აიგოს ბარათაშვილის #24-ში, შეთანხმებულია, თუმცა კომპანიას მერიაში ჯერ არ შეუტანია განაცხადი მშენებლობის ნებართვაზე.

„პროექტი შეთანხმდა შარშან. მშენებლობის ნებართვა გაიცემა სამ სტადიად. პირველი და მეორე სტადია გავლილი აქვს, მათ შორის კულტურული მემკვიდრეობის სააგენტოში, მაგრამ მშენებლობის ნებართვაზე ჯერ არ მოუმართავთ. მოგვმართეს მხოლოდ დემონტაჟის ნებართვაზე, რაზეც ჯერჯერობით არ გვაქვს გაცემული.“

ბარათაშვილის #24-ში კომპანია „დარ ბილდინგი“ გეგმავს 7-სართულიანი სახლის მშენებლობას.

ბათუმის მერიის ზედამხედველობის სამსახურის უფროსის, ზაალ მამუჭაძის თქმით, ამ წუთებში ბარათაშვილის #4-ში მუშაობს ზედამხედველობის სამსახურის ჯგუფი, დემონტაჟი შეჩერებულია და სავარაუდოდ, კომპანია დაჯარიმდება.

ამავე თემაზე: 

12 თებერვალს ბათუმში დაანგრიეს ბარათაშვილის ქუჩის #24-ში მდებარე შენობა, რომელიც XIX-XX საუკუნეების მიჯნაზე იყო აგებული.

ამ სახლისთვის ძეგლის სტატუსის მინიჭების საკითხი საქართველოს კულტურული მემკვიდრეობის ძეგლთა დაცვის სააგენტოსთან არსებულმა საბჭომ ორჯერ განიხილა: 2014 წლის 3 ივნისს საბჭომ გადაწყვიტა, რომ სახლს კულტურული მემკვიდრეობის ძეგლის სტატუსი უნდა მინიჭებოდა, იმავე წლის ბოლოს კი საბჭო ხელახლა შეიკრიბა და გადაწყდა, სახლს ძეგლის სტატუსი არ მინიჭებოდა. საბჭოს ორი, სხვადასხვა გადაწყვეტილება ორ დასკვნას ემყარებოდა. პირველი დასკვნა, სადაც აღნიშნული იყო, რომ სახლი ძეგლის სტატუსს იმსახურებდა მისი ნიშან-თვისებების გამო, აჭარის კულტურული მემკვიდრეობის სააგენტოს დაკვეთით მომზადდა. მეორე დასკვნა, სადაც ეწერა, რომ შენობას ძეგლის გამოხატული ნიშან-თვისებები არ აქვს, შენობის მესაკუთრის მიერ მოწვეული ხელოვნებათმცოდნის მიერ იყო მომზადებული, თუმცა სააგენტოსთან არსებულმა საბჭომ სწორედ ამ უკანასკნელის რეკომენდაცია გაითვალისწინა. 

ამ ადგილას 7-სართულიანი, მრავალფუნქციური სახლის აგება იგეგმება. საჯარო რეესტრის ინფორმაციის თანახმად, ეს ტერიტორია “დარ ბილდინგს“ ეკუთვნის.

ასე გამოიყურებოდა შენობა დანგრევამდე:

ბარათაშვილის #24 დღეს:

ამავე თემაზე: 

ისტორიული სახლების ნგრევის სერია ბათუმში

10 თებერვალს კლინიკა “მედინაში”  59 წლის ქალმა პირველი შვილი გააჩინა. ბავშვი საკეისრო კვეთით დაიბადა. მეან-გინეკოლოგის, კლინიკის ხელმძღვანელის, ჯუმბერ უნგიაძის თქმით, დედა და ახალშობილი კარგად გრძნობენ თავს.

ახალშობილი ვაჟია. როგორც კლინიკაში აღნიშნავენ, წყვილს დიდი ხნის მანძილზე არ ჰყავდა შვილი. ბავშვის მამა დაახლოებით 60 წლისაა.

10 თებერვალს აჭარის უმაღლესი საბჭო ოფიციალურად დატოვა ლევან ვარშალომიძემ, „ერთიანი ნაციონალური მოძრაობის“ სიის პირველმა ნომერმა აჭარის უმაღლესი საბჭოს არჩევნებში. უმაღლეს საბჭოში „ნაციონალური მოძრაობის“ პროპორციული სიით ასმათ დიასამიძე შევა, სიის მეექვსე ნომერი.

