ბათუმში, კ. გამსახურდიას [ყოფილი ლენინის ქუჩა] N35-ში არსებული ეკლესიის შენობის რესტავრაცია-რეაბილიტაციას აჭარის კულტურული მემკვიდრეობის დაცვის სააგენტო გეგმავს. ამ ეკლესიის შენობა დღეს ავარიულია, ჩამოშლილია სახურავი, დაზიანებულია კედლები, ირგვლივ მიშენებულია სხვადასხვა ნაგებობები და მიმდინარეობს სამშენებლო მოედნის მომზადება. მიუხედავად ამისა ეკლესიის კარებს ბოქლომი ადევს. როგორც ეკლესიის ეზოში გვითხრეს, ბოქლომი კარს მართლმადიდებელმა ეკლესიამ დაადო. ძველი სომხურ-კათოლიკური ეკლესია საქართველოს საპატრიარქოს ბალანსზეა 2012 წლიდან. შენობა წლებია მოუვლელია.
ბათუმში, გამსახურდიას ქუჩის #35-ში ძველი, სომხურ-კათოლიკური ეკლესიის შენობა მიმდინარე წლის 4 თებერვალს ჩამოინგრა. შენობა ჯერ კიდევ ოსმალეთის იმპერიის დროინდელ ბათუმში იყო აგებული, 1877 წელს. სამლოცველოს ფუნქცია შენობას გასული საუკუნის 20-იან წლებამდე ჰქონდა. შენობას კულტურული მემკვიდრეობის ძეგლის სტატუსი აქვს.
აღნიშნული შენობის რესტავრაციამდე სააგენტომ კვლევითი და სარეაბილიტაციო სამუშაოების საპროექტო დოკუმენტაცია უნდა მოამზადოს. აღნიშნული დოკუმენტაციის მომზადებაზე ტენდერი უკვე გამოცხადებულია. ტენდერში გამარჯვებულს ევალება „უძრავი ძეგლების – კერძოდ ქ. ბათუმში კ. გამსახურდიას N35 არსებული ავარიულ მდგომარეობაში მყოფი ეკლესიის რესტავრაცია-რეაბილიტაციის მიზნით კვლევითი სამუშაოებისა და სარეაბილიტაციო სამუშაოების საპროექტო დოკუმენტაციის მომზადება“.
საპროექტო დოკუმენტაცია მზად უნდა იყოს „კულტურული მემკვიდრეობის შესახებ“ საქართველოს კანონის შესაბამისად, ხელშეკრულების გაფორმებიდან 120 კალენდარული დღის განმავლობაში. ტენდერში წინადადებების მიღება მიმდინარე წლის 10 ივნისს დაიწყება და 15 ივნისს დასრულდება. სააგენტოს დოკუმენტაციის შესასყიდად 33 ათასი ლარი აქვს გათვალისწინებული.
[checklist]
- განმარტებითი ბარათი. განმარტებით ბარათში დასაბუთებული უნდა იყოს კვლევის მიზნით ძეგლზე ფიზიკური ზემოქმედების აუცილებლობა და კვლევითი სამუშაოების შესაბამისობა საქართველოს კანონმდებლობის მოთხოვნებთან. განმარტებით ბარათში უნდა მიეთითოს:
[/checklist]
- ძეგლის ზუსტი დასახელება, მისი ადგილმდებარეობის დასახელება და ზუსტი მისამართი;
- სამუშაოთა სახეობები და მოცულობა, შერჩეული მეთოდოლოგია;
- მოსალოდნელი შედეგების აღწერა.
[checklist]
- საპროექტო ობიექტის ადგილმდებარეობის სიტუაციური გეგმა, ადგილმდებარეობის განმსაზღვრელი კოორდინატებით;
- საპროექტო ობიექტის საერთო ხედების ამსახველი უახლესი ფოტო-მასალა;
[/checklist]
რაც შეეხება სარეაბილიტაციო სამუშაოების პროექტის შემადგენლობას, სატენდერო დოკუმენტების მიხედვით იგი მოიცავს ორი ეტაპის სამუშაოებს: I ეტაპის სამუშაო – საკვლევი და საფიქსაციო სამუშაოები, ხოლო II ეტაპის სამუშაო – საპროექტო სამუშაოები. იგეგმება ძეგლის ეზოს [ღობის კედელი, ჭიშკარი, მცირე არქიტექტურული ფორმები და დეკორატიული ელემენტები] რეაბილიტაციაც.
