განათლების სამინისტროს ინფორმაციით, მედიცინის ფაკულტეტის 1 844 სტუდენტი უკვე გადამზადდა Covid19-ის ეფექტიანად მართვის მიზნით.
გადამზადებული სტუდენტები საჭიროების შემთხვევაში მედპერსონალს დაეხმარებიან როგორც სამედიცინო დაწესებულებებში, ასევე კოვიდსასტუმროებში.
სამინისტროს ინფორმაციით, სტუდენტთა გადამზადების პროგრამა სისტემურად გაგრძელდება. „ამისთვის უნივერსიტეტებისთვის შემუშავდა ჩარჩოპროგრამა – „Covid19-ის ზედამხედველობისა და მართვის პრინციპები“, რომლის ფარგლებშიც უმაღლესი საგანმანათლებლო დაწესებულებები თავად უზრუნველყოფენ სავალდებულო შიდასაუნივერსიტეტო ტრენინგკურსის ჩატარებას მედიცინის საგანმანათლებლო პროგრამის მაღალკურსელებისთვის,“-აცხადებს სამინისტრო.
ამავე წყაროს ცნობით, აღნიშნული კონტინგენტის გათვალისწინებით, უნივერსიტეტებმა თვითონ უნდა შეადგინონ იმ სტუდენტთა სიებიც, რომლებიც სამედიცინო პერსონალის ბაზაში ჩარიცხვის სურვილს გამოთქვამენ.
„ერთკვირიანი ტრენინგკურსი სრულად მორგებულია პანდემიის მართვის პროცესში სამედიცინო პერსონალის დამხმარე მოხალისე სტუდენტთა საჭიროებებსა და გამოწვევებზე.
პროგრამა მოიცავს კორონავირუსის მართვის კუთხით თემატურ ლექციებს, მათ შორის, მედპერსონალის პირად უსაფრთხოებას, Covid19-ის შემთხვევების მართვას, პანდემიის პირობებში ეფექტურ კომუნიკაციას, ინფიცირებულთა ფსიქო-სოციალურ დახმარებასა და ინფიცირებულთა კონტაქტების დადგენას,“ – აცხადებენ სამინისტროში.
2 ნოემბრის მონაცემებით, ქვეყნის მასშტაბით 1852 ახალი შემთხვევა გამოვლინდა. გარდაიცვალა 6 პაციენტი.
დღევანდელი მდგომარეობით, სტაციონარში მეთვალყურეობის ქვეშაა 4 293 კოვიდპაციენტი, კოვიდსასტუმროში კი 2 236 პაციენტი მკურნალობს.
