მთავარი,სიახლეები

იგეგმება თუ არა ახალი გზის მშენებლობა და ოჯახების ასახლება „ბონი-გოროდოკის“ უბანში

04.04.2017 • 5258
იგეგმება თუ არა ახალი გზის მშენებლობა და ოჯახების ასახლება „ბონი-გოროდოკის“ უბანში

ბათუმში, ე.წ. ბონის დასახლებაში, მაიაკოვსკისა და ვოლსკის ქუჩებზე მცხოვრები მოსახლეობის ნაწილი ამბობს, რომ აქვთ ინფორმაცია, თითქოს იგეგმება ახალი გზის მშენებლობა [გოგოლის ქუჩიდან გოროდოკის დასახლების მიმართულებით], რის გამოც რამდენიმე ოჯახის ასახლება იქნება აუცილებელი.

ამ ინფორმაციას არ ადასტურებენ ბათუმის მერიაში.

ბათუმის მერიის კეთილმოწყობის სამსახურის უფროსის, თენგიზ პეტრიძის განცხადებით, აღნიშნულ უბანში ახალი გზის მშენებლობა არ განიხილება, მეტიც, აქ არც არსებული  [მაიაკოვსკისა და ვოლსკის] ქუჩების გაფართოებაა დაგეგმილი.

რაც შეეხება გოგოლის ქუჩას, პერსპექტივაშია მისი გაფართოება მაიაკოვსკის ქუჩიდან ბარცხანის დასახლების მიმართულებით, ნონეშვილის ქუჩამდე, თუმცა ეს მონაკვეთი ჯერ დაპროექტებულიც არ არის.

თენგიზ პეტრიძის განცხადებით, ამ უბანში ახალი გზის მშენებლობის სამუშაოები ფაქტობრივად დასრულდა. ამ სამუშაოებში შედიოდა ბაგრატიონის ქუჩის გაგრძელება გოგოლის ქუჩამდე [შავშეთის ქუჩის გადაკვეთამდე არის ბაგრატიონის ქუჩა, ხოლო ამ ქუჩის გაგრძელება შავშეთის ქუჩიდან გოგოლის ქუჩამდე – ერისთავის ქუჩა].

მიმდინარე თვეში მაიაკოვსკისა და ვოლსკის ქუჩებზე, ბონის კულტურის სახლის მიმდებარე ტერიტორიაზე, მიწისქვეშა [წყლისა და კანალიზაციის სისტემების] სამუშაოები უნდა დაიწყოს, რომლის დასრულების შემდეგადაც დაიწყება ამ ქუჩების კეთილმოწყობა – ამბობს ჯაბა ტუღუში, ბათუმის მერის მრჩეველი მუნიციპალური ინფრასტრუქტურის რეაბილიტაციის პროექტის საკითხებში.

გოგოლისა და მაიაკოვსკის ქუჩების კვეთა

გოგოლისა და მაიაკოვსკის ქუჩების კვეთა

IMG_20170326_154545

ერისთავის ქუჩა

გადაბეჭდვის წესი


ასევე: