Batumelebi

ბოლო სამი დღეა საქართველოში აქტიურად მსჯელობენ სწორად დათვალა თუ არა ცენტრალურმა საარჩევნო კომისიამ 31 ოქტომბრის არჩევნების შედეგები და ხომ არ არის კომისია „ოცნების“ სასარგებლოდ მიკერძოებული. ვიდრე ამომრჩეველი და არჩევნებში მონაწილე ამ კითხვაზე პასუხს და ოქმებში ბალანსს იპოვიან, „ბათუმელები“ კომისიის წევრების კავშირებით დაინტერესდა.

როგორც ქონებრივი დეკლარაციებით ირკვევა, ცესკოს ნეიტრალური წევრი და „ქართული ოცნების“ წარდგენილი წევრები მეგობრები არიან და ერთობლივ ქონებასაც კი ფლობენ. კერძოდ, ცესკოს ნეიტრალური მდივანი გიორგი ჯავახიშვილი, კიდევ ერთი ნეიტრალური წევრი დიმიტრი ჯავახაძე და „ქართული ოცნების“ ინტერესების დამცველი ლევან მაისურაძე 2019 წელს შეთანხმდნენ და ერთად შეიძინეს 174 000 [17.4 ჰექტარი] კვადრატული მეტრი მიწის ნაკვეთი გორში, ნადარბაზევის ტბასთან. მხოლოდ გიორგი ჯავახიშვილმა ამ ქონებაში 81 200 ლარი გადაიხადა [თანამესაკუთრეებიდან ქონებრივი დეკლარაციის შევსების ვალდებულება მხოლოდ გიორგი ჯავახიშვილს აქვს – ავტ.]

დიმიტრი ჯავახაძე ცენტრალური საარჩევნო კომისიის წევრია 2014 წლის დეკემბრიდან, ხოლო ლევან მაისურაძე ცესკოში „ოცნებას“ წარმოადგენს 2012 წლიდან. დეკლარაციებში არაფერია ასახული, რა საქმიანობას ეწევა ცესკოს სამი მეგობარი წევრი ამ მიწის ნაკვეთზე. 

გიორგი ჯავახიშვილი საქართველოს ცენტრალური საარჩევნო კომისიის მდივანია 2015 წლის თებერვლიდან. ბოლოს ქონებრივი დეკლარაცია მან 2020 წლის მარტში შეავსო. ამ ქონებრივი დეკლარაციის მიხედვით, გიორგი ჯავახიშვილმა და მისმა მეუღლემ თამარ კაპანაძემ, რომელიც ასევე ცესკოშია დასაქმებული, გასულ წელს მნიშვნელოვანი უძრავი ქონება შეიძინეს და დიდი ფულიც დახარჯეს.

ჯამში მათ მიერ გაწეულმა ხარჯებმა, გასულ წელს, 279 200 ლარი და 63 000 აშშ დოლარი შეადგინა. ამ თანხიდან 198 000 ლარი ოჯახმა დიღომში მშენებლობაზე დახარჯა.

600 კვადრატული მეტრი მიწის  ნაკვეთი თბილისში, სოფელ დიღომში თამარ კაპანაძემ 63 000 აშშ დოლარად 2019 წელს იყიდა. თამარ კაპანაძე ცესკოში საერთაშორისო ურთიერთობების და პროტოკოლის განყოფილების უფროსია.

ამ ნაკვეთის მომიჯნავედ 600 კვ.მ. მიწის ნაკვეთს ფლობს ასევე დავით კაპანაძე, სავარაუდოდ თამარ კაპანაძის ოჯახის წევრი. მშენებლობა ამ ნაკვეთზეც დაუწყიათ და დაუსრულებიათ კიდეც, სახლები ერთმანეთთან ძალიან ახლოს არის აშენებული.

გიორგი ჯავახიშვილი 119, 87 კვ.მ. მიწის ნაკვეთს და კომერციულ ფართობს ასევე ფლობს თბილისში, გრიბოედოვის ქუჩაზე [18,79 კვ.მ]. ეს სახლი და კომერციული ფართობი გიორგი ჯავახიშვილისთვის 2016 წელს უჩუქებიათ.

2015 წელს საცხოვრებელი სახლი უჩუქებიათ ასევე თამარ კაპანაძისთვისაც.

დეკლარაციაში არაფერი წერია, ვინ არის საჩუქრის გამცემი პირი.

დეკლარაციის მიხედვით, თამარ კაპანაძე და გიორგი ჯავახიშვილი წილებს ფლობენ სამ კომპანიაში, თუმცა ამავე დეკლარაციაში გიორგი ჯავახიშვილმა ჩაწერა, რომ კომპანიებიდან ფინანსური სარგებელი არ მიუღია.

ამავე ქონებრივი დეკლარაციის მიხედვით, 2019 წელს გიორგი ჯავახიშვილმა ხელფასის სახით ჯამში 101 412 მიიღო, რაც თვეში 8451 ლარია, თამარ კაპანაძეს კი შემოსავლის სახით 48 142 ლარი მიუღია, ეს თვეში 4000 ლარია.

ცესკოს მდივანმა დეკლარაციაში ჩაწერა, რომ 2019 წელს იპოთეკური სესხის დასაფარად ჯამში 39 924 აშშ დოლარი გადაიხადა [ეს სესხი მას 2015 წელს აუღია], თამარ კაპანაძემ კი გასულ წელს 249 000 ლარი ისესხა.

გიორგი ჯავახიშვილმა დეკლარაციაში შემოსავლის სახით ჩაწერა ასევე  206 000 ლარის შესახებ, რაც მას ბინის გაყიდვით მიუღია, ცესკოს მდივანს არ მიუთითებია დეკლარაციაში, რომელი ბინა გაყიდა. თუმცა 2018 წლის დეკლარაციაში მას კიდევ ერთი ბინა ჰქონდა ნუცუბიძის ქუჩაზე [101 კვ.მ], ეს ბინა გიორგი ჯავახიშვილმა 2015 წელს 62 000 დოლარად იყიდა.

ბანგლადეშში 50 000 მუსლიმი მაკრონისა და საფრანგეთის წინააღმდეგ გამოდის. პროტესტის მონაწილეები რადიკალური ისლამისტური დაჯგუფების, „ჰეფაზას“ წევრები არიან. მათი უკმაყოფილება საფრანგეთის პრეზიდენტის ოფიციალურმა განცხადებამ გამოიწვია – მაკრონმა თავმოკვეთილი მასწავლებლის, სამუელ პატის მიერ მოსწავლეებისთვის მუჰამედის კარიკატურის ჩვენება სიტყვისა და გამოხატვის თავისუფლებად შეაფასა და  სკოლის მასწავლებლის მკვლელობის ფაქტს ისლამისტური ტერორისტული თავდასხმა უწოდა.

პროტესტანტებმა პრეზიდენტ მაკრონის გამოსახულებით ტრანსფარანტი დაწვეს.

ფრანგულმა გამოცემა ,,Le Monde“-მა დღეს გაავრცელა ინფორმაცია, რომ ბანგლადეშის ისლამისტური დაჯგუფება „ჰეფაზა“ საფრანგეთის წინაღმდეგ ადამიანთა ჯგუფებს უწევს მობილიზებას. „ჰეფაზა“ 2010 წელს დაარსებული დაჯგუფებაა, რომელიც მორალურ წესებზე უსიტყვო მორჩილებას ქადაგებს და ქალისა და მამაკაცის თანასწორობის, გენდერული მრავალფეროვნების წინააღმდეგ ღიად გამოდის.

ბანგლადეშის დედაქალაქ დაკაში შეკრებილები აცხადებენ, რომ ბოიკოტს გამოუცხადებენ ქვეყანაში ფრანგულ პროდუქტებს.

160-მილიონიან ქვეყანაში მოსახლეობის 90% მუსლიმია. აქციის მონაწილეები ქალაქ დაკაში საფრანგეთის საელჩოსკენ მიემართებოდნენ, რაშიც მათ ხელი პოლიციამ შეუშალა, თუმცა „ჰეფაზას“ ერთ-ერთმა ლიდერმა ფრანგულ მხარეს ულტიმატუმი წაუყენა და 24 საათის ვადა მისცა. პროტესტის მონაწილეები ემანუელ მაკრონისგან ამ დროის განმავლობაში საჯაროდ ბოდიშის მოხდას და დაკაში საელჩოს დახურვას  მოითხოვენ, წინააღმდეგ შემთხვევაში იმუქრებიან, რომ საფრანგეთის საელჩოს გაანადგურებენ.

პროტესტის მონაწილეები ბანგლადეშის პრემიერ-მინისტრის, შეიხ ჰასინისგან ითხოვენ გაწყვიტოს დიპლომატური კავშირი საფრანგეთთან.

აქცია ამ მოთხოვნებით დაკაში გუშინ, 2 ნოემბერს დაიწყო და მონაწილეები აცხადებენ, რომ არ დაიშლებიან მანამ, სანამ მოთხოვნები არ შესრულდება.

ფრანგული გამოცემა მიიჩნევს, რომ ეს ულტიმატუმი გამოწვევაა ბანგლადეშის მთავრობისთვის, რომელიც წლებია ცდილობს წინააღმდეგობა გაუწიოს რადიკალური ისლამისტური დაჯგუფება „ჰეფაზას“ გავლენას ქვეყნის საზოგადოებაზე. ამ დაჯგუფების დაჟინებული მოთხოვნის საფუძველზე ბანგლადეშის ხელისუფლებამ 2013 წელს მიიღო კანონი ღვთისმგმობთა წინააღმდეგ, რომლის საფუძველზეც ბანგლადეშში არაერთი ბლოგერი, ჟურნალისტი და მეცნიერი დასაჯეს სიკვდილით.

აჭარაში ჯამში 14 928 ხმით მეტი მიიღო მთლიანობაში ოპოზიციამ, ვიდრე არჩევნებში გამარჯვებულმა „ქართულმა ოცნებამ“. უსკო-ს ოფიციალური მონაცემების მიხედვით, ოპოზიციურ პოლიტიკურ პარტიებს ჯამში 97 615-მა ადამიანმა დაუჭირა მხარი [54,1%], ხოლო „ქართულ ოცნებას“ – 82 687-მა [45.9]. საკუთარი არჩევანი აჭარის რეგიონში სულ 180 302-მა ადამიანმა დააფიქსირა.

ბათუმის ოლქში ოპოზიციამ მიიღო 12 227-ით მეტი ხმა

• ოპოზიციის ხმები – 45 214
• ქართული ოცნების ხმები – 32 987
• სხვაობა – 12 227

ქობულეთის ოლქში ოპოზიციამ მიიღო 321-ით მეტი ხმა

• ოპოზიციის ხმები – 21 185
•  ქართული ოცნების ხმები – 20 864
• სხვაობა – 321

ხულო, შუახევი, ქედა, ხელვაჩაურის ოლქში ოპოზიციამ მიიღო 2 380-ით მეტი ხმა

• ოპოზიციის ხმები – 31 216
• ქართული ოცნების ხმები – 28 836
• სხვაობა – 2 380

ამ მოცემულობის მიუხედავად, აჭარის უმაღლეს საბჭოში შესვლის შესძლებლობა მხოლოდ ორ პოლიტიკურ ძალას აქვს  – „ქართულ ოცნებას“ და „ერთიანი ნაციონალური მოძრაობა – გაერთიანებულ ოპოზიციას“. იმის მიუხედავად, რომ რეგიონში ამომრჩევლების უმრავლესობა კრიტიკულ დამოკიდებულებას ავლენს ხელისუფლების მიმართ და არ აურჩევია „ქართული ოცნება“, უმაღლეს საბჭოში მანდატების უმრავლესობას სწორედ „ქართული ოცნება“ მიიღებს.

