Batumelebi

ბათუმის ბულვართან ე.წ. „ტექნოლოგიური უნივერსიტეტის“ შენობის გვერდით, ათსართულიანი ნაგებობის ასაგებად სამშენებლო სამუშაოები მიმდინარეობს. მშენებარე ობიექტის საზღვრები არ ემთხვევა აქ არსებული, სამსართულიანი შენობის საძირკვლის საზღვრებს, რომლის დემონტაჟის შედეგად შენდება ახალი ნაგებობა.  „ბათუმელები“ შეეცადა გადაემოწმებინა იზრდება თუ არა შენობის მოცულობა ძველი ბულვარის ტერიტორიის ხარჯზე.

„ბათუმი თაუერი“ ჩვენ არ გვეკუთვნის და კომპეტენტურ პასუხს ვერ გაგცემთ.  სავარაუდოდ, ბათუმის მერიას უნდა კითხოთ. რაც შეეხება ბულვარის საზღვრებს, ის დარღვეული ნამდვილად არ არის“, – გვითხრეს ბათუმის ბულვარის ადმინისტრაციის საზოგადოებასთან ურთიერთობის სამსახურში.

ბათუმის მერიის პრესსამსახურის ინფორმაციით კი, მერიის არქიტექტურის სამსახურში განაცხადეს, რომ „ეს არის მეხუთე კლასის ობიექტი და, შესაბამისად, მათთან მიმდინარე სამუშაოები არ თანხმდება. მერია არც მშენებლობის მონიტორინგს ახორციელებს“.

„ბათუმელები“ საქართველოს ეკონომიკისა და მდგრადი განვითარების სამინისტროს ტექნიკური და სამშენებლო ზედამხედველობის სააგენტოს ხელმძღვანელს, გია კაკაურიძეს დაუკავშირდა: „ჩვენ ნებართვას ვერანაირად ვერ გავცემდით ბათუმის ბულვარის ტერიტორიაზე რომ გადასულიყო პროექტი. რეკონსტრუქციის ნებართვა გაცემულია კომპანიის საკუთრებაში არსებულ მიწის ნაკვეთზე, რომელიც თავის დროზე ამოირიცხა კულტურული მემკვიდრეობის ძეგლიდან. ამ საზღვრებში კი შენობის მოცულობა პროექტით იზრდებოდა“.

აჭარის კულტურული მემკვიდრეობის დაცვის სააგენტოს ძეგლებზე ნებართვების გაცემისა და მონიტორინგის განყოფილების უფროსის, ზაურ ახვლედიანის განცხადებით, როცა ის ამ სამსახურში მივიდა „ეს შენობა იყო ძეგლის ნიშნის ქვეშ,  იმიტომ რომ ბულვარის ტერიტორიაზე იდგა და ავტომატურად ძეგლი იყო. 2014 წელს ბულვარის საკადასტრო საზღვრები დავაზუსტეთ და აქ არ შეგვიტანია ტექნოლოგიური უნივერსიტეტის შენობა. ის იყო მომეტებული საფრთხის შემცველი ობიექტი [მოცულობისა და ტექნიკური არჭურვილობის გამო, მაგალითად ეშმაკის ბორბალი] და გადავეცით საქართველოს ეკონომიკის სამინისტროს, რომელიც გასცემს ასეთი, მე-5 კლასის ობიექტებზე ნებართვებს. ეკონომიკის სამინისტრო აწარმოებს მაქ უკვე პროცედურებს“.

ზაურ ახვლედიანის განცხადებით, საკადასტრო საზღვრები დარღვეული არ იყო იმ პროექტით, რომელიც მათთან შეთანხმდა: „გვერდით ამატებენ ათ სართულს. თუ დარღვეულია საზღვრები, ეს საქართველოს ეკონომიკის სამინისტროს მონიტორინგის სამსახურის კომპეტენციაა – ან უნდა მოანგრევინონ, ან უნდა მისცეს ნებართვა კანონის მოთხოვნათა დაცვით. მონიტორინგს, თუ არ ვცდები, უნდა აკეთებდეს აჭარის ფინანსთა და ეკონომიკის სამინისტროს ტექნიკური ზედამხედველობის სამსახურიც“.

აჭარის ფინანსთა და ეკონომიკის სამინისტროს პრესსამსახურის ინფორმაცით, ამ კონკრეტულ შემთხვევაში მშენებლობის პროცესის მონიტორინგი მათ კომპეტენციაში არ შედის.

ტექნიკური და სამშენებლო ზედამხედველობის სააგენტოს ხელმძღვანელს გია კაკაურიძის თქმით კი, ის საქართველოში ამ დროისთვის არ იმყოფება, ამდენად „ასეთ რეჟიმში საუბარი იმაზე, ირღვევა თუ არა ის საზღვრები, რაზეც ჩვენ გავეცით ნებართვა, გამიჭირდება“.

რაც შეეხება „ბათუმი თაუერს“, მისი მშენებლობა ბათუმის ბულვარში 2011 წელს დაიწყო, როცა საქართველოს ეკონომიკის სამინისტრომ 4504 კვ/მ მიწის ნაკვეთი ბათუმის ბულვარში საქართველოს რკინიგზის შვილობილ კომპანია “რეილვეი ფროფერთი მენეჯმენტს” საჩუქრად გადასცა. ბულვარში მასშტაბური პროექტის განხორციელების მიზნით ხეების უკანონო გაჩეხვას და ბულვარის, როგორც კულტურული მემკვიდრეობის ძეგლის ტერიტორიის ხელყოფას, პერმანენტული საპროტესტო აქციები მოჰყვა. ბათუმელები მშენებლობის შეჩერებას მოითხოვდნენ. მშენებლობა მაინც გაგრძელდა. 2015 წლის მარტში შენობა სახელმწიფო ქონების მართვის სააგენტომ ელექტრონულ აუქციონზე გამოიტანა და ის 25 მილიონ 4 ათას 626 დოლარად შპს „ბათუმი თაუერმა“ შეიძინა.

