Batumelebi

ბათუმის ბულვარში,  ანბანის კოშკის წინ, პლაჟზე ახალი კონსტრუქციის აგება მიმდინარეობს. „ბათუმის ბულვარის“  ინფორმაციით, 1 381 კვ/მეტრზე კვების ობიექტი აიგება, რომელიც შპს „რესტას“  ეკუთვნის. მფლობელს  ხელშეკრულება  2019 წლამდე აქვს გაფორმებული. მერიის არქიტექტურის სამსახურის ინფორმაციით, პროექტზე ნებართვა გაცემული არ არის.

ბულვარის ადმინისტრაციის ინფორმაციით,  „რესტას“  პლაჟის ნაწილი აუქციონის წესით გადაეცა. ტერიტორიაზე  ბეტონის სვეტების ჩამოსხმა მიმდინარეობს, თუმცა ბულვარის ადმინისტრაციაში „ბათუმელებს“ ეუბნებიან, რომ „რესტას“ კაპიტალური მშენებლობის განხორციელების უფლება არ აქვს.

„პროექტით გათვალისწინებულია ხის კონსტრუქცია, უბრალოდ წერტილოვან ჩასხმებს აკეთებენ, რაზეც უნდა აეწყოს ხის კონსტრუქცია“-გვეუბნება საზოგადოებასთან ურთიერთობის ხელმძღვანელი, მაგდა ჯაიანი.

ბულვარის ადმინისტრაციის ინფორმაციით, მოიჯარემ წლის განმავლობაში 55 ათასი ლარი უნდა გადაიხადოს. კვების ობიექტში კი დახალოებით 60 პირი დასაქმდება.

ბათუმის მერიის არქიტექტურის სამსახურის უფროსის ირაკლი ახალაძის განცხადებით, ობიექტის მშენებლობის პროექტი მის სამსახურთან არ არის შეთანხმებული. „უნდა შეეთანხმებინა ჩვენთან პროექტი და უნდა გაგვეცა ნებართვა, მაგრამ სამწუხაროდ არ აქვთ ეს ნებართვა და როგორც ვიცი ზედამხედვბელობის სამსახურის მიერ შეჩერებულია სამუშაოების წარმოება“-ამბობს ირაკლი ახალაძე.

მერიის ზედამხედველობის სამსახურის უფროსის, ზაალ მამუჭაძის თქმით, ობიექტის მშენებლობა გუშინწინ შეაჩერეს.

„ბათუმის მერიას არ გაუგზავნია სარჩელი სააპელაციო სასამართლოში“, – გვითხრეს მერიის პრესსამსახურში მას შემდეგ, როცა გონიოელებს ბათუმის მერი, გიორგი ერმაკოვი შეხვდა და მათ სააპელაციო სასამართლოში გაგზავნილი სარჩელის გამოხმობას დაჰპირდა.

საპროტესტო აქცია გონიოს მცხოვრებლებმა ბათუმის მერიასთან დღეს, 14 ივნისს გამართეს. მათი მოთხოვნა იმის გარკვევა იყო, ასაჩივრებდა თუ არა მერია ბათუმის საქალაქო სასამართლოს გადაწყვეტილებას, რომლის მიხედვითაც მერიის მიწის საკუთრების კომისიამ თითოეული გონიოელის შემთხვევა ინდივიდუალურად უნდა განიხილოს.

„იყო იქ საუბარი ძირითადად ისეთ თემებზე, რაც პრობლემური არ არის, რომ თურმე გადაფარვებია და ბევრს არ უნდა ჰქონდეს იმის მოლოდინი, რომ მიწა დაუბრუნდება. ეს ჩვენც ვიცით, რომ გადაფარვები არსებობს. ვისაც არ აქვს გადაფარვა, იმას დაგვიბრუნონ“, – უთხრა გონიოში მცხოვრებმა ენვერ ირემაძემ „ბათუმელებს“ მერთან შეხვედრის შემდეგ.

შეხვედრას ესწრებოდა ანა ბერძენიშვილი, „საერთაშორისო გამჭვირვალობა საქართველოს“ იურისტი.  იგი ყურადღებას ამახვილებს იმ გარემოებაზე, რომ ბათუმის მერი უფლებამოსილი პირი არ არის ჩაერიოს საკუთრების უფლების აღიარების კომისიის საქმიანობაში, თუმცა ამის მიუხედავად, ის გონიოელებს სარჩელის გამოხმობას დაჰპირდა.