უმაღლეს საბჭოში მოსახვედრად 5-პროცენტიანი ბარიერის გადალახვაა საჭირო. ოპოზიციური პოლიტიკური პარტიებიდან კი, ეს ბარიერი მხოლოდ გაერთიანებულმა ოპოზიციამ გადალახა. აჭარის უმაღლეს საბჭოში მოსახვედრად 21 ოპოზიციური პოლიტიკური პარტია ცალ-ცალკე იბრძოდა. ამ მოცემულობით ოპოზიცია ერთიანი რომ ყოფილიყო, არჩევნებსაც მოიგებდა და მანდატების უმრავლესობასაც ის მიიღებდა.

ამ არჩევნებში გაზრდილი იყო ამომრჩეველთა აქტივობის მაჩვენებელი. 31 ოქტომბრის არჩევნებში აჭარის რეგიონში აქტივობამ 59.12 პროცენტი შეადგინა, ხოლო 2016 წელს აქტივობის მაჩვენებელი იყო 52.97 პროცენტი.

2020 წლის არჩევნების აქტივობამ შეადგინა 59,12 პროცენტი. (2016 წლის აქტივობის მაჩვენებელია – 52,97%)

ოპოზიცია, როგორც უმაღლეს საბჭოში, ასევე პარლამენტში პროტესტის ნიშნად შესვლას არ აპირებს. ოპოზიცია ამბობს, რომ არჩევნები გაყალბდა.

არჩევნებში გამარჯვებულად გამოცხადებული „ქართული ოცნებისთვის“ არც მაჟორიტარი დეპუტატის მანდატი მიუცია ამომრჩევლების უმრავლესობას. უსკო-ს წინასწარი მონაცემებით, არჩევნების მეორე ტური გაიმართება ბათუმის, ასევე ქედის, ხელვაჩაურის, შუახევის და ხულოს მაჟორიტარულ ოლქებში.

ჯერ კიდევ გაურკვეველია ქობულეთის ბედი, სადაც უსკო-ს მონაცემებით „ქართული ოცნების“ კანდიდატმა – ცოტნე ანანიძემ 50.05 ხმა დააგროვა [ზუსტად 22 ხმით მეტი, ვიდრე არჩევნების მოსაგებად იყო საჭირო]. ქობულეთში ხუთ საარჩევნო უბანზე შესწორების ოქმის შედგა და რამდენიმე შემთხვევას „საერთაშორისო გამჭვირვალობა საქართველოც“ ასაჩივრებს. საჩივრები ჯერ საოლქო კომისიაში არ განუხილავთ.

მთავარი ფოტო: ფოტოზე წითელი კვადრატით აღნიშნულია ყველა ოპოზიციური პარტიის მიერ მიღებული ხმები, ლურჯი კვადრატით კი – “ქართული ოცნების” მიერ მიღებული.

დღეს, 2 ნოემბერს, სროლის ხმა ისმოდა ბათუმში. პუშკინისა და ლორიას ქუჩების კუთხეში მდებარე ვულკანიზაციასთან გასროლის ხმა დაახლოებით 17:45 წუთზე გაისმა. გასროლის შედეგად არავინ დაშავებულა. შემთხვევის ამსახველ კადრებს TV 25 ავრცელებს. კადრში ჩანს, როგორ გარბის ორი პირი ავტომანქანით, მათ უკან კი ორი პირი მისდევს ხელკეტით.

“გასროლის ხმა როგორც კი გავიგე, გავიხედე და დავინახე, რომ ორი პირი გარბოდა მანქანისკენ. ტელეფონი ამოვიღე და გადაღება დავიწყე. კადრებშიც ჩანს ეს პროცესი. ორი პირი დაედევნა ვულკანიზაციიდან ხელკეტით, თუმცა ვერ დაეწიენ. სახეები ვერ გავარჩიე, პირბადეები ეკეთათ, მაგრამ გავიგონე როგორ მიაძახეს – „გელოდებითო”, – უთხრა “ბათუმელებს” TV 25-ის საინფორმაციო სამსახურის უფროსმა სულხან მესხიძემ.

