Batumelebi

ბათუმის ნავსადგურის აკვატორიაში ფსკერდამაღმავებელი სამუშაოები ჩაატარეს. პორტის ადმინისტაციის ინფორმაციით მსგავსი მასშტაბის სამუშაოები ბოლოს ორმოცი წლის წინ ჩატარდა.

შემსრულებელმა კომპანიამ ნავსადგურის აკვატორიიდან გაიტანა 186 121 კუბური მეტრი გრუნტი, რაც პორტის სპეციალისტების განმარტებით „ხელს შეუწყობს უფრო დიდი ტვირთამწეობის გემების დამუშავებას.“

სამუშაოები კომპანია „DLEX Trade Consult“ და „Milford“ -მა მიწასაწოვის გამოყენებით ჩაატარეს.

სამუშაოების დაწყებამდე პორტის ადმინისტრაციას გარემოზე ზემოქმედების ანგარიში არ მოუმზადებია.

პორტის წარმომადგენლის ბექა გოგიბერიძის ინფორმაციით, შედარებით მცირემასშტაბიან ფსკერდამაღრმავებელ სამუშაოებს ბათუმის ნავასადგური ყოველწლიურად, საკუთარი ძალებით ახორციელებს, რაც შესაბამისი პროექტისა და გარემოზე ზემოქმედების ანგარიშის მომზადებას არ საჭიროებს:

„მიმდინარე წელს ჩატარდა უფრო მასშტაბური სამუშაოები.  გარემოზე ზემოქმედების შეფასების შესახებ ანგარიში არ გაგვიკეთებია, თუმცა სამუშაოები შეთანხმებული იყო გარემოს ეროვნულ სააგენტოსთან.“

საქართველოს გარემოს დაცვის სამინიტროს ნებართვების განყოფილებაში განმარტეს, რომ ფსკერდამაღმავებელი სამუშაოების წარმოება გარემოზე შეფასების ანგარიშის მომზადებას არ ითვალისწინებს.

პორტის ინფორმაციით ფსკერდამაღრმავებელი სამუშაოების წარმოება ბათუმის ნავსადგურის ადმინისტრაციას მისცემს საშუალებას შეინარჩუნოს საპროექტო სიღრმეები წლების განმავლობაში, გაზარდოს ოპერაციული შესაძლებლობები  და უზრუნველყოს მომსახურების კონკურენტული უპირატესობები.

ირაკლი სუკოლნიკოვი ორ მცირეწლოვან შვილთან და მეუღლესთან ერთად, სოფელ მაჭახლისპირის დაწყებითი სკოლის შენობაში 29 მაისს შესახლდა. სკოლა, როგორც ირაკლი სუკოლნიკოვი ამბობს, არ ფუნქციონირებს. ამ წუთებში სკოლის შენობაში პოლიციაა მისული, რომელიც უნებართვოდ შესახლებულ ოჯახს შენობის დატოვებასთან დაკავშირებით ხელწერილს აწერინებს.

„პოლიცია იმყოფება აქ და გვაწერინებს ხელწერილს რომ შენობა მინიმუმ ერთ კვირაში დავტოვოთ, წინააღმდეგ შემთხვევაში, სისხლის სამართლის პასუხიმგებლობა დაგვეკისრება.

სკოლის უმოქმედო შენობაში მაისის თვეში შემოვსახლდით, რადგან ამავე სოფელში, მე და ჩემი ორი ძმა რვა მცირეწლოვან ბავშვთან ერთად, ერთ პატარა, ძველ სახლში ვცხოვრობდით. ჩემი ძმა შშმ პირია და ბავშვებსაც მარტო ზრდის.

იმ სახლშიც ძალიან ცუდი პირობები გვაქვს, ამიტომ გადავწყვიტე რომ ჩემი ოჯახით სკოლის შენობაში გადმოვსულიყავი. მიუხედავად იმისა, რომ ამ შენობის სარემონტოდ 27 ათასი ლარი იყო გამოყოფილი, იატაკი არ გამოუვლით და შენობაშიც წყალი ჩამოდის.  ერთი ოთახის იატაკი მთლიანად ჩავარდნილია და სულ გაფუჭებას, გადავწყვიტეთ რომ შემოვსულიყავით და თან შენობისთვისაც მიგვეხედა. ხის ღობე ჩვენ გავაკეთეთ რადგან ეზოში პირუტყვი შემოდიოდა“- ამბობს ირაკლი სუკოლნიკოვი.