„ჩვენ ვერ მივიღეთ ბათუმის მერისგან პასუხი კითხვაზე, რატომ გასაჩივრდა სასამართლოს გადაწყვეტილება, ან რის გამო უნდა გამოითხოვონ სარჩელი უკან, თუ მერიას მიაჩნია, რომ სამართლიანი იყო გასაჩივრება. ვნახოთ. იმედია, ეს მორიგი ტყუილი დაპირება არ იქნება კომისიის მხრიდან,“ – ამბობს ანა ბერძენიშვილი.

გონიოელებთან შეხვედრას ესწრებოდა ირაკლი ბოლქვაძეც, საკუთრების უფლების აღიარების კომისიის ყოფილი თავმჯდომარე. მერიის პრესსამსახურის განმარტებით, ირაკლი ბოლქვაძე, მართალია, უკვე არაუფლებამოსილი პირია, მაგრამ კითხვებზე პასუხის გაცემა მასაც შეეძლო მოსახლეობისთვის. გონიოელებს არ შეხვედრია დავით ოქრაძე – მიწის საკუთრების აღიარების კომისიის ახალი თავმჯდომარე.

ბათუმის მერიის საკუთრების უფლების აღიარების კომისიის თავმჯდომარე დავით ოქრაძე იქნება. ინფორმაცია „ბათუმელებს“ მერიის პრესსამსახურში დაუდასტურეს. დავით ოქრაძე მიწის კომისიის თავმჯდომარის მოადგილე იყო აქამდე. იგი ასევე არის მერიის ქალაქგეგმარების და ურბანული განყოფილების უფროსი.

დავით ოქრაძე 2010 წელს ხელვაჩაურის საკუთრების აღიარების კომისიის წევრი იყო და ხელი მოაწერა ასობით გონიოელისთვის მიწის საკუთრების ჩამორთმევას. 2017 წლის 11 აპრილს მან „ბათუმელებს“ უთხრა: „მე არ ვმუშაობდი ხელვაჩაურის კომისიაში მაშინ, როცა ამ ადამიანებს მისცეს მიწის ნაკვეთები. მიმაჩნია, რომ ჩამორთმევის აქტი იყო სამართლიანი,“- უთხრა მაშინ „ბათუმელებს“ დავით ოქრაძემ.

დავით ოქრაძემ მაშინ „ბათუმელებს“  ისიც უთხრა, რომ სასამართლოს გადაწყვეტილების შემედგ, სადაც გონიოლებმა ბათუმის მერიას საქმე მოუგეს, ის გონიოსთან დაკავშირებულ დავებში მონაწილეობას არ მიიღებდა შემდეგი მოტივაციით: „მე აღარ ვაპირებ ამაში მონაწილეობას. არ მინდა, ისევ გაუგებრობაში მოვხვდე.“

დღემდე საკუთრების უფლების აღიარების კომისიას ირაკლი ბოლქვაძე ხელმძღვანელობდა. მან დღეს საპროტესტო აქციაზე გონიოელებს უთხრა, რომ ის აღარ არის კომისიის თავმჯდომარე, თუმცა მოგვიანებით ის ბათუმის მერთან ერთად შეხვდა აქციის მონაწილეებს ჟურნალისტების გარეშე. ამ შეხვედრის შემდეგ მიიღო „ბათუმელებმა“ ინფორმაცია, რომ ირაკლი ბოლქვაძე დავით ოქრაძემ ჩაანაცვლა.

აჭარის უმაღლესი საბჭო საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს 2016 წლის ანგარიშს საბჭოს სხდომაზე განიხილავს. განხილვის პროცედურის შესახებ დღეს, 13 ივნისს, საკონსტიტუციო, იურიდიულ და საპროცედურო საკითხთა კომისიის სხდომა იმართება.

„აჭარის ტელევიზიისა და რადიოს“ სამეთვალყურეო საბჭოში ოთხი წევრია. მე-5 წევრის სავარძელი კი გასული წლის მაისიდან თავისუფალია, მას შემდეგ, რაც ზაზა ხალვაშმა ეს თანამდებობდა დატოვა. სამეთვალყურეო საბჭოს წევრის შესარჩევად კონკურსს აჭარის უმაღლესი საბჭოს თავმჯდომარე აცხადებს. დავით გაბაიძე „ბათუმელებთან“ ორი თვის წინ ამბობდა, რომ კონკურსი საგაზაფხულო სესიის დროს აუცილებლად გამოცხადდებოდა.