ეს უკვე მესამე მოწვევის უმაღლესი საბჭოა, რომლის წევრიც ასმათ დიასამიძე გახდება. რის გაკეთება ვერ მოასწრო წინა ორი მოწვევის უმაღლეს საბჭოში, 8 წლის მანძილზე, ასმათ დიასამიძემ და რა ინიციატივები ექნება ახლა? – მომავალი დეპუტატი ამბობს, რომ იგი ძირითადად განათლებისა და კულტურული მემკვიდრეობის საკითხებზე იქნება ორიენტირებული.

„პირველი საკანონმდებლო ინიციატივა, ვფიქრობ, რომ იქნება კულტურული მემკვიდრეობის კუთხით. ადამიანებს, რომლებიც ცხოვრობენ ძეგლის სტატუსის მატარებელ სახლებში, არ აქვთ უფლება შეაკეთონ სახლი. მე არ ვამბობ, რომ უნდა დაირღვეს კულტურული მემკვიდრეობის ძეგლის ფასადი, მაგრამ უნდა მოხდეს მისი გამაგრება და თუ სახელმწიფო იცავს კულტურული მემკვიდრეობის ძეგლს, პირველ რიგში, უნდა იზრუნოს მის გამაგრებაზე, გამყარებაზე ან უნდა შეიქმნას კონკრეტული ჯგუფი და მიეცეს ამ ძეგლში მცხოვრებლებს საშუალება, შეასრულონ ეს სამუშაოები ისე, რომ არ დაირღვეს კულტურული მემკვიდრეობის ძეგლის ფასადი.

გადაწყვეტილების მიღება საქართველოს პარლამენტის უფლებამოსილებაა, ეს შემდეგ უნდა გადაეგზავნოს პარლამენტს. ადგილზე ჩვენი ხუთი ხმა ამისთვის არ კმარა, რა თქმა უნდა, მაგრამ ვეცდები, რომ ჩვენი კოლეგები დავარწმუნო, მცდელობა ყოველთვის შეიძლება, თუ თავიდანვე არ დაბლოკავენ.  2012 წლის მოწვევის უმაღლეს საბჭოში ჩემი პირველი ინიციატივა ეხებოდა იმას, რომ სკოლის დირექტორების დანიშვნის უფლება ჰქონოდა აჭარის განათლების სამინისტროს, მაგრამ პირველივე ბიუროდან იქნა ჩახსნილი, მივხვდი, რომ აზრი არ ჰქონდა და გამოვიტანე.“

კითხვაზე, რატომ არ დააყენა აღნიშნული საკითხები განსახილველად წინა მოწვევის უმაღლეს საბჭოში, ასმათ დიასამიძე ამბობს, რომ რამდენიმე ინიციატივის განხორციელება შეძლო კულტურულ მემკვიდრეობასთან და ზოგად განათლებასთან დაკავშირებით.  მისი თქმით, ამ ინიციატივების შედეგად 2008 წლის მოწვევის უმაღლესი საბჭოს პირობებში აჭარის მთავრობას გადმოეცა სამართავად გონიოს და პეტრას ციხეები, რომელიც მანამდე საქართველოს კულტურისა და ძეგლთა დაცვის სამინისტროს  დაქვემდებარებაში იყო და ცვლილება შევიდა კანონში „ზოგადი განათლების შესახებ“, რის შედეგადაც საჯარო სკოლა აჭარის ტერიტორიაზე ქონებას განკარგავს აჭარის განათლების სამინისტროს თანხმობის საფუძველზე.   ასმათ დიასამიძეს სულ შვიდი საკანონმდებლო ინიციატივა ჰქონდა უმაღლეს საბჭოში.  2008 წლის მოწვევვის უმაღლეს საბჭოში ასმათ დიასამიძე ხელმძღვანელობდა განათლების კომისიას, 2012 წლის მოწვევის უმაღლეს საბჭოში კი ამ კომისიის წევრი იყო.

„ახლაც, ალბათ ვიქნები განათლების კომისიაში და შევეცდები ჩემი გამოცდილება ამ საქმეს მოვახმარო. მე განათლების აკადემიური დოქტორი ვარ და ვფიქრობ, რომ მეცნიერებაში და ზოგად განათლებაში მექნება ინიციატივები,“ – ამბობს ასმათ დიასამიძე.

