„სად არიან ბათუმელები? სად არიან? ამ ბათუმელებმაც დაინახეს, რომ რაც არ უნდა იბრძოლონ, მაინც თურქეთის იქნება აქაურობა. აი, ეს არის ტრაგედია და ძალიან ვწუხვარ, რომ დღეს იმდენ ხალხს ვერ ვხედავ, რამდენიც მინდა“, – განაცხადა „პატრიოტთა ალიანსის“ ლიდერმა დავით თარხან-მოურავმა დღეს, 24 სექტემბერს, ალიანსის მიერ ორგანიზებულ აქციაზე ბათუმში, ევროპის მოედანზე.
დავით თარხან-მოურავმა თავის გამოსვლაში აქციაზე დამსწრეთა სიმცირეს გაუსვა ხაზი: „დიდი მადლობა, რომ მობრძანდით, მაგრამ მინდა ვთქვა, რომ ეს მოედანი მინიმუმ ოთხჯერ მაინც მაქვს სულ გავსებული. დღეს არ არის ბევრი ხალხი, ეს ძალიან ცუდია. ცუდია იმიტომ, რომ ხალხმა ეტყობა ყველაფრის იმედი დაკარგა. მთელი ამ წლების განმავლობაში, რაც ეს ხელისუფლებაა გაუთავებელ ტყუილში ვართ“.
თარხან-მოურავის თქმით, ხელისუფლება დათმობაზე რომ წავიდეს, სწორედ მრავალრიცხოვანი საპროტესტო აქციებია საჭირო: „ცუდია, რომ დღეს ნახევარი მოედანია სავსე, ეს ხელისუფლება ჩათვლის, რომ ხალხს არაფერი აინტერესებს და უარეს რაღაცებს იზამს, ვიდრე აკეთებდა აქამდე… უნდა ვიმუშაოთ და თბილისის აქციებზე მეტი ხალხი უნდა მოვიყვანოთ და კიდევ ერთი აქცია უნდა დავნიშნოთ ბათუმში, რომ უფრო მეტი ხალხი მოვიდეს. მიუხედავად იმისა, რომ მოედანი ვერ გავავსეთ, ეს აქციები არ დამთავრდება და მუხტი აუცილებლად აიწევა“.
„პატრიოტთა ალიანსის“ აქცია ბათუმში / 24.09.2017/ჯაბა ანანიძის ფოტო
