11-12 მარტის აქციაზე დაკავებულების საქმეზე რამდენიმე ბათუმელი ახალგაზრდა აქციის მოწყობას გეგმავს ლოზუნგით – ციხე არ არის გამოსავალი. აქცია ბათუმში, „აჭარის ტელევიზიის“ შენობასთან 4 აპრილს, საღამოს 6 საათზე გაიმართება. აქციაზე დაკავებულების ახლობლები სპეციალურ მოთხოვნებსაც გააჟღერებენ.
„ამ აქციით გვსურს მივმართოთ მთავრობასა და პროკურატურას, რათა პროცესები გამჭვირვალე და სამართლიანი იყოს. სამართლიანობაში იგულისხმება პროვოკატორთა საკადრისი დასჯა, რომლებმაც დეზინფორმაცია გაავრცელეს, ხოლო გამჭვირვალობაში – გამოძიების დროს აყვანილთა მიმართ უდანაშაულობის პრეზუმფციის დაცვა და მათ მიმართ კანონით გათვალისწინებული ქმედებების განხორციელება. ოჯახის წევრები ამბობენ, რომ დაკავებულთა მიმართ ხორციელდება ფიზიკური ძალადობა,“ – ამბობს „ბათუმელებთან“ გოჩა სურგულაძე. ის სტუდენტია და ამ აქციის ერთ-ერთი ორგანიზატორი.
გოჩა სურგულაძე ამბობს, რომ აქციის ორგანიზატორები პოლიტიკურ პარტიებს ემიჯნებიან, ხოლო „აჭარის ტელევიზიასთან“ აქცია გაიმართება იმიტომ, რომ მათი მოთხოვნები პირდაპირ ეთერში გადაიცეს.
„ბათუმის აქციის საქმეზე“ პროკურატურამ ბრალი 19 პირს წაუყენა, მათგან 18 წინასწარ პატიმრობაშია, ხოლო ერთი არასრულწლოვანი – გირაოს სანაცვლოდ გაათავისუფლა ბათუმის საქალაქო სასამართლომ. გამოძიება ბრალდებულებს მასობრივი არეულობის მოწყობას, პოლიციელებსა და საჯარო უწყებებზე თავდასხმას ედავება. ბრალის დადასტურების შემთხვევაში, მათ 7-დან 11 წლამდე პატიმრობა ელით.
“ბათუმის აქციის საქმეზე“ დაკავებულებს 7-დან 11 წლამდე პატიმრობა ემუქრებათ
პოლიცია „ბათუმის აქციის“ მონაწილეებთან წაგებულ საქმეებს ასაჩივრებს
