აჭარის მთავრობის გათვლებით, 2021 წელს აჭარის ბიუჯეტში 328 მილიონ 474 ათასი ლარი შევა, თუმცა ბიუჯეტიდან 21 მილიონი ლარით მეტი, 349 მილიონ 474 ათასი ლარი დაიხარჯება. აქედან ხელფასებისთვის ჯამში 38,5 მილიონი ლარია გათვალისწინებული.
აჭარის მომავალი წლის ბიუჯეტის პროექტი უმაღლეს საბჭოში გადაგზავნილია.
ბიუჯეტის პროექტის მიხედვით, მთავრობა მომავალ წელს 301 მილიონ ლარს სხვადასხვა სახის შემოსავლიდან ელის, 27 მილიონ ლარს კი – ქონების გაყიდვიდან. რაც შეეხება ხარჯს, რომელიც შემოსავლებზე მეტი იქნება, მთავრობა 21 მილიონი ლარის გამოყენებას წლის ბოლოს დარჩენილი ნაშთიდან [დეპოზიტზე არსებული თანხიდან] გეგმავს.
აჭარის ბიუჯეტის 2021 წლის გადასახდელები მხარჯავი დაწესებულების მიხედვით შემდეგნაირადაა გადანაწილებული:
- აჭარის უმაღლესი საბჭო – 5 216 800
- აჭარის უმაღლესი საარჩევნო კომისია – 701 000
- აჭარის მთავრობა – 3 000 200
- აჭარის ფინანსთა და ეკონომიკის სამინისტრო – 123 363 200
- აჭარის განათლების, კულტურისა და სპორტის სამინისტრო – 58 774 600
- აჭარის ჯანმრთელობისა და სოციალური დაცვის სამინისტრო – 25 091 000
- აჭარის სოფლის მეურნეობის სამინისტრო – 15 900 900
- საერთო დანიშნულების რესპუბლიკური გადასახდელები – 117 426 300 ლარი.
მთავრობის პროექტის მიხედვით, 2021 წელს ბიუჯეტის შემოსულობები 2020 წლის გეგმასთან შედარებით 21,4 მილიონი ლარით იზრდება, ხოლო ბიუჯეტის გადასახდელები [ხარჯები], მიმდინარე წლის გეგმასთან შედარებით, იზრდება 10,9 მილიონი ლარით.