შაჰინის სახელობის სკოლა-ლიცეუმისთვის ავტორიზაციის შეჩერების შემდეგ, შესაძლებელია საქართველოში არსებული იმ ოთხი სკოლა-ლიცეუმების ავტორიზაციის შეჩერების საკითხიც დადგეს  დღის წესრიგში, რომლებიც ე.წ. ჩაღლარის საგანმანათლებლო სივრცეში არიან მოქცეულები.  ამ სკოლებს შორის არის ბათუმში შაჰინის სახელობის სკოლა ლიცეუმიც.

ამ სკოლათაგან ზოგიერთს ავტორიზაციის ვადა მიმდინარე წელს უმთავრდება და ახალი ავტორიზაციის მისაღებად განათლების სამინისტროს განათლების ხარისხის განვითარების ეროვნული ცენტრის ხარისხის უზრუნველყოფის სამსახურს ისევ უნდა მიმართონ.

„ბათუმელები“ ამ ჩაღლარის საგანმანათლებლო სივრცეში ჩართული სკოლების – თბილისში, „დემირელის სახელობის კერძო კოლეჯის“, „ქუთაისის ნიკო ნიკოლაძის სახელობის სკოლა-ლიცეუმის“ და თბილისის სკოლა-ლიცეუმ „სხივის“ წარმომადგენლებს ესაუბრა. ისინი არ ადასტურებენ ინფორმაცია იმის შესახებ, რომ უახლეს პერიოდში მათი სკოლებსაც შეიძლება გაუუქმონ ავტორიზაცია სხვადასხვა მიზეზით. დირექტორები ამბობენ, რომ მათი სასწავლებლები ავტორიზაციის პირობებს აკმაყოფილებენ და ამასთანავე, ისინი ემიჯნებიან შაჰინის სკოლის წინააღმდეგ დაწყებულ პროცესს.

„წელს ჩვენ ვემზადებით ავტორიზაციისთვის, ჯერ განაცხადი არ შეგვიტანია. შესაბამისად, განაცხადის შეტანის შემდეგ, გეგმიური მონიტორინგი შემოვა სკოლაში. ეს ჩვეულებრივი პროცესია. ერთი თვის განმავლობაში მივმართავთ ავტორიზაციის საბჭოს“, – ამბობს დემირელის სახელობის კერძო კოლეჯის დირექტორი ნინო კავთიაშვილი.

დირექტორის თქმით, ავტორიზაციის მანძილზე სკოლას არ ჰქონია რაიმე ტიპის შენიშვნა მიღებული ავტორიზაციის საბჭოსგან და არც არაგეგმიური მონიტორინგი განხორციელებულა.

„მე გავემიჯნები პოლიტიკას, ჩვეულებრივად ვაგრძელებთ სასწავლო პროცესს, გვყავს იურისტი, რომელიც მუშაობს დოკუმენტაციაზე განათლების მიმართულებით და ვფიქრობთ, რომ ყველაფერი წესრიგში გვაქვს. ასე, რომ პრობლემა არ უნდა შეგვექმნას“, – გვეუბნება ის.

დირექტორის თქმით, კოლეჯი თვითდაფინანსებაზეა.

„ქუთაისის ნიკო ნიკოლაძის სახელობის სკოლა-ლიცეუმის“ წარმომადგენელი ქეთი მაწკეპლაძეც ამბობს, რომ სკოლა საკუთარი შემოსავლებით ფინანსდება და დოკუმენტაციაც წესრიგში აქვთ: „ჩვენ ორი კვირის წინ გვყავდა მონიტორინგის სამსახური, ავტორიზაცია ხუთი წლის წინ გავიარეთ და, შესაბამისად, მონიტორინგის სამსახურს უფლება ჰქონდა შემოსულიყო. გუშინ მოვიდა მონიტორინგის დასკვა, რომელიც არის დადებითი, პრობლემები არ გვაქვს და ველობით როდის დაგვიძახებენ სამინისტროში“.

ხელახალ ავტორიზაციამდე ერთი წელი აქვს დარჩენილი მარნეულში არსებულ დავით აღმაშენებლის სახელობის სკოლა-ლიცეუმსაც, თუმცა როგორც დირექტორის მოადგილე, ქეთევან ჭანტურია გვეუბნება, მონიტორინგის საბჭო სკოლაში გაურფთხილებლად მაინც შევიდა.

„ჩვენს სკოლას 2018 წლის თებერვალში უწევს ავტორიზაციის ხელმეორედ გავლა, თუმცა მონიტორინგის ჯგუფი 24 იანვარს მაინც შემოვიდა შესამოწმებლად. ჩვენ პოლიტიკისგან შორს ვართ, ჩავაბარებთ ყველა საჭირო დოკუმენტაციას, ყველანაირად ვემზადებით და ვნახოთ რა იქნება. წინასაწარ ვერაფერს გეტყვით“-გვეუბნება ის.

ქეთევან ჭანტურიას თქმით, მონიტორინგის შედეგები სკოლას ჯერ არ მიუღია, „შესაბამისად, არ ვიცით აქვთ თუ არა რაიმე შენიშვნები“.

თბილისის სკოლა-ლიცეუმი „სხივის“ წარმომადგენელმა კი  გვითხრა, რომ სკოლა-ლიცეუმმა ავტორიზაცია 2016 წლის ზაფხულში  უპრობლემოდ გაიარა.

ბათუმში შაჰინის სახელობის სკოლა-ლიცეუმს  ავტორიზაციის საბჭომ 2017 წლის 3 თებერვალს გაუუქმა ავტორიზაცია. სკოლაში მიაჩნიათ, რომ მათ მიმართ პოლიტიკური გადაწყვეტილება იქნა მიღებული.

ე.წ. ჩაღლარის საგანმანათლებლო სკოლების შექმნა უკავშირდება ამერიკაში მცხოვრებ ფეტულა გიულენს. თურქეთში სახელმწიფო გადატრიალების მცდელობის შემდეგ სწორედ ფეტულა გიულენი დაასახელა თურქეთის ხელისუფლებამ გადატრიალების მცდელობის ორგანიზატორად. თურქეთის ხელისუფლებამ გიულენის გადაცემა მოითხოვა ამერიკის შეერთებული შტატებისგან, რაზედაც უარი მიიღო. გადატრიალების მცდელობიდან მალევე თურქეთის ხელისუფლებამ ყველა სახელმწიფოს მოსთხოვა გიულენთან დაკავშირებული სკოლების გაუქმება. სწორედ იმ პერიოდში თურქეთის კონსულმა ბათუმში განაცხადა, რომ შაჰინის „სკოლაში ტერორისტებს ზრდიან“. სკოლები გაუქმეს მეზობელ აზერბაიჯანში.

შაჰინის სკოლა-ლიცეუმმა  2015 წლის შემოდგომაზე ავტორიზაცია ექვსი წლის ვადით მიიღო.

ბათუმში დღეს, 10 თებერვალს, ხიხანის ქუჩაზე მცხოვრები სულიკო გვიანიძე დააკავეს წვრილმანი ხულიგნობისა და პოლიციისათვის წინააღმდეგობის გაწევის ბრალდებით. შს სამინისტროს ინფორმაციით,  დაკავებულს ზოგადი ადმინისტრაციული კოდექსის 166-ე და 173- მუხლებით ედება ბრალი.

სულიკო გვიანიძის დაკავებას წინ უძღოდა აქცია, რომელსაც ხიხანის ქუჩაზე მცხოვრებლები უკვე მესამედ მართავენ. ამ ქუჩაზე  ახალციხე-ბათუმის 220-კილოვოლტიანი ელექტროგადამცემი ხაზი გადის, რისთვისაც მოსახლეობის ნაწილს საკუთრების დათმობა მოუწევს. მოსახლეობა საკუთრების დათმობის სანაცვლოდ „არაადეკვატური ფასის შეთავაზებას“ აპროტესტებს.

აქციაში მონაწილეობდა თამაზ ბაკურიძე, რომელიც ხიხანის ქუჩაზე მცხოვრები მოსახლეობის პრობლემებს კარგად იცნობს. მისი თქმით, ელექტროგადამცემი ბოძების დამონტაჟება ხიხანის ქუჩაზე უკვე დაიწყო, გუშინ კომპანია სახელმწიფოს კუთვნილ ტერიტორიაზე მუშაობდა, დღეს კი მშენებელი კომპანია სულიკო გვიანიძის საკუთრებაში არსებულ მიწის ნაკვეთში შევიდა.

„ასამდე პოლიციელი იყო ადგილზე მობილიზებული, პოლიციის ძალით მოხდა შესვლა ტერიტორიაზე, ამ დროს დააკავეს სულიკო გვიანიძე.  ხიხანის ქუჩის მოსახლეობა არ ეთანხმება იმ კონპენსაციას, რომელსაც თავაზობს კომპანია და ამან გამოიწვია ეს დაპირისპირება და მოსახლეობის პროტესტი,“ – ამბობს თამაზ ბაკურიძე.