ბათუმის ძველი ბულვარის, როგორც ძეგლის, საზღვრები საქართველოს კულტურისა და ძეგლთა დაცვის მინისტრის ბრძანებით, 2015 წლის 20 თებერვალს დაზუსტდა. ფართობი მოქცეულია პლაჟსა და ნინოშვილის ქუჩას შორის რესტორან „ძველი გემის“ მიმდებარე ტერიტორიიდან „რვაფეხამდე“ [ყოფილი კაფე „ფანტაზია“]

აჭარის სოფლის მეურნეობის სამინისტროს ინფორმაციით, მიმდინარე სეზონზე 24 603 ტონა მანდარინი გავიდა საექსპორტოდ, 7 135 ტონა კი გადამუშავებულია. სოფლის მეურნეობის მინისტრის მოადგილის იოსებ აბულაძის ინფორმაციით, ამ დროისთვის ციტრუსის დაკრეფის პროცესი ფაქტობრივად დასრულებულია.

იოსებ აბულაძის ინფორმაციით, წელს ყველაზე მეტი ციტრუსი საექსპორტოდ რუსეთის ბაზარზე გავიდა: „90 ათასი ტონა გავიდა რუსეთის ბაზარზე, შემდეგ ყველაზე მეტი უკრაინაში. ნაწილი გატანილია ბალტიისპერეთის ქვეყნებში და შუა აზიაში“.

როგორც სამინისტროში გვეუნებიან, მანდარინის საექსპორტო ახალი ბაზრები ევროპის სხვა ქვეყნებში, გარდა ბალტიისპირეთისა, მიმდინარე წელს არ დამატებია. „ევროპას აქვს თავისი სტანდარტები და ამ მოთხოვნებს ჯერ-ჯერობით ვერ ვპასუხობთ. თუმცა, ამ მიმართულებით მიმდინარეობს მუშაობა. სტანდარტიზებულ მანდარინს რუსეთის ბაზარიც მოითხოვს, თუმცა არა ისეთს, როგორც ევროპა“-გვეუბნება იოსებ აბულაძე.

მისივე ინფორმაციით, მიმდინარე წელს, მოსახლეობისგან სტანდარტული მანდარინის ჩაბარება საწარმოების მიერ 90 თეთრად ხდებოდა, შერეული ხარისხის მანდარინის კი 50-60 თეთრად. სამინისტროს ინფორმაციით, 2015 წელს, გასულ წელთან შედარებით მანდარინის მეტი მოსავალია მიღებული.

საქართველოს სოფლის მეურნეობის სამინისტროს ინფორმაციით, საექსპორტო ბაზრებზე კონკურენტუნარიანი და მაღალხარისხიანი ციტრუსის მიწოდების უზრუნველსაყოფად,  წლევანდელ სეზონზე  აჭარისა და გურიის რეგიონებში მანდარინის ჩაბარება 40-მდე დამახარისხებელ (შემფუთავ) პავილიონშია შესაძლებელი.  ამ ეტაპზე, მანდარინის მიღება-გადამუშავებას აწარმოებს ექვსი ქარხანა: ქობულეთში – Georgian Industrial Asset Management Group და შპს TCF Georgia, ქედაში, შპს ,,კახური ტრადიციული მეღვინეობა-აგრო-ქედა“, ამბროლაურის მუნიციპალიტეტში GEO-Flowers,  ჩოხატაურში  შპს ,,კახური ტრადიციული მეღვინეობა-აგრო-ჩოხატაური“ და გორში შპს ,,გსქ კულა“.

იოსებ აბულაძის ინფორმაციით, აჭარაში ორს საწარმოს, რომელმაც ციტრუსის ჩაბარება ვერ უზრუნველყო, აჭარის ფინანსთა და ეკონომიკის სამინისტრომ ხელშეკრულება გაუუქმა.

 

დღეს 28 დეკემბერს, ხელვაჩაურის მუნიციპალიტეტის გემგეობის პრესსამსახურის ინფორმაციით, საკუთრების უფლების აღიარების კომისიის თავმჯდომარის მოადგილე, დავით ქოქოლაძე დააკავეს.

გამგეობის პრესსამსახურში აცხადებენ, რომ არ აქვთ დაზუსტებული ინფორმაცია თუ რომელი სამსახურის მიერ იქნა დაკავებული დავით ქოქოლაძე.

დაზუსტებულ ინფორმაციას არც გამგებელი ფლობს: „ალბათ ანტიკორუფციული  უსაფრთხოების სამსახურია, ზუსტად არ ვიცი“-გვეუბნება ნადიმ ვარშანიძე.

“ამ აქციის მიზანია ხელი შევუშალოთ ბულვარის ისტორიული დაგეგმარების და ძველი სტილის დამახინჯებას. კონკრეტულად, შუაში მდებარე ხეივანის გაუქმებას,რაც გამოიწვევს ბულვარის, როგორც ისტორიული ძეგლის განადგურებას და მისი ფუნქციის შეცვლას” – წერია ფეისბუქში დაანონსებული აქციის ანოტაციაში.

აქცია 29 დეკემბერს, ბულვარის კოლონადებთან, 13 საათზეა დაგეგმილი.

შეგახსენებთ, რომ ბათუმის ძველი ბულვარის რეკონსტრუქცია, აჭარის მთავრობამ, რამდენიმე კვირის წინ დაიწყო. სამი სავალი ბილიკიდან ამჟამად ერთი გაუქმებულია.

 

ამავე თემაზე:

ბულვარში სავალი ბილიკის გაუქმებას ხელშეკრულება არ ითვალისწინებს

ბულვარის კონცეფციაზე მომუშავე კომპანია 2 მილიონზე მეტი დოლარითაა დაჯარიმებული

კომპანია, რომელიც ბულვარის კონცეფციაზე მუშაობდა აღარ არსებობს

აქცია ბათუმში ძველი ბულვარის ახალი კონცეფციისგან დასაცავად [ვიდეო]

ხვალ, 25 დეკემბერს, ძველი ბულვარის დასაცავად ბათუმში აქცია გაიმართება

ხმაური და დაპირისპირება ბათუმის ძველი ბულვარის გარშემო

საეჭვო შესყიდვა – რა გზით დაუშვეს კომპანია „ოაზისი“ ბულვარში?

ბათუმის ძველი ბულვარი – რატომ გახდა საჭირო კულტურული მემკვიდრეობის ძეგლის მოდერნიზაცია?!

