Batumelebi

დღეს, 3 ივლისს, ბათუმში, გრიბოედოვის ქუჩაზე, „საქართველოს უსინათლოთა კავშირის აჭარის ფილიალის“ ტერიტორიაზე, აჭარაში მცხოვრებმა უსინათლოებმა საპროტესტო აქცია  გამართეს. ისინი აცხადებენ, რომ უსინათლოთა კავშირის ბალანსზე არსებული ქონება და ამ ქონებით მიღებული შემოსავლები მათ არ ხმარდება. უსინათლოები საქართველოს მთავრობას და პროკურატურას მიმართავენ.

„უსინათლოთა საზოგადოების ქონება, რომლის წევრებიც ვართ ჩვენ, ჩვენთვის ხელმიუწვდომელია. ტერიტორია, სადაც ვიმყოფებით, არის უსინათლოთა კავშირის საკუთრება, თუმცა ვინ განკარგავს და სად მიდის ამ ტერიტორიაზე გაქირავებული ობიექტებისგან მიღებული შემოსავლები, ჩვენთვის უცნობია.

გვინდა შეიქმნას კომისია, დაინიშნოს აუდიტი, ჩატარდეს ინვენტარიზაცია და აჭარის უსინათლოთა კავშირის ქონება დარჩეს უსინათლეობს და არა ერთეულებს,“-ამბობს არასამთავრობო ორგანიზაცია „უსინათლოთა ხმის“ დირექტორი ალექსი წეველიძე.

მისი თქმით, უსინათლოები წელიწადში 12 ლარს იღებენ დახმარებას და სხვა ხელშეწყობა კავშირის ქონებისგან არ აქვთ.

„უსინათლოთა კავშირი არ ზრუნავს ადამიანებზე. 29 წლის ადამიანია ლაშა დუმბაძე, რომელიც თხილნარში ცხოვრობს და არც კი იცნობენ კავშირში. მცირე კლანური ჯგუფი მოქმედებს და მხოლოდ ისინი განკარგავენ ყველაფერს,“ – გვეუბნება ის.

თემურ თეთრაძეც უსინათლოა. კავშირის წევრების პოზიციას ისიც იზიარებს და ამბობს, რომ უსინათლოთა კავშირს უსინათლოები არ აინტერესებს.

„მადა ჭამაში მოდისო ნათქვამია და ესენიც ჭამენ ჩვენს ქონებას. შექმნეს ისეთი სისტემა, რომელიც ჩვენ წინააღმდეგ მუშაობს. ძალიან დიდი შემოსავალი გვაქვს, თუმცა უსინათლოები ვერ სარგებლობენ ვერაფრით,“ – ამბობს ის.

უსინათლოთა კავშირის საქმიანობას კრიტიკულად აფასებს კავშირის წევრი, შოთა ბოლქვაძეც: „მივმართავთ საქართველოს პრემიერ-მინისტრს, პროკურატურას და აუდიტის სამსახურს, რომ შეისწავლონ უსინათლოთა კავშირში არსებული ვითარება და დაიცვან ჩვენი უფლება.

ჩვენ გვინდა ვიყოთ სოციალურად დაცულები და მუდმივად არ ვიმყოფებოდეთ სახელმწიფოს კისერზე.  მოგვცენ უფლება ჩვენი კავშირის ქონებით და შემოსავლებით ვისარგებლოთ, თვითონ ვაკონტროლოთ შემოსავლები, ბიუჯეტი და უსინათლოებისთვის შევქმნათ დასაქმების ადგილები“.

შოთა ბოლქვაძის თქმით,  უსინათლოთა კავშრის კარები მათთვის დახურულია.  „უსინათლოთა კავშირის აჭარის ფილიალის თავმჯდომარე გვეუბნება 280 ლარი გვაქვს ხელფასიო. სწორი მართვის პირობებში მათი ხელფასიც გაიზრდება და ჩვენი ცხოვრებაც შეიცვლება. ჩვენ 6 წლიდან 60 წლამდე უსინათლო ადამიანები მოვიძიეთ, რომლებიც ცხოვრობენ აჭარაში და მათ შესახებ არაფერი იციან კავშირში.  მათი უფლებები სრულიად დაუცველია. მაშინ როცა კავშირის თავმჯდომარეს, რეზო მაისურაძეს, ასი ათას ლარამდე აქვს ისრაელის კაზინოში დახარჯული,“ – გვეუბნება შოთა ბოლქვაძე.

მისი თქმით, აუცილებელია შეიქმნას მონიტორინგის ჯგუფი და შეიქმნას სისტემა, რომელიც მოერგება უსინათლოთა პრობლემებს და არა ცალკეული პირების ინტერესებს.

„აქ იყო დანადგარები და უსინათლოები მუშაობდნენ და ჰქონდათ შემოსავლები. ახლა ბიზნესად იქცა აქაურობა და ჩვენ არც დასაქმებულები ვართ და ვერც ჩვენი ქონებით ვსარგებლობთ,“ – გვეუბნება მამია მეკეიძე.