რატომ არ გამოაცხადა აქამდე კონკურსი უმაღლესი საბჭოს თავმჯდომარემ? – დავით გაბაიძემ მაშინ განმარტა, რომ მას ამ კუთხით კანონმდებლობის დახვეწის სურვილი ჰქონდა: „გახსოვთ კრიტიკა კვოტირების წესებთან დაკავშირებით, მაგრამ უმჯობესია კონკურსი გამოვაცხადოთ და პარალელურად კანონის დახვეწაზეც გაგრძელდება მუშაობა. ბორდმა ტელევიზიის დირექტორი აირჩია, რაც აჩვენებს, რომ მეხუთე წევრის არყოლა დაბრკოლებას არ ქმნის.“

უმაღლესი საბჭოს პრესსამსახურის ინფორმაციით, ბორდის მეხუთე წევრის შესარჩევად კონკურსის გამოცხადებაზე მუშაობა მიმდინარეობს და კონკურსი უახლოეს მომავალში გამოცხადდება.

„ახალგაზრდა პედაგოგთა კავშირმა“, არასრულწლოვანთა შრომით უფლებებთან დაკავშირებით კვლევა გამოაქვეყნა, რომელიც „სოციალური კვლევებისა და ანალიზის ინსტიტუტმა“ ჩაატარა, პროექტის ფარგლებში – „სოციალური და საგანმანათლებლო ინიციატივები – მომავალი თაობის კეთილდღეობისთვის“.  კვლევის პერიოდში გურიასა და აჭარაში 16-იდან 22-წლამდე 223 ახალგაზრდა გამოიკითხა, რომლებიც თურქეთში მათი დასაქმების პირობების და დასაქმების ადგილზე სექსუალური ძალადობის შესახებ  საუბრობენ.

კვლევის მიხედვით, თურქეთში სამუშაო მიგრაციის გამოცდილება არასრულწლოვნების 86 პროცენტს, 15-17 წლის ასაკში აქვთ მიღებული. პირველი ვიზიტისას მათ საზღვარი მშობელთან ერთად გადაკვეთეს, მომდევნო ვიზიტებისას კი მშობელთან ერთად საზღვრის გადაკვეთის პროცენტული წილი თანდათან იკლებს. საზღვრის გადაკვეთისას არასრულწლოვნების  15 პროცენტს არ ჰქონია მშობლის ნოტარიულად დამოწმებული თანხმობა, რაც მათ ყოფნას თურქეთის ტერიტორიაზე თავიდანვე არალეგალურს ხდის.

„ბათუმელებს“  კვლევის სოციალური კომპონენტის მენეჯერი სალომე ჭიჭინაძე ესაუბრა, რომელიც ამბობს, რომ  მოზარდები თურქეთში სამუშაოდ, ძირითადად, ზაფხულის პერიოდში გადადიან, თუმცა არის სკოლის პერიოდში გადასვლის შემთხვევებიც.

„იყო შემთხვევები, როცა შრომითი გამოცდილება მოზარდებს 12 წლის ასაკშიც ჰქონდათ მიღებული. დასაქმების დროს მათ არც მშობლის ნებართვა ჰქონიათ და არც შრომითი ხელშეკრულება დამსაქმებლის მხრიდან“, – გვეუბნება ის.

სალომე ჭიჭინაძის თქმით, კვლევის დროს, ხუთმა რესპონდენტმა აღიარა, რომ  დასაქმების ადგილზე, არასრულწლოვან ასაკში გახდა სექსუალური ძალადობის მსხვერპლი. „აქედან 3 ბიჭი იყო, 2 კი გოგო“.

კვლევის მიხედვით, ჩაის ან თხილის პლანტაციებში დასაქმებული მოზარდების დიდი უმრავლესობა 9 საათს ან მეტს მუშაობს. ამასთან, ჩაის პლანტაციებში მომუშავეთა 79% საკუთარ სამუშაოს მძიმედ აფასებს, თხილის პლანტაციაში მომუშავეთაგან კი იმავე შეფასებას რესპონდენტთა 45% აკეთებს. „საერთო ჯამში, ყოველი ათი არასრულწლოვნიდან არანორმირებულად (8 საათზე მეტს) 9 საათს მუშაობს“, – ნათქვამია კვლევაში.