აჭარის განათლების სამინისტროს ინფორმაციით, სოფელ მაჭახლისპირის  დაწყებითი სკოლა არ ფუნქციონირებს, თუმცა ვის საკუთრებაშია ქონება, ამასთან დაკავშირებით ინფორმაციის დაზუსტებას შეგვპირდნენ.

სოციალურად დაუცველი ოჯახი სკოლის შენობაში 29 მაისს შევიდა. პოლიციამ შენობის დატოვების შესახებ პირველად 13 ივნისს აცნობა, მეორე დაფრთხილება კი ოჯახმა დღეს მიიღო.

„ჩვენ მანამდე გავესაუბრეთ აჭარისწყლის ცენტრალური სკოლის დირექტორს და ვუთხარით რომ სკოლის შენობაში შესვლას ვაპირებდით. მან გვითხრა რომ ნებართვის მისაღებად სახელმწიფოსთვის მიგვემართა. შენობა საქართველოს ეკონომიკური სამინისტროს ბალანსზეა და მათ წერილობით მივმართეთ, თუმცა პასუხი ამ დრომდე არ მიგვიღია“-გვეუბნება ის.

ირაკლი სუკოლნიკოვი ამბობს, რომ მისი ოჯახი სოციალურად დაუცველია და საცხოვრებლის გამოყოფის თაობაზე ხელვაჩაურის გამგებელსაც მიმართა თხოვნით. „მე ამ სოფელში ვცხოვრობ და მინდა რომ საცხოვრებელი ფართიც ამ სოფელში გამომიყონ“-გვეუბნება ის.

ხელვაჩაურის გამგებელი ნადიმ ვარშანიძე „ბათუმელებთან“ საუბარში ამბობს, რომ იმ შემთხვევაში თუკი სუკოლნიკოვების ოჯახს სკოლის შენობას დაატოვებინებენ, გამგეობა მათ ალტერნატიული ფართის მოძიებაში დაეხმარება.

ბათუმისა და ლაზეთის ეპარქიის განცხადებით, დღეს, 2017 წლის 27 ივნისს, ბათუმისა და ლაზეთის მიტროპოლიტმა დიმიტრიმ, მიიღო გადაწყვეტილება, რომ გამოძიების დასრულებამდე დეკანოზ გიორგი მამალაძეს შეუჩერდეს სამღვდელო ხარისხი და საღმრთო ზიარება.

ეპარქიის განცხადებას უცვლელად გთავაზობთ:

„დეკანოზ გიორგი მამალაძის ზიარებასთან დაკავშირებით გვსურს განვაცხადოთ, რომ სჯულის კანონის თანახმად, როდესაც სასულიერო პირს წაეყენება ბრალდება, გამოძიების დასრულებამდე უჩერდება სამღვდელო მსახურების აღსრულების უფლება, ხოლო შემდგომ, დანაშაულის დამტკიცების შემთხვევაში წმინდა სინოდი ღებულობს გადაწყვეტილებას საერთოდ განიკვეთოს, თუ მას გარკვეული პეროდით შეუჩერდეს მღვდლობა.

დეკანოზ გიორგი მამალაძეს აქვს წაყენებული მძიმე ბრალდებები. იმედს გამოვთქვამთ, რომ ის თავის სიმართლეს დაამტკიცებს, რაშიც თავადვე გვარწმუნებს. საღმრთო ზიარების მიღება არის შედეგი მონანული, განწმენდილი და გამართლებული ადამიანისათვის, სხვა შემთხვევაში გაჩნდება კითხვა, ხომ არ სცნო ის ეკლესიამ უდააშაულოდ გამოძიების დასრულებამდე და ამიტომ მიენიჭა მას საღმრთო ზიარების უფლება.