„სულიკო გვიანიძის საკუთრებაში არსებული 313 კვ.მ ფართობი უკვე სააქციო საზოგადოება „საქართველოს ელექტროსისტემის საკუთრებაშია“, რადგან გვიანიძეს ექსპროპრიაციის წესით ჩამოერთვა საკუთრება, ამ ადგილას ელექტროგადამცემი ბოძი განთავსდება,“ – ამბობს „ბათუმელებთან“ სააქციო საზოგადოება საქართველოს ელექტროსისტემის მმართველთა საბჭოს წევრი გიორგი შარკოვი.

„აღნიშნულ ნაკვეთზე, სადაც იდგმება მაღალი ძაბვის გადამცემი ანძა, მიმდინარეობდა ექსპროპრიაციის პროცედურა, რომელიც დასრულდა და საკუთრებაში გადმოგვეცა აღნიშნული მიწის ნაკვეთი. ელექტროგადამცემი ხაზის უსაფრთხოების ზოლი ამ ქუჩაზე წარმოადგენს 62-მეტრიან ბუფერს. ამ ზოლში რამდენი მოსახლეც ხვდება, მათ ყველას ეკუთვნის კომპენსაცია.

რაც შეეხება საკომპენსაციო თანხას, ბატონ სულიკოს სასამართლოს წესით შეუძლია გაასაჩივროს საკომპენსაციო თანხის ოდენობა და თუ სასამართლო დაადგენს უფრო მეტ საკომპენსაციო თანხის ოდენობას, ვიდრე ჩვენ ვთავაზობთ, ჩვენ დავემორჩილებით სასამართლოს გადაწყვეტილებას“, – ამბობს გიორგი შარკოვი.

იგი განმარტავს, რომ საკომპენსაციო თანხა ითვლება ყოველი კონკრეტული მოსახლისათვის იმის გათვალისწინებით, თუ კონკრეტულად სად მდებარეობს მიწის ნაკვეთი, არის თუ არა ნაკვეთზე ხე-მცენარეები, შენობა-ნაგებობები და ა.შ. „ამის მიხედვით არის რამდენიმე ტიპის კომპენსაციის თანხა. ეს დგინდება საბაზრო ღირებულებით, დამოუკიდებელი აუდიტორის მიერ. კომპენსაციის თანხა შეთანხმებულია როგორც მსოფლიო ბანკთან, ასევე საქართველოს მთავრობასთან,“ – ამბობს გიორგი შარკოვი.  მისი თქმით, ამ ეტაპზე დაახლოებით ოთხი მილიონი ლარის კომპენსაციაა გაცემული ბათუმი-შუახევის მონაკვეთზე მცხოვრებ მოსახლეობაზე.

აჭარაში მაღალი ძაბვის ახალციხე-ბათუმის 220-კილოვოლტიან ელექტროგადამცემ სისტემას საქართველოს სახელმწიფოს დაკვეთით ინდური კომპანია KEC-ი აშენებს. ელექტროგადამცემი ხაზი ხელვაჩაურის, ქედის, შუახევისა და ხულოს მუნიციპალიტეტების ტერიტორიაზე გაივლის. პირველადი მონაცემებით, ბუფერულ ზონაში 50 ოჯახი მოხვდება. მშენებლობა 2018 წლის დასაწყისისთვის უნდა დასრულდეს. ამ ქსელით ახალაშენებული ჰესების მიერ გამომუშავებული ელექტროენერგიის ერთ სისტემაში მოქცევა და თურქეთისთვის მიწოდება იგეგმება.

ხიხანის ქუჩის მოსახლეობამ დახმარებისთვის აჭარაში სახალხო დამცველის წარმომადგენელს მიმართა.

ფოტოზე: აქცია ხიხანის ქუჩაზე. ფოტო „ბათუმელების“ არქივიდან. 

ამავე თემაზე: 

აქცია ადექვატური კომპენსაციის მიღების მოთხოვნით

ვლადიმერ ჩიტაია საქართველოს მთავრობასa და პარლამენტს საკონსტიტუციო სასამართლოში უჩივის. ის სოციალურ შემწეობას ვერ იღებს. სოციალური მომსახურების სააგენტო განცხადების დარეგისტრირებასა და დეკლარაციის შევსებაზე უარს ეუბნება, რადგან ვლადიმერი უსახლკაროა. „მუდმივი საცხოვრებელი ადგილი“ სავალდებულო მოთხოვნაა შემწეობის მისაღებად. ვლადიმერ ჩიტაიას სარჩელი წარმოებაში საკონსტიტუციო სასამართლომ დღეს მიიღო.