სალომე ჭიჭინაძის თქმით, ბავშვების ან მოზარდების შრომით საქმიანობაში ჩაბმის ინიციატორები მშობლები არიან. „და ეს მაშინ, როცა მათ წარმოდგენა არ აქვთ არც შრომით უფლებებზე და არც შრომით კანონმდებლობაზე. კვლევაში შემაშფოთებელია ის, რომ 16 პროცენტი საუბრობს იმაზე, მათი ჯანმრთელობის მდგომარეობა გაუუარესდა. ყველაზე ცუდი ის არის, რომ მოზარდებს დაკარგული აქვთ განათლების მიღების სურვილი და ამაში დიდ როლს ასრულებენ როგორც პედაგოგები, ასევე  მშობლები“, – გვეუბნება სალომე ჭიჭინაძე. მისი თქმით, კვლევის დროს სწორედ ისინი საუბრობენ იმაზე, რომ „ეს ბავშვები მაინც ვერაფერს ისწავლიან და  სჯობს, შრომითი გამოცდილება მაინც მიიღონ თურქეთში“.

კვლევა აჩვენებს, რომ მოზარდები მძიმე შრომისგან მიღებულ თანხებს ძირითადად ოჯახის საჭიროებებში ხარჯავენ. „ტექნიკას ყიდულობენ ოჯახისთვის, თავისთვის ტანსაცმელს ან ტელეფონებს“.

კვლევის მიხედვით, გამოკითხვა აჩვენებს, რომ თურქეთში სამუშაოდ წასვლის ყველაზე დიდი მოტივაცია არასრულწლოვნებისთვის ფინანსური დამოუკიდებლობაა. მომდევნო მოტივაცია ოჯახის ფინანსური დახმარება, ასევე, მნიშვნელოვანი მოტივაციაა სიღარიბისგან თავის დაღწევა.

თურქეთში სამუშაოდ მოსიარულე არასრულწლოვნებიდან 76.7% სკოლაში ოფიციალურად დარეგისტრირებულია (არ არის დარეგისტრირებული 17% და სკოლის ასაკის აღარ არის 5.8%). მათში სკოლის რეგულარული გაცდენის ტენდენცია არ იკვეთება, რადგან 65% გაკვეთილებს თითქმის არ აცდენს. სასწავლო პროცესში ნაკლებად ჩართული არასრულწლოვნების თითქმის ნახევარი (47%) სკოლაში რეგულარულად სიარულს ვერ ახერხებს იმის გამო, რომ ოჯახის სამეურნეო საქმეებშია ჩართული. ასევე აღსანიშნავია, რომ 14.5%-ს სწავლის მიმართ ინტერესი აქვს დაკარგული.

არასრულწლოვნების უმრავლესობა თურქეთში ზაფხულში, სეზონურ სამუშაოზე მიდის, მაგრამ მონაცემთა ანალიზი აჩვენებს, რომ პირველიდან მეხუთემდე, თითოეული ვიზიტის შემდეგ, შრომითი მიგრაცია სულ უფრო ხშირად ხდება სკოლის გაცდენის ხარჯზე.

„ეს ტენდენცია იკვეთება თითოეულ ვიზიტზე და თუ პირველსა და ბოლო ვიზიტებს შევადარებთ. სასკოლო არდადეგების ხარჯზე თურქეთში გამგზავრების პროცენტული წილი 24.5%-ით მცირდება“, – ნათქვამია კვლევაში.

კვლევის მიხედვით, ფოკუს-ჯგუფის მონაწილე ექსპერტები საუბრობენ იმაზე, რომ სახელმწიფო ინსტიტუტები, რომლებსაც ამ საკითხისადმი ყურადღების მიქცევა ევალებათ, არ ხარჯავენ ამისათვის საკმარის რესურსს – სოციალური აგენტები ან სოფლის რწმუნებულები თურქეთში სამუშაოდ წასული ახალგაზრდის საქმიანობით არ ინტერესდებიან, არ კონტროლდება საზღვარზე მათი მიმოსვლის ვადები სათანადოდ და სკოლის წარმომადგენლები არ რეაგირებენ ასეთ დროს გაცდენებზე.

საქართველოს მთავარი პროკურატურა ოპერატიული დანიშნულების 10 ახალ მსუბუქ ავტომანქანას [სედანი] შეიძენს. ახალი ავტომანქანების შესაძენად პროკურატურას ორი ტენდერი აქვს გამოცხადებული, სატენდერო თანხა კი 713 550 ლარია.

მანქანების შესყიდვას მთავარი პროკურატურა ამ ავტომანქანების დამატებით 5-წლიან საგარანტიო სერვისთან ერთად და ამასთან, ჩანაცვლების გზით გეგმავს. ჩასანაცვლებელი ავტომანქანების ღირებულება კი, სატენდერო დოკუმენტების მიხედვით, ჯამში 310 ათასი ლარია, რაც მიმწოდებლებთან ანგარიშსწორებისას ახალი მანქანების შესყიდვაზე გასაფორმებელ სახელშეკრულებო ღირებულებას გამოაკლდება.

პროკურატურა 2 ტენდერით შეისყიდის 7 და 3 ავტომანქანას.

სატენდერო წინადადებების ფასი შედგება ორი კომპონენტისაგან: პირველ შემთხვევაში – 7 ერთეული ოპერატიული ავტომანქანის სავარაუდო ღირებულება არ უნდა აღემატებოდეს 425 300 ლარს, ხოლო ამ ავტომანქანების სერვისის ღირებულება [5 წელი ან 150 000 კილომეტრი] არ უნდა აღემატებოდეს 23 520 ლარს 1 წლის განმავლობაში;

3 ავტომანქანის შესყიდვის შემთხვევაში კი, ანალოგიურად – სავარაუდო ღირებულება არ უნდა აღემატებოდეს 131 500 ლარს, ხოლო სერვისის ღირებულება არ უნდა აღემატებოდეს 7 830 ლარს 1 წლის განმავლობაში.

ამასთან, თანმდევი საგარანტიო პირობების ფარგლებში გეგმიური ფასიანი მომსახურების ანგარიშსწორება მოხდება შესრულებული სამუშაოს მიხედვით, ყოველ ჯერზე გაწეული მომსახურების შემდეგ მიღება-ჩაბარების აქტის გაფორმებისა და შესაბამისი საგადასახადო დოკუმენტაციის წარმოდგენის საფუძველზე.

დაფინანსების წყაროა 2017-2022 წლების სახელმწიფო ბიუჯეტი.

მოქალაქე გიორგი ლოგუა საქართველოს პარლამენტს საკონსტიტუციო სასამართლოში უჩივის. ის სისხლის სამართლის კოდექსით გათვალისწინებულ იმ სამართლებრივი ნორმის ანტიკონსტიტუციურად ცნობას ითხოვს, რომელიც პორნოგრაფიის დამზადებასა და გავრცელებას კრძალავს.

გასული წლის აპრილში შინაგან საქმეთა სამინისტრომ გამოძიება სწორედ პორნოგრაფიის გავრცელების მუხლით დაიწყო ცნობილი რეჟისორის, გასპარ ნოეს ფილმის – „სიყვარულის“ წინააღმდეგ. შინაგან საქმეთა სამინისტროს შეფასებით, მხატვრული ფილმი პორნოგრაფია იყო, შესაბამისად, მისი ინტერნეტსაიტებზე გავრცელება დანაშაულია.

გიორგი ლოგუას და გიორგი ფუტკარაძეს პორნოგრაფიის გავრცელებისთვის 2015 წლის 28 აპრილს წაუყენეს ბრალი და გირაოს საფუძველზე გაათავისუფლეს. გამოძიების ვერსიით, სხვადასხვა საიტიდან გადმოტვირთულ პორნომასალას ისინი თავიანთ ინტერნეტგვერდზე ათავსებდნენ.

პორნოგრაფიის გავრცელებისთვის საქმის განხილვა ამ დრომდე გრძელდება თბილისის საქალაქო სასამართლოში. ვიდრე სასამართლო გადაწყვეტილებას მიიღებს, კანონის შეცვლის მოთხოვნით, თავდაპირველად სარჩელი საკონსტიტუციო სასამართლოში გიორგი ფუტკარაძემ შეიტანა. საქმის განხილვა რამდენიმე დღის წინ შეწყდა, რადგან მოსარჩელე ავტოავარიის შედეგად გარდაიცვალა. გიორგი ლოგუას სარჩელის არსებით განხილვას კი საკონსტიტუციო სასამართლოში 27 ივნისს დაიწყებს, თუმცა საკონსტიტუციო სასამართლომ მიიჩნია, რომ უნდა განიხილოს მხოლოდ პორნოგრაფიული მასალის გავრცელების ნაწილზე და არა მის დამზადებაზე, ასევე კანონით გათვალისწინებულ სასჯელზე. მოსარჩელის ინტერესებს საკონსტიტუციო სასამართლოში გიორგი გოცირიძე იცავს, „ახალგაზრდა იურისტთა ასოციაციის“ იურისტი.

მოსარჩელე მიიჩნევს, რომ სისხლის სამართლის კოდექსის ჩანაწერი ამ სახით: „პორნოგრაფიული ნაწარმოების, ნაბეჭდი გამოცემის, გამოსახულების ან პორნოგრაფიული ხასიათის სხვა საგნის უკანონოდ დამზადება, გავრცელება ან რეკლამირება, აგრეთვე ასეთი საგნით ვაჭრობა ანდა მისი შენახვა გაყიდვის ან გავრცელების მიზნით, – ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით იმავე ვადით”, – არის ბუნდოვანი და შეუძლებელი ხდება იმის დადგენა, რა უნდა ჩაითვალოს პორნოგრაფიად და რა – არა.

გარდა ამისა, გიორგი ლოგუას აზრით, საკანონმდებლო ჩანაწერი პორნოგრაფიაზე ნორმის დისკრიმინაციული გამოყენების შესაძლებლობას იძლევა. შესაძლოა, ცალკეული პირის მიერ კონკრეტული მასალის გავრცელება პორნოგრაფიად შეფასდეს და პირი პასუხისგებაში მიეცეს. სარჩელში ასევე წერია, რომ სისხლის სამართლის კოდექსი გაფრთხილების სტანდარტს არ ითვალისწინებს, რაც ასევე გამოხატვის უფლების რისკის ქვეშ დაყენების გარდა, ეწინააღმდეგება „საქართველოს კონსტიტუციის“ 42-ე მუხლს: „არავინ არ აგებს პასუხს იმ ქმედებისათვის, რომელიც მისი ჩადენის დროს სამართალდარღვევად არ ითვლებოდა“.

სარჩელში ხაზგასმულია ისიც, რომ სისხლის სამართლის კოდექსის გარდა, ტერმინს – „პორნოგრაფია“ იყენებს კანონი „მაუწყებლობის შესახებ“, თუმცა არც აქაა განმარტებული, კონკრეტულად რა უნდა ჩაითვალოს პორნოგრაფიად.

„მაუწყებლობის შესახებ” კანონის 56-ე მუხლის მე-4 ნაწილის თანახმად, „იკრძალება პორნოგრაფიის, აგრეთვე ადამიანისა და მოქალაქის ღირსებისა და ძირითად უფლებათა შემლახავი ისეთი პროგრამის ან რეკლამის განთავსება, რომელიც შეიცავს უხამსობას”. რას ნიშნავს პორნოგრაფია, არც ამ კანონით არ არის განსაზღვრული.

რაც ნათლად ჩანს, ამ კანონიდან არის ის, რომ პორნოგრაფია გათანაბრებულია უხამსობასთან, თუმცა ტერმინი ,,აგრეთვე”-ს გამოყენება მიგვანიშნებს იმაზე, რომ პორნოგრაფიასა და უხამსობას შორის ტოლობის ნიშანი არ უნდა დავსვათ. შესაძლოა ამ ორ  ფენომენს რაიმე საერთო, მსგავსება ჰქონდეს, მაგრამ პორნოგრაფია და უხამსობა ერთი და იმავე არ იქნება. სხვაგვარად აზრს მოკლებულია პორნოგრაფიის აკრძალვასთან ერთად, კანონმდებელმა ცალკე რატომ მიუთითა აგრეთვე უხამსობაზე,“ – ვკითხულობთ გიორგი ლოგუას სარჩელში.

სარჩელში რამდენიმე მაგალითია მოყვანილი, თუ რა გადაწყვეტილებები აქვთ მიღებული დასავლური ქვეყნების სასამართლოებს პორნოგრაფიის დამზადების და გავრცელების საქმეებზე. ამ პრაქტიკის მიხედვით, მთავარია, არასრუწლოვნის დაცვის მექანიზმების შექმნა და იმის განსაზღვრა, პორნოგრაფიულ მასალას აქვს თუ არა ხელონებითი, ან სამეცნიერო დანიშნულება. სასამართლოს გადაწყვეტილებებში ასევე ჩანს, რომ ძირითადი მოთხოვნა არის საჯარო სივრცის დაცვა პორნოგრაფიული მასალის გავრცელებისგან.

გიორგი ლოგუას სარჩელში მოყვანილია, მაგალითად აშშ-ს უზენაესი სასამართლოს გადაწყვეტილება საქმეზე „მილერი კალიფორნიის წინააღმდეგ“, რაც უხამსობის სტანდარტების დადგენას ეხებოდა. ამ საქმეში სასამართლომ განაცხადა შემდეგი:

,,თუკი სახელმწიფო უუნაროა სრულად, დეტალურად განსაზღვროს აკრძალული უხამსი მასალის შინაარსი, მაშინ ხელისუფლებას ერთმევა უხამსობის სისხლისსამართლებრივი დევნის უფლება. თუკი აკრძალული ქმედება ზუსტად არ არის განსაზღვრული, ძლიერი (Hard-core) პორნოგრაფია შეზღუდვის გარეშე ხელმისაწვდომი უნდა იყოს არასრულწლოვნებისათვის, ქუჩაში შემთხვევით გამვლელებისათვის და ამ მასალის მიღების მსურველი პირებისათვის ერთნაირად.”

ქონებრივი დეკლარაციის მიხედვით, დავით ვარდიაშვილი შინაგან საქმეთა მინისტრის მოადგილის გარდა, ფინანსური დირექტორია „საქართველოს ნავთობის და გაზის კორპორაციაში“. ამას გარდა, იგი ანსამბლ „რუსთავის“ სოლისტია და ტექნიკური უნივერსიტეტის ასოცირებული პროფესორი. 2016 წელს დავით ვარდიაშვილის შრომის ანაზღაურება ჯამში 163 603 ლარია.

დავით ვარდიაშვილი შინაგან საქმეთა მინისტრის მოადგილედ 2016 წლის იანვარში დაინიშნა. მის მიერ შევსებული 2016 წლის ქონებრივი დეკლარაციის მიხედვით, უშუალოდ მინისტრის მოადგილეობისთვის მან წლის განმავლობაში 132 100 ლარი მიიღო, ანუ თვეში – 11 008 ლარი.

დეკლარაციის მიხედვით, დავით ვარდიაშვილი მინისტრის მოადგილეობის პარალელურად იკავებდა „ნავთობისა და გაზის კორპორაციაში“ ფინანსური დირექტორის პოზიციას და მისმა შემოსავალმა წლის განმავლობაში 12 541 ლარი შეადგინა. მინისტრის მოადგილე დეკლარაციაშივე აღნიშნავს, რომ იგი ამ პოზიციაზე 2016 წლის პირველი იანვრიდან მუშაობდა 8 დეკემბრამდე.

სოლისტობაში დავით ვარდიაშვილს წლის განმავლობაში 11 812 ლარი მიუღია. ქონებრივი დეკლარაციის მიხედვით, შინაგან საქმეთა მინისტრის მოადგილე ანსამბლ „რუსთავის“ სოლისტად მუშაობდა 2016 წლის იანვრიდან დეკემბრის ჩათვლით.

ამას გარდა, დავით ვარდიაშვილი საქართველოს ტექნიკური უნივერსიტეტის ასოცირებული პროფესორია. პროფესორობაში მინისტრის მოადგილეს 2016 წლის განმავლობაში 7150 ლარი აუღია.

შინაგან საქმეთა სამინისტრო თანამდებობის პირებზე გაცემულ შემოსავლებს, პრემიების კონკრეტულ ოდენობებს მალავს. ამ უწყებას „ბათუმელებმა“ არაერთხელ მიმართა საჯარო ინფორმაციის მოწოდების თხოვნით, მაგრამ შინაგან საქმეთა სამინისტრო სასამართლოს გადაწყვეტილებასაც კი არ უწევს ანგარიშს.

ინფორმაციის გადასამოწმებლად ჩვენ საჯარო სამსახურის ბიუროს დავუკავშირდით, სადაც თანამდებობის პირები ქონებრივ დეკლარაციებს ავსებენ და აქვეყნებენ. ბიუროს დირექტორის მოადგილემ, თემურ ჩიხრაძემ გვითხრა, რომ დავით ვარდიაშვილმა დეკლარაციის შევსების დროს შეცდომა დაუშვა და შესწორებაზე წერილობითი განაცხადი მან 2017 წლის თებერვალში წარმოადგინა.

„წერილი წარმოადგინა, მაგრამ დეკლარაციაში ცვლილების შეტანის უფლება არავის აქვს. შემოსავლები სწორედ არის მითითებული, მაგრამ სამუშაოს შესრულების თარიღები არეულია,“- ამბობს თემურ ჩიხრაძე.

საჯარო სამსახურის ბიუროს ინფორმაციით, დავით ვარდიაშვილი 2016 წელს მხოლოდ შინაგან საქმეთა მინისტრის მოადგილე იყო და ასოცირებული პროფესორის თანამდებობას იკავებდა ტექნიკურ უნივერსიტეტში. რაც შეეხება კერძო კომპანიაში ფინანსურ დირექტორობას, დავით ვარდიაშვილს დაუზუსტებია, რომ იგი „საქართველოს ნავთობისა და გაზის კორპორაციაში“ მხოლოდ 2016 წლის პირველი იანვრიდან 8 იანვრამდე მუშაობდა. გამოდის, რომ დავით ვარდიაშვილს ერთ კვირაში აუღია 12 541 ლარი.