ნათია სირაბიძე, არასამთავრობო ორგანიზაცია „უსინათლოთა ხმის“ წარმომადგენელი ამბობს, რომ  სახელმწიფო უწყებების მხრიდან მათ ხელშეწყობა არ აქვთ.  „რატომ უნდა ვიქირაოთ ტერიტორიები და თან ისეთი, სადაც არც სველი წერტილი გვაქვს, არც წყალი, ვინტილატორის საშუალებაც კი არ გვაქვს, რომ ვისუნთქოთ, ეს არის სამარცხვინო. ყველა წერელი, რომელიც მთავრობას, გამგეობებს, მერიას გავუგზავნეთ,  უარყოფითი პასუხით დაგვიბრუნდა, არავის არ უნდა გამოგვიყოს ფართები, რომ რაიონებში ჩვენი წარმომადგენლობები გვქონდეს და ვიზრუნოთ უსინათლოების დასაქმებაზე.

ნებისმიერი მთავრობის წარმომადგენელმა ერთი საათით აიფაროს თვალებზე ხელი და ისე გადაადგილდნენ  მათ მიერ დაგებულ ქუჩებში,  სხვანაირად ვერ მიხვდებიან რას ვგრძნობთ ჩვენ“.

„საქართველოს უსინათლოთა კავშირის აჭარის ფილიალის“ თავმჯდომარე ზაურ დევაძე ამბობს, რომ უსინათლოთა კავშირის ბალანსზე არსებული ქონება იჯარით არის გაცემული, საიდანაც ყოველთვიური შემოსავალი დაახლოებით 24 ათასი ლარია.

„ბათუმელების“ კითხვაზე, უსინათლოთა რა კონკრეტულ საჭიროებებს ხმარდება აღნიშნული შემოსავლები, ზაურ დევაძე ამბობს „უსინათლოთა კეთილდღეობას“.

„ჩვენ მივმართეთ  სახელმწიფოს და ბუნებრივი აირის გაყვანა, უსინათლოებისთვის 90 პროცენტი არის უფასო, ჩვენი ფილიალი აკეთებს იმას, რომ შუამდგომლობს მთავრობასთან. მაგალითად, მუნიციპალური ტრანსპორტით რომ უფასოდ ისარგებლონ, ოღონდ მხოლოდ ქალაქის ფარგლებში, მუნიციპალიტეტებში არ არიან თანახმა“.

ზაურ დევაძე, უსინათლოთათვის გაწეულ კეთილდღეობად მიიჩნევს მათთვის სპექტაკლის გამართვას: „გავაკეთეთ ღონისძიება, თეატრი ჩავატარეთ და უსინათლოები გვყავდა უფასოდ წაყვანილი. რაც შეეხება ფინანსებს, მე ყოველთვიურად შპს „სინათლიდან“ ვიღებ 500 ლარს, ჩვენმა გამგეობამ გადაწყვიტა, რომ ეს თანხა მხოლოდ სოციალურად დაუცველ და ტოტალურ უსინათლოებს მოხმარდეს“.

ზაურ დევაძის თქმით, შპს „სინათლეში“  11 უსინათლოა დასაქმებული. საიჯარო თანხებიდან შემოსული შემოსავალი კი უსინათლოთა კავშირის ერთიან ბიუჯეტში მიდის და მთელი საქართველოს მასშტაბით ნაწილდება: „ნაწილი ხმარდება მშენებლობას ციხისძირში, სადაც უსინათლოთათვის დასასვენებელი სახლი შენდება“.

„გვყავს ცხრა თვის უსინათლო ბავშვი, ვისთვისაც დახმარება ვთხოვეთ  ქალაქის მერიას  და სარეზერვო ფონდიდან 1 400 ლარით დავეხმარეთ,“ – გვეუბნება უსინათლოთა კავშირის მდივანი თამარ ართილაყვა.

მათი ინფორმაციით, ქვეყნის მასშტაბით, უსინათლოთა კავშირში 24 ათასი უსინათლოა გაწევრიანებული.

ქობულეთი-ბათუმის საავტომობილო გზაზე, მახინჯაურის გვირაბის მიმდებარედ [ჩაქვის მხრიდან], ავტოტრანსპორტის მოსაბრუნებელი კვანძი მოეწყობა. ახალი კვანძის მოწყობას 2,5 მილიონი ლარი დასჭირდება და სამუშაოებს საქართველოს საავტომობილო გზების დეპარტამენტი დაჩქარებული წესით შეისყიდის.

„განსაკუთრებით მაღალი ინტენსივობა არის ჩაქვი-მახინჯაურის მონაკვეთზე, რომელიც გადის რთულ მთაგორიან რელიეფზე და გზის ტექნიკური პარამეტრებიდან გამომდინარე, ავტოტრანსპორტის გადაადგილების სიჩქარე შემცირებულია. შესაბამისად, განსაკუთრებით საკურორტო სეზონზე, ხშირად იქმნება სატრანსპორტო საცობები და მგზავრებს ექმნებათ დისკომფორტი,“ – აცხადებენ გზების დეპარტამენტში.

ჩაქვი-მახინჯაურის მონაკვეთზე, გვირაბის მიმდებარედ, ავტოტრანსპორტის მოსაბრუნებელი გზის [სავარაუდო სიგრძით 1 კმ] მოწყობა, დიდი ალბათობით, განხორციელდება ტენდერის გარეშე, გამარტივებული შესყიდვის საშუალებით, პროექტირება-მშენებლობის რეჟიმში.

ახალი კვანძის მოწყობა, როგორც დოკუმენტებიდან ჩანს, ბათუმის მერის წერილის შემდეგ გადაწყდა. სამინისტრომ 2,5-მილიონიანი პროექტის ტენდერის გარეშე განხორციელების საკითხი ფაქტობრივად ორ დღეში გადაწყვიტა.

ბათუმის მერმა, გიორგი ერმაკოვმა, საქართველოს რეგიონული განვითარებისა და ინფრასტრუქტურის მინისტრს ზურაბ ალავიძეს კვანძის მოწყობის თხოვნით, წერილობით, მიმდინარე წლის 27 ივნისს მიმართა.

„აჭარის რეგიონში ბოლო წლებში საგრძნობლად მოიმატა ადგილობრივმა თუ უცხოეთიდან ჩამოსულმა ტურისტების რიცხვმა, რაც შესაბამისად მოითხოვს ტურისტული ინფრასტრუქტურის მოწყობა-მოწესრიგებას, რათა სრულად იქნას დაკმაყოფილებული ჩამოსული ვიზიტორების მოთხოვნები… უახლოეს პერიოდში დაიწყება ბათუმის შემოვლითი გზის მშენებლობა, რაც საგრძნობლად განტვირთავს ქალაქ ბათუმს ტრანზიტული სატრანსპორტო ნაკადებისგან. იმის გათვალისწინებით, რომ ჩაქვი- მახინჯაურის მონაკვეთი საკმაოდ დატვირთულია სატრანსპორტო ნაკადებით, აღნიშნული მშენებლობის დასრულებამდე მოძრაობის უსაფრთხოების ღონისძიებების გაუმჯობესების მიზნით, მიზანშეწონილია მოეწყოს დამატებით მოსატრიალებელი კვანძი. ყოველივე ზემოაღნიშნულის გათვალისწინებით, გთხოვთ თქვენს დახმარებას, რათა უმოკლეს პერიოდში დაიწყოს და მიმდინარე წელს დასრულდეს აღნიშნული მოსატრიალებელი კვანძის სამშენებლო სამუშაოები“ – აღნიშნულია გიორგი ერმაკოვის წერილში.

რეგიონული განვითარებისა და ინფრასტრუქტურის მინისტრმა ბათუმის მერის წერილი მიღების დღესვე, 27 ივნისს, გადაუგზავნა განსახილველად საქართველოს საავტომობილო გზების დეპარტამენტს.

გზების დეპარტამენტმა კი შესყიდვების სააგენტოს 29 ივნისს მიმართა შესაბამისი სამუშაოების დაუყოვნებლივ დაწყებაზე თანხმობის მისაღებად: „რეგიონში დამახასიათებელი შემოდგომა-ზამთრის უხვნალექიანობა და ის გარემოება, რომ სამუშაოების საპროექტო მომსახურების შესყიდვა, დოკუმენტაციის დამუშავება და ამის შემდგომ, საავტომობილო გზის მოწყობის სამუშაოების შესყიდვის სატენდერო პროცედურები მოითხოვს დროის საკმაოდ დიდ პერიოდს, მიზანშეწონილად მიგვაჩნია, დაუყოვნებლივ დაიწყოს აღნიშნული სამუშაოების განხორციელებს პარალელურ რეჟიმში, რათა სამუშაოები დასრულდეს შემჭიდროვებულ ვადებში, კლიმატური პირობების გაუარესებამდე“.

შესყიდვების სააგენტოს, პოზიციის დასაფიქსირებლად, ვადა 5 ივლისამდე აქვს.

საქართველოს საავტომობილო გზების დეპარტამენტის ინფორმაციით, ფინანსური წინადადება 22-მა კომპანიამ წარმოადგინა, მათგან შეირჩა 10 კომპანია და მათ მიერ შემოთავაზებული ფინანსური წინადადებების შეფასება მოხდება. ბათუმის შემოვლითი გზის 14-კილომეტრიანი მონაკვეთის მშენებლობა ტენდერში გამარჯვებულის გამოვლენის შემდეგ დაიწყება.

ორშაბათს, 3 ივლისს, საქართველოში ერთიანი ეროვნული გამოცდები იწყება. პირველი გამოცდა ქართულ ენასა და ლიტერატურაშია. გამოცდა 4 საათსა და 15 წუთს გაგრძელდება. 

აჭარაში აბიტურიენტებს გამოცდის ჩაბარება შოთა რუსთაველის უნივერსიტეტის შენობაში და დაბა ხულოს საჯარო სკოლაში შეუძლიათ.

ერთიანი ეროვნული გამოცდები 27 ივლისს დასრულდება. ამავე პერიოდში ჩატარდება სამაგისტრო გამოცდები, რომელზეც 14  ათასი აბიტურიენტია დარეგისტრირებული და პედაგოგთა სასერტიფიკატო გამოცდები, სადაც 28 ათასი პედაგოგი დარეგისტრირდა.

ამავე თემაზე: მაია მიმინოშვილის რჩევები აბიტურიენტებსა და მათ მშობლებს საგამოცდო სტრესის დასაძლევად

მთავარ ფოტოზე: ერთიანი ეროვნული გამოცდები ბათუმში, 2016 წელი. ფოტო  „ბათუმელების“ არქივიდან

ბათუმში, ევროპის მოედნის გვერდით მდებარე დუმბაძის ქუჩა, საჯარო პარკინგად იქცა. აქ არც პარკინგის ამკრძალავი და არც ჩიხის ნიშანი დგას. დუმბაძის ქუჩაზე ამბობენ, რომ თუ ადრე აქ მხოლოდ ადგილობრივი მაცხოვრებლები აჩერებდნენ მანქანებს, ახლა ხშირია შემთხვევები, როცა ვიწრო, ტურისტულ ქუჩაზე მანქანას აპარკინგებენ და ტოვებენ, შედეგად, ქუჩა, რომელიც რუსთაველის ქუჩას ევროპის მოედანთან და მემედ აბაშიძის ქუჩასთან აკავშირებს, სასეირნოდ გამოუსადეგარი ხდება.

ბათუმის სატრანსპორტო ინფრასტრუქტურის მართვის სააგენტოს საგზაო მოძრაობის ტექნიკური რეგულირების განყოფილების უფროსის კახაბერ ჭეიშვილის განმარტებით, სააგენტოს თავად არ შეუძლია ამ ადგილას პარკირების ამკრძალავი ნიშნის დადგმა, თუ კი არ იქნება მითითება ბათუმის საკრებულოდან ან საპატრულო პოლიციიდან:

„დუმბაძის ქუჩაზე თავიდან იყო სპეციალური შლაგბაუმი და ვერავინ შედიოდა იქ მაცხოვრებლების გარდა. როგორც ჩანს, შლაგბაუმი აღარ მოქმედებს. პარკირების ამკრძალავი ნიშანს რაც შეეხება, ამ ნიშნის დადგმა ჩვენ შეგვიძლია მხოლოდ საკრებულოს ან საპატრულო პოლიციის დადგენილების თანახმად. იმ შემთხვევაში, თუ იქნება მითითება საპატრულო პოლიციიდან ან ბათუმის საკრებულოს დადგენილება, ჩვენ ვიმოქმედებთ.“

სააგენტოს პარკირების ადმინისტრირების განყოფილების უფროსი, გენადი ჩხაიძე ამბობს, რომ ბოლო ხანს აქ არასწორი პარკინგისთვის არა ერთი ავტომანქანა დააჯარიმეს:

„იყო ამ ადგილზე დაჯარიმებები და ევაკუაციაც განვახორციელეთ. როცა იქნება საგზაო ნიშნები, ჩვენ ამის მიხედვით ვიმოქმედებთ. ჩვენ რამდენჯერაც დაგვირეკა საპატრულო პოლიციამ, იმდენჯერ ჩავატარეთ ევაკუცია. პირადად ჩემი აზრით, ამ ადგილას პარკირება შეიძლება იყოს შეზღუდული, რადგან ეს ქალაქის ცენტრია და მოძრაობა თავისუფალი უნდა იყოს, განსაკუთრებით ახლა, ტურისტულ სეზონზე.“

დუმბაძის ქუჩაზე თვითნებურ ავტოპარკინგს ფეისბუქზეც გამოეხმაურნენ:

ბათუმის დელფინარიუმის განცხადებით, დელფინარიუმის ბინადარს, დელფინს მეტსახელად დანა, შვილი შეეძინა.

„ბოლო ერთი თვეა დელფინარიუმის თანამშრომლები 24 საათიან, საგანგებო რეჟიმში მუშაობენ. დანამ  ექოსკოპიის თანახმად დადგენილ ვადაში იმშობიარა. დედა და ახალშობილი, უსაფრთხოების ნორმების გამო ცალკე აუზში იმყოფებიან, სადაც კიდევ ერთი დედა-შვილი ცუცა და გურუ ბინადრობენ.

დანა და მისი შვილი თავს კარგად გრძნობენ. ჩვეულებისამებრ დაბადებისთანავე დედამ შვილი წლის ზედაპირზე ამოაცურა, ჰაერის პირველი ჩასუნთქვისთვის. რის შემდეგაც პატარამ დედასთან ერთად სინქრონული ცურვა დაიწყო. დაახლოებით 15 წუთის შემდეგ ახალბედამ დედის რძით კვება დაიწყო. ეს პროცესი 3 წელზე მეტ ხანსგაგრძელდება. 6-დან 8 თვის ასაკის შუალედში, რძესთან ერთად პატარა, თევზით კვებასაც დაიწყებს. ახალშობილის სქესი ჯერჯერობით უცნობია“ – აღნიშნულია დელფინარიუმის გაცხადებაში.

ბუნებრივ პირობებთან მიახლოვებულ საარსებო გარემოში დელფინის დაბადება არც თუ ისე ხშირია. თუმცა ბათუმის დელფინარიუმში მსგავსი შემთხვევაა უკვე მეექვსედ დაფიქსირდა. ახალშობილი დელფინის სქესი ჯერჯერობით უცნობია.

საქართველოს განათლების სამინისტროს ინფორმაციით, ევროკავშირის პროექტის ფარგლებში გამოცხადებულია კონკურსი – ახალგაზრდული შეჯიბრი ესეებში [Youth Essay Prize Competition].

კონკურსში მონაწილეობის მიღება შეუძლიათ საქართველოს, მოლდოვის და უკრაინის 30 წლამდე მოქალაქეებს. კონკურსის პირობების თანახმად, მონაწილეებმა უნდა წარადგინონ ესეი ინგლისურ ენაზე (მოცულობა 3000 სიტყვამდე). ესეების თემატიკა უნდა უკავშირდებოდეს მონაწილის ქვეყნის ევროკავშირთან ასოცირების შესახებ შეთანხმებასა და  თავისუფალ სავაჭრო სივრცეს.

ესე უნდა იყოს კარგი ანალიტიკური და ენობრივი ხარისხის. სასურველია, მონაწილემ ესეის თემა შეარჩიოს ისე, რომ საშუალება ჰქონდეს ასახოს საკუთარი ცოდნა, რომლის საფუძველიც იქნება მიღებული აკადემიური ცოდნა, კვლევები ან პროფესიული გამოცდილება. ესეის ავტორი მკითხველს უნდა სთავაზობდეს საინტერესო არგუმენტს ან მიდგომას.

გამარჯვებულების შესახებ ინფორმაცია გამოქვეყნდება შემდეგ ვებ-გვერდზე:   www.3dcftas.eu

გათვალისწინებულია ექვსი ჯილდოს გადაცემა. პირველი კონკურსის შედეგად გაიმარჯვა მოლდოვის ორმა მოქალაქემ. დარჩენილია კიდევ ოთხი ჯილდო. გამარჯვებულები დაჯილდოვდებიან ფულადი პრიზით – 500 ევროს ოდენობით.

განაცხადის წარდგენა შესაძლებელია 2017 წლის 31 აგვისტომდე, შემდეგ ელექტრონულ ფოსტაზე Hrant.Kostanyan@ceps.eu

დღეიდან შუახევში, საზაფხულო იალაღებზე მგზავრთა უფასო მომსახურების პროგრამა ამოქმედდება. პროგრამა  იალაღებზე მგზავრთა უფასოდ, ავტოტრანსპორტით გადაყვანას ითვალისწინებს. შუახევის მუნიციპალიტეტის გამგებლის, ტარიელ ებრალიძის ინფორმაციით, გადაწყვეტილება მოსახლეობის თხოვნით მიიღეს, პროგრამა გასულ წელს დაიწყო და წელს მეორედ ხორციელდება.

გამგებლის ინფორმაციით, პროგრამით სარგებლობაზე „ტურისტებს უარს არვინ ეტყვის“. იმ შემთხვევაში კი, თუ ამას ინტენსიური სახე მიეცემა, რაც ადგილობრივებს შეუშლის ხელს და საჭირო გახდება მარშრუტის დამატება, გამგეობაში იმსჯელებენ როგორ მოიქცნენ: „ პირდაპირ გეტყვით, ამაზე არ გვიფიქრია. აქ ტურისტები, ძირითადად, საკუთარი მანქანებით მოდიან, ისინი ითვალისწინებენ ჩვენს რელიეფს.“

შუახევიდან იალაღების მიმართულებით სამარშუტო მიკროავტობუსი იმოძრავებს, შესაბამისი მომსახურება მუნიციპალიტეტმა ელექტრონული ტენდერით შეისყიდა: „ორი მოთხოვნა გვქონდა, მძღოლს უნდა ჰქონდეს მართვის მოწმობა და ავტომანქანა უნდა იყოს გამართული“.

შუახევის მუნიციპალიტეტის ინფორმაციით, მგზავრებს საშუალება ექნებათ უსაფრთხოდ გადაადგილდნენ შუახევი-კატრიანი-ყავრიანის, ახალდაბა-ბარათაული-გრძელგორის, ხიჭაური-თაგინურის, ცხემლისი-თაგინური-ნაფოცხვარას, ოლადაური-ჩირუხის, ტბეთი-გოგაძეები-ჩირუხის, ჯაბნიძეები-ქიძინიძეები-ჩირუხის, შუბანი-ჩირუხის, კვირიაული-ცინარეთი-ღომის, ნიგაზეული-ჯანჯღნარის, ხიჭაური-მერიაყელის, ინწკირვეთი-შედრეკილის, ზამლეთი-თეთრობის, ბრილი-თაგინურის მთების მიმართულებით.

პროგრამა გასული წლიდან მოქმედებს და მასზე წელს 35 000 ლარი დაიხარჯება.

პარალელურად მიმდინარეობს იალაღების ელექტროფიკაციაც. სამუშაოებს შპს ,,ზურა 2012“ აწარმოებს. პროექტის განსახორციელებლად მუნიციპალიტეტის ადგილობრივი ბიუჯეტიდან ნახევარ მილიონამდე ლარი დაიხარჯება.

საქართველოს რკინიგზა პირველი ივლისიდან ტურისტულ სეზონზე ქათაისი-ბათუმის მარშრუტზე ჩქარ მატარებელს ნიშნავს, რომელიც დილით ქუთაისიდან წამოვა და საღამოს ბათუმიდან გავა. მგზავრობის ფასი 6 ლარი იქნება.

„ჩქაროსნული მატარებელი ქუთაისი-ბათუმი ქუთაისიდან გავა ყოველ დღე, დილის 10:25 საათზე. 13:28 საათზე მატარებელი უკვე ბათუმში იქნება. ბათუმიდან ქუთაისის მიმართულებით კი მატარებელი 23:25 საათზე გავა და ქუთაისში იქნება ღამის 2 საათზა და 20 წუთზე“ – უთხრეს „ბათუმელებს“ საქართველოს რკინიგზაში.

ქუთაისიდან ბათუმამდე გზის მონაკვეთში ჩქარი მატარებელი შემდეგ სადგურებში გაჩერდება: რიონი, სამტრედია, საჯავახო, ლანჩხუთი, სუფსა, ურეკი, ქობულეთი, ჩაქვი, მახინჯაური.

იგივე მატარებელი დღის განმავლობაში საგარეუბნო რეისებს გააკეთებს, ბათუმი-ურეკის მიმართულებით. ბილეთის ფასი 4 ლარი იქნება. საგარეუბნო მატარებლის მოძრაობის განრიგია:

ბათუმი – ურეკი – 14:55 საათზე და 19:20 საათზე.

ურეკი – ბათუმი – 16:20 საათსა და 20:45 საათზე.

10 ივლისიდან ბათუმი-თბილისის მარშრუტზე „მეტრო ჯორჯია“ სამგზავრო ბილეთის ღირებულებას ხუთი ლარით ზრდის, მგზავრებს 25 ლარის ნაცვლად ბილეთში 30 ლარის გადახდა მოუწევთ.

კითხვაზე, რამ განაპირობა ბილეთის გაძვირება, „მეტრო ჯორჯიას“ მარკეტინგის მენეჯერი, ლაშა კენჭაძე პასუხობს, რომ კომპანია ახალი სერვისებისა და ტრანსპორტის დამატებას გეგმავს და ბილეთის ფასის გაზრდა „სერვისის გაუმჯობესებასთანაა დაკავშირებული“. იგი არ აკონკრეტებს, კონკრეტულად რა ახალ სერვისს შესთავაზებს „მეტრო ჯორჯია“ მგზავრებს და რა ხნის განმავლობაში შენარჩუნდება ბილეთის ღირებულება. ლაშა კენჭაძის თქმით, ეს ინფორმაცია 10 ივლისს გახდება ცნობილი.

პარლამენტმა „საჯარო სამსახურის შესახებ“ საქართველოს კანონში ცვლილებები შეიტანა. ამ ცვლილებებით, 2017 წლის 1-ელი ივლისიდან 2017 წლის 31 დეკემბრამდე პერიოდი ჩაითვალა გარდამავალ პერიოდად, რა დროშიც ახალი კანონმდებლობის გარკვეული მოთხოვნები, რომლებიც 1-ელი ივლისიდან ამოქმედდება, საჯარო მოხელეებზე 2018 წლამდე არ გავრცელდება.

ასეთია, მაგალითად, კანონი, რომელიც შრომის ანაზღაურების [ხელფასი, დანამატი, პრემია] გაცემის მოქმედ წესს საჯარო სამსახურებში 1-ელი ივლისიდან ფაქტობრივად აუქმებს.  ხელისუფლების გადაწყვეტილებით, ეს წესი საჯარო მოხელეებზე 2018 წლის 1-ელი იანვრიდან გავრცელდება.

გარდამავალ პერიოდში კი, საჯარო დაწესებულებაში დასაქმებული პირი შრომით გასამრჯელოს [ხელფასს] მიიღებს „საჯარო სამსახურის შესახებ“ საქართველოს 1997 წლის 31 ოქტომბრის №1022-Iს კანონით და მის საფუძველზე მიღებული [გამოცემული] კანონქვემდებარე აქტებით დადგენილი წესითა და ოდენობით. ეს დღეს მოქმედი წესი და ხელფასის [დანამატი, პრემია] დადგენილი ოდენობებია, რაც სავარაუდოდ, გარდამავალ პერიოდში აღარ შეიცვლება.

გარდამავალი პერიოდის გასვლის შემდეგ, საჯარო დაწესებულებებში ხელფასებისა თუ საკლასო დანამატების საკითხს დაარეგულირებს ახალი კანონი – „საჯარო დაწესებულებაში შრომის ანაზღაურების შესახებ“, რომელიც ჯერ მიღებული არ არის.

საქართველოს მთავრობამ პროფესიული საჯარო მოხელისთვის მოხელის კლასების მინიჭების წესი და პირობებიც დაამტკიცა, რომელიც მიმდინარე წლის პირველი ივლისიდან ამოქმედდება. ახალი ცვლილებით: „მოხელეს შესაძლებელია მიენიჭოს მოხელის კლასი მოხელის შეფასების შედეგების მიხედვით“. პროფესიული საჯარო მოხელის შეფასების წესი და პირობები კი 2018 წლის იანვრიდან ამოქმედდება.

კანონში შეტანილი ცვლილებით:

[checklist]

• საჯარო „მოხელეს შვებულების მოთხოვნის უფლება წარმოეშობა თანამდებობაზე დანიშვნიდან 11 თვის გასვლის შემდეგ. უფლებამოსილი პირის თანხმობით მოხელეს შვებულება შეიძლება ამ ვადის გასვლამდეც მიეცეს. თანამდებობაზე დანიშვნიდან 1 წლის გასვლის შემდეგ კი მოხელეს შვებულება კალენდარული წლის განმავლობაში ნებისმიერ დროს მიეცემა.“
• 1-ლი ივლისიდან ცვლილებების ამოქმედება იწვევს საჯარო მოხელის მოვალეობის შემსრულებლად დანიშნული პირის უფლებამოსილების შეწყვეტასაც. 2017 წლის 1 ივლისამდე საჯარო დაწესებულებებმა უნდა უზრუნველყონ გამოცხადებული კონკურსებისა და დაწყებული წარმოებების დასრულება. ამასთან საჯარო დაწესებულებებს მიეცათ უფლება გარდამავალ პერიოდში ამა თუ იმ ვაკანსიაზე გამოაცხადონ ღია კონკურსებიც.

[/checklist]

[red_box]„საჯარო სამსახურის შესახებ“ კანონის საბოოლოო ვარიანტით ამ კანონის მოქმედება არ ვრცელდება:[/red_box]

[crosslist]

• საქართველოს პარლამენტის საპარლამენტო ფრაქციის, დროებითი საგამოძიებო კომისიისა და სხვა დროებითი კომისიის აპარატების, აფხაზეთისა და აჭარის ავტონომიური რესპუბლიკების უმაღლესი წარმომადგენლობითი ორგანოების ფრაქციის აპარატის, მუნიციპალიტეტის საკრებულოს ფრაქციის აპარატის თანამშრომლებზე;
• საქართველოს პრეზიდენტის ადმინისტრაციის უფროსსა და მის მოადგილეზე, საქართველოს მთავრობის ადმინისტრაციის უფროსსა და მის მოადგილეზე, საქართველოს პარლამენტის აპარატის უფროსსა და მის მოადგილეზე, აფხაზეთისა და აჭარის ავტონომიური რესპუბლიკების უმაღლესი წარმომადგენლობითი ორგანოების აპარატების უფროსებსა და მათ მოადგილეებზე, აფხაზეთისა და აჭარის ავტონომიური რესპუბლიკების მთავრობების აპარატების უფროსებსა და მათ მოადგილეებზე;

[/crosslist]

„აჭარის ფერები“ – ასე ჰქვია ახალ ვიდეოკლიპს, რომელიც აჭარის ტურიზმის დეპარტამენტის დაკვეთით გადაიღო სარეკლამო კომპანია JWT METRO-მ. კლიპისათვის აჭარის ტურიზმისა და კურორტების დეპარტამენტმა კომპანიას 125 000 ლარი გადაუხადა გამარტივებული შესყიდვით.

დეპარტამენტის შეკვეთით კიდევ ერთი ახალი კლიპი – „მწვანე აჭარა“ გამოვიდა, რომლის მოსამზადებლადაც ტურიზმის დეპარტამენტმა 35 000 ლარი გადაიხადა. ვიდეორგოლი სარეკლამო კომპანია LOOK PRODUCTION-მა გადაიღო.

აჭარის ტურიზმის დეპარტამენტის დაკვეთით სულ ამ ეტაპისთვის  4 ვიდეორგოლია გადაღებული, რომელსაც ტურისტები 16 სამიზნე ქვეყანაში ნახავენ, როგორც ინტერნეტ და სოციალური მედიის საშუალებით, ასევე საერთაშორისო მედიით. ტურიზმის დეპარტამენტს ხუთი ვიდეორგოლის გადაღება აქვს დაგეგმილი, რისთვისაც აჭარის ტურიზმის დეპარტამენტს ჯამში 350 000 ლარი აქვს გათვალისწინებული.

აჭარის ტურიზმისა და კურორტების დეპარტამენტის თავმჯდომარე სულხან ღლონტი ამბობს, რომ დეპარტამენტი უმაღლესი საბჭოს მიერ დამტკიცებული ბიუჯეტით ხელმძღვანელობს. მისი თქმით, თანხა, რაც დეპარტამენტმა ახალი კლიპისათვის – „აჭარის ფერები“ – გადაიხადა, კლიპის საბაზრო ღირებულებაზე ბევრად მცირეა, შემსრულებელი კომპანიის გამოცდილებიდან და ფასებიდან გამომდინარე. კითხვას, რატომ შეისყიდა კლიპი დეპარტამენტმა გამარტივებული წესით, სულხან ღლონტი ასე პასუხობს:

„შესყიდვების სააგენტომ გაგვიმარტივა შესყიდვები და ვიყიდეთ გამარტივებულად. კლიპების შემთხვევაში, ძირითადად, სახელწიფო ამ გზას ირჩევს, რადგან აქ არის საქმე არა მხოლოდ ფასზე, არამედ კრეატივზე, ტექნიკურ მახასიათებლებსა და ხარისხზე, რაც ყველაზე მნიშვნელოვანია. ამ პროდუქტს მსოფლიოს 16 ქვეყნის ბაზარზე ნახავენ, მათ შორის „ევრონიუსზე“ და „ბიბისიზე“ , რომელთანაც კონტრაქტებს ჩვენ ახლა ვამზადებთ. „მწვანე აჭარა“ და „აჭარის ფერები“ არის პროდუქტი, რომელიც ძალიან ბევრ ტურისტს მოიზიდავს აჭარაში. ეს არის კლიპები, რომლებზეც, პრაქტიკულად ნეგატიური შეფასება არ ყოფილა, არც სოციალურ ქსელში, არც პროფესიონალებში. კლიპი გუშინ დავდეთ და ერთ დღეში ნახა ნახევარ მილიონზე მეტმა მომხმარებელმა სხვადასხვა ინტერნეტგვერდზე, ისე, რომ ჩვენ არც ერთი თეთრი არ დაგვიხარჯავს [ინტერნეტრეკლამისთვის].

ჩვენი რეგიონის მთავარი კონტრიბუტორი არის ტურიზმი, განხორციელებული ინვესტიციების 40 პროცენტი მოდის ტურიზმზე, ყველაფერი რეგიონში უკავშირდება ტურიზმს და ჩვენ, სამწუხაროდ, ტურიზმისთვის არ ვხარჯავთ ბიუჯეტის ერთ პროცენტსაც კი. გვინდა ტურისტი, მაგრამ გვენანება თანხის დახარჯვა კლიპებში, გვინდა ტურისტი, მაგრამ სარეკლამო კამპანიები გავაკეთოთ თუ არ გავაკეთოთ – სულ ამ დისკუსიაშია საზოგადოება. ჩვენ დაგვხვდა ბიუჯეტი და შევასრულეთ ბიუჯეტი. მე ვთვლი, რომ ძალიან ხარისხიანად“.

სულხან ღლონტი ამბობს, რომ დეპატამენტი ახლა მოლაპარაკებებს აწარმოებს სამ საერთაშორისო მედიაორგანიზაცისთან, კლიპების ეთერში განთავსებასთან დაკავშირებით. ამისათვის დეპარატამენტი 250 000-ზე მეტ  დოლარს დახარჯავს.

„ევრონიუსზე“ მზადდება 11-კვირიანი კონტრაქტი, რომელიც გულისხმობს კლიპის რამდენჯერმე გაშვებას დღის განმავლობაში, ასევე, სიუჟეტებისა და რეპორტაჟების მომზადებას აჭარის შესახებ. ახლა მიდის საუბარი კონტრაქტზე. ასევე საუბარია „ემბისი“-ზე, რომელიც ფარავს არაბულ ქვეყნებს“, – ამბობს სულხან ღლონტი.

დეპარტამენტი კიდევ ერთი კლიპის გადაღებას გეგმავს, რომელიც, სავარაუდოდ, 2017 წლის ბოლოს გამოვა და ტურისტებს აჭარაში მოუხმობს ახალი წლის შესახვედრად. ჯამში 2017 წელს აჭარის ტურიზმისა და კურორტების დეპარტამენტი 16 სამიზნე ქვეყანაში რეგიონის რეკლამირებისათვის 4, 765, 000  ლარს დახარჯავს.

უახლოეს დღეებში ბათუმში უნალექო ამინდია მოსალოდნელი. გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, ხვალ, პირველ ივლისს, ჰაერის ტემპერატურა სანაპირო რაიონებში დღისით 25-30, ღამით კი 20-25 გრადუსი იქნება.  მთაში – დღისით 23-28 და ღამით 10-15 გრადუსი ტემპერატურაა მოსალოდნელი.

მომდევნო ორი დღის განმავლობაში ჰაერის ტემპერატურა ორი-სამი გრადუსით მოიმატებს. სინოპტიკოსების ინფორმაციით, ზღვის წყლის ტემპერატურა ამჟამად 23,5  გრადუსია.