საქართველოს სახელმწიფო უსაფრთხოების სამსახურის [სუს] დროებითი მოთავსების იზოლატორში მყოფ პირთა სადღეღამისო კვების ნორმები, სუსის სამსახურის უფროსმა, ვახტანგ გომელეურმა ორი დღის წინ დაამტკიცა.
მინისტრის ბრძანებით, სუს-ის დროებითი მოთავსების იზოლატორში მყოფი პირებისთვის სადღეღამისო სასურსათო ულუფის ოთხი ნორმა დამტკიცდა:
- დროებითი მოთავსების იზოლატორში მყოფ პირთა სადღეღამისო სასურსათო ულუფის ნორმა;
- დროებითი მოთავსების იზოლატორში მყოფ ორსული და მეძუძური დედებისათვის და აგრეთვე ტუბერკულოზით, დისტროფიით, წყლულოვანი ავიტამინოზით და ავთვისებიანი სიმსივნით დაავადებულ პირთა სადღეღამისო სასურსათო ულუფის ნორმა;
- დროებითი მოთავსების იზოლატორში მყოფ არასრულწლოვანთათვის სადღეღამისო სასურსათო ულუფის ნორმა;
- დროებითი ყოფნის იზოლატორში მყოფ პირთა სადღეღამისო მშრალი სასურსათო ულუფის ნორმა.
სუსი რამდენიმე დღის წინ სამხედრო მოსამსახურეთა, შენობების მორიგე თანამშრომელთა და დროებითი მოთავსების იზოლატორში მყოფი პირებისთვის კვებითი მომსახურების შესაძლო შეზღუდვაზე საუბრობდა, რაც უწყების განცხადებით, სახელმწიფო და საზოგადოებრივი ინტერესებისთვის საფრთხის შემცველი იქნებოდა. სამსახური ვითარების აღმოსაფხვრელად გადაუდებელ შესყიდვაზე თანხმობას ითხოვდა:
„გადაუდებელი შესყიდვა უნდა განხორციელდეს 2 თვის განმავლობაში, ანუ 2017 წლის პირველი აპრილიდან 2017 წლის 31 მაისის ჩათვლით, მანამ, სანამ დასრულდება კვებითი მომსახურებისთვის გამოცხადებული ტენდერის პროცედურები და გამოვლინდება გამარჯვებული. ორთვიანი გადაუდებელი შესყიდვის სავარაუდო ღირებულება შეადგენს 127 ათას ლარს“.
თანხმობა გამარტივებულ შესყიდვაზე სუს-მა შესყიდვების სააგენტოსგან 24 მარტს მიიღო.
კვებითი უზრუნველყოფის მომსახურებაზე სუს-სა და შპს Niart vision-ს შორის გაფორმებული ხელშეკრულება მიმდინარე წლის 31 მარტს შეწყდა.