რაც შეეხება ბოდბელ ეპისკოპოს იაკობის მიერ ეპიტემიის (სასჯელის) დადებას, ჩვენ ღრმად ვიყავით დარწმუნებული (ეს საპატრიარქოს წარმომადგენლებმა დაადასტურეს სატელევიზიო ეთერის საშუალებით), რომ ეს იყო პატრიარქთან შეთანხმებული და მისი ლოცვა-კურთხევით, რაც სამწუხაროდ არ აღმოჩნდა სიმართლე. ეპისკოპოსმა იაკობმა თვითნებურად მიღო ეს გადაწყვეტილება, რისი უფლებაც მას არ ჰქონდა.

დღეს, 2017 წლის 27 ივნისს, ბათუმისა და ლაზეთის ეპარქიის მღვდელმთავარს დაუკავშირდა საქართველოს საპატრიარქოს წარმომადგენელი და აუწყა მისი უწმინდესობის ლოცვა-კურთხევა, მას მიეღო გადაწყვეტილება დეკანოზ გიორგი მამალაძის ზიარებასთან დაკავშირებით. ბათუმისა და ლაზეთის მიტროპოლიტმა დიმიტრიმ მიიღო გადაწყვეტილება, როგორც დეკანოზ გიორგი მამალაძის მაკურთხეველმა მღვდელმთავარმა, რომ გამოძიების დასრულებამდე შეუჩერდეს სამღვდელო ხარისხი და საღმრთო ზიარება. დანაშაულის დამტკიცების შემთხვევაში მისი საკითხი გადაეცეს წმინდა სინოდს შემდგომი გადაწყვეტილების მისაღებად.

ბათუმისა და ლაზეთის ეპარქია ლოცვითა და სასოებით ველოდებით, რომ დეკანოზი გიორგი მამალაძე დაამტკიცებს თავის უდანაშაულობას და დაუბრუნდება სამღვდელო დასს“.

ე.წ. ციანიდის საქმეზე 10 თებერვლიდან დაკავებულია დეკანოზი გიორგი მამალაძე, მას ბრალად ედება პატრიარქის მდივან რეფერენტის, შორენა თეთრუაშვილის ციანიდის ფხვნილით მკვლელობის მომზადება.

დღეს, 27 ივნისს, ბათუმში „დემოკრატიული ჩართულობის ცენტრში“ ორგანიზაცია  „ლიბერალური ხაზისა“ და რესპუბლიკური პარტიის საერთო პროექტის ფარგლებში საჯარო განხილვა გაიმართა.

შეხვედრაზე ორდონიანი თვითმმართველობის თემა განიხილეს.  შეხვედრაზე „რესპუბლიკური პარტიის“ პოლიტიკურმა მდივანმა, თამარ კორძაიამ, პარტიის ეროვნული კომიტეტის წევრმა, დავით ბერძენიშვილმა და თვითმმართველობის საკითხებში ექსპერტმა, კოკა კიღურაძემ დამსწრე საზოგადოებას საკუთარი ხედვა გააცნეს, რის შემდეგაც შეხვედრა დისკუსიის ფორმატში გაგრძელდა.

„რესპუბლიკური პარტია“ მიიჩნევს, რომ ადგილობრივი დემოკრატიის გაძლიერებისთვის, ეფექტიანი თვითმმართველობისთვის დამკვიდრებისთვის უმნიშვნელოვანესია ქვეყანაში დამკვიდრეს ორდონიანი ადგილობრივი თვითმმართველობა, რომლის სისტემა შემდეგ პრინციპებს დაეფუძნება:

• პირველი დონის თვითმმართველობა პასუხობს საქალაქო და სასოფლო ტიპის დასახლებებში არსებულ ადგილობრივი მნიშვნელობის გამოწვევებს.

• მეორე დონის ხელისუფლება შექმნილია რეგიონის დონეზე და პასუხობს რეგიონში შემავალ პირველი დონის თვითმმართველ ერთეულთა მიერ ადგილობრივი მნიშვნელობის საკითხების გადაწყვეტისას წარმოშობილ საერთო გამოწვევებს.