შინაგან საქმეთა სამინისტროს პრესცენტრის ცნობით მომხდარ ფაქტზე საქმე სისხლის სამართლის კოდექსის ორი მუხლით აღიძრა 126-ე [ძალადობა] და  236-ე [იარაღის უკანონო შეძენა-შენახვა-ტარება].

„პატრიოტთა ალიანსის“ პოლიტიკური მდივანი, გოჩა თევდორაძე ამბობს, რომ მათი პარტია საპარლამენტო მანდატებზე უარს ამბობს და გამართავს მრავალათასიან საპროტესტო აქციებს მანამ, სანამ არჩევნები ბათილად არ გამოცხადდება. პატრიოტთა ალიანსი არ უერთდება ოპოზიციის მიერ დაანონსებულ საპროტესტო აქციებს და აქციების გამართვას ცალკე, დამოუკიდებლად გეგმავს.

„ჩვენი პარტია უარს ამბობს საპარლამენტო მანდატებზე. ოპოზიციასთან ერთად ჩვენ არაფერს განვიხილავთ, ეს ჩვენი ინდივიდუალური გადაწყვეტილებაა, გავაგრძელებთ ბრძოლას, ხმების დათვლას, არჩევნების ბათილად ცნობამდე. გვაქვს აქციების ადამიანური რესურსიც, გვიკეთებია ეს საქმე, კიდევ იხილავენ ასეთ პერმანენტულ აქციებს და არ შევჩერდებით სანამ არ მივაღწევთ სამართლიანობის აღდგენას, არჩევნების შედეგების გაბათილებას. ოპოზიციის აქციებს ჩვენ არ შევუერთდებით, არც არავითარ ალიანსს არ განვიხილავთ ნაციონალურ მოძრაობასთან და მით უფრო, მათთან დაკავშირებულ პოლიტიკურ ძალებთან,“ – უთხრა გოჩა თევდორაძემ „ბათუმელებს“.

„პატრიოტთა ალიანსმა“ არჩევნებზე ხმათა 3,14% მიიღო, რაც ნიშნავს, რომ მათ 4 საპარლამენტო მანდატი მოიპოვეს: ირმა ინაშვილმა, გიორგი ლომიამ, გოჩა თევდორაძემ და ავთანდილ ენუქიძემ.

დანარჩენი პარტიების მიღებული ხმები კი ასე გადანაწილდა:

„ქართული ოცნება“ – 48,15 %;

„ნაციონალური მოძრაობა – გაერთიანებული ოპოზიცია“ – 27,14%;

„ევროპული საქართველო“ – 3.78%;

„ლელო“ – 3,15%;

„სტრატეგია აღმაშენებელი“ –3,15 %;

„გირჩი“ – 2,89%;

„ალეკო ელისაშვილი – მოქალაქეები“ – 1,33%;

„ლეიბორისტული პარტია“ – 1%.

„ერთიანი ნაციონალური მოძრაობის“ წარმომადგენლებმა ბათუმის 121-ე საარჩევნო უბნიდან 99 უბნის ოქმი გადაამოწმეს. უმაღლეს საბჭოში ენმ-ის მაჟორიტარი დეპუტატობის კანდიდატის, გიორგი კირთაძის მტკიცებით, 99 ოქმის მიხედვით 9 676 ბიულეტენია გაბათილებული.

„ეს ნიშნავს იმას, რომ საქართველოს  პროპორციულ არჩევნებზე, 3 170 ხმა მოპარეს ნაციონალურ მოძრაობას. ეს ნიშნავს, რომ ლევან ვარშალომიძეს 1 794 ხმა მოპარეს. ეს ნიშნავს, რომ აჭარის  უმაღლეს საბჭოში 1 601 ჩვენი ბიულეტენი დაიკარგა. ეს ნიშნავს იმას, რომ მეც, როგორც აჭარის უმაღლესი საბჭოს მაჟორიტარს, მხოლოდ  ამ ოქმებით 1 605 ხმა მაქვს დაკარგული. ასეთი უბნებია მე-4, მე-9, მე-11, 34-ე, 53-ე. ეს ნიშნავს იმას,  რომ ხელმომწერთა რაოდენობა სამაგიდო  სიებში არის უფრო ნაკლები, ვიდრე ყუთებში აღმოჩენილ  ბიულეტენთა რაოდენობა. მოქმედი  კანონმდებლობა ცალსახად ითვალისწინებს ამ უბნების ბათილობას. ამასთან ერთად მე-13 და 41-ე უბანში, თუ ჩვენ საოლქო კომისიას დავუჯერებთ, საქართველოს პარლამენტში არჩევნებში მონაწილეობის მისაღებად სხვა რაოდენობის ხალხი მისულა და აჭარის  უმაღლეს საბჭოში არჩევნებში მონაწილეობის მისაღებად სხვა ხალხი. ვინმეს სჯერა ეს?,“ – იკითხა  გიორგი  კირთაძემ.

დღეს, 2 ნოემბერს,  გიორგი კირთაძემ ბრიფინგი საუბნო კომისიის წევრებთან ერთად გამართა და თქვა, რომ საოლქო კომისიიდან ურეკავენ საუბნო კომისიის წევრებს და შემაჯამებელ ოქმებზე ხელის მოწერას სთხოვენ. ენმ-ს განცხადებით, პარტიამ საუბნო კომისიებიდან თავისი წარმომადგენლები უკვე გამოიწვია.

ამავე თემაზე:

დღეს, 2 ნოემბერს, უმაღლეს საბჭოში ენმ-ის მაჟორიტარი დეპუტატობის კანდიდატმა გიორგი კირთაძემ საუბნო კომისიის წევრებთან ერთად ბრიფინგი გამართა. კირთაძის თქმით, საუბნო კომისიის წევრებს იბარებენ საოლქო კომისიაში და სთხოვენ, რომ ხელი მოუწერონ ე.წ. შესწორების ოქმებზე.

გიორგი კირთაძემ ბრიფინგზე 99 უბნის ოქმი წარმოადგინა. მისი თქმით, ოქმების მიხედვით 9 676 ბიულეტენი გააბათილეს. შედეგად ენმ-მ 8 170 ხმა დაკარგა.

„ეს და სხვა უამრავი დარღვევა და პირდაპირი გაყალბება არის შედეგი, რაც დააყენა „ქართულმა ოცნებამ“ და ამ ყველაფრის გასასწორებლად ისინი ახლა საუბნო კომისიის წევრებს ექაჩებიან საოლქო კომისიაში და ცდილობენ, რომ ხელი მოაწერინონ.

მინდა გავაფრთხილო ციალა შავაძე [ბათუმის 79-ე ოლქის თავმჯდომარე], რომელიც არაფერს წყვეტს, მაგრამ ის არის საოლქო კომისიის თავმჯდომარე და მე მას ვაფრთხილებ – თავი დაანებოს ჩვენი კომისიის წევრებს. ჩვენ უკვე ისინი გამოვიწვიეთ საუბნო კომისიებიდან, ახლა მათ ურეკავენ და ეუბნებიან, რომ ძველი რიცხვით მოუწერონ ხელი შემაჯამებელ ოქმებზე. არც ერთი კომისიის წევრი, ჩვენ მიერ დანიშნული, ამას არ გააკეთებს. ნუ მიდიან სისხლის სამართლის დანაშაულზე,“ – თქვა გიორგი კირთაძემ.

ცენტრალურმა საარჩევნო კომისიამ გამოაქვეყნა შემაჯამებელი ოქმი, რომელსაც კომისიის თავმჯდომარის ხელმოწერა არ აქვს, რაც საარჩევნო კოდექსის დარღვევაა. გარდა ამისა, აღნიშნული ოქმის მიხედვით, ამ უბანზე 17:00 საათისთვის ხმა მიცემული ჰქონდა მხოლოდ 62 ამომრჩეველს, დარჩენილ სამ საათში კი, 323 ამომრჩეველი მისულა [სულ 385], რაც სავარაუდოდ, ამომრჩევლების მობილიზებაზე მიუთითებს.

აღნიშნული ოქმის შესაბამის გრაფებში არ არის მითითებული უბანზე მისული ამომრჩევლების, ასევე მიღებული ბიულეტენების რაოდენობა, რაც კოდექსის თანახმად აუცილებლად უნდა ეწეროს.

საუბარია რუსთავის N 12.20.86 უბანზე. ოქმის მიხედვით, ამ უბანზე სახელისუფლებო პარტიამ – „ქართულმა ოცნებამ“ – 339 ხმა მიიღო.

ოქმს ხელს არ აწერს კომისიის წევრი „ერთიანი ნაციონალური მოძრაობიდან“ ლაშა ხუსკივაძე.

„ვთვლი, რომ ადგილი ჰქონდა ამომრჩეველზე ზეგავლენის მოხდენას, რის გამოც არ ვეთანხმები კენჭისყრის შედეგებს“, – წერს განსხვავებული აზრის გრაფაში ლაშა ხუსკივაძე.

შემაჯამებელ ოქმში არ არის შეტანილი რეგისტრატორებისა და კომისიის ბეჭდების ნომრები, რაც კოდექსით ასევე დარღვევაა. ასევე ცარიელია იმ პოლიტიკური სუბიექტების გასწვრივ გრაფები, რომლებმაც ვერცერთი ხმა მიიღეს.

შემაჯამებელი ოქმი შედგენილია 31 ოქტომბრის 23:00 საათზე, შესწორების ოქმი კი 1-ლი ნოემბრის 17:53 საათზე.

შესწორების ოქმში მხოლოდ ისაა აღნიშნული, რომ შემაჯამებელ ოქმში შესაბამის გრაფებში უნდა ეწეროს 385 [არჩევნებში მონაწილეთა რაოდენობა] და 850 [მიღებული ბიულეტენების რაოდენობა].

დარღვევებითაა შევსებული ამავე უბანზე მაჟორიტარული სისტემით კენჭისყრის შედეგების შემაჯამებელი ოქმიც – არ არის მითითებული კომისიის ბეჭდების ნომრები, შეტანილი არ არის რამდენიმე მონაცემი. ამ ოქმს თავმჯდომარე კი აწერს ხელს, მაგრამ არ აწერს კომისიის ერთ-ერთი წევრი, რომლის გვარიც ოქმში მითითებულია [ლ. მილაშვილი].

ოქმში აღნიშნულია, რომ არჩევნებში მონაწილე ამომრჩეველთა საერთო რაოდენობა არის 95, შესწორების ოქმით კი, ეს რიცხვი კენჭისყრიდან მეორე დღეს, გაზრდილია 385-მდე. თუმცა, მაჟორიტარული წესით ხმა მიცემული აქვს მხოლოდ 95-ს, აქედან 5 გაბათილდა.

წყარო: ცესკო

ცესკოს მონაცემებით, ბათუმის #28 მაჟორიტარულ ოლქში დათვლილია ყველა უბანი. წინასწარი მონაცემებით, მთავარ კონკურენტებს შორის ხმები ასე გადანაწილდა:

• რესან კონცელიძე, „ქართული ოცნება“ – 40,97%
• ლევან ვარშალომიძე, „ნაციონალური მოძრაობა“ – 37,3% 

მაჟორიტარ კანდიდატს გამარჯვებისთვის სჭირდება მიცემულ ხმათა ნახევარზე მეტი – 50 პროცენტს პლუს თუნდაც ერთი ხმა. ამ შემთხვევაში არც ერთ კანდიდატს არ აქვს მიღებული ამომრჩეველთა ხმების ნახევარზე მეტი, რაც იმას ნიშნავს, რომ ბათუმში არჩევნების მეორე ტური გაიმართება, სადაც ამომრჩეველს მხოლოდ ამ ორ კანდიდატს შორის მოუწევს არჩევანის გაკეთება.