 

აჭარის ხელისუფლებამ დაანონსა, რომ ის ბულვარის კონცეფციაზე მუშაობს. შესაბამისი ვიდეოკლიპის გავრცელებამ საზოგადოებაში უარყოფითი რეაქცია გამოიწვია. ხელისუფლება აცხადებს, რომ მათ მიერ შემუშავებული კონცეფცია ფლორცენციის ქარტიისთან შესაბამისობაშია. „ბათუმელები“ აქვეყნებს ქარტიის სრულ ვერსიას იმისათვის, რომ დაინტერესებულმა პირებმა თავად განსაზღვრონ, ეწინააღმდეგება თუ არა ბულვართან დაკავშირებული სახელისუფლო გეგმები ფლორენციის ქარტიას.

პრეამბულა

ძეგლებისა და ღირსშესანიშნავი ადგილების საერთაშორისო კომიტეტისა (ICOMOS) და ლანდშაფტის არქიტექტორთა საერთაშორისო ასოციაციის (IFLA) ისტორიული პარკების საერთაშორისო კომიტეტმა, რომელიც შეიკრიბა ფლორენციაში 1981 წლის 21 მაისს, გადაწყვიტა ისტორიული ბაღების დაცვის ქარტიის შედგენა, რომელსაც ამ ქალაქის სახელი მიენიჭა. წინამდებარე ფლორენციის ქარტია შექმნილია კომიტეტის მიერ, რომელიც დაამტკიცა იკომოსმა 1982 წლის 15 დეკემბერს, როგორც ვენეციის ქარტიის დამატება, რომელიც კონკრეტულ სფეროს ეხება.

მუხლი 1.

„ისტორიული ბაღი არის არქიტექტურული და ბაღის მცენარეების ერთობლივი კომპოზიცია, რომელიც საზოგადოებისთვის საინტერესოა ისტორიული და მხატვრული თვალსაზრისით“. ამდენად, იგი შეიძლება განხილულ იქნას, როგორც ძეგლი.
მუხლი 2.

„ისტორიული ბაღი არქიტექტურული კომპოზიციაა, რომლის შემადგენელი ნაწილები, ძირითადად, მცენარეულია და ამდენად, ცოცხალი. ეს ნიშნავს იმას, რომ ისინი ადვილად დაზიანებადი და განახლებადია“. ამდენად, მისი ფიზიკური იერსახე ასახავს, ერთი მხრივ, მუდმივ ბალანსს სეზონურ ციკლებსა და ბუნების ზრდასა და კვდომას შორის და მეორე მხრივ, მხატვართა და ოსტატთა მისწრაფებას შეინარჩუნონ ის მუდმივად უცვლელი სახით.

მუხლი 3.

ისტორიული ბაღი, როგორც კულტურული მემკვიდრეობის ძეგლი, უნდა შენარჩუნდეს ვენეციის ქარტიის სულისკვეთების ჭრილში. მაგრამ, რამდენადაც იგი ცოცხალი ძეგლია, მისი დაცვის მართვა უნდა განხორციელდეს სპეციფიკური წესების დაცვით, რაც წინამდებარე ქარტიის საგანს წარმოადგენს.

მუხლი 4.

ისტორიული ბაღის არქიტექტურული კომპოზიცია მოიცავს:

• მის დაგეგმარებას და ტოპოგრაფიას;
• მის მცენარეულობას, თავისი სახეობებით, პროპორციებით, ფერთა შეხამებით, მათ შორის მანძილებით და შესაბამისი სიმაღლეებით;
• მის სტრუქტურულ და დეკორაციულ მახასიათებლებს;
• მის წყლებს (აუზი, რუ, ნაკადული, მდინარე), რომლებიც ცას აირეკლავენ.

მუხლი 5.

როგორც ცივილიზაციისა და ბუნების პირდაპირი მსგავსების გამოხატულება,  როგორც სიამოვნების განცდის ადგილი  შესაფერისი მედიტაციისა ან დასვენებისათვის,  ბაღი იდეალიზებული სამყაროს გამოსახულების, „სამოთხის“, კოსმიურ მნიშვნელობას იძენს, ამ ტერმინის (სამოთხის) ეტიმოლოგიური მნიშვნელობით და, ამდენად, კულტურის, სტილის, ხნოვანების და ხშირად, ორიგინალური მხატვრული შემოქმედების განსახიერებას წარმოადგენს.

მუხლი 6.

ტერმინი „ისტორიული ბაღი“ თანაბრად მიესადაგება პატარა ბაღებსაც და დიდ პარკებსაც, როგორც ფორმალურს, ისე „ლანდშაფტურს“.

მუხლი 7.

იმის მიუხედავად,  დაკავშირებულია თუ არა ისტორიული ბაღი ნაგებობასთან, რომლის განუყოფელ ნაწილსაც ის წარმოადგენს, არ შეიძლება მისი განხილვა იზოლირებულად გარემომცველი სპეციფიკური  გარემოსგან,  ურბანული იქნება ის, სოფლის, ხელოვნური თუ ბუნებრივი.

მუხლი 8.

ისტორიული ადგილი (ძეგლი) არის სპეციფიკური ლანდშაფტი, რომელიც დაკავშირებულია მეხსიერებაში შემონახულ ამბავთან, როგორიცაა, მაგალითად, ღირსშესანიშნავი ისტორიული მოვლენა, ცნობილი მითები, ეპიკური ბრძოლები, ან ცნობილი ნახატის საგანი.

მუხლი 9.

ისტორიული ბაღების დაცვა დამოკიდებულია მათ იდენტიფიკაციასა და აღწერაზე და აღწერაზე. ის მოითხოვს რამდენიმე სახის აქტივობას: შენარჩუნებას, კონსერვაციასა და რესტავრაციას. ზოგ შემთხვევაში შესაძლებელია რეკომენდებულ იქნას რეკონსტრუქცია. ისტორიული ბაღის ავთენტურობა მნიშვნელოვნადაა დამოკიდებული მისი სხვადასხვა შემადგენლის დიზაინსა და ზომაზე, ასევე, მის დეკორატიულ მახასიათებლებზე, მცენარეთა შერჩევაზე და იმ არაორგანულ მასალებზე, რომლებიც შეთვისებულია ბაღის ცალკეული ნაწილების მიერ.

შენარჩუნება, კონსერვაცია, რესტავრაცია, რეკონსტრუქცია

მუხლი 10.

ისტორიული ბაღის ან მისი რომელიმე ნაწილის შენარჩუნების, რესტავრაციის ან რეკონსტრუქციის მიზნით განხორციელებული ნებისმიერი სამუშაოს დროს, მისი თითოეული შემადგენელი ნაწილი განხილულ უნდა იქნას მთლიანობაში. სხვადასხვა ღონისძიებების იზოლირებულად განხორციელება დაარღვევს მის მთლიანობას.

შენარჩუნება და კონსერვაცია

მუხლი 11.

ისტორიული ბაღის მდგრადი შენარჩუნება უპირველესი მნიშვნელობისაა. ვინაიდან ძირითადი მასალა მცენარეულ საფარს წარმოადგენს, ბაღის უცვლელი სახით შენარჩუნება მოითხოვს ერთდროულად: სწრაფ შეცვლას საჭიროებისამებრ და პერიოდული განახლების გრძელვადიან პროგრამას (მოჭრა და ახალი, მზარდი ნერგების ხელახლა დარგვა, შენაცვლება).

მუხლი 12.

ხეების, ბუჩქების, მცენარეებისა და ყვავილთა სახეობების პერიოდულად შეცვლისას, პრიორიტეტი უნდა მიენიჭოს თითოეული ბოტანიკური და მცენარეული რეგიონისათვის დამკვიდრებულ და აღიარებულ პრაქტიკას, რათა განისაზღვროს და დაცულ იქნას ის სახეობები, რომლებიც თავდაპირველად იზრდებოდნენ აქ.

მუხლი 13.

უძრავი ან მოძრავი არქიტექტურული, სკულპტურული ან დეკორატიული შემადგენლები, რომლებიც ქმნიან ისტორიული ბაღის განუყოფელ ნაწილს, მოცილებულ და გადაადგილებულ უნდა იქნან მხოლოდ იმ შემთხვევაში, თუ ეს აუცილებელია მათი კონსერვაციისა და რესტავრაციისთვის.  განადგურების საფრთხის ქვეშ მყოფი ძეგლების გადაადგილება ან რესტავრაცია უნდა მოხდეს ვენეციის ქარტიის პრინციპების გათვალისწინებით და თარიღი ყოველი სრული ადგილმონაცვლეობისა უნდა იყოს მითითებული.

მუხლი 14.

ისტორიული ბაღი უნდა იქნას შენარჩუნებული შესაბამისი შემოგარენით.  ნებისმიერი ცვლილება (გადაკეთება) ფიზიკური გარემოსი, რომელიც ეკოლოგიური ბალანსისათვის საფრთხის შემცველია, უნდა აიკრძალოს. ეს განაცხადი მიესადაგება ინფასტრუქტურის ყველა ასპექტს, როგორც შიდა, ისე გარე (სადრენაჟო სამუშაოები, საირიგაციო სისტემები, გზები, ავტოპარკები, ღობეები, ტუალეტები, ვიზიტიორთა მოსაცდელები).

რესტავრაცია და რეკონსტრუქცია

მუხლი 15.

ისტორიულ ბაღში არ შეიძლება განხორციელდეს  არანაირი სარესტავრაციო სამუშაოები და, მით უმეტეს, სარეკონსტრუქციო სამუშაოები წინასწარი კვლევის გარეშე მანამ, ვიდრე არ დავრწმუნდებით, რომ ამგვარი სამუშაოების ჩატარება მეცნიერულად შესწავლილია და მოიცავს როგორც კონკრეტული ბაღის, ისე მსგავსი ბაღების ყველა მონაცემის გამოვლენას და კვლევას. პრაქტიკული სამუშაოების დაწყებამდე უნდა მომზადდეს პროექტი კვლევაზე დაყრდნობით და გადაეცეს ექსპერტებს განხილვისა და ვიზირებისათვის.

მუხლი 16.

სარესტავრაციო სამუშაოებმა პატივი უნდა სცეს ბაღის ევოლუციის წარმატებულ ეტაპებს. პრინციპში, არც ერთ პერიოდს არ უნდა მიენიჭოს უპირატესობა სხვებთან შედარებით, გარდა გამონაკლისი შემთხვევებისა, როდესაც დაზიანების ან დანგრევის ხარისხმა გავლენა იქონია ბაღის შემადგენელ ნაწილებზე იმდენად, რომ გადაწყდა მისი რეკონსტრუქცია შემორჩენილი ნაკვალევის ან უნაკლო, უტყუარი დოკუმენტური მონაცემების საფუძველზე. ამგვარი სარეკონსტრუქციო სამუშაოები შეიძლება ჩატარდეს უფრო მეტად ბაღის შემადგენლობაში არსებული ნაგებობების მახლობლად იმ მიზნით, რომ გამოკვეთილ იქნას მისი მნიშვნელობა დიზაინში.

მუხლი 17.

როდესაც ბაღი სრულად განადგურებულია ან შემორჩენილია მისი არსებობის  წარმატებული ეტაპების ჰოპოთეტური ნარჩენები, რეკონსტრუქცია არ შეიძლება ჩაითვალოს ისტორიული პარკის რეკონსტრუქციად.

გამოყენება

მუხლი 18.

ვინაიდან ისტორიული პარკი შექმნილია დათვალიერებისა და სეირნობისთვის, იქ შესვლა უნდა იყოს შეზღუდული, რაც ნაკარნახევია მისი ზომებით და  დაზიანების საფრთხით, ისე, რომ მისი ფიზიკური სახე და კულტურული მესიჯი იყოს შენარჩუნებული.
მუხლი 19.

თავისი ბუნებიდან და მიზნიდან გამომდინარე, ისტორიული ბაღი არის მშვიდი ადგილი, შესაფერისი ადამიანთა კონტაქტებისთვის, სიმშვიდისა და ბუნების შეცნობისათვის.  მისი ყოველდღიური გამოყენების ამგვარი აღქმა ეწინააღმდეგება მის იშვიათ როლს იმ შემთხვევებში, როცა ის გამოიყენება სახალხო ზეიმებისათვის (ფესტივალები). ამდენად, მისი ასეთი იშვიათი გამოყენების პირობები ზუსტად უნდა იყოს განსაზღვრული, რათა ამგვარმა ზეიმებმა (ფესტივალებმა) განავითარონ ბაღის ვიზუალური ეფექტი და არა პირიქით – დააზიანონ ან  დაამახინჯონ იგი.

მუხლი 20.

ისტორიული ბაღები უნდა იყოს მოსახერხებელი ყოველდღიური წყნარი თამაშებისთვის; შესაძლებელია ცალკეული ადგილების გამოყოფა აქტიური და ცოცხალი თამაშებისა და სპორტისთვის ისტორიული ბაღების მახლობლად ისე, რომ მოსახლეობის მოთხოვნილებები დაკმაყოფილდეს ბაღებისა და ლანდშაფტების კონსერვაციის მიმართ პატივისცემის გრძნობის გამოხატულებით.

მუხლი 21.

მდგრადი შენარჩუნებისა და კონსერვაციის სამუშაოები, რომელთა  განხორციელება სეზონებითაა განსაზღვრული და ძირითადი ოპერაციები, რომლებიც ემსახურება ბაღების ავთენტურობის შენარჩუნებასა და აღდგენას, ყოველთვის პრიორიტეტული უნდა იყოს, ვიდრე მისი მასობრივი გამოყენება. ვიზიტიორთა მიღებისთვის ისტორიული ბაღების მომზადებისას, განხილვის საგანი უნდა იყოს რეგულაციები, რომლებიც უზრუნველყოფს ადგილის სულის შენარჩუნებას.

მუხლი 22.

თუ ბაღი შემოღობილია, მისი კედლები არ უნდა მოიხსნას წინასწარი კვლევის გარეშე და იმის გათვალისწინებით, თუ რა გავლენა შეიძლება მოახდინოს ამან ბაღის ატმოსფეროსა და მის დაცვაზე.

სამართლებრივი და ადმინისტრაციული დაცვა

მუხლი 23.

მართვაზე პასუხისმგებელი ორგანოს ამოცანაა,  კვალიფიციური ექსპერტების რჩევებზე დაყრდნობით, სათანადო სამართლებრივი და ადმინისტრაციული ზომების გამოყენება ისტორიული ბაღების იდენტიფიკაციის, აღწერისა და დაცვისთვის. მსგავსი ბაღების დაცვა წარმოდგენილი უნდა იყოს მიწათსარგებლობის გეგმებში და ამგვარმა  უზრუნველყოფამ სათანადო ასახვა უნდა ჰპოვოს რეგიონალური და ადგილობრივი დაგეგმარების დოკუმენტებში. ასევე, პასუხისმგებელი პირების ამოცანაა, კვალიფიციური ექსპერტების რჩევით, ისტორიული ბაღის შენარჩუნების, კონსერვაციის და რესტავრაციისათვის, ხოლო აუცილებლობის შემთხვევაში, მისი რეკონსტრუქციისთვის საჭირო ფინანსების განსაზღვრა.

მუხლი 24.

ისტორიული ბაღი წარსულის მემკვიდრეობის ერთ-ერთი გამოხატულებაა, რომლის გადარჩენა, მისი ბუნებიდან გამომდინარე, ითხოვს დაოსტატებული ექსპერტების მხრიდან ინტენსიურ, მუდმივ მოვლას. სასურველია ამგვარი პირების – ისტორიკოსების, არქიტექტორების, ლანდშაფტის არქიტექტორების, მებაღეებისა თუ ბოტანიკოსების შესაფერისი ტრენინგებით უზრუნველყოფა.  ყურადღება უნდა მიექცეს იმ მცენარეთა სახეობების გამრავლებასა და გავრცელებაზე ზრუნვას, რომლებიც აუცილებელია ბაღის შენარჩუნების ან რესტავრაციისათვის.

მუხლი 25.

ისტორიული ბაღებისადმი ინტერესი უნდა იყოს სტიმულირებული ყველა სახის აქტივობით, რომელიც შეესაბამება და ხაზს უსვამს მისი როგორც წარსული მემკვიდრეობის ჭეშმარიტ ღირებულებას და უზრუნველყოფს გაუმჯობესებულ ცოდნას და მისდამი პატივისცემას: სამეცნიერო კვლევების ხელშეწყობა, ინფორმაციის საერთაშორისო დონეზე ურთიერთგაცვლა; პუბლიკაციები, მათ შორის ხალხისათვის განკუთვნილი ზოგადი ხასიათისა; ხალხისათვის მისაწვდომი მონიტორინგის წახალისება  და მედიის გამოყენება ბაღის საჭიროებებისა და განვითარების მიმართ ცნობიერების ამაღლების მიზნით, რათა დაცულ იქნას ბუნება და ისტორიული მემკვიდრეობა.

Nota Bene

ზემოაღნიშნული რეკომენდაციები გამოსაყენებელია მსოფლიოს ნებისმიერი ბაღისათვის.
წარმოდგენილ ქარტიას შესაძლებელია დაემატოს ზოგიერთი პუნქტი ბაღების სპეციფიკური ტიპების შესახებ, რომელიც დაერთვება  ზემოჩამოთვლილ პუნქტებს მოკლე აღწერილობის სახით.

დამტკიცებულია იკომოსის მიერ 1982 წელს

„ბათუმის ავტოტრანსპორტი“ რუსული „გაზპრომის“ პროდუქციას შეიძენს. 92 ათასი ლარის ღირებულების საცხებ-საპოხ მასალებზე ხელშეკრულება ტენდერში გამარჯვებულ კომპანიასთან 31 დეკემბრამდე უნდა გაფორმდეს.

სატრანსპორტო საშუალებებისთვის საჭირო საცხებ-საპოხი მასალების შესყიდვაზე ტენდერი „ბათუმის ავტოტრანსპორტმა“ 2015 წლის 10 დეკემბერს გამოაცხადა, სავარაუდო ღირებულებით – 110 780 ლარი.

ტენდერში სამი კომპანია მონაწილეობდა: „ჯენტო ტრეიდინგი“ [საბოლოო ფასი – 105 900 ლარი],  „თეგეტა მოტორსი“ [96 585 ლარი] და „ემ-ენ ჯორჯია“ [92 000 ლარი].

სატენდერო კომისიამ ყველაზე დაბალი ფასის მიხედვით „ემ-ენ ჯორჯიას“ წინადადება განიხილა. კომპანიამ კი შემსყიდველს რუსული, „გაზპრომის“ მიერ   წარმოებული პროდუქცია შესთავაზა, რაც „ბათუმის ავტოტრანსპორტისთვის“ მისაღები აღმოჩნდა.

