ბათუმში მწვანე კონცხზე მდებარე ყოფილი აგრარული უნივერსიტეტისა და საერთო საცხოვრებლის შენობები პირობებიან აუქციონზე კომპანია „ბიზნეს დეველოპმენტმა“ შეიძინა. აუქციონში მხოლოდ ეს ერთი კომპანია მონაწილეობდა, რომელმაც აღნიშნული ქონება 4 600 000 ლარად შეიძინა.

აუქციონზე ქონება 4 500 000 ლარად იყო გამოტანილი – ორი შენობა [3239,62 კვ.მ და 4912,07 კვ.მ] და მათზე დამაგრებული 13 640 კვ.მ მიწის ნაკვეთი. შესაბამისად, ინვესტორს, რომელსაც აუქციონზე კონკურენტი არ ჰყოლია, 1 კვ/მეტრ მიწის ნაკვეთში დაახლოებით 337 ლარის გადახდა მოუწევს. მაშინ, როდესაც ზღვისპირა ზოლში მიწის საბაზრო ფასი გაცილებით მაღალია.

რაც შეეხება პირობებს, აჭარის ფინანსთა და ეკონომიკის სამინისტრო ქონების საფასურის ნაწილის ჩარიცხვას [სამი მილიონი ლარი] ბათუმის სახელმწიფო უნივერსიტეტის ბიუჯეტში ითხოვს. დარჩენილი თანხა კი მყიდველმა აჭარის ბიუჯეტში უნდა შეიტანოს. გარდა ამისა, მყიდველი იღებს ვალდებულებას, რომ ხელშეკრულების გაფორმებიდან ხუთი წლის ვადაში, საკუთრებაში გადაცემულ ქონებაზე არანაკლებ ხუთი მილიონი ლარის ინვესტიციას განახორციელებს.

ერთ-ერთი ინფორმირებული პირი, რომელიც საჯაროდ თავისი ვინაობის დასახელების წინააღმდეგი იყო, სასწავლებლის შენობის გაყიდვამდე ამბობდა, რომ ტერიტორიის ყიდვას ბიძინა ივანიშვილი აპირებდა. ივანიშვილის მწვანე კონცხთან დაკავშირებული გეგმების შესახებ “ბათუმელები” აქამდეც წერდა. მწვანე კონცხზე საქართველოს ყოფილი პრემიერის – ბიძინა ივანიშვილის პროექტის ე.წ. „პანორმა ბათუმის“ შესაძლო განხორციელებაზე არაოფიციალურად საუბრობენ.

აჭარის ფინანსთა და ეკონომიკის სამინისტრომ სასწავლებლის ტერიტორიის ნაწილი 2015 წლის ბოლოს გაასხვისა. აუქციონში „ბიზნეს დეველოპმენტი“ მაშინაც უკონკურენტო იყო.

თავის დროზე, შესაძლებლობა, რომ „ბიზნეს დეველოპმენტის“ უკან ბიძინა ივანიშვილი შეიძლება იდგეს არ გამორიცხა აჭარის მთავრობის ყოფილმა თავმჯდომარე არჩილ ხაბაძემ.

ყოფილი სასოფლო-სამეურნეო ინსტიტუტის შესასვლელ ჭიშკარზე, დაახლოებით ერთი წლის წინ, პატარა დაფა იყო გამოკრული წარწერით: „მწვანე კონცხი, ბოტანიკური ბაღის ზედა შესასვლელის მიმდებარედ სასტუმრო კომპლექსი 300-320 ნომერზე“. აქ მშენებლობა უკვე დაწყებულია და დაფაც შეცვლილია. ახალი საინფორმაციო დაფა გვაუწყებს, რომ აქ „Magnolia – Resort & SPA“ შენდება, დამკვეთი კი „ბიზნეს დეველოპმენტია“.

შპს „ბიზნეს დეველოპმენტი“ 2015 წლის ივნისში დაფუძნებული კომპანიაა, რომლის 100% წილს შპს „ნოდია, ურუმაშვილი და პარტნიორები“ ფლობს. „ნოდია, ურუმაშვილი და პარტნიორები“, კომპანიის საიტის მიხედვით, 2005 წელს შეიქმნა და ის ინდუსტრიულ და კომერციულ სექტორებში კლიენტებს, ძირითადად, იურიდიულ მომსახურებას სთავაზობს.

თანამშრომლობს თუ არა კომპანია საპარტნიორო ფონდთან, რომელი კომპანიები არიან მისი პარტნიორები მწვანე კონცხის პროექტში, რა გეგმები გაქვთ და ან რა კავშირები იმ ფირმებთან, რომლებიც ბიძინა ივანიშვილს სახელს უკავშირდება? – ამ კითხვების პასუხად, თავის დროზე კომპანიიდან შემდეგი SMS-ს შეტყობინება მივიღეთ: „სამწუხაროდ „ნოდია, ურუმაშვილი და პარტნიორები“ ვერ მოგაწოდებთ ინფორმაციას თქვენს მიერ დასმული კითხვების და საკითხის გარშემო ვინაიდან ამ ეტაპისთვის ეს ინფორმაცია კონფიდენციალურია“.

ბათუმში შაჰინის სკოლისათვის ავტორიზაციის გაუქმებას სკოლის მოსწავლეების, მასწავლებლების, მშობლებისა და არასამთავრობო ორგანიზაციების წარმომადგენლების გამოხმაურება მოჰყვა ფეისბუქზე. სკოლის მხარდამჭერებმა ჰაშთაგიც შექმნეს – #შაჰინიჩემია.

შაჰინის სკოლა-ლიცეუმის დირექტორი ელგუჯა დავითაძე საქართველოს პრემირს გიორგი კვირიკაშვილს, განათლების მინისტრს ალესანდრე ჯეჯელავას და სახალხო დამცველს უჩა ნანუაშვილს მიმართავს და სთხოვს, დაიცვან 340 მოსწავლის უფლებები. განცხადების ტექსტს უცვლელად გთავაზობთ:

იძულებული ვართ, თქვენი ყურადღება მივაპყროთ იმ უკანონობაზე, რომელიც ხორციელდება ბათუმის შაჰინის სახელობის სკოლა-ლიცეუმის მიმართ, რომელიც  23 წელია ფუნქციონირებს  და დღეისათვის მასში 340 მოსწავლე  სწავლობს.

2017 წლის  3 თებერვალს განათლების ხარისხის განვითარების ეროვნულ ცენტრში გამართულ საბჭოზე მიიღებული იქნა გადაწყვეტილება შაჰინის სკოლა-ლიცეუმის ავტორიზაციის  შეჩერების თაობაზე. ავტორიზაციის შეჩერება საფუძვლად დაედო ის გარემოება, რომ 6 არაქართველი მოსწავლე თურქულენოვანი კლასებიდან  გადაყვანილ იქნა ქართულ კლასებში, მაშინ როდესაც ამგვარი კანონი ან რეგულაცია სექტორის ცვლასთან დაკავშირებით, საქართველოს კანონმდებლობაში არ არსებობს, ხოლო თურქული სექტორის გაუქმება და მოსწავლეების ქართულ სექტორზე გადაყვანა სწორედ  ავტორიზაციის საბჭოს 2015 წლის 04 სექტემბრის  გადწყვეტილების შესაბამისად განხორციელდა.

ცალკე უნდა აღინიშნოს, რომ წინასწარ დაუგეგმავი მონიტორიგის პროცესი, რომელიც სკოლაში ბოლო თვეების განმავლობაში  რატომღაც მესამედ განხორცილდა.  ხელოვნურად შექმნილი და       არარსებული საფუძვლებიდან გამომდინარე, ეჭვს გამოვთქვათ, რომ აღნიშნული გადაწყვეტილება მიზანმიმართული პოლიტიკის ნაწილია მხოლოდ  რათა შეიზღუდოს და აიკრძალოს  შაჰინის სკოლის მუშაობა საქართველოში.

მოგმართავთ თხოვნით,  თქვენს პირად კონტროლზე აიყვანოთ და დაიცვათ სკოლის 340 მოსწავლის, მათი მშობლებისა და პედაგოგების კანონიერი უფლებები. არავის  მისცეთ უფლება  უკანონდ დახუროს სკოლა, რომელიც უკვე მრავალი წელია ქვეყნის სამსახურშია და არ შეიზღუდოს  სკოლის მუშაობა, სადაც საქართველოს ღირსეული მოქალაქეები იზრდებიან.

