Batumelebi | შემაჯამებელი ოქმი კომისიის თავმჯდომარის ხელმოწერის გარეშე სხვა დარღვევები შემაჯამებელი ოქმი კომისიის თავმჯდომარის ხელმოწერის გარეშე სხვა დარღვევები – Batumelebi
RU | GE  

შემაჯამებელი ოქმი კომისიის თავმჯდომარის ხელმოწერის გარეშე სხვა დარღვევები

ცენტრალურმა საარჩევნო კომისიამ გამოაქვეყნა შემაჯამებელი ოქმი, რომელსაც კომისიის თავმჯდომარის ხელმოწერა არ აქვს, რაც საარჩევნო კოდექსის დარღვევაა. გარდა ამისა, აღნიშნული ოქმის მიხედვით, ამ უბანზე 17:00 საათისთვის ხმა მიცემული ჰქონდა მხოლოდ 62 ამომრჩეველს, დარჩენილ სამ საათში კი, 323 ამომრჩეველი მისულა [სულ 385], რაც სავარაუდოდ, ამომრჩევლების მობილიზებაზე მიუთითებს.

აღნიშნული ოქმის შესაბამის გრაფებში არ არის მითითებული უბანზე მისული ამომრჩევლების, ასევე მიღებული ბიულეტენების რაოდენობა, რაც კოდექსის თანახმად აუცილებლად უნდა ეწეროს.

საუბარია რუსთავის N 12.20.86 უბანზე. ოქმის მიხედვით, ამ უბანზე სახელისუფლებო პარტიამ – „ქართულმა ოცნებამ“ – 339 ხმა მიიღო.

ოქმს ხელს არ აწერს კომისიის წევრი „ერთიანი ნაციონალური მოძრაობიდან“ ლაშა ხუსკივაძე.

„ვთვლი, რომ ადგილი ჰქონდა ამომრჩეველზე ზეგავლენის მოხდენას, რის გამოც არ ვეთანხმები კენჭისყრის შედეგებს“, – წერს განსხვავებული აზრის გრაფაში ლაშა ხუსკივაძე.

წყარო: ცესკო

შემაჯამებელ ოქმში არ არის შეტანილი რეგისტრატორებისა და კომისიის ბეჭდების ნომრები, რაც კოდექსით ასევე დარღვევაა. ასევე ცარიელია იმ პოლიტიკური სუბიექტების გასწვრივ გრაფები, რომლებმაც ვერცერთი ხმა მიიღეს.

შემაჯამებელი ოქმი შედგენილია 31 ოქტომბრის 23:00 საათზე, შესწორების ოქმი კი 1-ლი ნოემბრის 17:53 საათზე.

შესწორების ოქმში მხოლოდ ისაა აღნიშნული, რომ შემაჯამებელ ოქმში შესაბამის გრაფებში უნდა ეწეროს 385 [არჩევნებში მონაწილეთა რაოდენობა] და 850 [მიღებული ბიულეტენების რაოდენობა].

წყარო: ცესკო

დარღვევებითაა შევსებული ამავე უბანზე მაჟორიტარული სისტემით კენჭისყრის შედეგების შემაჯამებელი ოქმიც – არ არის მითითებული კომისიის ბეჭდების ნომრები, შეტანილი არ არის რამდენიმე მონაცემი. ამ ოქმს თავმჯდომარე კი აწერს ხელს, მაგრამ არ აწერს კომისიის ერთ-ერთი წევრი, რომლის გვარიც ოქმში მითითებულია [ლ. მილაშვილი].

ოქმში აღნიშნულია, რომ არჩევნებში მონაწილე ამომრჩეველთა საერთო რაოდენობა არის 95, შესწორების ოქმით კი, ეს რიცხვი კენჭისყრიდან მეორე დღეს, გაზრდილია 385-მდე. თუმცა, მაჟორიტარული წესით ხმა მიცემული აქვს მხოლოდ 95-ს, აქედან 5 გაბათილდა.

წყარო: ცესკო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com