შპს „ემ-ენ ჯორჯია“-ს წილის 100%-ის მფლობელი მიმდინარე წლის 23 დეკემბრამდე სააქციო საზოგადოება „ვისოლ პეტროლიუმ ჯორჯია“ იყო, ხოლო საჯარო რეესტრის 23 დეკემბრის ამონაწერით კომპანიის მესაკუთრეა შპს „ვისოლ ავტო ექსპრესი“, რომელმაც „ემ-ენ ჯორჯია“-ს წილის 100% „ვისოლ პეტროლიუმ ჯორჯიასგან“ 1 მილიონ 187 ათას ლარად შეისყიდა.

მეორე დღესვე, შპს „ემ-ენ ჯორჯია“ შეერწყა „ვისოლ ავტო ექსპრესს“, რომლის მესაკუთრეც ასევე „ვისოლ პეტროლიუმ ჯორჯიაა“.

კომპანიების შერწყმის შედეგად, „ბათუმის ავტოტრანსპორტის“ სატენდერო კომისიის მიერ გამარჯვებულად დასახელებულმა კომპანია „ემ-ენ ჯორჯიამ“ არსებობა შეწყვიტა. შესაბამისად, საცხებ-საპოხი მასალების შესყიდვაზე  ხელშეკრულება „ბათუმის ავტოტრანსპორტსა“ და „ვისოლ ავტო ექსპრესს“ შორის გაფორმდება. პროდუქციის მიწოდება კი მოხდება ეტაპობრივად, 2016 წლის 31 დეკემბრამდე.

„ბათუმის ავტოტრანსპორტი“ რუსულ პროდუქციას პირველად არ ყიდულობს. მაგალითად:

2015 წლის 25 თებერვლის ხელშეკრულებით, ასევე „გაზპრომის“ მიერ წარმოებული საცხებ-საპოხი მასალები „ავტოტრანსპორტმა“ შპს „ჯეო-ტრენდისგან“ 79 900 ლარად შეისყიდა.

2014 წლის 9 იანვარს შპს „ავტოფორმულასთან“ გაფორმებული ხელშეკრულებით „ბათუმის ავტოტრანსპორტმა“ 89 980 ლარად შეიძინა რუსული კომპანია „ლუკოილის“ პროდუქცია – 22 ათასი ლიტრი დიზელის ძრავის ზეთი.

2013 წლის 10 იანვრის ხელშეკრულებით შპს თეგეტა მოტორსისგან „ბათუმის ავტოტრანსპორტის“ მიერ, ასევე შეძენილი იქნა რუსეთში წარმოებული დიზელის ძრავის ზეთი, 59 390 ლარად.

ბათუმის ძველ ბულვარში სამი სავალი ბილიკიდან ერთი უქმდება და მის ადგილს,  სავარაუდოდ, მწვანე საფარი დაიკავებს. ვინაიდან „ძველი ბულვარი“ კულტურული მენკვიდრეობის ძეგლია, იქ მიმდინარე სამუშაოები უნდა შეთანხმდეს აჭარის  კულტურული მემკვიდრეობის დაცვის სააგენტოსთან. სააგენტოს ხელმძღვანელი მირანდა ჩარკვიანი აცხადებს, რომ სამუშაოები გეგმიურია, სააგენტოსთან შეთანხმებულია და მას ტენდერში გამარჯვებული კომპანია ახორციელებს.

„ბათუმელებმა“ გადაამოწმა სატენდერო დოკუმენტაცია და აღმოჩნდა, რომ კომპანიასთან გაფორმებული ხელშეკრულება სავალი ბილიკის გაუქმებას არ ითვალისწინებს. სავალი ბილიკის გაუქმება და მოლის მოწყობა არც იმ საინფორმაციო დაფაზეა დატანილი, რომელიც ბულვარშია განთავსებული.

ბულვარის ადმინისტრაციამ ხელშეკრულება [N2/35, ძირითადად, ძველ ბულვარში საკანალიზაციო სისტემის რეაბილიტაციასა და ქვაფენილების დაგებაზე] რუსულ კომპანია „ლიტომთან“ [ООО „ЛИТОМ“] 2015 წლის 26 ნოემბერს გააფორმა. ხელშეკრულების მიხედვით, კომპანიას ბულვარში შესრულებული სამუშაოებისთვის  1,2 მილიონზე მეტ ლარს გადაუხდიან.

ხელშეკრულებით კომპანიამ შემდეგი სამუშაოები უნდა შეასრულოს: „ძველი ბულვარის ტერიტორიაზე საკანალიზაციო სისტემის რეაბილიტაციის, უნივერსიტეტის მოედნის ასასვლელიდან კაფებარ „ტყუპებამდე“ ალეაში ასფალტის საფარის, დაზიანებული ფილების, ბრეგჩის საფარისა და ძველი ბორდიურების აყრა-გატანა, სანიაღვრე ბუნებრივი წვიმმიმღები ჭების დაერთება-მოწყობის (გადაყვანა პლიაჟზე გადაქაჩვით), ბეტონის დეკორატიული ფილებისა და ბორდიურების მოწყობის სამუშაო“.

მირანდა ჩარკვიანის ინფორმაციით, „საუბარია 5600 კვ/მ ფართობზე და თუ მოქალაქეებს ბულვარში დამატებით მწვანე საფარი არ უნდათ, შესაძლოა ეს საკითხი განიხილონ“. მიუხედავად ჩარკვანის ამ განცხადებისა, ბილიკი დღეს უკვე გაუქმებულია და ის „მოლის“ მოსაწყობად, ფაქტობრივად, მზადაა.

ბულვარში მიმდინარე პროცესებთან დაკავშირებით მირანდა ჩარკვიანი აცხადებს – „ჩვენ კანონი არ დაგვირღვევია“, თუმცა ვის გულისხმობს „ჩვენ“-ში და კონკტრეტულად ვინ მიიღო გადაწყვეტილება სამი ბილიკიდან ერთი ბილიკი გაუქმებულიყო, ჩარკვიანი არ აკონკრეტებს: „ბილიკი არ უქმდება, იქ კეთდება მოლი“.