ავტორიზაციის საბჭომ შაჰინის სკოლა-ლიცეუმს ავტორიზაცია შეუჩერა, ამასთან დაკავშირებით გუშინ, 4 თებერვალს, სკოლის დირექტორმა ელგუჯა დავითაძემ სპეციალური ბრიფინგი გამართა. მისი ინფრომაციით, სკოლას ათი თურქი ეროვნების მოსწავლის ქართულ სექტორში ჩარიცხვას ედავებიან. მანამდე სკოლას ავტორიზაციის საბჭომ თურქული სექტორის გაუქმება მოსთხოვა, რასაც სკოლა დაემორჩილა.

ხარისხის კონტროლის სააგენტოს ინფორმაციით, სკოლას აღარ აქვს საქმიანობის გაგრძელების უფლება, თუმცა დირექტორის ინფრომაციით, სკოლა ხვალ, 6 თებერვალს, სასწავლო პროცესის გარძელებას გეგმავს, ვინაიდან ჯერ სკოლას ავტორიზაციის შეჩერებასთან დაკავშირებით დოკუმენტი არ მიუღია.

შპს „ბათუმის სასწრაფო სამედიცინო დახმარების ცენტრი“ ავტომანქანების შესყიდვას ტენდერის საშუალებით და ამასთან, ჩანაცვლების გზით განახორციელებს. სპეციალური დანიშნულების 9 ავტომანქანა [რაც ამჯერად აქვს ცენტრს] გადაეცემა ტენდერში გამარჯვებულს 6 ერთეული ახალი ავტომანქანის ცენტრისთვის გადაფორმების შემდეგ.

სატენდერო დოკუმენტების მიხედვით, ჩანაცვლების გზით შესასყიდი 6 ახალი ავტომანქანის სავარაუდო ღირებულება შეადგენს 480 ათას  ლარს. ამ თანხაში 143 ათასი ლარი ჩასანაცვლებელი 9 ავტომანქანის ღირებულებაა, 29 ათასი ლარი სამედიცინო დახმარების ცენტრის საკუთარი სახსრები, ხოლო 307 ათას 500 ლარი – ბათუმის მერიის სუბსიდირება.

ჩასანაცვლებელი 9 ავტომანქანა „სამხარაულის ბიურომ“ შეაფასა.

სამედიცინო დახმარების ახალი ავტომანქანები 2016-2017 წლებში უნდა იყოს გამოშვებული. ტენდერი მიმდინარე წლის 20 თებერვალს დასრულდება.

„ბათუმის სასწრაფო სამედიცინო დახმარების ცენტრში“ სულ სასწრაფო სამედიცინო დახმარების 13 ჯგუფია.

აჭარის ავტონომიური რესპუბლიკის სტატუსის შესახებ კანონი არ ადგენს ვინ უნდა შეასრულოს მთავრობის თავმჯდომარის მოვალეობა მისი გადადგომის შემდეგ. როგორ უნდა გაგრძელდეს პროცედურა, თუ თავმჯდომარის ვეტო უმაღლესმა საბჭომ ვერ დაძლია… ამ და სხვა ხარვეზების გამოსასწორებლად უმაღლესმა საბჭომ უნდა იზრუნოს. რა ინციატივებით შევა უმაღლესი საბჭო საკონსტიტუციო კომისიაში? – ამ საკითხზე „ბათუმელებს“ უმაღლესი საბჭოს თავმჯდომარე დავით გაბაიძე ესაუბრა, რომელიც ასევე სახელმწიფო საკონსტიტუციო კომისიის წევრია.

ბატონო დავით, რა ინიციატივებით შეხვალთ კომისიაში, როგორც ვიცით, საკითხები არასამთავრობო სექტორთან უკვე განიხილეთ.

ენჯეოებთან მე ის არ განმიხილავს, თუ რა ინიციატივებით ვაპირებ შევიდე კომისიაში. მე მინდოდა მათგან მომესმინა მოსაზრებები და იდეები ამაზე, მაინტერესებდა ისინი რა ხარვეზებს ხედავენ. მაქვს მოსაზრებები, რომლებსაც მაინცადამაინც არ ვაკონკრეტებ. თუმცა, რამდენიმე მათგანი გავასაჯაროვე და არც თქვენთან დავმალავ. ეს არის მთავრობის ფორმირებასთან დაკავშირებული პროცესები, მთავრობის თავმჯდომარის გადადგომის შემდგომ ურთიერთობების საკითხი, რომელიც ხარვეზის სახით გამოჩნდა. ვეტოს მექანიზმი მთავრობის თავმჯდომარის ხელში და შემგომი დაუსრულებელი საკანონმდებლო პროცედურა, რომელსაც არ აწესრიგებდა აჭარის ავტონომიური რესპუბლიკის სტატუსის შესახებ კონსტიტუციური კანონი.

გარდა ამისა, არის საკითხები, რომლებიც აჭარის ავტონომიური რესპუბლიკის განსაკუთრებულ კომპეტენციას ეხება. თუ გადავხედავთ განსაკუთრებულ კომპეტენციას მიკუთვნებულ საკითხებს, მათი დიდი ნაწილი თვითმმართველობის კოდექსით არის თვითმმართველობის განსაკუთრებული გამგებლობა, აქედან გამომდინარე ამ საკითხებს რაღაც ფორმით დახვეწა ან ამოღება სჭირდება, რომ არ მოხდეს დუბლირება. აჭარის ავტონომიური რესპუბლიკის კომპეტენციების ჩამონათვალში უნდა მოხდეს კოდიფიცირება ან ფორმულირების შეცვლა. მაგალითად, გვაქვს ადგილობრივი მნიშვნელობის გზები, როგორც აჭარის ავტონომიური რესპუბლიკის განსაკუთრებული კომპეტენცია, ამ დროს ადგილობრივი მნიშვნელობის გზები მუნიციპლიტეტის კომპეტენციაა ორგანული კანონით. აქედან გამომდინარე ამას ან უნდა დაერქვას აჭარის ავტონომიური რესპუბლიკის მნიშვნელობის გზები, ან საერთოდ უნდა იყოს ამოღებული და ასეთი ძალიან ბევრი ტექნიკური და არატექნიკური საკითხია, რომლებიც ცვლილებას საჭიროებს. შეხვედრის მიზანი იყო არამხოლოდ ჩემი მოსაზრებები გამეხმოვანებინა საკონსტიტუციო კომისიის წინაშე, არამედ საზოგადოების აზრიც ყოფილიყო გათვალისწინებული და საზოგადოებრივი აზრის გამომხატველია, ნაწილის მაინც, არასამთავრობო ორგანიზაციები.

იყო მათგან საინტერესო წინადადებები?

ვერ გეტყვი, რომ ბევრი, მაგრამ იყო. ასლან ლორთქიფანიძეს ჰქონდა წარმოდგენილი მოსაზრება ავტონომიური რესპუბლიკის მოწყობაზე, მისი პოზიციაა, რომ ავტონომიური რესპუბლიკის სახით კი არ უნდა იყოს მოწყობილი, არამედ პოლიტიკური ნაწილი უნდა ჩამოშორდეს და როგორც რეგიონი, ისე უნდა ჩამოყალიბდეს. ანუ სამართლებრივი ნიშნით უნდა იყოს მოწყობილი. ეს არის აბსოლუტურად განსხვავებული კონცეფცია და რაც შეეხება დანარჩენ მონაწილეებს, მათ  წერილობით ჩამოყალიბებული მოსაზრებები არ ჰქონდათ, მაგრამ ჰქონდათ მინიშნებები ამა თუ იმ საკითხზე, რომელიც შესაძლოა, ჩამოყალიბდეს როგორც ინიციატივა კონსტიტუციურ კანონში ცვლილების შეტანის თაობაზე და ეს ძირითადად დაკავშირებული იყო აჭარის ავტონომიური რესპუბლიკის განსაკუთრებულ გამგებლობას მიკუთვნებულ საკითხებზე. იმავე დღეს შევხვდი აჭარის სამინისტროების იურიდიული დეპარტამენტების ხელმძღვანელებს. ყველაზე კარგად ალბათ სწორედ იურიდიულ დეპარტამენტებში ხედავენ ამა თუ იმ საკითხის არასრულყოფილებას თუ დაუხვეწელობას, აქედან გამომდინარე მათგანაც მოვისმინე საქმიანი მოსაზრებები, რომლებიც ასევე შეიძლება გახდეს საკონსტიტუციო კომისიის მსჯელობის საგანი.

რამდენიმე ხარვეზზე რომ გვითხრათ, რომელთა გამოსწორებაზეც მუშაობა უკვე დაწყებული გაქვთ.

აი, მაგალითად, გადადგა მთავრობის თავმჯდომარე. გადადგომას კონსტიტუციური კანონი არ ითვალისწინებდა. გადადგომის შემდგომ ვის უნდა გაეგრძლებინა უფლებამოვალეობის შესრულება, ეს არ იყო განსაზღვრული. შესაბამისად, დავდექით დილემის წინაშე – ზოგადად, ჩაითვალა თუ არა გადამდგარად მთავრობის თავმჯდომარე, შემდგომ, მას უნდა გაეგრძელებინა მოვალეობის შესრულება, თუ უნდა დანიშნულიყო მოვალეობის შემსრულებელი და ასე შემდეგ. აი, ასეთი ტექნიკური ხარვეზები იყო ძალიან ბევრი. მთავარია შევთანხმდეთ, რომ ეს პრობლემაა და უნდა მოწესრიგდეს, ხოლო როგორ უნდა მოწესრიგდეს, ეს უკვე იურიდიული საკითხია. მთავარია დავინახოთ, რომ იყო პრობლემა და ამას სჭირდება შეცვლა.

ასევე მნიშვნელოვანია უმაღლესი საარჩევნო კომისიის არჩევასთან დაკავშირებული საკითხები. 2013 წელს მთავრობის თავმჯდომარემ გამოიყენა ვეტოს უფლება. ვეტო ვერ იქნა დაძლეული უმაღლესი საბჭოს მიერ, დაბრუნდა მთავრობის აპარატში ხარვეზებით. მაშინ ჩათვალეს, რომ ამას არ ითვალისწინებდა აჭარის ვტონომიური რესპუბლიკის კანონმდებლობა და საკანონმდებლო პროცესი დაუსრულებლად შეწყდა შუა გზაში. არც ხარვეზი გამოსწორდა. ამან აჩვენა, რომ მოწესრიგების ეს სისტემა იყო არასრულყოფილი, რაც არ შეიძლება საკანონმდებლო რეგულაციებში იყოს. ეს საკითხებიც ზუსტდება და აქედან გამომდინარე ძალიან ბევრი ტექნიკური საკითხია, რომელზედაც წლების განმავლობაში ვსაუბრობდით, როცა აღმასრულებელ ხალისუფლებაში ვიყავით. ამას ვამბობდი არა მხოლოდ მე, ზოგადად იურისტები ვთანხმდებოდით, რომ ასე იყო.

ზოგიერთი უწყება საუბრობდა კომპეტენციის ნაკლებობაზე და უფლებების დელეგირებას ითხოვდა. ასეთი ერთ-ერთი იყო, მაგალითად, გარემოს დაცვის სამმართველო.

აქ ჩვენ საკითხები უნდა გავყოთ ორ ნაწილად. ერთი, რომელიც აჭარის განსაკუთრებულ გამგებლობას უნდა მიეკუთვნებოდეს და მეორე, რაზეც დელეგირებას აკეთებს ცენტრალური უწყება. დელეგირების საკითხი და დელეგირების თემა გაცილებით იოლი გადასაწყვეტია და არ არის კონსტიტუციურ კანონში ცვლილების შეტანით მოწესრიგებადი საკითხი.

კომისია კიდევ რა საკითხებზე მუშაობს?

კომისიაში, სამუშაო ჯგუფის შეხვედრაზე, რაზე იყო აქცენტი გაკეთებული, ამაზე საჯაროდ ვერ ვისაუბრებ, რადგან სამუშაო ჯგუფის შეხვედრა იყო დახურული ფორმატის და შესაბამისად, არაეთიკური იქნება დეტალებზე აქცენტირება, თუმცა დაახლოებითი ჩარჩო გითხარით.

4 თებერვალს ბათუმში, გამსახურდიას ქუჩის #35-ში ძველი, სომხურ-კათოლიკური ეკლესიის შენობა ჩამოინგრა.

საზოგადოება „ბათომის“ წევრის, შოთა გუჯაბიძის თქმით, შენობა ჯერ კიდევ ოსმალეთის იმპერიის დროინდელ ბათუმში იყო აგებული,  1877 წელს.  სამლოცველოს ფუნქცია შენობას გასული საუკუნის 20-იან წლებამდე ჰქონდა.

შენობას კულტურული მემკვიდრეობის ძეგლის სტატუსი აქვს. ძველი სომხურ-კათოლიკური ეკლესია საქართველოს საპატრიარქოს ბალანსზე იყო 2012 წლიდან. შენობა წლებია მოუვლელია.

„შენობის სახურავის ჩამონგრევის მიზეზი დიდთოვლობა გახდა. სასულიერო პირი და სომხური დიასპორა მიმართავს საქართველოს ხელისუფლებას და მართლამდიდებლურ ეკლესიას, ეს შენობები გადაეცეს სომხურ კათოლიკურ ეკლესიას, რომ შესაბამისად მოვუაროთ“, – განაცხადა „ბათუმელებთან“ აჭარის სომეხთა კავშირის პრესმდივანმა, არტურ ოგანესიანმა.

აჭარაში მდებარე საკულტო ძეგლების მეთვალყურეობა საქართველოს კულტურული მემკვიდრეობის დაცვის სააგენტოს ევალება.

„ჩვენგან გავა მონიტორინგის ჯგუფი, ოქმი შედგება და ოფიციალურად ეცნობება საქართველოს კულტურული მემკვიდრეობის დაცვის სააგენტოს ამის შესახებ. უნდა ჩამოვიდნენ სპეციალისტები, შეაფასონ და მათი კომპეტენციიდან გამომდინარე იმოქმედებენ.  ნიკა ანთიძე, სააგენტოს ხელმძღვანელი, უკვე საქმის კურსშია“, – უთხრა “ბათუმელებს“ ლაშა ასლანიშვილმა, აჭარის კულტურული მემკვიდრეობის სააგენტოს სამუზეუმო განყოფილების უფროსმა.

აჭარის განათლების მინისტრმა ინგა შამილიშვილმა შაჰინის სკოლა-ლიცეუმის ავტორიზაციის შეჩერებასთან დაკავშირებით განცხადება გააკეთა. ის ამბობს, რომ ჰქონდა გარკვეული ინფორმაცია და კითხვითი ნიშნები ამ საკითხთან დაკავშირებით, თუმცა დაკონკრეტებისგან თავი შეიკავა. მინისტრის თქმით, სამინისტრო უკვე აგროვებს ინფორმაციას სხვადასხვა სკოლაში არსებულ ვაკანსიებზე, სადაც შესაძლებელი იქნება შაჰინის სკოლის მოასწავლეები მობილობით გადანაწილდნენ.

„ჩემთვის როგორც ცნობილია ავტორიზაციის საბჭომ იმსჯელა ამ სკოლაში არსებულ დარღვევებთან დაკავშირებით, მან ჩაატარა გარკვეული მონიტორინგი და მიიღო გადაწყვეტილება. თუმცა არის ვადა, ვიდრე საბოლოო ბრძანება გამოიცემა ამ საკითხთან დაკავშირებით. საბოლოო ბრძანების მიღების შემდეგ ჩვენ მზად ვართ მობილობა განვახორციელოთ საქართველოს კანონმდებლობის ფარგლებში”.

