Batumelebi

აჭარის ტურიზმის დეპარტამენტის ინფორმაციით, ტურისტული პროდუქტების განვითარების სააგენტოში გიდებისთვის ტრენინგები იწყება. მთიანი აჭარის ტურისტულ მარშრუტებზე გადამზადების მსურველთა რეგისტრაცია სააგენტოში 5 აპრილამდე გაგრძელდება. ტრენინგების ფარგლებში 60 გიდის გადამზადება მთიანი აჭარის 4 ტურისტული მიმართულებით იგეგმება:

მაჭახელას მარშრუტი + მაჭახელას დაცული ტერიტორია
ქედის ღვინის მარშრუტი+ მერისის მარშრუტი
მაღალმთიანი აჭარა – ჩირუხის მარშრუტი, სხალთა – ხიხანის მარშრუტი, ხულო. გოდერძი – მწვანე ტბის მარშრუტი
დაცული ტერიტოერიები: კინტრიში, მტირალა, ისპანი + ფრინველებზე დაკვირვება (სახალვაშო-შუამთა)

ტრენინგების საშუალოდ ორ კვირას გაგრძელდება და მოიცავს თეორიულ და პრაქტიკულ სალექციო პროგრამას, რომელიც როგორც აჭარის ტურიზმის დეპარტამენტში ასევე, უშუალოდ ტურისტულ მარშრუტებზე ჩატარდება. ტრენინგებს ისტორიკოსები, ეთნოგრაფები და ექსკურსიათმძღოლები ჩაატარებენ.

სატრენინგო პროგრამაში ჩართვა მოქმედი გიდების გარდა ნებისმიერ დაინტერესებულ პირს შეუძლია. მსურველებმა ტრენინგში მონაწილეობის მისაღებად უნდა ეწვიონ აჭარის ტურიზმის დეპარტამენტის ტურისტული პროდუქტების განვითარების სააგენტოს ფარნავაზ მეფის 84/86-ში ან გამოგზავნონ CV ელექტრონულ ფოსტაზე Agency@gobatumi.com., ასევე ინფორმაცია, თუ რომელენოვანი გიდია და რომელი მიმართულებით სურს გადამზადება.

დეპარტამენტის ინფორმაციით, 5-დან 15 აპრილამდე ტურისტული პროდუქტების განვითარების სააგენტოში ჩატარდება გასაუბრება, სადაც გადაარჩევენ ტრენინგებში მონაწილეობის მსურველებს და ჩავამენ და შესაბამის სატრენინგო პროგრამაში. ტრენინგები აპრილის ბოლოდან დაიწყება და 15 ივნისამდე გაგრძელდება.

ფოტო: pfr.co.uk

2017 წლის 29 აპრილს დედაენის დღისადმი მიძღვნილი ქართული ენის რესპუბლიკური ოლიმპიადა გაიმართება.

ოლიმპიადაში მონაწილეობას მიიღებენ საქართველოში მცხოვრები უცხოელი მოსწავლეებიც.  პროექტის ორგანიზატორთა ინფორმაციით, ოლიმპიადის მიზანი ქართველ და არაქართველ მოსწავლეებში ქართული ენისადმი ინტერესის გაზრდა, წერითი და ზეპირი მეტყველების კულტურის გამომუშავება, კითხვისა და წიგნიერებისადმი ინტერესის გაძლიერება, ლიტერატურის, როგორც სიტყვის ხელოვნების მეტად აღქმისა და გაცნობიერების უნარის გაზრდაა.

ორგანიზატორთა ინფორმაციით, წელს ოლიმპიადა კამპანია – „ვსწავლობთ ქართულად“ ფარგლებში იმართება.

ოლიმპიადის შესარჩევი ტური 8 აპრილიდან დაიწყება და თბილისის გარდა ქუთაისში, რუსთავსა და მარნეულში ჩატარდება.

ოლიმპიადა ჩატარდება სამ კატეგორიაში – საუკეთესო კალიგრაფი, მხატვრული კითხვის ოსტატი, საუკეთესო მუსიკალური ნომერი.