პირველ დონეზე ადგილობრივი ხელისუფლება იქმნება იმ საკითხების გადასაწყვეტად, რომელიც ადგილობრივი მნიშვნელობისაა და ამავდროულად არ სცდება მუნიციპალიტეტის საზღვრებს, ხოლო რეგიონალური ხელისუფლება ორგანიზებას უწევს იმ საკითხების გადაწყვეტას, რომელიც ინტერმუნიციპალური ხასიათისაა.

პირველი დონის ადგილობრივი თვითმმართველობას წარმოადგენს მუნიციპალიტეტი, მეორე დონის ადგილობრივ თვითმმართველობას კი – რეგიონი.

ამავე თემაზე: რესპუბლიკური პარტიის ინიციატივა ორდონიანი თვითმმართველობის შემოღების შესახებ

დღეს, 27 ივნისს, „დემოკრატიული ჩართულობის ცენტრში“ ხელვაჩაურის მუნიციპალიტეტში 1937-1938 წლებში უდანაშაულო რეპრესირებულთა სამარხების მოძიების სამუშაო ჯგუფმა შეხვედრა გამართა. ჯგუფის ხელმძღვანელი ზურაბ ზაქარიაძე ამბობს, რომ აუცილებელია შეიქმნას სამთავრობო კომისია, რომელიც ხელვაჩაურსა და სალიაბურში საბჭოთა რეჟიმის მიერ დახვრეტილ პირთა სამარხების მოძიებას დაიწყებს.

„ჩვენ მოვიძიეთ მოწმეები, რომლებიც ამბობენ, რომ ხელვაჩაურში, ასევე სალიბაურში ე.წ. ყოფილი სამთავრობო აგარაკის ტერიტორიაზე ხდებოდა უდანაშაულო პირთა დახვრეტა. ჩვენ ვითხოვთ, შეიქმნას სამთავრობო კომისია და კომპეტენტური ადამიანების ჩართულობით შევისწავლოთ ეს სამარხები.

ჩვენ ხელისუფლებას მივაწვდით ჩვენ მიერ მოძიებულ ყველა ინფორმაციას. დამოუკიდებლად სამარხების მოძიების შესაძლებლობა ჩვენ არ გვაქვს, რადგან სალიბაურის სამთავრობო აგარაკის ტერიტორია დღეს არის კერძო მეპატრონის ხელში და, ბუნებრივია, იქ ნებართვის გარეშე კვლევებს  ვერ ვაწარმოებთ. თუმცა, არსებობს მოწმე, რომელიც გვეუბნება, რომ იმ ტერიტორიაზე ნამდვილად არის სამარხები“, – ამბობს ზურაბ ზაქარიაძე. მისი თქმით, სალიბაურში სამთავრობო აგარაკის ტერიტორიაზე გაუქმებული გვირაბებიცაა, სადაც მოწმეების ინფორმაციით, ხალხს აწამებდნენ.

ერთ-ერთი ასეთი მოწმე თენგიზ ქონდარიძეა, რომელიც ამბობს, რომ ყოფილ სამთავრობო აგარაკის ტერიტორიაზე ნამდვილად არსებობს სამარხები.

„მე სალიბაურში ვარ დაბადებულ-გაზრდილი და ხალხი ყოფილი სამთავრობო აგარაკის ტერიტორიაზე არ დადიოდა. იცოდნენ, რომ იქ ძველი უშიშროების სახლი იყო, „ბერიას დაჩას“ ეძახდნენ და იქ დასახვრეტად მიჰყავდათ ადამიანები.

1983 წელს იმ შენობაში დავიწყე მუშაობა დაცვის წევრად და იქ ვნახე ერთი მოხუცი კაცი, რომელიც მიყვებოდა ამის შესახებ. როგორც გავარკვიე, ის ადამიანი ერთ-ერთი შემსრულებელი იყო. მან თქვა, რომ ვინც ეს შენობა ააშენა, აქედან არავინ გასულა, ყველა იმ ტერიტორიაზეა დამარხულიო. ერთმა ჩემმა თანამშრომელმა იმ ტერიტორიაზე ადამიანის თავის ქალაც იპოვა“, – ამბობს თენგიზ ქონდარიძე.

საზოგადოებრივი ორგანიზაცია „მემორიალი“ და რეპრესირებულთა სამარხების მოძიების სამუშაო ჯგუფი ხელისუფლებას ამ სამარხების მოძიებაში დახმარებას სთხოვს.