აჭარის განათლების მინისტრი ამბობს, რომ “კონკრეტულად დარღვევებზე ამ შემთხვევაში ვერ ვიასაუბრებთ. იმდენად რამდენადაც საბოლოო დოკუმენტს არ ვიცნობთ…”

ინგა შამილიშვილის თქმით, რადგან ის ცოტა ხნის წინ დაინიშნა თანამდებობაზე, “არ ჰქონდა საშუალება, ჩაეხედა ამ სფეროში”:

“მე ვფლობდი გარკვეულ ინფრომაციას, მქონდა გარკვეული კითხვის ნიშნები, მქონდა გარკვეული დადებითი ინფორმაცია. მე ამ შემთხვევაში ჩემი სუბიექტური აზრის გამოხატვისგან თავს შევიკავებ. ჩვენ ვიმოქმედებთ განათლების და მეცნიერების სამინისტროსთან ერთად და გარწმუნებთ, რომ არც ერთ ბავშვს პრობლემა არ შეექმნება სასწავლო პროცესთან დაკავშირებით. ადგილები იქნება და ჩვენ უკვე ვაკეთებთ გარკვეულ მოთელვას, თუ რომელ სკოლაში რა ვაკანსიებია”.

რაც შეეხება სკოლაში დასაქმებულ საქართველოს 127 მოქალაქეს, რაჭარის განათლების მინისტრს მიაჩნია, რომ სკოლას უნდა ეზრუნა, მსგავსი პრობლემები რომ არ შექმნილიყო: “ის არის კერძო სამართლის იურიდიული პირი, ამიტომ პედაგოგეგბზე მე განცხადებას ვერ გავაკეთებ”.

შაჰინის სკოლის დირექტორის ელგუჯა დავითაძის ინფორმაციით, ავტორიზაციის საბჭომ სკოლას ავტორიზაცია შეუჩერა. მისივე ინფრომაციით, საბჭომ ძირითად დარღვევად სკოლაში  თურქეთის ათი მოქალაქის ჩარიცხვა მიიჩნია.

შაჰინის სკოლის დირქეტორს ეჭვი აქვს, რომ “სკოლის დახურვა არის პოლიტიკური საკითხი”.

გაზეთი ბათუმელები

• ბათუმში შაჰინის სკოლას შესაძლოა ავტორიზაცია შეუჩერდეს
• მტვერი, გოგირდი და აზოტი – როგორი ჰაერია ბათუმში?
• საქართველოს საგარეო ვაჭრობა ევროკავშირისა და დსთ-ის ქვეყნებთან [ინფოგრაფიკა]
• გვენეტაძის გადაწყვეტილებით, საკრებულოს თავმჯდომარის ყოფილ მოადგილეს პატიმრობის ვადა რვა წლით გაეზარდა
• რა საკითხები განიხილა ზურაბ პატარაძემ ნახიჩევანში

გვიპოვეთ ფეისბუკზე

See more

ეკონომიკა

• 

  იანვარში საქართველოს 150 ათასზე მეტი ტურისტი ეწვია

• 

  “სარეკლამო ომი” თბილისში მაგთისა და ჯეოსელს შორის

slideshow, ახალი ამბები

ცაგო კახაბერიძე – 04.02.2017

შაჰინის სკოლის დირექტორი: ეჭვი გვაქვს, სკოლის დახურვა პოლიტიკური საკითხია

ბათუმში არსებული სკოლა-ლიცეუმის – შაჰინის სკოლის დირექტორი ელგუჯა დავითაძე აცხადებს, რომ სკოლისთვის ავტორიზაციის გაუქმების პასუხად ყველა კანონიერ უფლებას გამოიყენებს.

დღეს, 4 თებერვალს გამართულ პრესკონფერენციაზე, დავითაძემ განაცხადა, რომ სკოლის ადმინისტრაცია ამ ეტაპზე მუშაობს ქართველ და უცხოელ ექსპერტებთან და უფლებადამცველებთან და გამოიყენებს მის ხელთ არსებულ ყველა კანონიერ უფლებას, დაიცვას საკუთარი მოსწავლეების და თანამშრომლების უფლებები.

დავითაძის თქმით, სკოლა-ლიცეუმის ადმინისტრაცია პროტესტს გამოთქვამს მიღებულ გადაწყვეტილებაზე, რადგან მონიტორინგის განხორციელების დროს კანონები დაირღვა და უარყოფს იმ ფაქტებს, რომ იყო რაიმე საფუძველი სკოლისთვის ავტორიზაციის შეჩერებისა.

“ძირითადად ყურადღება გამახვილებული იყო აქ მცხოვრებ უცხო ქვეყნის მოქალაქეებზე, რომლებიც ჩარიცხული არიან ჩვენს სკოლა-ლიცეუმში. საუბარი იყო იმაზე, რომ მოხდა ჩარიცხვა არაკანონიერი გზით. თუმცა, ეს ყველაფერი თუ როგორ უნდა მომხდარიყო მათი ჩარიცხვა ქართულ სექტორზე ჩვენ გავიარეთ განათლების ხარისხის განვითარების ეროვნულ ცენტრთან ერთად [რისი ოქმიც არსებობს] და, შესაბამისად, განვახორციელეთ მათი ჩარიცხვა ქართულ სექტორზე”, – განაცხადა დავითაძემ.

შაჰინის სკოლის დირქეტორს ეჭვი აქვს, რომ “სკოლის დახურვა არის პოლიტიკური საკითხი”:

“18 იანვარს თურქეთის მასმედიაში გავრცელდა ინფორმაცია, რომ საქართველო მზად არის დარტყმა მიაყენოს, დახუროს ეს სკოლები და გადაუფორმოს [სკოლები] თურქეთის სახელმწიფოს მიერ გახსნილ საგანმანათლებლო ფონდს, რომელსაც ჰქვია მარიხი. ეს ინფორმაცია შეგიძლიათ ნახოთ თურქეთის ერთ-ერთ ყველაზე მაღალტირაჟიან გაზეთ „საბახში“.

ელგუჯა დავითაძის თქმით, შაჰინის სკოლაში არსებული თურქული სექტორის გაუქმება მათ განათლების სამინისტროს ავტორიზაციის საბჭომ მოსთხოვა:

“სკოლაში არსებობოდა თურქული სექტორი, რომელიც ფუნქციონირებდა 9 წლის განმავლობაში და დღემდე პრობლემა არ შექმნია. ბოლო ავტორიზაციის პერიოდში იყო საკითხი იმაზე, რომ ავტორიზაციას მხოლოდ იმ შემთხვევაში მივიღებდით თუ გავაუქმებდით თურქულ სექტორს. ჩვენ იქვე განვაცხადეთ, რომ ამ სექტორს მეორე დღესვე გავაუქმებდით და ბავშვებს გავუშვებდით სხვა სკოლებში. საბჭოს წევრებმა თქვეს, რომ ეს იქნებოდა ამ ბავშვების უფლებების დარღვევა და ეს უნდა გაგვევლო ეტაპობრივად… თურქულ კლასებში უნდა გაძლიერებულიყო ქართულის სწავლება, სასწავლო პროცესში მშობლებისთვის უნდა მიგვეწოდებინა ინფორმაცია, რომ თურქული სექტორი უქმდებოდა”.

სკოლის დირექტორმა თქვა, რომ სკოლა ორშაბათიდან ჩვეულ რეჟიმში გააგრძელებს მუშაობას, რადგან მათ არ ჩაბარებიათ ავტორიზაციის გაუქმებასთან დაკავშირებული დოკუმენტაცია.

ამ სკოლაში 350 ბათუმელი მოსწავლე სწავლობს.

განათლების ხარისხის განვითარების ეროვნული ცენტრის ცნობით, 3 თებერვალს გამართულ სხდომაზე მიიღეს გადაწყვეტილება, რომ სკოლისთვის ავტორიზაცია გაეუქმებინათ მოსწავლეების ჩარიცხვის საკითხთან დაკავშირებით.

შაჰინის სკოლა მას შემდეგ მოექცა ყურადღების ცენტრში, რაც თურქეთის გენერალურმა კონსულმა ბათუმში თურქეთში მომხდარი გადატრიალების მცდელობის კომენტირებისას აღნიშნა, რომ ბათუმში, შაჰინის სახელობის მეგობრობის ლიცეუმში ტერორისტებს ზრდიან.

კონსულმა მაშინ აღნიშნა, რომ შაჰინის სკოლა-ლიცეუმი ფეტულა გულენის მიმდევრებს ეკუთვნით, რომელიც თურქეთის ხელისუფლებამ თურქეთის პრეზიდენტი ერდოღანი სამხედრო გადატრიალების მცდელობის ავტორად ასახელებს.

მოგვიანებით კონსულმა ეს განცხადება უარყო და თარგმანის არასწორ ინტერპრეტაციას დააბრალა, თუმცა ვიდეომასალაში, რომელიც ტელევიზიებმა გაავრცელეს, ჩანდა, რომ კონსულის განცხადებას საკონსულოს თარჯიმანი თარგმნიდა.

კონსულის განცხადებას დიდი საპროტესტო გამოხმაურება მოჰყვა სოციალურ ქსელებში. ბათუმის შაჰინის სკოლის კურსდამთავრებულები კონსულს პასუხობდნენ, რომ ისინი ტერორისტები არ არიან, ხოლო შაჰინის სახელობის ლიცეუმი ერთ-ერთი საუკეთესოა ბათუმში.

გადატრიალების მცდელობის შემდეგ თურქეთის ხელისუფლებამ ყველა სახელმწიფოს მოსთხოვა ეგრეთ წოდებული გიულენის სკოლების დახურვა. სკოლები დახურეს აზერბაიჯანში.

2016 წლის აგვისტოში, განათლების მინისტრმა ალექსანდრე ჯეჯელავამ განაცხადა, რომ საქართველოს პრემიერ-მინისტრ გიორგი კვირიკაშვილს თურქეთში ვიტის დროს დაგეგმილი იყო უმაღლეს დონეზე შეხვედრა, რომელზეც ასევე განიხილებოდა შაჰინის სკოლის საკითხი.

“რა თქმა უნდა, ჩვენ ძალიან სერიოზულად ვუდგებით თურქეთის ხელისუფლების დამოკიდებულებას. მოგეხსენებათ, რომ ხვალ არის პრემიერის ვიზიტი თურქეთში და იქნება შეხვედრები უმაღლეს დონეზე და მეც ვიქნები ამ გუნდში და ერთ-ერთ საკითხად განვიხილავთ ამას. ჩვენთვის მნიშნველოვანია, რომ, ერთი მხრივ, ჩვენს სტრატეგიულ პარტნიორთან ჩვენს მეგობრობას არაფერი არ ართულებდეს, ხოლო, მეორე მხრივ, მნიშვნელოვანია, რომ ობიექტურად შევაფასოთ სიტუაცია და ერთი ადამიანის განცხადებაზე არ ავაგოთ გადაწყვეტილება”, – ამბობს განათლების მინისტრი.

ბათუმში არსებული სკოლა-ლიცეუმის – შაჰინის სკოლის დირექტორმა ელგუჯა დავითაძემ სკოლისთვის ავტორიზაციის გაუქმებასთან დაკავშირებით ბრიფინგი გამართა.

ელგუჯა დავითაძის თქმით, “3 თებერვალს, თბილისში განათლების ხარისხის განვითარების ეროვნულ ცენტრში გამართულ საბჭოზე განხილული იქნა შპს შაჰინის სახელობის სკოლა-ლიცეუმის ავტორიზაციის საკითხი. შეხვედრაზე კომისიის წევრების უმრავლესობამ მიიღო გადაწყვეტილება სკოლისთვის ავტორიზაციის შეჩერების თაობაზე. თუმცა, ეს არ არის საბოლოო გადაწყვეტილება და ჩვენ ამ ეტაპისთვის ხელთ არ გვაქვს დოკუმეტაცია, რომ სკოლის ლიცენზია ან ავტორიზაცია შეჩერებულია”.

ელგუჯა დავითაძის თქმით, სკოლა-ლიცეუმის ადმინისტრაციამ უკვე მიმართა თბილისის საქალაქო სასამართლოს: “პროტესტს გამოთქვამთ მიღებულ უსამართლო გადაწყვეტილებაზე, რადგან აქვს ადგილი კანონების დარღვევას მონიტორინგის განხორციელების დროს… ძირითადად ყურადღება გამახვილებული იყო აქ მცხოვრებ უცხო ქვეყნის მოქალაქეებზე, რომლებიც ჩარიცხული არიან ჩვენს სკოლა-ლიცეუმში. საუბარი იყო იმაზე, რომ მოხდა ჩარიცხვა არაკანონიერი გზით. თუმცა, ეს ყველაფერი თუ როგორ უნდა მომხდარიყო მათი [სულ 6 მოსწავლე] ჩარიცხვა ქართულ სექტორზე ჩვენ გავიარეთ განათლების ხარისხის განვითარების ეროვნულ ცენტრთან ერთად [რისი ოქმიც არსებობს] და, შესაბამისად, განვახორციელეთ მათი ჩარიცხვა ქართულ სექტორზე”.

შაჰინის სკოლის დირქეტორს ეჭვი აქვს, რომ “სკოლის დახურვა არის პოლიტიკური საკითხი”:

“18 იანვარს თურქეთის მასმედიაში გავრცელდა ინფორმაცია, რომ საქართველო მზად არის დარტყმა მიაყენოს, დახუროს ეს სკოლები და გადაუფორმოს [სკოლები] თურქეთის სახელმწიფოს მიერ გახსნილ საგანმანათლებლო ფონდს, რომელსაც ჰქვია მარიფი. ეს ინფორმაცია შეგიძლიათ ნახოთ თურქეთის ერთ-ერთ ყველაზე მაღალტირაჟიან გაზეთ „საბახში“.

ელგუჯა დავითაძის თქმით, შაჰინის სკოლაში არსებული თურქული სექტორის გაუქმება მათ განათლების სამინისტროს ავტორიზაციის საბჭომ მოსთხოვა:

“სკოლაში არსებობოდა თურქული სექტორი, რომელიც ფუნქციონირებდა 9 წლის განმავლობაში და დღემდე პრობლემა არ შექმნია. ბოლო ავტორიზაციის პერიოდში იყო საკითხი იმაზე, რომ ავტორიზაციას მხოლოდ იმ შემთხვევაში მივიღებდით თუ გავაუქმებდით თურქულ სექტორს. ჩვენ იქვე განვაცხადეთ, რომ ამ სექტორს მეორე დღესვე გავაუქმებდით და ბავშვებს გავუშვებდით სხვა სკოლებში. საბჭოს წევრებმა თქვეს, რომ ეს იქნებოდა ამ ბავშვების უფლებების დარღვევა და ეს უნდა გაგვევლო ეტაპობრივად… თურქულ კლასებში უნდა გაძლიერებულიყო ქართულის სწავლება, სასწავლო პროცესში მშობლებისთვის უნდა მიგვეწოდებინა ინფორმაცია, რომ თურქული სექტორი უქმდებოდა”.

სკოლის დირექტორმა თქვა, რომ სკოლა ორშაბათიდან ჩვეულ რეჟიმში გააგრძელებს მუშაობას, რადგან მათ არ ჩაბარებიათ ავტორიზაციის გაუქმებასთან დაკავშირებული დოკუმენტაცია.

ამ სკოლაში 350 ბათუმელი მოსწავლე სწავლობს. ცენტრის განმარტებით, იმის გამო, რომ სკოლას ავტორიზაციის გარეშე არ აქვს ფუნქციონირების უფლება, მოსწავლეები მობილობის საშუალებით სხვა სკოლებში გააგრძელებენ სწავლას.

შაჰინის სკოლა მას შემდეგ მოექცა ყურადღების ცენტრში, რაც თურქეთის გენერალურმა კონსულმა ბათუმში თურქეთში მომხდარი გადატრიალების მცდელობის კომენტირებისას აღნიშნა, რომ ბათუმში, შაჰინის სახელობის მეგობრობის ლიცეუმში ტერორისტებს ზრდიან.

კონსულმა მაშინ აღნიშნა, რომ შაჰინის სკოლა-ლიცეუმი ფეტულა გულენის მიმდევრებს ეკუთვნით, რომელიც თურქეთის ხელისუფლებამ თურქეთის პრეზიდენტი ერდოღანი სამხედრო გადატრიალების მცდელობის ავტორად ასახელებს.

მოგვიანებით კონსულმა ეს განცხადება უარყო და თარგმანის არასწორ ინტერპრეტაციას დააბრალა, თუმცა ვიდეომასალაში, რომელიც ტელევიზიებმა გაავრცელეს, ჩანდა, რომ კონსულის განცხადებას საკონსულოს თარჯიმანი თარგმნიდა.

კონსულის განცხადებას დიდი საპროტესტო გამოხმაურება მოჰყვა სოციალურ ქსელებში. ბათუმის შაჰინის სკოლის კურსდამთავრებულები კონსულს პასუხობდნენ, რომ ისინი ტერორისტები არ არიან, ხოლო შაჰინის სახელობის ლიცეუმი ერთ-ერთი საუკეთესოა ბათუმში.

გადატრიალების მცდელობის შემდეგ თურქეთის ხელისუფლებამ ყველა სახელმწიფოს მოსთხოვა ეგრეთ წოდებული გიულენის სკოლების დახურვა. სკოლები დახურეს აზერბაიჯანში.

2016 წლის აგვისტროში, განათლების მინისტრმა ალექსანდრე ჯეჯელავამ განაცხადა, რომ საქართველოს პრემიერ-მინისტრ გიორგი კვირიკაშვილს თურქეთში ვიტის დროს დაგეგმილი იყო უმაღლეს დონეზე შეხვედრა, რომელზეც ასევე განიხილებოდა შაჰინის სკოლის საკითხი.

“რა თქმა უნდა, ჩვენ ძალიან სერიოზულად ვუდგებით თურქეთის ხელისუფლების დამოკიდებულებას. მოგეხსენებათ, რომ ხვალ არის პრემიერის ვიზიტი თურქეთში და იქნება შეხვედრები უმაღლეს დონეზე და მეც ვიქნები ამ გუნდში და ერთ-ერთ საკითხად განვიხილავთ ამას. ჩვენთვის მნიშნველოვანია, რომ, ერთი მხრივ, ჩვენს სტრატეგიულ პარტნიორთან ჩვენს მეგობრობას არაფერი არ ართულებდეს, ხოლო, მეორე მხრივ, მნიშნვნელოვანია, რომ ობიექტურად შევაფასოთ სიტუაცია და ერთი ადამიანის განცხადებაზე არ ავაგოთ გადაწყვეტილება”, – ამბობს განათლების მინისტრი.

ჟურნალისტების კითხვას, შესაძლებელია თუ არა სკოლას აკრედიტაცია შეუჩერონ, ალექსანდრე ჯეჯელავამ ასე უპასუხა: “კანონში კონკრეტულად გაწერილია აკრედიტაციის შეწყვეტის კრიტერიუმები. თუ მართლა აღმოჩნდა მტკიცებულებები, ტერორიზმთან ან სხვა სახის უკანონობასთან ბავშვების ჩართვის შესახებ, აუცილებლად ეს იქნება როგორც ადმინისტრაციული, ასევე, შესაძლოა, სისხლის სამართლის დევნის საფუძველი, თუმცა ამ წუთას ასეთი მტკიცებულებები ჩვენ არა გვაქვს”.

გარემოს ეროვნული სააგენტოს ოფიციალური მონაცემებით, 2016 წელს, დეკემბერში, ატმოსფერული ჰაერის  დაბინძურების მონიტორინგი ბათუმში აბუსერიძის ქუჩაზე განთავსებულ სადამკვირვებლო პუნქტზე წარმოებდა. განი­სა­ზღვრებოდა ატმოსფერული ჰაერის შემდეგი დამაბინძურებელი ნივთიე­რებების კონცენტრაციები: მტვე­რი, გოგირდისა და აზოტის დიოქსიდები, ასევე ნახშირჟანგი.

მონიტორინგის შედეგების მიხედვით, „ბათუმის ჰაერში მტვრის  ერთჯერადი მაქსიმალური კონცენტრაცია შესაბამის ზღვრულად დასაშვებ კონცენტრაციას აღემატებო­და 1.4-ჯერ,  ხოლო აზოტის დიოქსიდისა – 1.1-ჯერ.  გოგირდის დიოქსიდისა და ნახშირჟანგის ერთჯერადი მაქსიმალური კონცენტრაციები კი  ნორმის ფარგლებში იყო“.

სააგენტოს ინფორმაციით, დეკემბრის თვეში ატმოსფერული ჰაერის  დაბინძურების მონიტორინგი ბათუმში ასევე წარმოებდა ქათამაძის ქუჩაზე განლაგებულ ავტომატურ სადგურზე და აქაც განისაზღვრებოდა ატმოსფერული ჰაერის შემდეგი დამაბინძურებელი ნივთიერებების კონცენტრაციები: გოგირდისა და აზოტის დიოქსიდები, ნახშირჟანგი, PM₁₀ და PM_2.5.

„ბათუმის ავტომატურ სადგურზე გაზომილი დამაბინძურებელი ნივთიერების  საშუალო თვიური კონცენტრაციები, გარდა აზოტის დიოქსიდისა და ნახშირჟანგისა, ნორმის ფარგლებში იყო. აზოტის დიოქსიდის საშუალო თვიური კონცენტრაცია (0,150 მგ/მ³) 3.8-ჯერ, ხოლო ნახშირჟანგის – 1,3-ჯერ  აღემატებოდა შესაბამის ზღვრულად დასაშვებ კონცენტრაციას“ – აღნიშნულია მონიტორინგის შედეგებში.

გარემოს ეროვნული სააგენტოს ინფორმაციით, 2016 წლის დეკემბერში ქალაქ ბათუმში ჩატარდა ატმოსფერული ჰაერის ინდიკატირული გაზომვები. კერძოდ, ქალაქის 4 წერტილში ჩატარდა 9 ინდიკატორული გაზომვა.

„აქედან აზოტის დიოქსიდის – 4, გოგირდის დიოქსიდის – 1, ბენზოლის – 3 და ოზონის – 1 გაზომვა. შედეგები შედარებული იქნა ევროკავშირის ნორმატივებთან ჰარმონიზებული ატმოსფერული ჰაერის დაბინძურების ინდექსებთან. ყველგან დაფიქსირდა გოგირდის დიოქსიდის, ოზონისა და  ბენზოლის დაბალი ინდექსები. აზოტის დიოქსიდის ინდექსი მხოლოდ ერთ წერტილში იყო დაბალი, ხოლო სამ წერტილში – ტერმინალთან, რუსთაველის ქუჩაზე თეატრთან და ტექნიკურ უნივერსიტეტთან იყო საშუალო“.

2017 წლიდან,  საწარმოები ვალდებულნი არიან ჰაერში გაფრქვეულ  მავნე  ნივთიერებათა  რაოდენობრივი  მაჩვენებლები აღრიცხონ და შემდეგ ეს მონაცემები ელექტრონულად წარადგინონ ყოველი საანგარიშო წლის  ბოლოს. ვადების დარღვევის ან ინფორმაციის მიუწოდებლობის შემთხვევაში, საწარმოები დაჯარიმდებიან.

საქართველოს საავტომობილო გზების დეპარტამენტის ინფორმაციით, ბათუმის შემოვლითი გზის მშენებლობის ფარგლებში, განსახლებას, საერთო ჯამში 774  ოჯახი ექვემდებარება, აქედან 218 ოჯახთან ხელშეკრულება უკვე გაფორმდა.

„ოჯახების უმრავლესობა დათანხმდა შეთავაზებულ პირობებს და განსახლების პროცედურები გრძელდება. დეპარტამენტმა, თავის მხრივ მოსახლეობის განცხადებები განიხილა და დაინტერესებულ პირებს შესაბამისი ინფორმაცია მიაწოდა“ – აცხადებენ დეპარტამენტში.

ბათუმის შემოვლითი გზის პროექტი, 14 კილომეტრიანი ორზოლიანი ასფალტ-ბეტონის გზის, 19 სახიდე გადასასვლელის, 4 სატრანსპორტო კვანძის, 5 გვირაბისა და 57 წყალგამტარი მილის მშენებლობას ითვალისწინებს. პროექტს, ერთობლივად აზიის განვითარების ბანკი (ADB) და აზიის ინფრასტრუქტურის საინვესტიციო ბანკი (AIIB) აფინანსებენ.

„არსებული გზა გადის ტურისტულ და საცხოვრებელ ზონაში, რაც პრობლემას უქმნის  საერთაშორისო სატრანზიტო ტრანსპორტს, რომელსაც ვიწრო ქუჩებში უწევს მოძრაობა. პრობლემის გადასაჭრელად უკვე აშენდა ქობულეთის შემოვლითი გზის პირველი მონაკვეთი და მიმდინარეობს მეორე მოანკვეთის მშენებლობა. აღნიშნულ მონაკვეთებს დაემატება ბათუმის შემოვლითი გზა, რაც სრულად განტვირთავს მოძრაობას აჭარის საკურორტო ზონაში“ – აღნიშნულია დეპარტამენტის მიერ გავრცელებულ განცხადებაში.

ბათუმის შემოვლითი გზის სამშენებლო სამუშაოების ვადა 2017-2020 წლებია.

ბათუმის ახალი შემოვლითი გზა გაივლის: მახინჯაურს, განთიადს, კაპრეშუმს, სალიბაურს, ფერიას, მახვილაურსა და ხელვაჩაურს.

სამშენებლო სამუშაოებისთვის გამოცხადებულ ტენდერში წინადადებების წარდგენის ვადა გასული წლის დეკემბერში იწურებოდა, თუმცა „ბათუმელების“ ინფორმაციით, ეს ვადა 2017 წლის მარტამდე გაგრძელდა.

ფოტო „ბათუმელების“ არქივიდან

ციხეში შესვლის, გამოსვლის, ან სხვა საკანში გადაყვანის დროს, პატიმრებს ციხის ადმინისტრაცია გაშიშვლებას სთხოვს. ზოგიერთი პატიმრის თქმით, მათ ბუქნების გაკეთებასაც აიძულებენ. სასჯელაღსრულების და პრობაციის სამინისტროს დღეს მოუწია პასუხის გაცემა კითხვებზე, რატომ არის ეს საჭირო, როცა არსებობს სკანირების მეთოდი და კიდევ – არის თუ არა ღირსების შემლახავი, როცა ადამიანს გაშიშვლებას და ბუქნების გაკეთებას აიძულებ.

პატიმრების გაშიშვლების ანტიკონსტიტუციურად მიჩნევის თხოვნით სასამართლოს ყოფილმა პატიმარმა, ნანა ფ.-მ მიმართა. სარჩელი საკონსტიტუციო სასამართლოს მეორე კოლეგიამ [თეიმურაზ ტუღუში, ირინე იმერლიშვილი, თამაზ ცაბუტაშვილი] დღეს, 2 თებერვალს, არსებითად განიხილა.

სარჩელის დარეგისტრირების შემდეგ, 2017 წლის 5 იანვარს, სასჯელაღსრულების და პრობაციის მინისტრმა ერთ-ერთ გასაჩივრებულ ბრძანებაში ცვლილება შეიტანა, რომლის მიხედვითაც ბრალდებულს, ან მსჯავრდებულს უფლება აქვს სკანირების მეთოდი აირჩიოს [სკანირების აპარატი ამ ეტაპზე საქართველოში მხოლოდ სასჯელაღსრულების 3 დაწესებულებაში აქვთ]. უარის შემთხვევაში, საპატიმრო დაწესებულების ადმინისტრაცია იტოვებს უფლებას, პატიმარს მოსთხოვოს სკანირება და ე.წ. „სრული შემოწმება“, რაც სხეულის  ნაწილობრივ, ან სრულ გაშიშვლებას გულისხმობს.

„ჩვენი სასარჩელო მოთხოვნა მაინც ძალაში რჩება, რადგან არსებობს ბრძანება #200, სადაც სკანირების შესახებ არაფერი წერია და ციხის ადმინისტრაციას ისევ აქვს უფლება, მოსთხოვოს პატიმრებს გაშიშვლება. გააჩნია, რომელი ბრძანებით იხელმძღვანელებს ციხის ადმინისტრაცია, მათ არჩევანი ისევ აქვთ,“ – მიმართა სასამართლოს მოსარჩელის ინტერესების დამცველმა,  გიორგი გოცირიძემ, „ახალგაზრდა იურისტთა ასოციაციის“ იურისტმა.

„რის გამო შევიდა ბრძანებაში ცვლილება?“ – კითხა მოსამართლე ირინე იმერლიშვილმა სასჯელაღსრულების სამინისტროს იურისტებს. მათი განმარტებით, „ცვლილება დროებითი რეგულაციაა იმისთვის, რომ საპატიმრო დაწესებულებას სკანირების აპარატის გამოყენების სამართლებრივი საფუძველი ჰქონდეს.“

„როგორ განსაზღვრავთ, რა შემთხვევაში შეიძლება გამოიყენოთ სკანირება და როდის „სრული შემოწმება“, რის საფუძველზე მიიღება გადაწყვეტილება? – ეს კითხვა მოსამართლე ირინე იმერლიშვილმა მოპასუხე მხარეს რამდენჯერმე გაუმეორა. სასჯელაღსრულების სამინისტროს იურისტმა მოსამართლეს უპასუხა, რომ  დასკვნით სხდომაზე გასცემს პასუხს სამართლებრივი საფუძვლის შესახებ. იურისტებმა მანამდე აღნიშნეს, რომ სკანირებით, მაგალითად, ვერ აღმოაჩენ, აქვს თუ არა დაზიანება სხეულზე პატიმარს, ან ფარულად ჩაკერებულ ჯიბეს და ასე შემდეგ.

კონკრეტული პასუხი სასჯელაღსრულების სამინისტროს იურისტებმა ვერც „ჩაკერებული ჯიბეზე” დასმულ შეკითხვას გასცეს: „თქვენ ამბობთ, რომ ნებისმიერი პატიმარს შეიძლება ჰქონდეს აკრძალული ნივთი, რომ რისკი არსებობს ნებისმიერ შემთხვევაში. თუკი პატიმარი დათანხმდება სკანირებას, მაგრამ ეს მეთოდი ვერ ადგენს ჩაკერებულ ჯიბეს, როგორ ხდება ამ რისკის დაზღვევა? ხომ არ გამოდის, რომ სკანირებაც და „სრული შემოწმება“ აუცილებელია? იქნებ ასეთი პრაქტიკა არსებობს, რომ ორივეს თანაბრად იყენებთ?” – იკითხა თეიმურაზ ტუღუშმა, კოლეგიის თავმჯდომარემ.

სხდომაზე გიორგი გოცირიძემ ევროპის რამდენიმე ქვეყნის მაგალითი მოიყვანა, სადაც აქტიურად გამოიყენება სკანირების მეთოდი, ხოლო „სრული შემოწმება“ – იშვიათ შემთხვევებში. მორიგ სხდომაზე ის სასამართლოს სკანირების აპარატის ტექნიკურ შესაძლებლობებსაც წარმოუდგენს.

საკონსტიტუციო სარჩელში აღწერილია კონკრეტული შემთხვევაც, როცა ევროპის ადამიანის უფლებათა დაცვის სასამართლომ პატიმრის გაშიშვლება ადამიანის ღირსების შემლახავ მოპყრობად მიიჩნია. ამის შესახებ „ბათუმელები“ გასული წლის ნოემბერში წერდა, როცა ბათუმის ციხიდან ერთ-ერთი პატიმრის წერილი მივიღეთ. პატიმარი დღემდე ვერ ესწრება საკუთარ სასამართლო პროცესებს, რადგან ის უარს აცხადებს სრულ გაშიშვლებასა და ბუქნების გაკეთებაზე, რის გარეშეც ადმინისტრაცია მას ციხიდან გასვლის ნებას არ აძლევს.

„თუკი სრული შემოწმება აუცილებელია, რატომ შემოგაქვთ მაშინ სკანირების აპარატები, რაც როგორც აღნიშნეთ, ძვირადღირებულია?“, – მიმართა კითხვით თეიმურაზ ტუღუშმა სასჯელაღსრულების სამინისტროს წარმომადგენლებს. მათი განმარტებით, სკანირების მეთოდის დანერგვა „გაზრდის სტანდარტს“.

სასჯელაღსრულების სამინისტრო აქცენტირებს იმაზე, რომ პატიმარს იმავე სქესის ადამიანი ამოწმებს გაშიშვლების დროს, ეს ხდება დახურულ ოთახში, რომელსაც არ აქვს ფანჯარა და პატიმარს შეუძლია გაასაჩივროს, თუკი მისი უფლება „სრული შემოწმების“ დროს დაირღვა.