„კანონმდებლობაში არსად წერია განმარტება, რა იგულისხმება „მუდმივ საცხოვრებელ ადგილში“. შესაბამისად, არსებობს განსხვავებული პრაქტიკა. უსახლკარო ადამიანები სოციალურ შემწეობას ძირითადად ვერ იღებენ, რადგან ისინი ხშირად იცვლიან საცხოვრებელ ადგილს“, – გვიყვება ლინა ღვინიანიძე, მოსარჩელის ინტერესების დამცველი „ადამიანის უფლებების სწავლების და მონიტორინგის ცენტრიდან“.

„ბათუმელები“ ეცადა გაერკვია, რა პრაქტიკაა ამ კუთხით ბათუმში.

„უსახლკარო თუა, მერიას უნდა მიმართონ და მოიძიონ სახლ-კარი. ქუჩაში დეკლარაცია არ ივსება“, – გვითხრა თემურ ქარცივაძემ, სოციალური მომსახურების სააგენტოს აჭარის ფილიალის უფროსმა. მისი განმარტებით, თუკი ადამიანი სოციალური შემწეობის დანიშვნის დროს აღარ ცხოვრობს იქ, სადაც აგენტმა მონაცემები შეავსო, დეკლარაცია გაუქმებულად ჩაითვლება.

თემურ ქარცივაძე მიიჩნევს, რომ უსახლკაროებზე, ამ შემთხვევაში, თვითმმართველობამ უნდა იზრუნოს, ხოლო „ჯანმრთელობის და სოციალური დაცვის სამინისტროს არ აქვს  უფლებამოსილება უსახლკაროებს სოციალური შემწეობა მისცეს.“

სოციალური მომსახურების სააგენტოს ხელმძღვანელს ვთხოვეთ, დაესახელებინა ის შემზღუდავი სამართლებრივი ნორმა, რაც სოციალური დაცვის სამინისტროს უსახლკაროებისთვის შემწეობის მიცემას უკრძალავს. „არ ვიცი, ეს იურისტებს ჰკითხეთ. თუ დაგვიწესებენ და სავალდებულო იქნება, მაგის მექანიზმიც შეიქმნება, რომ უსახლკარომ მიიღოს დახმარება“, – გვპასუხობს თემურ ქარცივაძე.

გასული წლის დეკემბრის მონაცემებით, ბათუმის მერიისგან 4567 ადამიანი მოითხოვდა საცხოვრებლის მიღებას. 

„ჩვენი სარჩელის მიზანი არის ის, რომ სახელმწიფომ შექმნას სისტემა, რომელიც ამ უთანასწორობას გამორიცხავს. თავდაპირველად საჭიროა, საკონსტიტუციო სასამართლომ არაკონსტიტუციურად მიიჩნიოს სამართლებრივი ნორმა, რომელიც ქუჩაში დარჩენილ ადამიანს შემწეობის მიცემაზე უარს ეუბნება“, – ამბობს იურისტი ლინა ღვინიანიძე.

სარჩელის მიხედვით, არსებული რეგულაცია სხვადასხვა მუხლთან ერთად არღვევს „საქართველოს კონსტიტუციის“ მე-14 მუხლს, სადაც წერია, რომ ყველა ადამიანი დაბადებით თავისუფალია და თანასწორი „განურჩევლად საცხოვრებელი ადგილისა“.

„პროკურორს არ უნდა ჰქონდეს უფლება, დამავალოს საკუთარი თავის წინააღმდეგ წარვადგინო მტკიცებულებები“, – მიმართა მოსამართლეებს იურისტმა გიორგი მშვენიერაძემ. ის მოქალაქე ტატიკო ჩორგილიანის ინტერესებს იცავს ორგანიზაციიდან „საქართველოს დემოკრატიული ინიციატივა“.

„იყო შემთხვევა, როცა ადამიანს საკუთარი ხმის აუდიოჩანაწერის წარმოდგენა მოსთხოვეს, ასევე ხელმოწერის ნიმუშის წარმოდგენას სთხოვენ. გამოძიებას შეუძლია მოიპოვოს სხვა წყაროებიდან ბრალდებულის ხელმოწერა, მაგრამ თავად ბრალდებული არ უნდა იყოს ვალდებული მისთვის საზიანო მტკიცებულება მიაწოდოს პროკურორს“, – ამბობს გიორგი მშვენიერაძე.