შეხვედრის ბოლოს სამარხების შესახებ დოკუმენტური ფილმი აჩვენეს.

არასამთავრობო ორგანიზაცია „უსინათლოთა ხმა“ 3 ივლისს ბათუმში, გრიბოედოვის ქუჩაზე, ნომერ 67-ში, უსინათლოთა საზოგადოების ტერიტორიაზე აქციას გამართავს.

აქციის ორგანიზატორთა განცხადებით, აქციის მიზანი უსინათლოთა უფლებების დაცვაა.

„დღეს ქვეყანაში უსინათლო ადამიანების როგორც ქონებრივი, ასევე სხვა უფლებები დარღვეულია. ისინი, ვინც თვლიან, რომ უსინათლო ადამიანებიც ამ ქვეყნის სრულუფლებიანი მოქალაქეები არიან და მათი სიცოცხლე და ყველა სხვა უფლება უნდა იყოს დაცული ამ ქვეყანაში, შემოგვიერთდით,“ – ნათქვამია განცხადებაში, რომელიც „ფეისბუქით“ ვრცელდება.

აქცია დილის 9 საათზე დაიწყება.

ერთიანი ეროვნული გამოცდები წელს  3 ივლისს დაიწყება. ქვეყნის მასშტაბით სულ 22 საგამოცდო ცენტრი იქნება. პირველ გამოცდას აბიტურიენტები ქართულ ენასა და ლიტერატურაში ჩააბარებენ.

აჭარის მასშტაბით ორი საგამოცდო ცენტრი იმუშავებს – ერთი ბათუმში, რომელიც ბათუმის შოთა რუსთაველის სახელმწიფო უნივერსიტეტში გაიხსნება, ხოლო მეორე ხულოში – დაბა ხულოს საჯარო სკოლაში. შეფასებისა და გამოცდების ეროვნული ცენტრის დირექტორის მოადგილის,  ივა მინდაძის ინფორმაციით,  ბათუმში არსებული საგამოცდო ცენტრი  წელს  ქვეყნის მასშტაბით ერთ-ერთი ყველაზე დიდი საგამოცდო ცენტრი იქნება,  ხულოს საგამოცდო ცენტრი კი – ყველაზე პატარა.

ბათუმის  საგამოცდო  ცენტრში მაქსიმალური დატვირთვით 80 სექტორი იმუშავებს, სადაც გამოცდას 2 000 – ზე მეტი აბიტურიენტი ჩააბარებს. რაც შეეხება ხულოს საგამოცდო ცენტრს, აქ მაქსიმალური დატვირთვით 10 სექტორი იმუშავებს და გამოცდებზე 500 – მდე აბიტურიენტია დარეგისტრირებული.

ივა მინდაძის თქმით, ეროვნული გამოცდები 3 ივლისს დაიწყება და 27 ივლისამდე გაგრძელდება.

ამავე პერიოდში ჩატარდება სამაგისტრო გამოცდები, რომელზეც 14  ათასი აბიტურიენტია დარეგისტრირებული და პედაგოგთა სასერტიფიკატო გამოცდები, სადაც 28 ათასი პედაგოგი დარეგისტრირდა.

ეროვნული გამოცდები წელს  მეორედ ნაწილობრივ ელექტრონული ფორმატით  ჩატარდება.

2017 წლის 1-ელი ივლისიდან საჯარო დაწესებულებებში ხელფასის, დანამატისა და პრემიის გაცემის წესი ამ დროისთვის დამტკიცებული არ არის. ივლისიდან ამოქმედდება ახალი კანონი, რომელიც შრომის ანაზღაურების გაცემის მოქმედ წესს ფაქტობრივად აუქმებს.

