სტუდენტური დასაქმების პროგრამაში მონაწილეობის მსურველთა რეგისტრაცია დაიწყო

რეგისტრაცია 25 მაისიდან 25 ივნისის ჩათვლით იწარმოებს. პროგრამის ფარგლებში 200 სტუდენტი ორ ეტაპად, ივლისსა და აგვისტოში დასაქმდება.
ბათუმის მერიის ინფორმაციით, სტუდენტები ბათუმის მერიის სტრუქტურულ და ადმინისტრაციულ ერთეულებში პროფესიული კუთხით დასაქმდებიან და გაწეული შრომა მერიაში გავლილ სტაჟირების კურსად ჩაეთვლებათ. შესაბამისად, გადაეცემათ დამადასტურებელი დოკუმენტი. სტუდენტების მიერ გაწეული შრომა ანაზღაურდება 400 ლარის ოდენობით, საშემოსავლო გადასახადის ჩათვლით.
პროგრამაში მონაწილეობის მიღება შეუძლიათ ბათუმის მუნიციპალიტეტის ტერიტორიაზე 2017 წლის 1-ელ იანვრის მდგომარეობით რეგისტრირებულ სტუდენტებს, რომლებიც ავტორიზებულ უმაღლეს ან პროფესიულ სასწავლებლებში სწავლობენ.
რეგისტრაციისთვის სტუდენტმა pdf ფორმატში უნდა ატვირთოს შემდეგი სახის დოკუმენტაცია:
• პირადობის მოწმობის ასლი;
• რეგისტრაციის დამადასტურებელი დოკუმენტი გაცემული 2017 წლის მდგომარეობით;
• ცნობა სასწავლებლიდან სპეციალობის, ფაკულტეტის, კურსის, სტუდენტის სტატუსის და ბოლო სემესტრის აკადემიური მოსწრების (საშუალო შეწონილი ქულა) შესახებ.
სტუდენტებმა მერიაში ასევე უნდა წარადგინონ დოკუმენტაცია, რომელიმე სტატუსის შესახებ – (სოციალურად დაუცველი, მრავალშვილიანი ოჯახის წევრი (ოთხი ან მეტი შვილი); საქართველოს ტერიტორიული მთლიანობისათვის ბრძოლაში მონაწილის, დაღუპულის ან დაკარგულად აღიარებულის შვილი; სტუდენტი, რომელიც აქტიურად მონაწილეობდა სხვადასხვა სახისა და ხასიათის მოხალისეობრივ საქმიანობაში; მაღალი აკადემიური მოსწრების მქონე (საშუალო შეწონილი ქულა 81 და ზევით) სტუდენტები; უდედმამო სტუდენტები.
მერიის პრესსამსახურის ინფორმაციით, ყველა ზემოთ ჩამოთვლილი სტატუსის მქონე სტუდენტს მიენიჭება პრიორიტეტი.

სტუდენტების მიერ წარდგენილ დოკუმენტაციას საკონკურსო კომისია რეგისტრაციის დასრულებიდან 5 კალენდარული დღის განმავლობაში განიხილავს.