მირანდა ჩარკვიანი, იმ უწყების ხელმძღვანელია, რომელმაც უმთავრესად ბულვარის, როგორც ძეგლის იერ-სახის შენარჩუნებაზე უნდა იზრუნოს, ბილიკის გაუქმებაში პრობლემას იმიტომ ვერ ხედავს, რომ – მისივე სიტყვებით – „აქ არ არის ისეთი მოძრაობა, რომ ხალხი ერთმანეთს ეჯახებოდეს“.

ბულვარში მიმდინარე პროცესებზე არაინფორმირებულია ბათუმის მერიაც, რომელიც ბულვარის მესაკუთრეა.

„ბულვარში სარეაბილიტაციო სამუშაოები, ეს გულისხმობს ქვაფენილებს, გზის გასწორებას და ა.შ. ასეთ რამეს კი მერიასთან შეთანხმება არ სჭირდება. თუმცა, იქ ინფრასტრუქტურის გადაკეთებასთან დაკავშირებით რაიმე ინფორმაცია მერიაში არ არის შემოსული. სავალი ბილიკი თუ უქმდება და ეს არის თუ არა ინფრასტრუქტურის გადაკეთება – ეს უკვე აჭარის ეკონომიკის სამინისტრომ უნდა გვითხრას“, – უთხრეს „ბათუმელებს“ ბათუმის მერიის პრესსამსახურში. მათივე ინფორმაციით, მათ გადაამოწმეს ინფორმაცია აჭარის ფინანსთა და ეკონომიკის სამინისტროში, საიდანაც აცნობეს, რომ ბულვარში მხოლოდ დაზიანებული ასფალტის საფარს ცვლიან და არანაირი სავალი ბილიკი არ უქმდება.

ბათუმის ბულვარის ტოპოგრაფიული გეგმისა და კონცეფციის შემუშავება-დაგეგმარებაზე  ხელშეკრულება ტენდერისა და კონკურსის გარეშე გაფორმდა კომპანიასთან, რომელიც ნასყიდობის სხვა ხელშეკრულების პირობების დარღვევისთვის, ადრე აჭარის ფინანსთა და ეკონომიკის სამინისტროს დაჯარიმებული ჰყავს. საუბარია შპს „სანატორიუმი-სასტუმრო ოაზისზე“.

კომპანიას მაშინ ჯარიმა აპატიეს, თუმცა პირობები მაინც ვერ შეასრულა, რის გამოც გაუცოცხლდა ძველი და დაეკისრა ახალი საჯარიმო სანქციები.

ბულვარის კონცეფციასთან დაკავშირებით შექმნილი კომისის წევრის, მირანდა ჩარკვიანის განცხადებით, კომპანიის შერჩევაში კომისიაც მონაწილეობდა. თუ რა კრიტერიუმით შეირჩა „სანატორიუმი სასტუმრო ოაზისი“? – „ბათუმელების“ კითხვაზე ჩარკვიანმა ასეთი პასუხი გასცა – „მე სპეციალურად ჩავედი ჩაქვში და ვნახე მათი გაკეთებული პროექტი. მე ვნახე ლანდშაფტურ დიზაინს როგორ უყურებენ“. თუმცა, იქვე განაცხადა, რომ ის არ არის ლანდშაფტის სპეციალისტი.

მომდევნო კითხვაზე, დაინტერესდა თუ არა ამ კომპანიის საქმიანობით, რომ იყო დაჯარიმებული ვალდებულებების შეუსრულებლობის გამო, მირანდა ჩარკვიანმა გვიპასუხა, რომ ამითი არ დაინტერესებულა: „მე მაინტერესებს რა პროდუქტს ქმნის და ბულვარში რას შემოგვთავაზებს“.

სსიპ „ბათუმის ბულვარი“ მართვის უფლებით აჭარის ფინანსთა და ეკონომიკის სამინისტროზეა გადაცემული. ბულვარის კონცეფციასთან დაკავშირებით შექმნილი კომისის წევრები, მირანდა ჩარკვიანის თქმით, სამინისტროს წარმომადგენლებიც იყვნენ, კომისიას კი უშუალოდ ფინანსთა და ეკონომიკის მინისტრის ერთ-ერთი მოადგილე თავმჯდომარეობდა.

სახელმწიფო აუდიტის  [2014 წლის პერიოდის, N7/105] ანგარიშის მიხედვით, აჭარის ფინანსთა და ეკონომიკის სამინისტროში: „ადგილი აქვს სახელშეკრულებო ვალდებულებების შესრულებაზე არათავისდროული და არასათანადო კონტროლის დაწესების ფაქტებს. მაგალითად, შპს „სანატორიუმი-სასტუმრო ოაზისს“ ნასყიდობის ხელშეკულების პირობების დარღვევისათვის დაკისრებული საჯარიმო სანქციები, 2013 წლის 17 ოქტომბრის შეთანხმების აქტის თანახმად ჩამოეწერა, ვალდებულების სრულად და დროულად შესრულების პირობით.

ვალდებულებები არ შესრულებულა, რის გამოც გაუცოცხლდა ჩამოწერილი და დაეკისრა ახალი საჯარიმო სანქციები, რამაც 2015 წლის 15 იანვრის მდგომარეობით 2 მილიონ 380 ათასი აშშ დოლარი და 832 ათას 800 ლარი შეადგინა. ზემოთ აღნიშნული თარიღიდან ვალდებულების შესრულების დამადასტურებელი დოკუმენტები აუდიტის პერიოდში ვერ იქნა წარმოდგენილი“.

აუდიტის დასკვნიდან გამომდინარე, რამდენიმე შეკითხვით მივმართეთ აჭარის ფინანსთა და ეკონომიკის სამინისტროს. „ბათუმელებმა“ სამინისტროსგან ზეპირი განმარტება ვერ მიიღო. სამინისტროს პრესცენტრის ხელმძღვანელის თქმით, აღნიშნულ კითხვებზე პასუხებს წერილობით მოგვაწვდიან.