„იმის გამო, რომ საჯარო მოხელეები ივლისიდან ხელფასის გარეშე არ დარჩენილიყვნენ, შევიმუშავეთ ცვლილებები „საჯარო სამსახურის შესახებ კანონში“, რაც მეორე-მესამე მოსმენით პარლამენტის პლენარულ სხდომაზე ამ კვირაში გადის. ამ ცვლილებებით, გარდამავალ დებულებებში გაწერილია, თუ რა წესით გაიცეს 2017 წლის ივლისიდან-იანვრამდე ხელფასები, დანამატები და პრემიები.“ – განაცხადა „ბათუმელებთან“ სატელეფონო საუბარში საჯარო სამსახურის ბიუროს უფროსის მოადგილემ, თეიმურაზ ჩიხრაძემ. მისივე თქმით, გარდამავალ პერიოდში [ივლისი-იანვარი] სახელფასო დანამატები და პრემიები ძირითადად იმავე პრინციპით გაიცემა, როგორც დღეს.

2017 წლის 1-ელი ივლისიდან ძალაში შედის კანონი, რომლის მიხედვითაც საჯარო სამსახურში დასაქმებულები საკლასო დანამატებს აიღებენ და არა დღეს არსებულ დანამატებსა და პრემიებს. მოხელის საკლასო დანამატის ოდენობა კი უნდა განისაზღვროს „საჯარო დაწესებულებაში შრომის ანაზღაურების შესახებ“ საქართველოს კანონით, რომელიც ასევე არ არის მიღებული.

„საჯარო დაწესებულებაში შრომის ანაზღაურების შესახებ“ კანონის პროექტი საჯარო სამსახურის ბიურომ და საქართველოს ფინანსთა სამინისტრომ ერთობლივად შეიმუშავა და თეიმურაზ ჩიხრაძის თქმით, ის უახლოეს მომავალში წარედგინება ქვეყნის მთავრობას.

„მთავრობის მიერ პროექტის მოწონების შემთხვევაში, კი ის, როგორც საკანონმდებლო ინიციატივა, წარედგინება საქართველოს პარლამენტს. თუმცა იგეგმება, რომ კანონი 2018 წლის პირველი იანვრიდან ამოქმედდეს, იმიტომ, რომ ეს მაინც მიბმულია ბიუჯეტის შესახებ კანონზე და მომავალი წლის ბიუჯეტიც შესაბამისად დაიგეგმება.“ – აცხადებს საჯარო სამსახურის ბიუროს უფროსის მოადგილე.

[highlight color=”red”]ამავე თემაზე:[/highlight]

პრემიები და დანამატები პირველი ივლისიდან აღარ გაიცემა

საჯარო მოხელის კლასების მინიჭება და საკლასო დანამატები პირველი ივლისიდან

საჯარო მოხელეებს წელიწადში ერთხელ მაინც შეაფასებენ – შეფასების შედეგები კონფიდენციალური იქნება

მთავრობამ საჯარო დაწესებულებაში ეთიკისა და ქცევის წესები განსაზღვრა

აჭარის განათლების მინისტრის 2017 წლის ქონებრივი დეკლარაციის მიხედვით, ინგა შამილიშვილის საკუთრებაში მხოლოდ ბეშუმში არსებული 80,00კვ/მეტრი აგარაკი ირიცხება.

დეკლარაციის მიხედვით, განათლების მინისტრი შვილთან და დედასთან ერთად ცხოვრობს. თუმცა დეკლარაციაში არ არის მითითებული, რა ღირებულებისაა და ვის ეკუთვნის საცხოვრებელი ბინა, სადაც ის ცხოვრობს.

მინისტრის პენსიონერი დედის, ნათელა დუმბაძის სახელზე ბათუმში, ტბელ აბუსერიძის 57 ნომერში რეგისტრირებულია 6 მშენებარე ბინა. ბინების საერთო ღირებულება, დეკლარაციის მიხედვით, 156 050 დოლარია. დეკლარაციაში არ არის მითითებული თანხის წარმომავლობა და არც მშენებარე ბინების შესყიდვის თარიღი.

მინისტრის დედის, ნათელა დუმბაძის სახელზე ასევე რეგისტრირებულია 145 კვ/მეტრი საცხოვრებელი ბინა, ბათუმში, რუსთაველის 57 ნომერში, რომელიც მას ჩუქების ხელშეკრულებით გადაეცა. ვისგან მიიღო მინისტრის დედამ ქონება საჩუქრად, დეკლარაციაში მითითებული არ არის.