დღეს, პირველ ნოემბერს, ლევან ვარშალომიძემ, გაერთიანებული ოპოზიციის მაჟორიტარი დეპუტატობის კანდიდატმა ბათუმში, განაცხადა, რომ ხელისუფლებამ ხალხის არჩევნები მიიტაცა.

„გუშინ ივანიშვილი გასცდა საკონსტიტუციო ჩარჩოს. ფაქტობრივად მიიტაცა არჩევნები და ხალხის ნება. ჩვენ ვიმსჯელეთ და მყარი გადაწყვეტილება მივიღეთ –  ყველა  ოპოზიციური პარტია დადგება იქ, სადაც იქნება ქართველი ხალხი.  ჩვენ ვიქნებით მათთან ერთად და ჩვენ გავიმარჯვებთ მათთან ერთად,“ – თქვა ლევან ვარშალომიძემ.

უმაღლესი საარჩევნო კომისიის წინასწარი მონაცემებით, მეორე ტური აჭარის უმაღლესი საბჭოს მაჟორიტარი დეპუტატის შესარჩევად ქობულეთში გაიმართება. აქ 50-პროცენტიანი ბარიერი ვერცერთმა კანდიდატმა გადალახა. ხმების დათვლა ჯერ არ დასრულებულა კიდევ ორ მაჟორიტარულ ოლქში.

უსკო-ს მონაცემებით, ქობულეთის 73 საარჩევნო უბანში სულ 41 918-მა ამომრჩეველმა მიიღო მონაწილეობა. ყველაზე მეტი ხმა „ქართული ოცნების“ კანდიდატმა – ცოტნე ანანიძემ დააგროვა – 49.06 პროცენტი. მეორე ადგილზეა გაერთიანებული ოპოზიციის კანდიდატი – ელგუჯა ბაგრატიონი – 37.02 პროცენტით. მეორე ტურში ამ ორ კანდიდატს შორის მოუწევს ქობულეთელ ამომრჩეველს არჩევანის გაკეთება.

ბათუმში ჯერ ყველა საარჩევნო უბნის შედეგი ცნობილი არ არის, თუმცა გამორიცხული არაა აქაც მეორე ტურის ჩატარება გახდეს საჭირო – ამ ეტაპზე [20:00] ყველაზე მეტი ხმა „ქართული ოცნების“ კანდიდატს – ტიტე აროშიძეს აქვს – 42.23 პროცენტი. მეორე ადგილზე გაერთიანებული ოპოზიციის კანდიდატი გიორგი კირთაძე – 34.2 პროცენტით. ამ დროისთვის დათვლილია 98 საარჩევნო უბნის მონაცემები, დასათვლელია – 22.

ჯერ უცნობია გახდება თუ არა საჭირო მეორე ტური ხელვაჩაურში, შუახევსა და ხულოში მაჟორიტარი დეპუტატის შესარჩევად. პირველ ადგილზე აქაც „ქართული ოცნების“ კანდიდატი ფრიდონ ფუტკარაძეა, თუმცა ამ ეტაპზე მას 50.01 პროცენტი აქვს. მეორე ადგილზეა გაერთიანებული ოპოზიციის კანდიდატი გია აბულაძე 32.06 პროცენტით. ამ დროისთვის დათვლილია 164 საარჩევნო უბანი, დასათვლელია – 16.

რაც შეეხება პარტიებს, წინასწარი მონაცემებით, უმაღლეს საბჭოში მხოლოდ ორი პოლიტიკური ძალა იქნება წარმოდგენილი – 5-პროცენტიანი ბარიერი მხოლოდ „ქართულმა ოცნებამ“ და გაერთიანებულმა ოპოზიციამ გადალახეს.

ამ თემაზე: