2017 წლის 30 მარტს აჭარის განათლების, კულტურისა და სპორტის სამინისტროში გერმანულ კომპანია „Hapto“-ს წარმომადგენლებთან შეხვედრა გაიმართა, შეხვედრის მიზანი იყო ციფრული ინტერაქტიული მედიის დანერგვა და განვითარება მუზეუმებში.
კომპანია ,,Hapto“-ს მიერ წარმოდგენილი პროექტი მოიცავდა მედიის წარმოების საკითხებს, პროდუქციას, პროგრამულ უზრუნველყოფას, საგამოფენო ტექნიკის, მომსახურებასა და მხარდაჭერასთან დაკავშირებულ საკითხებს, გრაფიკების, ანიმაციებისა და ინტერაქტიული 3D მოდელების შექმნას.
პროექტი ძალიან ხელსაყრელია მუზეუმების განვითარებისათვის, ვინაიდან ეს მოწყობილობები უზრუნველყოფს სხვადასხვა სახის ინფორმაციის შეჯერებასა და სხვადასხვა ეფექტური საშუალებით წარმოდგენას. ამ ტექნოლოგიების დანერგვა აადვილებს ინფორმაციის მოკლე დროში მიღებას ყველაზე ეფექტური გზებით. ტექნოლოგიებს შეუძლია გააცოცხლოს წარსული და გვამოგზაუროს დროში.
პროექტი საქართველოში პირველად ხორციელდება და პირველი ადგილი, სადაც ის დაინერგება, გონიოს ციხე იქნება. სამუშაო შეხვედრაზე სტუმრებმა წარმოადგინეს მათ მიერ სხვადასხვა მუზეუმისთვის გაკეთებული ანალოგიური პროექტები და მათი იდეები გონიო-აფსაროსის ციხის განვითარებასთან დაკავშირებით.
კომპანიის წარმომადგენლები აჭარის კულტურული მემკვიდრეობის დაცვის სააგენტოს მოწვევით იმყოფებოდნენ ბათუმში.