ოლიმპიადის ორგანიზატორია სკოლა-ლიცეუმი „სხივი“. პროექტის მხარდამჭერი კი საქართველოს განათლების სამინისტრო და საქართველოს ხელნაწერთა ეროვნული ცენტრი.

ბზების ნაცვლად ნებისმიერი სხვა მცენარით ბზობის აღნიშვნისკენ დღეს, 2 აპრილს, საკვირაო ქადაგების დროს დეკანოზმა სერგი რუხაძემ მოუწოდა მრევლს. ის ბათუმის წმინდა ნიკოლოზის ტაძრის წინამძღვარია. ქადაგების დროს მან გადაშენების პირას მყოფ ბზაზე ისაუბრა და მორწმუნეებს დართო ნება, მომავალ კვირას, ბზობის დღესასწაულზე ტაძარში სხვა მცენარით მივიდნენ.

არის თუ არა ეს მართლმადიდებელი ეკლესიის გადაწყვეტილება – ეპისკოპოს დიმიტრის რეზიდენციაში „ბათუმელებს“ უთხრეს, რომ ფაქტის შესახებ ინფორმირებული არ არიან. „არ ვიცი, თვითონ მამა სერგის ჰკითხეთ, ვისგან ჰქონდა კურთხევა“, – გვითხრა მიტროპოლიტ დიმიტრის მდივანმა, თამარ ჩხაიძემ.

დეკანოზი სერგი რუხაძე: „ასე იყო კი, რაა ამაში ცუდი? ბზა გადაშენების პირასაა და კიდევ მოვატეხოთ ტოტები, არ იქნება კარგი. ეს ჩემი პირადი განწყობაა. ბზის გარეშეც შესაძლებელია ბზობის დღესასწაულის ჩატარება. ისრაელში საერთოდ არ არის ბზის კულტურა. იქ მაცხოვარს შეხვდნენ პალმის რტოებით, ან საკუთარ შესამოსელს უფენდა ხალხი პატივისცემის ნიშნად. ჩვენთან დამკვიდრდა ბზის ტრადიცია, რადგან ბზა ყოველთვის  ბევრი იყო აქ.“

კითხვაზე, ვისთან შეთანხმებით მიიღო ეს გადაწყვეტილება, სერგი რუხაძემ გვიპასუხა: „ეს არის ჩემი პირადი განწყობა. ეკლესიაში სხვა სასულიერო პირებთან ამაზე საუბარი არ მქონია…“

სერგი რუხაძემ მრევლს მისცა კურთხევა ბზის ნერგებითაც აღნიშნონ ბზობის დღესასწაული, თუკი ამის შესაძლებლობა იქნება.

გაყიდის თუ არა თავად ეკლესია ბზის ნერგებს? – წმინდა ნიკოლოზის ტაძრის წინამძღვარი ამის შესახებ ჯერ ვერაფერს ამბობს.

კოლხური ბზა წითელ ნუსხაშია შეტანილი, როგორც საფრთხის ქვეშ მყოფი სახეობა, რომელიც ამ ეტაპზე ნადგურდება.

ენდემური მცენარე კოლხური ბზა საქართველოს „წითელ ნუსხაშია“ შეტანილი. საქართველოს ადმინისტრაციულ სამართალდარღვევათა კოდექსის 64/1 მუხლის მიხედვით, ბზის, როგორც წითელი ნუსხით დაცული სახეობის მოჭრა, ამოძირკვა და ტოტების დაზიანება დასჯადი ქმედებაა. საჯარიმო სანქციების ოდენობა 200-დან 500 ლარამდეა, ხოლო იმ შემთხვევაში, თუ გარემოსთვის მიყენებული ზიანი 1000 ლარს აჭარბებს, სისხლის სამართლის საქმის წარმოება დაიწყება.

საქართველოს პარლამენტი მაღალი კლასის ავტოსატრანსპორტო საშუალებებს მძღოლებთან ერთად დაიქირავებს, რაშიც 150 ათას ლარამდე გადაიხდის. ტრანსპორტის დაქირავების მიზანია ნატოს საპარლამენტო ასამბლეისა და სესიის ფარგლებში სხვა ღონისძიებების მონაწილეების [სავარაუდოდ, 500-600 ადამიანის] მომსახურება.