„საქართველოს კონსტიტუციის“ 42-ე მუხლის მიხედვით: „არავინ არის ვალდებული მისცეს თავის, ან მის ახლობელთა წინააღმდეგ ჩვენება, რომელთა წრეც განისაზღვრება კანონით“.

მოსარჩელე მხარე კიდევ ერთ საკითხზე ამახვილებს ყურადღებას. არსებული პრაქტიკის მიხედვით, თუკი დაცვის მხარის ანუ ბრალდებულის მოთხოვნით სასამართლო დააკმაყოფილებს ამა თუ იმ მტკიცებულების ამოღებაზე შუამდგომლობას, ჩხრეკას ატარებს გამომძიებელი და ამოღებულ მტკიცებულებას პირდაპირ გადასცემს ბრალდების მხარეს, ანუ პროკურატურას.

საკონსტიტუციო სასამართლომ უნდა დაადგინოს, კონსტიტუციურია თუ არა სისხლის სამართლის საპროცესო კოდექსის ის სამართლებრივი ნორმა, რომლის მიხედვითაც „დაცვის მხარის შუამდგომლობის საფუძველზე ამოღებული საგნის, ნივთის, ნივთიერების, აგრეთვე ინფორმაციის შემცველი დოკუმენტის პირველადი გამოკვლევის უფლება აქვს ბრალდების მხარეს“.

გიორგი მშვენიერაძეს მოსამართლეებმა კითხვები ძირითადად დაუსვეს იმ კუთხით, რომ თუკი დაცვის მხარის [ანუ ბრალდებულის] ინიციატივით ამოღებული მტკიცებულება ჩაბარდება პირველად დაცვის მხარეს [ანუ ბრალდებულს], შესაძლოა, ბრალდებულმა მისი განადგურება მოახერხოს.

„მაგალითად, მედავებიან თაღლიოთობას ან დოკუმენტების გაყალბებას. გამოძიებამ ზუსტად არ იცის, სად არის ეს გაყალბებული დოკუმენტები. მე, ბრალდებულმა ვიცი, სადაც შეიძლება ის იყოს, ვითხოვ მათ ამოღებას, გამომძიებელი ჩხრეკის შედეგად იღებს ამ დოკუმენტებს ამა თუ იმ ორგანიზაციიდან და შესწავლის გარეშე მაძლევს მე. შესაძლოა მე ეს მტკიცებულებები აღარ წარვადგინო, რადგან ის არის ჩემ წინააღმდეგ, ხოლო ბრალდების მხარეს ექნება არგუმენტი, რომ ისინიც მოახერხებდნენ გარკვეულ დროში ამ დოკუმენტების ამოღებას, მაგრამ იგი უკვე განადგურებულია“, – თქვა მოსამართლე მერაბ ტურავამ.

„ამისთვის სპეციალური რეგულაციის შემუშავება შეიძლება. ჩვენი მოთხოვნა არის ის, რომ ავტომატურ რეჟიმში არ უნდა ჰქონდეს ბრალდების მხარეს წვდომა იმ მტკიცებულებებზე, რაც დაცვის მხარის შუამდგომლობით ამოიღო გამოძიებამ“, – უპასუხა მოსამართლეს გიორგი მშვენიერაძემ.

„საზოგადოებასთან ურთიერთობის, ინფორმაციული ტექნოლოგიებისა და პროტოკოლის დეპარტამენტი“ – ასე ეწოდება დოკუმენტის სამუშაო ვერსიაში ახალ დეპარტამენტს აჭარის უმაღლეს საბჭოში, რომელიც, პრესსამსახურის თქმით, უმაღლესი საბჭოს სამ  – პრესსამსახურს, IT ჯგუფსა და პროტოკოლის სამსახურს გააერთიანებს. გადაწყვეტილება ახალი დეპარტამენტის შექმნის შესახებ დღეს, 10 თებერვალს, რიგგარეშე სხდომაზე განიხილეს.

როგორც უმაღლესი საბჭოს პრესსამსახურში განმარტავენ, ცვლილება მიზნად ისახავს სამი სამსახურის ერთი ქოლგის ქვეშ მოქცევის და კოორდინირებულ მუშაობას და არ გამოიწვევს შტატების მატებას ან შემცირებას. ჯერჯერობით უცნობია ვინ უხელმძღვანელებს ახალ დეპარტამენტს.

აჭარის უმაღლეს საბჭოში აქამდე სამი დეპარტამენტი იყო: იურიდიულ და საკადრო საკითხთა, საერთო – [საფინანსო-სამეურნეო და სატრანსპორტო უზრუნველყოფის] და საორგანიზაციო და საქმისწარმოების დეპარტამენტები.

ბათუმში, გორგილაძისა და ვაჟა-ფშაველას ქუჩების კვეთაში მდებარე ყოფილი კოლეჯის შენობის რეაბილიტაცია-მშენებლობისთვის ბიუჯეტში 2 მილიონ 703 ათას 154 ლარია გათვალისწინებული. შენობაში, რომელიც კულტურული მემკვიდრეობის ძეგლია, ბოლო დროს ბათუმის პირველი საჯარო სკოლის მოსწავლეები სწავლობდნენ.

ორსართულიანი შენობა ამჯერად დაცლილია. მშენებლობაზე გამოცხადებული ტენდერიც დასრულდა.

შენობის რეაბილიტაციას, ასევე მასზე მესამე სართულისა და ვერანდის დაშენებას, ბათუმის ხელოვნების სასწავლო უნივერსიტეტს კომპანია – შპს „ალიგატორი1“ 2 მილიონ 162 ათას 520 ლარად სთავაზობს. უნივერსიტეტის მიერ გამოცხადებულ ტენდერში მხოლოდ ეს ერთი კომპანია მონაწილეობდა. გამოცხადდება თუ არა ის გამარჯვებულად, სატენდერო კომისია გადაწყვეტს. გადაკეთებულ შენობაში ხელოვნების უნივერსიტეტი უნდა განთავსდეს.

„ბათუმის ხელოვნების სასწავლო უნივერსიტეტის“ განთავსებისთვის „ბათუმში, ზურაბ გორგილაძის/ვაჟა-ფშაველას ქუჩაზე, N19/32-ში მდებარე შენობა-ნაგებობის  რეაბილიტაცია/რეკონსტრუქცია/მშენებლობის სამუშაოები – კულტურული მემკვიდრეობის უძრავი ძეგლის რეაბილიტაცია“, სატენდერო დოკუმენტების მიხედვით 2018 წელს უნდა დასრულდეს – ხელშეკრულების გაფორმებიდან 12 თვის ვადაში. „ვადის გადაწევის საფუძველს არ წარმოადგენს თოვა, წვიმა და სხვა მსგავსი მოვლენები,“ – აღნიშნულია სატენდერო დოკუმენტებში.

დოკუმენტში ასევე აღნიშნულია, რომ „ვინაიდან შენობა წარმოადგენს კულტურული მემკვიდრეობის უძრავ ძეგლს, მომწოდებელი ვალდებულია სარეაბილიტაციო სამუშაოების განხორციელების დროს ზედმიწევნით და სრულად დაიცვას „კულტურული მემკვიდრეობის შესახებ“ საქართველოს კანონის მოთხოვნები“.

დღეს, 10 თებერვალს, აჭარის უმაღლესი საბჭო რიგგარეშე სხდომაზე ლევან ვარშალომიძისათვის აჭარის ავტონომიური რესპუბლიკის უმაღლესი საბჭოს წევრის უფლებამოსილების ვადამდე შეწყვეტის შესახებ იმსჯელებს. როგორც პრესრელიზშია აღნიშნული, ამ თემაზე მომხსენებელი ნინო ჩხეტია იქნება,  საკონსტიტუციო, იურიდიულ და საპროცედურო საკითხთა კომისიის თავმჯდომარე.

„ერთიანი ნაციონალური მოძრაობის“ ლიდერმა და აჭარის მთავრობის ყოფილმა თავმჯდომარემ ლევან ვარშალომიძემ აჭარის უმაღლესი საბჭოს დატოვების შესახებ  27 იანვარს განაცხადა. 

იმის მიუხედავად, რომ აჭარის უმაღლესი საბჭოს არც ერთ სხდომას არ დასწრებია, 2016 წლის დეკემბერში ლევან ვარშალომიძემ 4290 ლარი მიიღო ხელფასისა და დანამატის სახით. აჭარის უმაღლესი საბჭოს პრესსამსახურის ინფორმაციით, ვარშალომიძემ ხელფასი იანვარშიც მიიღო.

ლევან ვარშალომიძე საარჩევნო სიის პირველი ნომერი იყო. მის ნაცვლად უმაღლეს საბჭოში ერთიანი ნაციონალური მოძრაობის პატრიული სიით, ასმათ დიასამიძე აპირებს შესვლას.