„ბათუმელებმა“ აჭარის ფინანსთა და ეკონომიკის სამინისტროს შემდეგი კითხვებით მიმართა:

1. რა პირობების დარღვევისთვის და როდის დაეკისრა საჯარიმო სანქციები შპს „სანატორიუმი-სასტუმრო ოაზისს“ და რა ოდენობით?
2. რა ღონისძიებები გაატარა სამინისტრომ აღნიშნული კომპანიის მიმართ დარიცხულ საჯარიმო სანქციებთან [რამაც 2015 წლის 15 იანვრის მდგომარეობით 2380,0 ათასი აშშ დოლარი და 832,8 ათასი ლარი შეადგინა] დაკავშირებით? გადაიხადა ჯარიმა კომპანიამ [თუ კი, რამდენი და როდის]? თუ კვლავ ჩამოეწერა [რამდენი, რის საფუძველზე და რა პირობით]?
3. რატომ მოახდინა სსიპ „ბათუმის ბულვარმა“ ბათუმის ბულვარის ტოპოგრაფიული გეგმისა და კონცეფციის შემუშავება-დაგეგმარების მომსახურების შესყიდვა გამარტივებული შესყიდვის გზით და რატომ არ მოხერხდა ტენდერის ან კონკურსის გამოცხადება?
4. რა კრიტერიუმების მიხედვით შეირჩა შპს „სანატორიუმი-სასტუმრო ოაზისი“, რომელთანაც გაფორმდა კიდეც ზემოაღნიშნული მომსახურების [ბულვარის ტოპოგრაფიული გეგმისა და კონცეფციის შემუშავება-დაგეგმარება] გაწევაზე სახელმწიფო შესყიდვის ხელშეკრულება?

შპს „სასტუმრო სანატორიუმი ოაზისი“, რომელიც ბათუმის ბულვარის კონცეფციაზე მუშაობდა, 24 დეკემბრიდან ცალკე იურიდიულ კომპანიად აღარ არსებობს. სამი კომპანიის შერწყმა/რეორგანიზაციის შემდეგ ახალი კომპანია – შპს „დრიმლენდ ოაზისი“ მუშაობს. სწორედ ამ სახელწოდების პროექტი ხორციელდება ჩაქვში, სასტუმრო „ოაზისის“ ირგვლივ.

25 დეკემბერს, ბათუმის ბულვარში ძველი ბულვარის დასაცავად გამაფრთხილებელი აქცია გაიმართა, რომლის მონაწილეები ქალაქის ისტორიულ ბულვარში ახალი კონცეფციის განხორციელებას ეწინააღმდეგებიან.

ბათუმში, ევროპის მოედანზე საახალწლო ნაძვის ხე საღამოს რვის ნახევარზე აანთეს, რის შემდეგაც ნინო ქათამაძისა და ჯგუფ „ინსაითის“ კონცერტი დაიწყო, რომელიც საათ ნახევარს გაგრძელდა.

ნაძვის ხის ანთება ბათუმში 2016 | 25 დეკემბერი, 2015

კონცერტი თბილისიდან მოწვეულმა ალტერნატიულმა ბენდმა “LOUDSPEAKER” გააგრძელა და ამ წუთებშიც მიმდინარეობს.

კონცერტის ორგანიზატორია აჭარის ტურიზმისა და კურორტების დეპარტამენტი, რომლის ორგანიზებითვე  ღონისძიებები ჩატარდება 26 და 27 დეკემბერსაც.

26 დეკემბერს, 20:00 საათზე, მსმენელის წინაშე 2014 წლის „X ფაქტორის“ გამარჯვებული თორნიკე ყიფიანი და ბენდი, ლაშა ღლონტისა და ვაჟა ტუღუშის ტრიო წარდგება. 27 დეკემბერს, კი ადგილობრივი და დედაქალაქიდან მოწვეული ჯგუფები „Gravity“, „The Mins“ და „Young georgian lolitaz“ მსმენელს ორ საათიან პროგრამას წარუდგენენ.

28 დეკემბრიდან 7 იანვრამდე ჩატარებული საახალწლო ღონისძიებებს კი აჭარის განათლებისა და კულტურის სამინისტრო და ბათუმის მერიის „კულტურის ცენტრი“ უხელმძღვანელებს.

საახალწლო ღონისძიებების დეტალური განრიგი შეგიძლიათ იხილოთ აჭარის ტურიზმისა და კურორტების დეპარტამენტის მთავარ ვებ-გვერდზე gobatumi.com

შენიშვნა: ტურიზმის დეპარტამენტის პრესამსახურის ინფორმაციით, 26-27 დეკემბერს, ევროპის მოედანზე დაგეგმილი საახალწლო კონცერტები, წვიმის შემთხვევაში, ბათუმის ხელოვნებისა და მუსიკის ცენტრის ნაცვლად, ისევ ევროპის მოედანზე გაიმართება.

ნაძვის ხის ანთება ბათუმში 2016 | 25 დეკემბერი, 2015

ბათუმის საქალაქო სასამართლოში იუტიციის უმაღლესი საბჭოს გადაწყვეტილებით სამი მოსამართლე გაამწესეს: ხათუნა ბოლქვაძე, ირაკლი შავაძე და გიორგი გრატიაშვილი. არჩევნები ამ წუთებშიც მიმდინარეობს.

ხათუნა ბოლქვაძე ბათუმის საქალაქო სასამართლოში წლებია მუშაობს, ირაკლი შავაძე კი ადვოკატია.

რაც შეეხება გიორგი გრატიაშვილს, იგი 2009-2011 წლებში აჭარაში ზედამხედველ პროკურორად მუშაობდა. მისი სახელი ბიზნესმენებისთვის ძვირადღირებული მანქანების ჩამორთმევის სკანდალს უკავშირდება. ეს მანქანები ახალმა ხელისუფლებამ 2012 წლის საპარლამენტო არჩევნების შემდეგ მფლობელებს უკან დაუბრუნა. ასევე, ბათუმში ის იყო 2008 წელს მოკლული ჯარისკაცის, როინ შავაძის საქმის ზედამხედველი პროკურორი. ეს საქმე დღემდე გამოუძიებელია.

ბათუმის საქალაქო სასამართლოს ადმინისტრაციულ საქმეთა კოლეგიაში მოსამართლეობის მსურველი 19 კანდიდატი იყო დარეგისტრირებული, სამოქალაქო საქმეთა კოლეგიაში კი – 20. სისხლის სამართლის საქმეთა კოლეგიაში მოსამართლეობის მსურველი 19 კანიდატი იყო დარეგიტრირებული.