შესაბამის ტენდერში წინადადებების მიღება 4 აპრილს დაიწყება და 6 აპრილს დასრულდება. სატენდერო პირობების მიხედვით, მიმწოდებელმა უნდა უზრუნველყოს ასევე ავტოტრანსპორტის უცხოური ენების მცოდნე კოორდინატორებით მომსახურება, კერძოდ:

• თბილისის საერთაშორისო აეროპორტის, ღონისძიების მონაწილეთათვის განკუთვნილი ყველა სასტუმროს და ღონისძიების ჩატარების ადგილის საინფორმაციო კუთხეების კოორდინატორებმა უნდა უზრუნველყონ სტუმრების შეუფერხებელი განთავსება ავტოსატრანსპორტო საშუალებებში, ხოლო ავტოტრანსპორტის პარკირების ადგილებისთვის გამოყოფილმა კოორდინატორებმა უნდა უზრუნველყონ ავტოტრანსპორტის შეუფერხებელი გადაადგილება;
• მიმწოდებელმა უნდა უზრუნველყოს კოორდინატორებს შორის სწრაფი და ეფექტიანი კომუნიკაცია;
• თბილისის საერთაშორისო აეროპორტში, ღონისძიების ჩატარების ადგილის საინფორმაციო კუთხესთან და ავტოტრანსპორტის პარკირების ადგილზე (ადგილების გამოყოფას უზრუნველყოფს პარლამენტი) უნდა განთავსდეს ინგლისური და რუსული ენების მცოდნე ორ-ორი კოორდინატორი შესაბამისი საპროტოკოლო ჩაცმულობით.

მომსახურების მიწოდების პროცესში ჩართული მძღოლები:

• არ უნდა იყვნენ დაჯარიმებული საქართველოს ადმინისტრაციულ სამართალდარღვევათა კოდექსის 116-ე მუხლის და 125-ე მუხლის მე-4 პუნქტით ბოლო ერთი წლის განმავლობაში;
• მძღოლები უნდა იყვნენ ორგანიზებულნი, მოწესრიგებულნი, პუნქტუალურნი, შესაბამისი საპროტოკოლო ჩაცმულობით;
• ავტოსატრანსპორტო საშუალების მართვის პერიოდში მძღოლები არ უნდა ეწეოდნენ თამბაქოს.

პარლამენტი რამდენიმე ერთეულ მაღალი კლასის ავტობუსს, მიკროავტობუსს, ავტომანქანას [VIP], ასევე მსუბუქი კლასის ავტომანქანასა და ბარგის დახურულ მიკროავტობუსს დაიქირავებს. დაქირავებული ტრანსპორტით მომსახურება, შესყიდვების ვებგვერდის მიხედვით, უნდა განხორციელდეს საჭიროების მიხედვით, სავარაუდოდ, 2017 წლის 24 მაისიდან 2017 წლის 30 მაისის ჩათვლით.

საქართველოს პარლამენტის ინფორმაციით, 2017 წლის 26-29 მაისს ნატოს საპარლამენტო ასამბლეის საგაზაფხულო სესია თბილისში გაიმართება.

ღონისძიების ორგანიზებისთვის პარლამენტი 3 მილიონი ლარის ფარგლებში პირდაპირ შესყიდვაზე თანხმობასაც ითხოვდა, რაც შესყიდვების სააგენტომ 28 მარტს დააკმაყოფილა.

„უკვე მეხუთე წელია მნიშვნელოვან გამოწვევად რჩება აჭარაში, კერძოდ, ყოფილი 25-ე და 53-ე ბატალიონების ტერიტორიაზე თვითნებურად მცხოვრები პირების სოციალურ-ეკონომიკური მდგომარეობის შესწავლა და მათ საჭიროებებზე მორგებული დახმარებების შეთავაზების საკითხი,“ – აღნიშნავს სახალხო დამცველი ე.წ. „ოცნების ქალაქის“ შესახებ საპარლამენტო ანგარიშში, რომელიც პირველ აპრილს გამოქვეყნდა.

ომბუდსმენის შეფასებით, სამთავრობო კომისიამ ვერ დადო ამ საკითხზე სტრატეგია და რეკომენდაცია, რომელიც თავშესაფრის არმქონე პირების მდგომარეობას გააუმჯობესებდა. „არ მომხდარა „კარდაკარის“ მეთოდით შესწავლა და კომისიამ მუნიციპალიტეტების გამგებლებს დაავალა მათ ტერიტორიაზე მცხოვრები ამ ოჯახების მონაცემების შეგროვება,“ – ვკითხულობთ სახალხო დამცველის ანგარიშში.

„ოცნების ქალაქზე“ სახალხო დამცველი ხელისუფლებას სხვადასხვა რეკომენდაციით მიმართავს 2013 წლიდან. ამჯერად უჩა ნანუაშვილი კონკრეტულ რეკომენდაციას პარლამენტს სთავაზობს: „სოციალური დახმარების შესახებ“ საქართველოს კანონში განხორციელდეს უსახლკარო პირის არსებული დეფინიციის კორექტირება და სრულყოფა, რათა მან მოიცვას უსახლკაროების სხვადასხვა ფორმა, რომლებიც საერთაშორისო სტანდარტების მიხედვით, სათანადო საცხოვრებლის უფლების სუბიექტებს წარმოადგენენ“.

ამავდროულად, ომბუდსმენი მიმართავს მთავრობას რეკომენდაციით, ადამიანის უფლებათა დაცვის ეროვნულ სტრატეგიაში „ოცნების ქალაქის“ პრობლემის მოსაგვარებლად გაიწეროს კონკრეტული ღონისძიებები.

ამავე თემაზე:

„ოცნების ქალაქი აღებაშია?“ – ავტობანი და კომპენსაციის მოლოდინები 

ამ წუთებში [14:20] ბათუმში, ბარბარეს სახელობის ეკლესიის მიმდებარე სკვერში დეკანოზ გიორგი მამალაძის მხარდამჭერი აქცია იმართება. აქციაზე არ ისმის მიმართვის ტექსტები.

აქციის ერთ-ერთი მონაწილე, გიგა მოწყობილი აცხადებს, რომ საქმის სირთულიდან გამომდინარე ეს არ იქნება ერთჯერადი აქცია და აუცილებლად გაგრძელდება.

„დღეს შევიკრიბეთ ნიშნად სოლიდარობისა მამა გიორგის მეგობრები, მრევლი, ნათესავები და მხარდაჭერას ვუცხადებთ დაკავებულ დეკანოზს… ამ უსამართლობასთან ბრძოლაში მამა გიორგი არ იქნება მარტო. მინდა, რომ ის ილუზიები გავაქარწყლოთ, რაც საზოგადოებაში სუფევს, რომ თითქოს მამა გიორგი არის ამ უსამართლობასთან ბრძოლაში მარტო.

რაც შეეხება გამოძიებას, გარკვეული ეჭვები გამოძიებასთან მიმართებაში ოჯახის წევრებს და მის მეგობრებს გაგვაჩნია“.

„მღვდელი რასაც იტყვის, ის მართალია. ამბიონიდან, როცა გეტყვის ადამიანი, გიყვარდეთ ერთმანეთიო, როგორ შეიძლება, მისი არ გჯეროდეს? არ ვიცი, რატომ არ არიან აქ სასულიერო პირები.  როგორც ჩანს, ყველა მოლოდინის რეჟიმშია. მე მიკვირს, რა აკეთებს აქამდე გამოძიება, რატომ ვერ დადეს მტკიცებულებები?“ – ამბობს ნინო ჯიმშელაძე, დეკანოზ გიორგი მამალაძის მრევლის წევრი.

მრევლის კიდევ ერთ წევრს, ნანა მამულაიშვილსაც არ სჯერა გამოძიების ოფიციალური ვერსიის: „მამა გიორგი ციანიდს არ იყიდდა. ის სამი ქართველი ბიჭის მამაა, ორი ძმა ჰყავს და ერთი და, ასეთ ნაბიჯზე როგორ წავიდოდა? ის ჩემი მოძღვარი იყო და მე მისი მჯერა“.

ალექსანდრე მეტრეველი, გიორგი მამალაძის მეზობელი: „აქ ის ადამიანები შევიკრიბეთ, ვისაც გვჯერა გიორგის სიმართლის. მტკიცებულებები, რაც პროკურატურამ გამოაქვეყნა, არავისთვის არაა დამაჯერებელი და მე რატომ უნდა მჯეროდეს?“

აქციაზე ძირითადად დეკანოზ გიორგი მამალაძის მეგობრები, მეზობლები, მრევლის წევრები და ნათესავები იმყოფებოდნენ. აქციას არ დასწრებიან სასულიერო პირები. გიორგი მამალაძე წლების განმავლობაში სწორედ ბათუმში ბარბარეს სახელობის ეკლესიის წინამძღვარი იყო.

პროკურატურამ დეკანოზი გიორგი მამალაძე 10 თებერვალს დააკავა, როცა ის ბერლინში მიემგზავრებოდა. მას ბრალად ედება პატრიარქის მდივნის შორენა თეთრუაშვილის მკვლელობის მომზადება და  ცეცხლსასროლი იარაღის მართლსაწინააღმდეგოდ შეძენა-შენახვა (საქართველოს სისხლის სამართლის კოდექსის 18-108-ე და 236-ე მუხლები), რაც სასჯელის სახედ და ზომად ითვალისწინებს თავისუფლების აღკვეთას ვადით შვიდიდან თხუთმეტ წლამდე.

სასჯელაღსრულების ბათუმის მე-3 დაწესებულებაში სხეულის დაზიანების მაჩვენებელი 2016 წელს, გასულ წელთან შედარებით, 19-დან 212-მდე გაიზარდა. მონაცემები სახალხო დამცველის საპარლამენტო ანგარიშში წერია, რომელიც ომბუდსმენმა გუშინ, პირველ აპრილს გამოაქვეყნა.

სახალხო დამცველის ანგარიშის მიხედვით, კონკრეტულად ბათუმის ციხეში, სხეულის დაზიანების კატეგორიებიდან თვითდაზიანების მაჩვენებელი ყველაზე მაღალია [2015 წელს – 0, 2016 წელს – 180]. საყოფაცხოვრებო მიზეზით სხეულის დაზიანების 26 შემთხვევა დაფიქისირებულა გასულ წელს [2015 წელს იყო სულ 16]. ბათუმის ციხეში 2016 წელს 9 შემთხვევა დადასტურდა, როცა პატიმარს სხვა პირმა მიაყენა დაზიანება. 2015 წელს ამ გრაფის გასწვრივ ასევე წერია – ნული.

სასჯელაღსრულების სამინისტროს ინფორმაციაზე დაყრდნობით, ომბუდსმენის ანგარიშში სასჯელაღსრულების ყველა დაწესებულებაში სხეულის დაზიანების მაჩვენებელია მოცემული. ჯამში ეს რაოდენობა 2016 წელს 3853-ს შეადგენს, 2015 წელს კი სასჯელაღსრულების დაწესებულებებში სულ 3892 სხეულის დაზიანების შემთხვევა დაფიქსირებულა.

ომბუდსმენი თავის ანგარიშში ბათუმის ციხის სხვა პრობლემებზეც წერს, მაგალითად, სანიტარული ნორმების დაუცველობასა და უჰაერობაზე საკნებში.

„დაწესებულების სამედიცინო პერსონლის მიერ მოწოდებული ინფორმაციის თანახმად, პატიმრებს აწუხებთ ტკივილი წელის არეში, რასაც „ნარის სიმპტომს“ უწოდებენ, რაც განპირობებულია უმოძრაობით და მცირე ფართის საწოლზე ერთ პოზაში წოლით. მათ ასევე აქვთ კუჭ-ნაწლავის დაავადებები, გამოწვეული უმოძრაობით, კვების და ძილის რეჟიმის დარღვევით, ხშირია თავის ტკივილები, რასაც სამედიცინო პერსონალი საკანში უჰაერობას/ჟანგბადის ნაკლებობას უკავშირებს… მე-3 დაწესებულების სასეირნო ეზოში მხოლოდ ერთი ტურნიკია დამონტაჟებული. პატიმართა ფიზიკური აქტივობების უზრუნველსაყოფად, მნიშვნელოვანია, სასეირონო ეზოების სავარჯიშო ინვენტარით აღჭურვა,“ – ვკითხულობთ სახალხო დამცველის ანგარიშში.

სახალხო დამცველი ბათუმის ციხეში ასევე აფიქსირებს ციხიდან გამოგზავნილი წერილების რეგისტრაციის პრობლემას.

„პატიმრების განცხადებით, მათ არ აქვთ შესაბამისი წერილობითი დოკუმენტი, რომლითაც ისინი დაამტკიცებდნენ წერილის სოციალური მუშაკისთვის გადაცემის ფაქტს,“ – აღნიშნავს ომბუდსმენი.

ანგარიშის მიხედვით, ბათუმის მე-3 დაწესებულებაში მყოფ პატიმრებს არ მიეწოდება ჟურნალ-გაზეთები, „ბათუმელების“ გარდა.

შინმოვლის პროგრამა ხელვაჩაურში აღარ ფინანსდება. ეს პროგრამა ქრონიკული დაავადების მქონე მოხუცების ადგილზე მოვლას გულისხმობს. ორთაბათუმის თემში მცხოვრები 47 ადამიანისთვის გასულ წელს შინმოვლას გერმანული ფონდი აფინანსებდა.

ხელვაჩაურის მუნიციპალიტეტის გამგეობა პროექტში, რომლის ღირებულებაც დაახლოებით 40 ათასი ლარი იყო,  მხოლოდ 2500 ლარით მონაწილეობდა. გამგეობისგან გამოყოფილი თანხა, ძირითადად, მედიკამენტების შეძენას მოხმარდა. კოალიციაში „შინმოვლა საქართველოში“, რომელიც ამ პროგრამას ხელვაჩაურში ახორციელებდა, გვითხრეს, რომ დონორი ორგანიზაცია პროექტის გაგრძელებას აღარ გეგმავს.

„ეს იყო სიმბოლური ჟესტი, რომ ადგილობრივ მთავრობას მსგავსი პროგრამის განხორციელების საჭიროება დაენახა და საფუძველი შექმნილიყო მისი შემდგომი განვითარების,“ – გვითხრა უჩა ვახანიამ, კოალიციის „შინმოვლა საქართველოში“ ხელმძღვანელმა.

უჩა ვახანია უკვე შეხვდა და წინადადებაც შესთავაზა ხელვაჩაურის მუნიციპალიტეტის წარმომადგენლებს, მათ შორის, გამგებელ ნადიმ ვარშანიძეს.

„შეხვედრას ესწრებოდნენ ასევე ხელვაჩაურის საკრებულოს წევრები, სოციალური სამსახურის უფროსი. დამრჩა შთაბეჭდილება, რომ ყველა მხარე მხურვალედ უჭერს ამ იდეას მხარს. მერე როგორ იქნება, არ ვიცი. ნადიმ ვარშანიძე დაგვპირდა, რომ განიხილავენ ჩვენს წინადადებას, რაც ადგილობრივი ექთნების სპეციალურად შინმოვლისთვის გადამზადებას გულისხმობს. ბუნებრივია, მუნიციპალიტეტი მხოლოდ ერთი თემისთვის ვერ განახორციელებს პროექტს. ჩვენ მათ შევთავაზეთ მაქსიმალურად მოქნილი და იაფი პროექტი“, – გვიყვება უჩა ვახანია.

ბათუმის გარდა, შინმოვლის პროგრამა აჭარის რეგიონის არც ერთ მუნიციპალიტეტში არ ხორციელდება. პროგრამის ბიუჯეტი წელს შეამცირა ბათუმის მერიამაც იმ მოტივით, რომ შინმოვლის განხორციელებაში საქველმოქმედო ორგანიზაცია „კარიტასი“ ჩაერთო. გასულ წელს ბათუმის მერიამ შინმოვლისთვის 79 920 ლარი დახარჯა. წელს ამ პროგრამისთვის ბიუჯეტიდან 55 080 ლარი დაიხარჯება. პროგრამით დაახლოებით 90 ადამიანი სარგებლობს, თუმცა მიმართვიანობა პროგრამაში ჩართვაზე გაცილებით მაღალია.

ამავე თემაზე:

საწოლს მიჯაჭვულები და სახელმწიფო

ტურისტული სეზონისთვის 4 კონცერტის ორგანიზებაზე ტენდერი აჭარის განათლების, კულტურისა და სპორტის სამინისტრომ გამოაცხადა საწყისი ფასით –  90 ათასი ლარი. ტენდერის აღწერილობაში წერია, რომ კონცერტები ბათუმში, ქობულეთში, გონიოსა და გოდერძზე უნდა მოეწყოს.

კონცერტების ორგანიზებას სავარაუდოდ აჭარის განათლების სამინისტროს დაქვემდებარებული – „ბათუმის სახელმწიფო მუსიკალური ცენტრი“ განახორციელებს. ცენტრმა სამინისტროს ელექტრონულ ტენდერში 79 998 ლარად შესთავაზა ამ სამუშაოს განხორციელება. ტენდერში მონაწილეობდა ინდ. მეწარმე „ლაშა კვარაცხელიაც“, რომელმაც იმავე კონცერტების ორგანიზება  გაცილებით დაბალ ფასად, 73 730 ლარად შესთავაზა.

ტენდერის წესებიდან გამომდინარე, გამარჯვებული ისაა, ვინც ნაკლებ ფასად სთავაზობს სახელმწიფო უწყებას კონკრეტული მომსახურების გაწევას, მაგრამ ინდ. მეწარმე „ლაშა კვარაცხელიას“ განათლების სამინისტროს სატენდერო კომისიამ დისკვალიფიკაცია მიანიჭა. კომისიის შეფასებით, ფესტივალების ჩატარების დამადასტურებელი 3 დოკუმენტიდან ერთ-ერთით არ დასტურდება ფესტივალის ჩატარება, ხოლო წარსულში სამი ფესტივალის ჩატარება ტენდერის ერთ-ერთი სავალდებულო მოთხოვნა იყო.

ლაშა კვარაცხელიამ სატენდერო კომისიის გადაწყვეტილება შესყიდვების სახელმწიფო სააგენტოს დავების საბჭოში გაასაჩივრა. ის საქართველოს კანონმდებლობაზე აკეთებს აქცენტს, სადაც ტერმინი „ფესტივალი“ განმარტებული არ არის და ეს ტერმინი არც ამ კონკრეტული ტენდერის აღწერილობაში გვხდება:

„ჩვენთვის გაუგებარია, რატომ შემოიფარგლა სატენდერო კომისია დოკუმენტის მხოლოდ ზედაპირული შეფასებით და რატომ არ განიხილა მისი შინაარსი, რომლის მიხედვითაც შემსრულებელმა განახორციელა 3-დღიანი გასართობი ღონისძიებების ორგანიზება, მათ შორის, სხვადასხვა ჟანრის კონცერტების და თეატრალური წარმოდგენების,“ –  ვკითხულობთ „ლაშა კვარაცხელიას“ მიერ დავების საბჭოსთვის მიმართულ საჩივარში.