ქონებრივი დეკლარაციის მიხედვით, ნათელა დუმბაძის საბანკო ანგარიშზე  „ლიბერთი ბანკში“ 180  ლარი  ფიქსირდება, ინგა შამილიშვილის საბანკო ანგარიშებზე  „ბანკი ქართუში“ ანაბარზე 8 000 დოლარი, „თი ბი სი ბანკში“ სახელფასო ანგარიშზე 2700 ლარი და ასევე სახელფასო ანგარიშზე – „ბაზის ბანკში“ – 650 ლარია.

ინგა შამილიშვილს შოთა რუსთაველის სახელმწიფო უნივერსიტეტში რექტორის მოადგილედ მუშაობის  პერიოდში (2016), შემოსავლის სახით, 26 659 ლარი აქვს მიღებული. ამავე უნივერსიტეტში, როგორც ასოცირებულ პროფესორს კი – 4 982 ლარი.

დედის სახელზე რეგისტრირებული ბინების შესახებ განათლების მინისტრმა, ინგა შამილიშვილმა, „ბათუმელებთან“ განაცხადა, რომ მშენებარე ბინები ნათელა დუმბაძეს ინვესტორმა მიწის სანაცვლოდ გადასცა. „იქ იყო მამაპაპისეული სახლი და მიწის ნაკვეთი, იმ ადგილზე ინვესტორი აშენებს კორპუსს და ეს ბინები იმ ადგილის სანაცვლოდ გადაეცა დედას. თანხები ბინის შეფასების მიხედვით წერია“, – ამბობს მინისტრი. მიწის ნაკვეთი ინვესტორს, როგორც მინისტრი ამბობს, მისმა ოჯახმა ოთხი წლის წინ გადასცა.

რაც შეეხება ნაჩუქარ ბინას რუსთაველზე, ინგა შამილიშვილი ამბობს, რომ ესეც დედის ბინაა, სადაც ამჟამად თვითონაც ცხოვრობს.

მინისტრის ქონებრივ დეკლარაციაში სხვა უძრავ-მოძრავი ქონება დაფიქსირებული არ არის.

მუნიციპალური განვითარების ფონდმა საჩხერის მუნიციპალიტეტის სოფლების – ჭორვილასა და საირხეს წყალსადენის მოსაწყობად სატენდერო წინადადებაზე მოწვევის შესახებ განცხადება გამოაქვეყნა. შესყიდვის ბიუჯეტი 10 მილიონ 874 ათას 147 ლარია.

სატენდერო წინადადების მიხედვით პროექტი ითვალისწინებს საიხისა და ჭორვილასთვის წყლის მიწოდებას მდინარე ყვირილას მარჯვნივ მდებარე რაჭის ქედიდან.

პროექტის მიხედვით, წყალმომარაგების სათავე ნაგებობებიდან, მაგისტრალური 250მმ მაღალი წნევის მილსადენით წყალი მიეწოდება საირხისა და ჭორვილას რეზერვუარებს, საიდანაც წყალს ამ სოფლებში გადაანაწილებენ.

გათვალისწინებულია შენობებისთვის როგორც განშტოებების მოწყობა ქსელიდან, ასევე მრიცხველების მონტაჟიც. შესყიდვის ხარჯებს ევროპის საინვესტიციო ბანკი გაიღებს.

საქართველომ მიიღო ევროპის საინვესტიციო ბანკისაგან (EIB) დაფინანსება ურბანული რეკონსტრუქციის და განვითარების პროექტის (GURAD) განსახორციელებლად.

შესყიდვაზე არ ვრცელდება სახელმწიფო შესყიდვის პროცედურები. სატენდერო წინადადებების წარდგენა და წინადადებების გახსნა ჩატარდება ელექტრონულად, სახელმწიფო შესყიდვების ერთიანი ელექტრონული სისტემის გამოყენებით.

ყოფილი პრემიერი და მილიარდელი ბიძინა ივანიშვილი თბილისისა და გურიის შემდეგ ყველაზე მეტ მიწის ფართობს იმერეთში, კერძოდ, სოფელ ჭორვილაში ფლობს. ბიძინა ივანიშვილი ამ სოფელში დაიბადა.