დავით ვარდიაშვილს წერილობით ასევე უცნობებია საჯარო სამსახურის ბიუროსთვის, რომ ანსამბლ „რუსთავის“ სოლისტი თვითონ კი არა, მისი მეუღლე – ეთერ ჭანუყვაძეა.

ავტოსაგზაო შემთხვევა ბათუმში, მემედ აბაშიძის გამზირზე, რამდენიმე წუთის წინ მოხდა. ლუკა ასათიანის ქუჩიდან მემედ აბაშიძის გამზირზე გამოსული მოპედი მსუბუქ ავტომანქანას შეეჯახა.

შემთხვევის შედეგად მოპედიდან ქალი გადმოვარდა. დაშავებული სასწრაფო-სამედიცინო სამსახურმა გადაიყვანა. ადგილზე უკვე იმყოფება საპატრულო პოლიცია. შინაგან საქმეთა სამინისტროში გვითხრეს, რომ მოპედი გაჩერებულ ავტომანქანას დაეჯახა და მხოლოდ ადმინისტრაციული სამართალდარღვევის ოქმი გაფორმდება. ამ ავტოსაგზაო შემთხვევაზე გამოძიება არ დაწყებულა.

აჭარის უმაღლესი საბჭოს ადმინისტრაციულ შენობაში გათბობა-გაგრილების ახალი მოწყობილობების [ჩილერ(ებ)ის] შეძენა, მათი მონტაჟი და არსებულის დემონტაჟია დაგეგმილი. სისტემის განახლებისთვის უმაღლესი საბჭოს ბიუჯეტში 64 ათას 300 ლარია გათვალისწინებული. სამუშაოებს საკანონმდებლო ორგანო ელექტრონული ტენდერით შეისყიდის.

უმაღლესი საბჭო ტენდერში გამარჯვებულს ჩილერის ექსპლუატაციის ინსტრუქციას ქართულ, ან რუსულ ენაზე თხოვს.

ამასთან, მიმწოდებელმა უნდა უზრუნველყოს აჭარის უმაღლესი საბჭოს ადმინისტრაციული შენობისთვის „მინიმუმ 235 კვტ. ჯამური სიმძლავრის გათბობა-გაგრილების მოწყობილობ(ებ)ის „ჩილერ(ებ)ი“-ს მიწოდება, ადგილზე მონტაჟი [მ/შ შენობის შიგნით უკვე არსებულ გაყვანილობაზე მიერთება] და გაშვება-გამართვა, მწყობრიდან გამოსული ჩილერების დემონტაჟი და გატანა უმაღლესი საბჭოს ტერიტორიაზე მითითებულ ადგილზე“.

საგარანტიო ვადა არანაკლებ 18 თვეა.  სატენდერო პირობის მიხედვით, „გარანტიის მოქმედების ვადაში, შესაბამისი შეტყობინების მიღებიდან არაუგვიანეს 5 დღეში მიმწოდებელმა საკუთარი ხარჯებით უნდა უზრუნველყოს საქონელზე გამოვლენილი ნაკლის აღმოფხვრა, ხოლო აღნიშნულის შეუძლებლობის შემთხვევაში არაუგვიანეს 15 დღის ვადაში უზრუნველყოს საქონლის ჩანაცვლება შესაბამისი საქონლით და თანმდევი სამონტაჟო სამუშაოების შესრულება“.

ახალი მოწყობილობების მონტაჟი და უმაღლესი საბჭოს შენობის გათბობა-გაგრილების შიდა გაყვანილობაზე დაერთება, ხელშეკრულების გაფორმებიდან არაუგვიანეს 20 დღეში უნდა შესრულდეს. ტენდერი მიმდინარე წლის 15 ივნისს დასრულდება.

ხვალ, ათ ივნისს, დღის მეორე ნახევრიდან ბათუმში დროგამოშვებით წვიმაა მოსალოდნელი – ასეთია გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის პროგნოზი.

ჰაერის ტემპერატურა სანაპირო რაიონებში ღამით 15-20, დღისით 25-30 გრადუსი, ხოლო მთაში ღამით 10-15, დღისით კი 15-20 გრადუსი იქნება.

დროგამოშვებით წვიმა და ელჭექი 11 ივნისამდე გაგრძელდება, შემდეგი ორი დღის განმავლობაში კი ბათუმში გამოიდარებს.