„საქართველოს კანონმდებლობა არ იძლევა ტერმინ „ფესტივალის“ განმარტებას. საბაზრო ურთიერთობებსა და ხელოვნებაში კი ფესტივალს მრავალნაირი გაგება აქვს. აღსანიშნავია ის ფაქტიც, რომ მოცემულ ტენდერშიც საერთოდ არაა სიტყვა ფესტივალი ნახსენები. თუმცა მოთხოვნებში წერია, რომ პრეტენდენტს კონცერტებთან ერთად, უნდა გააჩნდეს ფესტივალის ჩატარების გამოცდილებაც. ლოგიკურად თუ ვიმსჯელებთ, მსგავსი მოთხოვნა შემსყიდველმა ჩადო იმის გამო, რომ მოცემული ტენდერის შესყიდვის ობიექტი მათი შეფასებით წარმოადგენს ასევე ფესტივალს და არა უბრალოდ კონცერტს. შესყიდვის ობიექტი კი ასეთია: „ღონისძიების ორგანიზება, კერძოდ, კონცერტების ორგანიზება ტურისტულ სეზონზე აჭარის რეგიონში ადგილობრივი ბენდების მონაწილეობით“. ჩვენ მიერ წარმოდგენილ ხელშეკრულებაში კი მითითებულია, რომ 3 დღის განმავლობაში 9 საკონცერტო წარმოდგენა გაიმართა, სადაც სხვადასხვა ბენდი მონაწილეობა“, – აღნიშნულია საჩივარში.

საჩივარს შესყიდვების სააგენტოს დავების საბჭო არ განიხილავს. სააგენტოს ინტერნეტგვერდზე უკვე განთავსებულია პასუხი, სადაც წერია, რომ გასაჩივრებისთვის დადგენილი 5-დღიანი ვადა 28 მარტს უკვე გავიდა, ხოლო ინდმეწარმემ სააგენტოს 29-ში მიმართა.

სატენდერო კომისიაში დოკუმენტაცია უკვე წარადგინა „ბათუმის სახელმწიფო მუსიკალურმა ცენტრმა“. ამ დოკუმენტების განხილვას და საბოლოო გადაწყვეტილების მიღებას აჭარის განათლების სამინისტროს სატენდერო კომისია მომავალ კვირას გეგმავს.

საქართველოს სახელმწიფო უსაფრთხოების სამსახურის [სუს] დროებითი მოთავსების იზოლატორში მყოფ პირთა სადღეღამისო კვების ნორმები, სუსის სამსახურის უფროსმა, ვახტანგ გომელეურმა ორი დღის წინ დაამტკიცა.

„ჩემი სიცოცხლე შენს ხელშია“, „სიჩქარე კლავს“ „გამიფრთხილდი, მე შენი მომავალი ვარ“-  ასეთი პოსტერებით გამოვიდნენ დღეს ბათუმში, #3 საჯარო სკოლის მოსწავლეები ქუჩაში და მძღოლებს სიფრთხილისკენ მოუწოდეს. აქცია, რომლის მიზანიც ავტოავარიების პრევენციაში მოსწავლეთა წვლილის შეტანა იყო, #3 საჯარო სკოლასთან არსებული კლუბის „შემოქმედთა სივრცის“ წევრებმა დაგეგმეს.

„ასე გვინდოდა გამოვხმაურებოდით გახშირებულ ავარიებს, რომელიც ხშირად მთავრდება მსხვერპლით. ჩვენი სკოლა მდებარეობს ქუჩაზე, სადაც ინტენსიური მოძრაობაა.  ხშირად მოდიან ბავშვები სკოლაში დათრგუნულები, შეშინებულები, ამბობენ, რომ არ უთმობენ გზას მძღოლები, არ აძლევენ ზებრაზე გადასვლის საშუალებას და ეს არის ძალიან სერიოზული პრობლემა, ამიტომ დავგეგმეთ ეს აქცია,  ძალიან დაგვეხმარა სკოლის დირექტორის მოადგილე ილონა ადამია, პოსტერები მისი ინიციატივით დაიბეჭდა“  – ამბობს ირმა ვადაჭკორია, კლუბის ხელმღვანელი და აქციის ერთ-ერთი ორგანიზატორი.

მისი თქმით, აქციას მძღოლები ძალიან პოზიტიურად შეხვდნენ. „ძალიან აქტიურობდნენ მძღოლები, სიგნალს გვაძლევდნენ, გვეხმიანებოდნენ…  ვფიქრობ, კარგი იქნება, თუ სხვა სკოლებიც გამართავენ მსგავს აქციებს.  სამწუხარო იყო, რომ აქციის მანძილზე არ ჩამოუვლია პატრულს, რომლისთვისაც გვქონდა ასევე გამზადებული პოსტერები“ – ამბობს ირმა ვადაჭკორია.