Batumelebi | აჭარის ჯანდაცვის სამინისტრო 30 ეკომიგრანტ ოჯახს ვაშლოვანში ბინას გადასცემს აჭარის ჯანდაცვის სამინისტრო 30 ეკომიგრანტ ოჯახს ვაშლოვანში ბინას გადასცემს – Batumelebi
RU | GE  

აჭარის ჯანდაცვის სამინისტრო 30 ეკომიგრანტ ოჯახს ვაშლოვანში ბინას გადასცემს

25 მაისს აჭარის ჯანდაცვის სამინისტროში აჭარაში სტიქიური მოვლენების შედეგად მიყენებული ზარალის სალიკვიდაციო შერეული სამთავრობო კომისიის სხდომა გაიმართა.

სხდომაზე ეკომიგრანტი ოჯახების შესახლებისა და სტიქიის შედეგად დაზარალებული შენობების აღდგენაზე ისაუბრეს, კერძოდ, ხულოს მუნიციპალიტეტის სოფელ ვაშლოვანში მდებარე სოციალურ სახლში 30 ოჯახის საცხოვრებელი ფართობით დაკმაყოფილებისა და ქობულეთის მუნიციპალიტეტში, მიმდინარე წლის 23-28 აპრილს, ძლიერი ქარის შედეგად დაზიანებული 210 შენობის (176 კერძო სახლი და 9 კორპუსი) აღდგენის საკითხებზე.

აჭარის ჯანდაცვის სამინისტროს ინფორმაციის თანახმად, აჭარის ფინანსთა და ეკონომიკის სამინისტრომ ხულოს მუნიციპალიტეტში უკვე ააშენა სამი კორპუსი, ჯამში 72 ბინა. ამჟამად შეირჩა 30 ოჯახი, რომელიც სრულიად აკმაყოფილებდა კომისიის პირობებს. სულ კომისიაზე 88 განაცხადი იყო წარდგენილი, აქედან  17 ოჯახს კომისიამ უარი უთხრა, ხოლო დანარჩენ ნაწილს არ წარუდგენია სრული დოკუმენტაცია.

აჭარის ჯანმრთელობისა და სოციალური დაცვის სამინისტროს სტიქიით დაზარალებული საქმეების დეპარტამენტის უფროსის, დალი ქიქავას თქმით, დანარჩენ ეკომიგრანტ ოჯახთა რაოდენობას ხულოს გამგეობა აჭარის ჯანდაცვის სამინისტროს უახლოეს დროში წარუდგენს.

აჭარის ჯანდაცვის მინისტრის, ზაალ მიქელაძის თქმით, ოჯახებში სულადობის მიხედვით ფართობის განაწილებაზე ხულოს ადგილობრივი გამგეობა იმუშავებს.

რაც შეეხება ქობულეთის მუნიციპალიტეტის საკითხს, სხდომაზე დადებითი გადაწყვეტილება მიიღეს 210-ვე დაზიანებული შენობის შეკეთებაზე.

სხდომას ხულოსა და ქობულეთის მუნიციპალიტეტების გამგებლები – ბესიკ ბაუჩაძე და სულხან ევგენიძე ესწრებოდნენ.

ნეტგაზეთის მასალების სხვა გამოცემებში გადაბეჭდვის წესი
გულნარა კაკაბაძე