როგორია კულტურული ცხოვრება რეგიონებში, რა მდგომარეობაშია ადგილობრივი კულტურული ობიექტები, რატომ უნდა გაამახვილონ ამ თემებზე ყურადღება პოლიტიკურმა პარტიებმა, როგორია ევროპული ქვეყნების გამოცდილება და რა შეიძლება გააკეთონ ადგილობრივმა მთავრობებმა სიტუაციის გამოსასწორებლად? – ამ თემაზე ბათუმში, „დემოკრატიული ჩართულობის ცენტრში“, 29 სექტემბერს 17:00 საათზე, საარჩევნო მედიაცენტრების პროექტის ფარგლებში ლიტერატურის მუზეუმის დირექტორი, ლაშა ბაქრაძე დისკუსიას გამართავს.
ამავე თემაზე შეხვედრები ბათუმის გარდა გაიმართება ქუთაისსა და ოზურგეთშიც.
„დემოკრატიული ჩართულობის ცენტრის“ ინფორმაციით, საარჩევნო მედიაცენტრები დაფინანსებულია ამერიკის შეერთებული შტატების საერთაშორისო განვითარების სააგენტოს (USAID) მიერ სამოქალაქო საზოგადოების განვითარებისა და მოქალაქეთა ჩართულობის პროექტის (ACCESS) ფარგლებში.
„მედიაცენტრები მოქალაქეებს, ჟურნალისტებს, არასამთავრობო ორგანიზაციებს, მაჟორიტარ კანდიდატებსა და პოლიტიკურ პარტიებს სთავაზობს უსაფრთხო და ნეიტრალურ სივრცეებს ინფორმაციის გავრცელებისა და დისკუსიებისათვის. მედიაცენტრები ხელს უწყობს საარჩევნო კანდიდატებსა და მათი ოლქების ამომრჩევლებს შორის დიალოგის წარმართვას, რათა მოქალაქეები გაეცნონ კანდიდატების საარჩევნო პროგრამებს და ინფორმირებული არჩევანი გააკეთონ“.