„მსგავსი სარჩელი აქამდე ჩვენ არ გვქონია. ჩვენ წარმოვადგენთ იმ მონაცემებსაც, თუ რამდენი დანაშაულის აღკვეთა მოხდა ამ „სრული შემოწმების“ შედეგად. სკანერი, რაც უნდა დიდი სიმძლავრის იყოს და საუკეთესო ტექნიკური მონაცემების, ის ვერ შეცვლის სრულ შემოწმებას“, – მიმართა სასამართლოს სასჯელაღსრულების სამინისტროს ერთ-ერთმა იურისტმა.

„დაზიანების აღმოჩენა ხსეულზე, რაც მოსაპუხე მხარემ აღნიშნა, არ არის „სრული შემოწმების“ მიზანი. მიზანი პირდაპირ განმარტებულია ბრძანებაში და ეს არის კანონით აკრძალული ნივთების ამოღება, რომლის ტარებაც ეკრძალება ბრალდებულს, ან მსჯავრდებულს. სკანირებით ამ ნივთების აღმოჩენა თავისუფლად შეიძლება“, – განაცხადა სხდომაზე გიორგი გოცირიძემ, მოსარჩელის ინტერესების დამცველმა.

სარჩელის მიხედვით, პატიმრების გაშიშვლება, ან ბუქნების გაკეთების იძულება ეწინააღმდეგება „საქართველოს კონსტიტუციის“ მე-16 მუხლს [პიროვნების თავისუფალი განვითარება], მე-17 მუხლს [ადამიანის წამების, არაჰუმანური, სასტიკი, ან პატივისა და ღირსების შემლახავი მოპყრობისა და სასჯელის გამოყენების აკრძალვა] და მე-20 მუხლს [პირადი ცხოვრების ხელშეუხებლობის უფლება].

გასულ წელს ყველა სახის მშენებლობაზე აჭარის მასშტაბით სულ 1309 ნებართვა გაიცა [საერთო ფართობი: 1,5 მილიონ კვ/მ-ზე მეტი], აქედან 1012 ნებართვა უშუალოდ ქალაქ ბათუმში.

შარშან ყველაზე მეტი – 804 ნებართვა – გაცემულია ბათუმში, საცხოვრებელი შენობების მშენებლობაზე. ამ ასაშენებელი სახლების საერთო ფართობი კი 1 მილიონ კვ/მ-ზე მეტია. საცხოვრებელ შენობებში იგულისხმება როგორც მრავალფუნქციური, ასევე ინდივიდუალური საცხოვრებელი შენობები.

2016 წელს გაცემული ნებართვები აჭარაში მუნიციპალიტეტების მიხედვით:

• ბათუმი – 1039,
• ქობულეთი – 169,
• ხელვაჩაური – 99,
• ხულო – 17,
• შუახევი – 7,
• ქედა – 5.

საქართველოს მასშტაბით გასულ წელს მშენებლობებზე გაიცა 11 031 ნებართვა [საერთო ფართობი თითქმის 6 მილიონი კვ/მ]. ქვეყნის მასშტაბით კი, შარშან გაცემული ნებართვებიდან 221 ნებართვა ადმინისტრაციული, ხოლო 6999 – საცხოვრებელი შენობების მშენებლობაზეა გაცემული.

მონაცემები მოგვაწოდა საქართველოს სტატისტიკის ეროვნულმა სამსახურმა. სამსახურის ინფორმაციით, მშენებლობაზე გაცემული ნებართვების სტატისტიკა დეკლარირებულ მონაცემებზე დაყრდნობით მოამზადეს.

ბათუმში, ახალი მშენებლობების პარალელურად, ისტორიული შენობები ნადგურდება:

როგორ გადავარჩინოთ ბათუმი თვითმკვლელობას?

ისტორიული სახლების ნგრევის სერია ბათუმში

კულტურული მემკვიდრეობის დაცვის პოლიტიკა ძველი ბათუმის ნგრევის ფონზე 

ვაჟა-ფშაველას 13 – გამოცხადებული ნგრევის ქრონიკა

შენობა-ნაგებობის უსაფრთხოების წესების ახალი ტექნიკური რეგლამენტი 2017 წლის პირველი იანვრიდან ამოქმედდა. დოკუმენტთან დაკავშირებით საქართველოს ეკონომიკის სამინისტროს წარმომადგენლებმა ბათუმის მერიისა და აჭარის ფინანსთა და ეკონომიკის სამინისტროს თანამშრომლებთან შეხვედრა გამართეს. ბლიც-ინტერვიუ ფინანსთა და ეკონომიკის სამინისტროს ქალაქმშენებლობის დეპარტამენტის ხელმძღვანელთან, ნუგზარ ძნელაძესთან.

ბატონო ნუგზარ, რას გულისხმობს ახალი რეგლამენტი?

არის გარკვეული სიახლეები დაგეგმარებაში და მშენებლობაში, რაც მოეთხოვება ნებართვის გამცემს, მაკონტროლებელსა და მშენებელს. ახლა გაცნობითი ხასიათის შეხვედრებია [პარალელურად ამ პროცესში ჩართული იქნებიან მერიის მუნიციპალური სამსახურები და მუნიციპალიტეტები] ნათელი რომ იყოს ის სიახლეები, რა ცვლილებებსაც გულისხმობს ნებართვის გაცემა თუ ნებართვის მიღება.

უსაფრთხოების ისეთ რა საკითხებს ითვალისწინებს რეგლამენტი, რასაც ამ დრომდე სამშენებლო რეგულაციები არ ითვალისწინებდა?

ეს ძირითადად მესამე და მეოთხე კლასის შენობებს ეხება, მეხუთე კლასსაც თავისთავად, მაგრამ ბათუმში, ძირითადად, მეხუთე კლასის შენობები შენდება. ძირითადად სახანძრო უსაფრთხოებაზეა საუბარი. იმას, თუ სახანძრო უსაფრთხოებიდან გამომდინარე რა გეგმარებითი მოთხოვნები იქნება აუცილებელი; როგორ დაიგეგმოს შენობა, რომ რაღაც შემთხვევის დროს მაქსიმალურად იქნას შენობაში მყოფი ადამიანების უსაფრთხოება დაცული; ეხება ასევე გეგმარებით ნაწილს შშმ პირებისთვის;  ეს უკავშირდება ასევე ფასადებს, შენობების განთავსებას და ასე შემდეგ.

მხოლოდ ის შენობები იგულისხმება, რომლებიც უნდა აშენდეს, თუ მიმდინარე მშენებლობებიც?

რაც ახლა იგეგმება, იქ მკაცრად რომ იყოს ეს ნორმები დაცული. რაც შეეხება უკვე აშენებულ შენობებს, რაიმე აუცილებლობა თუ იქნება, შეიძლება მერე დადგეს ეს საკითხი დღის წესრიგში. ალბათ უფრო სავარაუდოა, რომ საზოგადოებრივი დანიშნულების შენობებზე რაიმე მოთხოვნები შემოვიდეს. სასტუმროებზე, სავაჭრო ცენტრებზე და ასე შემდეგ. ამ ეტაპზე დოკუმენტი მხოლოდ ახლა მშენებარეს განიხილავს და არა უკვე აშენებულს.

ხომ არ ითვალისწინებს ეს რეგლამენტი მუშების უსაფრთხოების წესების დაცვის გამკაცრებასაც?

ამ საკითხს თავისთავად არეგულირებს შრომის უსაფრთხოების წესი, რომელიც უნდა დაიცვას ნებისმიერმა დეველოპერმა და ობიექტზე უნდა იყოს შრომის უსაფრთხოების ინჟინერი. მესმის, რომ რომ ბევრი სამწუხარო ფატი მოხდა სამშენებლო ობიექტებზე, თუმცა შრომის უსაფრთხოებასთან დაკავშირებულ საკითხებს ეს დოკუმენტი არ ითვალისწინებს.

უკვე ამ რეგლამენტის მოთხოვნათა გათვალისწინებით გაიცემა ნებართვები?

დიახ. ეს დოკუმენტი მოთხოვნებსაც ითვალისწინებს. მშენებლობის ნებართვის გაცემის წესს გულისხმობს მთავრობის 57-ე დადგენილება, ამ დადგენილებაშიც უნდა შევიდეს ცვლილება და ეს ორი დოკუმენტი იყოს ურთიერთთავსებადი. გარდა ამისა, ყველა სხვა სამშენებლო წესიც, ამ დოკუმენტთან თანხვედრაში უნდა მოვიდეს.