მთავარი,სიახლეები

რა უთხრეს თურქმა მებაჟეებმა ქართველ კოლეგებს შეხვედრაზე

25.09.2017 • 2775
რა უთხრეს თურქმა მებაჟეებმა ქართველ კოლეგებს შეხვედრაზე

სარფის საბაჟოზე დღეს მომხდარ ინციდენტთან დაკავშირებით ქართველი მებაჟეები თურქ კოლეგებს შეხვდნენ. შემოსავლების სამსახურის ინფორმაციით, შეხვედრას ესწრებოდა ხოფის ახალი გუბერნატორიც.

„გუბერნატორმა განაცხადა, რომ ის პირად კონტროლზე აიყვანს მიმდინარე მოვლენებს და ვიდეო ჩანაწერებსაც პირადად ნახავს. ის დაპირდა მებაჟეებს, რომ აუცილებლად დაისჯებიან ის მებაჟეები, ვისი ბრალეულობაც გამოიკვეთება. ამ შეხვედრის დაწყებისთანავე საზღვრის გადაკვეთის პრობლემა მოიხსნა,“ – ამბობს ხატია მოისწრაფიშვილი, შემოსავლების სამსახურის საზოგადოებასთან ურთიერთობის სამსახურის უფროსი.

რის გამო შეფერხდა საქართველოს მოქალაქეებისთვის თურქეთის საზღვარზე გადასვლა? – ხატია მოისწრაფიშვილის თქმით, ამასთან დაკავშირებით თურქეთის საბაჟოსგან წერილობითი განმარტება არ მიუღიათ.

„ზეპირ საუბრებში თურქმა მებაჟეებმა აღნიშნეს, რომ საქართველოს მოქალაქეებს მართალია „დუტი ფრიში“ ნაყიდი თამბაქო შეჰქონდათ თურქეთში, მაგრამ სიმრავლიდან გამომდინარე, ჩათვალეს, რომ ეს იყო ეკონომიკური საქმიანობა და ფიზიკურ პირებს მისი შეტანის უფლება არ ჰქონდათ,“ – დასძენს ხატია მოისწრაფიშვილი.

დღეს, თურქეთის საზღვრის გადაკვეთის უფლება არც „აჭარის ტელევიზიის“ გადამღებ ჯგუფს მისცეს. ჟურნალისტის, ჯენი კვანტალიანის თქმით, მას თურქმა მებაჟეებმა პასპორტი და მობილური ტელეფონი წაართვეს, ასევე მას და ოპერატორს ფიზიკური შეურაცხყოფა მიაყენეს.

ამავე თემაზე:

თურქეთის საკონსულო თურქი მებაჟეების მიერ აჭარის ტელევიზიის ჟურნალისტის ცემაზე

გადაბეჭდვის წესი


ასევე: